Be E Jẹ Nado Wà Azọ́n Dagbe lẹ to Gbọjẹzangbe Ya?

Jesu ko wà nususu dotana to lizọnyizọn ayidego tọn etọn whenu to Galili. Ṣigba, to whenue e dọ dọ, “Yẹn dona yì tòdaho devo lẹ mẹ ga nado lá wẹndagbe Ahọluduta Jiwheyẹwhe tọn,” e ma yin Galili kẹdẹ wẹ Jesu tindo to ayiha mẹ. Enẹwutu, e “to yẹwhehodọ to sinagọgu Jude tọn lẹ mẹ.” (Luku 4:43, 44) E sọgbe domọ, na amakikọ-whenu ko wá todin bọ hùnwhẹ de to sisẹpọ bo na yin bibasi to Jelusalẹm.

Owe Wẹndagbe tọn lẹ ma dọ nususu gando nuwiwa Jesu tọn lẹ to Jude go, yijlẹdo nuhe yé dọ gando lizọnyizọn etọn to Galili go. Mahopọnna dọ mẹsusu ma do ojlo hia to Jude, enẹ ma hẹnalọdotena Jesu nado yí zohunhun do dọyẹwheho bo wà azọ́n dagbe lẹ to fidepope he e te.

To madẹnmẹ, Jesu dedo tòdaho tangan Jude tọn mẹ, yèdọ Jelusalẹm na hùnwhẹ Juwayi owhe 31 W.M. tọn. To fie wayi-wayi nọ sù te sẹpọ Họngbo Lẹngbọ lẹ tọn, osindò daho he yè do agbà gaa de lẹdo tin to finẹ bo nọ yin yiylọdọ Bẹtsata. Mẹhe to azọ̀njẹ, nukuntọ́nnọ po sẹkunọ susu po nọ wá osindò ehe tó. Etẹwutu? Na mẹsusu yise dọ gbẹtọ lẹ sọgan yin azọ̀nhẹngbọna eyin yé biọ osindò lọ mẹ to whenue osin lọ wlu.

Todin, Gbọjẹzangbe wẹ, bọ Jesu mọ dawe de to osindò lọ tó he ko to azọ̀njẹ na owhe 38. Jesu kanse dọmọ: “Be hiẹ jlo na jẹgangan ya?” Dawe lọ gblọn dọmọ: “Mẹdaho, yẹn ma tindo mẹde he na ze mi do osindò lọ mẹ to whenue osin lọ wlu; ṣigba eyin yẹn jei mẹdevo nọ jẹnukọnna mi.”—Johanu 5:6, 7.

Jesu dọ ohó de he na ko paṣa dawe lọ po mẹdevo depope he to finẹ lẹ po dọmọ: “Fọ́n! Ze adọzan towe bo zinzọnlin.” (Johanu 5:8) Podọ nuhe e wà pẹpẹ niyẹn. Dawe lọ yin azọ̀nhẹngbọna to afọdopolọji bo ze adọzan etọn bosọ jẹ zọnlinzin ji!

Kakati nado jaya na nujiawu enẹ he jọ wutu, Ju lẹ mọ dawe lọ bo jẹ whẹgbledo e ji dọmọ: “Gbọjẹzangbe wẹ, podọ e ma sọgbe hẹ osẹ́n dọ hiẹ ni ze adọzan towe gba.” Dawe lọ gblọnna yé dọmọ: “Mẹlọ he hẹn mi jẹgangan wẹ dọna mi dọ, ‘Ze adọzan towe bo zinzọnlin.’” (Johanu 5:10, 11) Ju enẹlẹ jẹ homọdọdo mẹhe hẹnazọ̀ngbọnamẹ to Gbọjẹzangbe go ji.

“Mẹnu wẹ mẹlọ he dọna we dọ, ‘Ze adọzan towe bo zinzọnlin’?” wẹ yé jlo na yọnẹn. Naegbọn yé do kàn enẹ biọ dawe lọ? Na Jesu ko “tọ́n sọn finẹ [biọ gbẹtọgun lọ mẹ],” podọ dawe he yin azọ̀nhẹngbọna lọ ma yọ́n oyín Jesu tọn. (Johanu 5:12, 13) Ṣigba, dawe ehe na vọ́ wá mọ Jesu. To nukọn mẹ, to tẹmpli lọ mẹ, dawe lọ pé Jesu bo wá yọ́n omẹ he nkọ mẹhe hẹnazọ̀ngbọna ẹn to osindò lọ tó yin.

Dawe he yin azọ̀nhẹngbọna lọ mọ Ju he ko kanhose e gando azọ̀nhẹngbọ etọn go lẹ. E dọna yé dọ Jesu wẹ. To whenue Ju lọ lẹ sè ehe, yé yì Jesu dè. Be yé jlo na yọ́n lehe Jesu wagbọn do wà nujiawu mọnkọtọn wẹ ya? Lala. Kakatimọ, yé jlo na dín aklọ̀n do Jesu go, na nudagbe he e wà to Gbọjẹzangbe wutu. Yé tlẹ sọ jẹ homẹkẹndo e ji!