Weta 89

Azọ́ndenamẹ Lẹblanu Tọn de Yì Judé

TO OSẸ delẹ die jẹnukọn, to Hùnwhẹ Klandowiwe tọn lọ whenu to Jelusalẹm, Ju lẹ tẹnpọn nado hù Jesu. Enẹwutu e zin gbejizọnlin yì agewaji, he kunnudenu dohia dọ e ma dẹn do Ohù Galili tọn.

To agọe, e ko pànta hùwaji hlan Jelusalẹm whladopo dogọ, bo to yẹwhehodọ to aliho ji to gbetato Pelea tọn lẹ mẹ, heyin agbegbe whèzẹtẹn Otọ̀ Jọdani tọn. To oló dawe adọkunnọ lọ po Lazalọsi po tọn didó pó godo, e zindonukọn nado to nuhe e ko plọnmẹ wayi to whenuena e tin to Galili plọn devi etọn lẹ.

Di apajlẹ, e dọ dọ e na pọnte na mẹde hugan “eyin yé sìn osé de do okọ̀ go na ẹn bọ ewọ yin zize dlan ohù mẹ” hugan dọ e ni hẹn dopo to omẹ “flinflin” Jiwheyẹwhe tọn lẹ mẹ nado dahli. E sọ zinnudo nuhudo jonamẹ tọn ji ga, dọmọ: “Eyin [mẹmẹsunnu de] waylan do we whla ṣinawe to azán dopo mẹ, bosọ gọ̀ do dè we whla ṣinawe to azán dopo mẹ, dọmọ, Yẹn lẹnvọjọ; bo jona ẹn.”

To whenuena devi lẹ biọ dọ, “Déjí na yise mítọn,” Jesu gblọn dọmọ: “Eyin mìwlẹ tindo yise di okún mutaldi tọn dopo, mì do dọ hlan atin sikomoli tọn he, dọ, Yè ni dọ̀n we sún po adọ̀ po, bo yin didó do ohù mẹ; e na sè mìtọn.” Enẹwutu yèdọ yise pẹvide sọgan basi wadotana onú daho lẹ tọn.

Enẹgodo, Jesu dọ ninọmẹ nugbo gbẹzan tọn de he basi dohia na walọ he sọgbe he devizọnwatọ Jiwheyẹwhe ganhunupotọ tọn de dona tindo. “Mẹnu wẹ to mì mẹ, he tindo afanumẹ de he to aigbajlo, kavi he to lẹngbọ yìn,” wẹ Jesu dọ, “he na dọ hlan ẹn, whenuena e sọn ogle mẹ wá whégbè, dọmọ, Wá jagla nado dùnú to afọdoponẹji? Bọ e ma na kúkú dọ hlan ẹn, dọmọ, Wleawu nuhe yẹn na dù tọn, bo blàgó, bo sẹ̀n mi, kaka yẹn na do dù bo nù: enẹgodo hiẹ nasọ dù bosọ nù? Be ewọ [na] dopẹ́ na afanumẹ lọ, na e wà nuhe yè degbena ẹn wutu? Yẹn ma lẹnmọ gba. Yèdọ mọwẹ mìwlẹ ga, whenuena mì ko wà onú he yè degbena mì vọ̀, mì dọmọ, Afanumẹ madoalenọ wẹ mí: onú he yin azọ́nwiwa mítọn wẹ mí wà.” Enẹwutu, devizọnwatọ Jiwheyẹwhe tọn lẹ ma dona lẹn gbede dọ yé to dagbe wà na Jiwheyẹwhe gbọn sinsẹ̀n ẹn dali gba. Kakatimọ, yé dona nọ flin lẹblanulọkẹyi he yé tindo nado basi sinsẹ̀n hlan ẹn taidi hagbẹ dejido whédo etọn tọn to whepoponu.

E họnwun dọ ojlẹ gli de he Jesu ko dó oló ehe godo wẹ wẹnsagun de wá. E yin didohlan gbọn Malia po Malta po dali, heyin nọviyọnnu Lazalọsi tọn lẹ, he nọ nọ̀ Bẹtani Judé tọn. “Oklunọ, pọ́n, mẹhe hiẹ yiwanna yin awutuzọ̀nnọ,” wẹ yin zẹẹmẹ he wẹnsagun lọ basi.

Jesu gblọn dọmọ: “Awutuzọ̀n he ma yin hlan okú gba, ṣigba na gigo Jiwheyẹwhe tọn, na yè nido pagigona Ovi Jiwheyẹwhe tọn gbọn e dali.” To gbigbọṣi fie e tin te lọ na azán awe godo, Jesu dọna devi etọn lẹ dọmọ: “Mì gbọ mí ni sọ vọ́ gọyì biọ Judé mẹ.” Ṣigba, yé flin in dọmọ: “Mẹplọntọ, dinvie Ju lẹ to dindin nado dlan zannu do we; hiẹ sọ gọ̀ jei finẹ?”

Jesu gblọn bo kanse dọmọ: “E ma yin ojlẹ wiawe wẹ tin to okle dopo mẹ? Eyin mẹde zinzọnlin to okle, ewọ ma na dahli, na e mọ hinhọ́n aihọn he mẹ tọn wutu. Ṣigba eyin mẹde zinzọnlin to ozán mẹ, e na dahli, na hinhọ́n de ma tin to e mẹ wutu.”

Nuhe Jesu tindo to ayiha mẹ tlọlọ wẹ yindọ ‘ojlẹ okle tọn,’ kavi ojlẹ he Jiwheyẹwhe ko de na lizọnyizọn aigba ji Jesu tọn, ma ko wá vivọnu todin gba podọ kakajẹ whenuena yé na wá vivọnu, mẹdepope ma sọgan gbleawuna ẹn gba. E dona yí ojlẹ gli “okle” tọn he pò na ẹn lọ zan to gigọ́mẹ, to whenuena e yindọ to enẹgodo “ozán” na wá to whenuena kẹntọ etọn lẹ na hù i.

Jesu yidogọ dọmọ: “Họntọn mítọn Lazalọsi mlọnai damlọn; ṣigba yẹn jei na yẹn nido fọ́n ẹn sọn amlọn mẹ.”

Kunnudenu dohia dọ na yé to linlẹn dọ Lazalọsi to gbigbọjẹ to amlọn mẹ podọ dọ ehe yin ohia họnwun de dọ ewọ na jẹgangan, devi lẹ gblọn dọmọ: “Oklunọ, eyin e mlọnai damlọn wẹ e na jẹgangan.”

To whenẹnu Jesu dọ ẹ tọ́n na yé hezeheze dọmọ: “Lazalọsi kú. Yẹn sọ yin homẹhunnọ na mìtọn wutu, bọ yẹn ma tin to finẹ, na mì nido yise; ganṣo mì gbọ mí ni yì e dè.”

To yinyọnẹn dọ Jesu sọgan yin hùhù to Judé, ṣogan tindo ojlo nado nọgodona ẹn, Tọmasi na tuli devi hatọ etọn lẹ dọmọ: “Mì gbọ mí ni yì ga, na mí nido kú hẹ ẹ.” Enẹwutu to ogbẹ̀ yetọn lẹ zizedo owù mẹ, devi lọ lẹ hodo Jesu to azọ́ndenamẹ lẹblanu tọn ehe mẹ yì Judé. Luku 13:22; 17:1-10; Johanu 10:22, 31, 40-42; 11:1-16.

▪ Fie wẹ Jesu ko to yẹwhehodọ te to agọe?

▪ Nuplọnmẹ tẹlẹ wẹ Jesu vọ́ nùzindeji, podọ ninọmẹ nugbo gbẹzan tọn tẹwẹ e basi zẹẹmẹ etọn nado do nuagokun tẹ hia?

▪ Linlin tẹlẹ wẹ Jesu mọyi, podọ etẹwẹ e tindo to ayiha mẹ gbọn “okle” po “ozán” po dali?

▪ Etẹwẹ Tọmasi tindo to ayiha mẹ to whenuena e dọ, ‘Mì gbọ mí ni yì na mí nido kú hẹ ẹ’?