Nukundido Vonọtaun De!
“Mẹhe sọ tin to ogbẹ̀, bosọ yí mi sè, ma na kú gbede.”—JOHANU 11:26.
1. Livi susu he ko kú todin lẹ na yin finfọnsọnku hlan lẹdo wunmẹ tẹlẹ mẹ?
TO WHENUENA livi susu lẹ yin finfọ́n to fọnsọnku mẹ, yé ma na yin hinhẹn gọwa ogbẹ̀ do aigba gbọgbé de ji gba. (Owalọ lẹ 24:15) Yé na fọ́n do lẹdo yọnwhanpẹ ehe ko yin vivọjlado lẹ mẹ bo na mọdọ adọtẹn lẹ, avọ̀, po núdùdù susugege po ko yin awu etọn wledai na yé. Mẹnu lẹ wẹ na basi awuwledai ehe lẹpo? E họnwun dọ, gbẹtọ lẹ dona ko to gbẹnọ to aihọn yọyọ lọ mẹ whẹpo fọnsọnku aigba ji tọn nado bẹjẹeji. Ṣigba mẹnu lẹ wẹ?
2-4. Nukundido jiawu tẹwẹ tin to nukọn ja na mẹhe to gbẹnọ to ‘azán godo tọn lẹ’ mẹ?
2 Hẹndi dọdai Biblu tọn dohia dọ mí to gbẹnọ to ‘azán godo tọn’ titonu ehe tọn lẹ mẹ.a (2 Timoti 3:1) To madẹnmẹ todin, Jehovah Jiwheyẹwhe na dá do whẹho gbẹtọvi lẹ tọn mẹ bo na súnsún ylanwiwa sẹ̀ sọn aigba ji. (Psalm 37:10, 11; Howhinwhẹn lẹ 2:21, 22) To ojlẹ enẹ mẹ, etẹwẹ na jọ do mẹhe to Jiwheyẹwhe sẹ̀n po nugbonọ-yinyin po lẹ go?
3 Jehovah ma na và dodonọ lẹ sudo po mẹylankan lẹ po gba. (Psalm 145:20) E ma ko wà onú mọnkọtọn pọ́n gbede gba, podọ e ma sọ to mọ na wà gba to whenuena e na klọ aigba lọ wé sọn ylanwa lẹpo mẹ. (Yijlẹdo Gẹnẹsisi 18:22, 23, 26 go.) Na nugbo tọn, owe godo tọn Biblu tọn dọho gando “gbẹtọ susugege, he mẹdepope ma sọgan hia, sọn akọta lẹpo mẹ, sọn ohẹnnu lẹpo mẹ, sọn gbẹtọ lẹpo mẹ, podọ sọn ogbè lẹpo mẹ” go, he tọ́n sọn “nukunbibia daho” lọ mẹ. (Osọhia 7:9-14) Mọwẹ, gbẹtọgun daho de na lùn nukunbibia daho lọ tọ́n to ehe mẹ aihọn ylankan dinwhenu tọn na wá vivọnu te, podọ yé na biọ aihọn yọyọ Jiwheyẹwhe tọn mẹ. To finẹ, gbẹtọvi tonusetọ lẹ sọgan duvivi to gigọ́mẹ sọn nuwleawudaina jiawu Jiwheyẹwhe tọn lẹ nado hẹn gbẹtọvi lẹ jẹ mẹdekannu sọn ylando po okú po si. (Osọhia 22:1, 2) Gbọnmọ dali, “gbẹtọ susugege” lẹ ma nasọ tindo numimọ okú tọn gbede bà. Nukundido vonọtaun tẹ die!
4 Be mí sọgan tindo jide to todido ayidego tọn ehe mẹ ya? Gbau! Jesu Klisti lọsu dohia dọ ojlẹ de na tin to whenuena gbẹtọ lẹ na nọ nọgbẹ̀ bo ma na kú gbede. Whẹpo e do fọ́n họntọn etọn Lazalọsi sọnku, Jesu dọna Malta dọmọ: “Mẹhe sọ tin to ogbẹ̀, bosọ yí mi sè, ma na kú gbede.”—Johanu 11:26.
Hiẹ Lọsu Sọgan Nọgbẹ̀ Kakadoi
5, 6. Eyin hiẹ jlo nado nọgbẹ̀ kakadoi to Paladisi mẹ to aigba ji, etẹwẹ hiẹ dona wà?
5 Be hiẹ jlo nado nọgbẹ̀ kakadoi to Paladisi mẹ to aigba ji ya? Be hiẹ jlo nado mọ mẹyiwanna towe lẹ whladopo dogọ ya? Whelọnu lo hiẹ dona tindo oyọnẹn he pegan ojlo po lẹndai Jiwheyẹwhe tọn lẹ po. To odẹ̀ de mẹ hlan Jiwheyẹwhe, Jesu dọmọ: “Podọ ehe wẹ ogbẹ̀ madopodo, dọ yé ni yọ́n hiẹ ṣokẹdẹ Jiwheyẹwhe nugbo, podọ ewọ mẹhe hiẹ dohlan, yèdọ Jesu Klisti.”—Johanu 17:3.
6 Ojlo Jiwheyẹwhe tọn wẹ e yin dọ “yé ni whlẹn [ gbẹtọ wunmẹ lẹpo, NW ] gán, podọ na yé ni wá oyọnẹn nugbo tọn kọ̀n.” (1 Timoti 2:3, 4) Din wẹ ojlẹ lọ nado plọn lehe hiẹ, to pọmẹ po livi devo he ko to ojlo Jiwheyẹwhe tọn wà lẹ po, sọgan nọgbẹ̀ kakadoi to Paladisi mẹ to aigba ji do. Homẹ Kunnudetọ Jehovah tọn lẹ tọn na hùn nado gọalọna we nado plọn onú susu dogọ dogbọn Jiwheyẹwhe po nubiọtomẹsi etọn lẹ po dali. Naegbọn hiẹ ma do dọnsẹpọ yé to Plitẹnhọ Ahọluduta tọn de he sẹpọ we mẹ kavi kanwe dohlan adlẹsi he sẹpọ we to ehe yin sislẹ do weda he bọdego lọ ji?
[Nudọnamẹ odò tọn]
a Pọ́n Oyọnẹn He Nọ Planmẹ Sọyi Ogbẹ̀ Madopodo Mẹ, weda 98-107, he yin zinzinjẹgbonu gbọn Watchtower Bible and Tract Society of New York, Inc. dali.
[Yẹdide to weda 31]
“Gbẹtọ susugege lọ” ma na tindo numimọ okú tọn gbede bà