Linlẹn Tangan lẹ Yin Nùzindeji

WEHIATỌ dagbe nọ mọnú zẹ hodidọ blebu lẹ go, bo tlẹ nọ mọnú zẹ hukan he mẹ e sọawuhia te lọsu go. To wehihia whenu, e nọ hẹn linlẹn tangan he tin to nuhe e to hihia lọ mẹ pete do ayiha mẹ. Ehe nọ yinuwado fie e nọ zinnudo lẹ ji.

Eyin aliho ehe mayin hihodo, nuagokun ayidego tọn lẹ ma na tin to nuzedonukọnnamẹ lọ mẹ. Nude ma na họnwun hezeheze gba. To whenuena azọ́n lọ yin tadona, e sọgan sinyẹnawu nado flin nuagokun ayidego tọn depope.

Ayidonugo he jẹ nina nùzindo linlẹn tangan lẹ ji nọ saba wà nususu nado hẹn kandai de hihia sọn Biblu mẹ họnwun. Nùzindonuji mọnkọtọn sọgan hẹn hukan lẹ hihia to plọnmẹ Biblu whégbè tọn de tẹnmẹ kavi to opli agun tọn de ji họnwun dogọ. Podọ onú titengbe wẹ e yin to alọnuwe-hihia whenu, dile e nọ yin wiwà do to whedelẹnu to plidopọ mítọn lẹ ji.

Lehe E Nọ Yin Wiwà Do. To wehọmẹ, hiẹ sọgan yin azọ́ndena nado hia adà Biblu tọn de. Etẹwẹ dona yin nùzindeji? Eyin nuhe hiẹ to hihia yin zize sinai do linlẹn tangan kavi nujijọ titengbe delẹ ji, e na yin nuhe sọgbe nado de ehelẹ tọ́n.

Vlavo adà he hiẹ dona hia lọ yin ohó milomilo kavi hodidọ tlọlọ, howhinwhẹn kavi otàn, mẹplidopọ towe lẹ na mọaleyi eyin hiẹ hia ẹ ganji. (2 Tim. 3:16, 17) Nado wà ehe hiẹ dona lẹnnupọndo nuhe hiẹ jlo na hia po mẹplidopọ towe lẹ po ji.

Eyin hiẹ na hia zinjẹgbonu de daga to plọnmẹ Biblu de tẹnmẹ kavi to opli agun tọn de ji, linlẹn tangan tẹlẹ ji wẹ hiẹ dona zinnudo? Pọ́n gblọndo kanbiọ heyin zinzinjẹgbonu lẹ tọn hlan taidi linlẹn tangan lọ lẹ. Humọ zinnudo linlẹn he tindo kanṣiṣa hẹ hóvila wekun tlitlinọ he glọ nudọnamẹ lọ sọawuhia te ji.

E mayin ayinamẹ etọn na dọ hiẹ ni hẹn ẹn zun aṣa nado nọ na hodidọ he nọ yin nina to agun mẹ lẹ taidi alọnuwe-hihia de gba. Ṣigba, to whedelẹnu, alọnuwe-hihia lẹ nọ yin awuwlena na hodidọ plidopọ delẹ tọn na linlẹn dopolọ lẹ nido sọgan yin zizedonukọnnamẹ to aliho dopolọ mẹ to plidopọ lẹpo ji. Nado sọgan zinnudo linlẹn tangan lẹ ji to alọnuwe-hihia mọnkọtọn mẹ, hodọtọ lọ dona yí sọwhiwhe do keje nudọnamẹ lọ pọ́n jẹnukọn whẹ́. Nuagokun tangan tẹlẹ wẹ tin to e mẹ? E dona penugo nado yọ́n ehelẹ. Nuagokun tangan lẹ mayin linlẹn he ewọ lẹndọ e yin ojlofọndotenamẹnu poun gba. Yé yin linlẹn titengbe he ji nudọnamẹ lọ lọsu sinai do. To whedelẹnu linlẹn tangan heyin didọ tlọlọ to alọnuwe-hihia de mẹ nọ do otàn kavi hoyijlẹdohogo de hia. Ṣigba hodidọ he dùtomẹji de nọ saba yin didọ to whenuena kunnudenu he nọgodona ẹn ko yin awuwlena godo. Eyin nuagokun tangan ehelẹ ko yin yinyọnẹn, hodọtọ lọ dona dohiagona yé to alọnuwe-hihia etọn mẹ. To paa mẹ, vude poun wẹ nọ tin, vlavo ẹnẹ kavi atọ́n. Enẹgodo, e dona plọn nado hiawe to aliho de mẹ bọ mẹplidopọ lẹ sọgan yọ́n yé po awubibọ po. Ehelẹ wẹ nuagokun tangan hodidọ lọ tọn. Eyin azọ́n lọ yin wiwà po nùzindonuji he sọgbe po, e yọnbasi taun dọ linlẹn tangan ehelẹ na yin finflin. Enẹ wẹ dona yin yanwle hodọtọ lọ tọn.

Aliho voovo wẹ tin he mẹ hodọtọ de sọgan yí nùzindonuji he jẹ zan te nado gọalọna mẹplidopọ lẹ nado yọ́n nuagokun tangan lẹ. E sọgan yí zohunhun susu zan, diọdo to awuyiya mẹ, numọtolanmẹ sisosiso, kavi gòwhinwhàn he sọgbe, nado donù vude poun go.