OPLỌN 19
Biblu Yiyizan Yin Tulina
OJLO mítọn wẹ nado lilẹ́ ayidonugo mẹlẹpo tọn wá Ohó Jiwheyẹwhe tọn, Biblu ji. Owe wiwe enẹ ji wẹ owẹ̀n he mí nọ dọyẹwheho etọn sinai do, podọ mí jlo dọ gbẹtọ lẹ ni yọnẹn dọ nuhe dọ mí te, ma yin sọn mídelẹ dè gba, ṣigba sọn Jiwheyẹwhe dè. Gbẹtọ lẹ dona wleawuna jidide to Biblu mẹ.
To Lizọnyizọn Kunnudegbe Tọn Mẹ. To awuwiwlena lizọnyizọn kunnudegbe tọn whenu, nọ de wefọ dopo kavi humọ nado má hẹ mẹhe jlo nado dotoai lẹ to whepoponu. Eyin hiẹ tlẹ to tito-basi nado ze owe sinai do Biblu ji de donukọnnamẹ to kleun mẹ, e nọ saba yin alemọyinu nado hia wefọ Biblu tọn he sọgbe de. Biblu tindo huhlọn susu nado deanana omẹ taidi lẹngbọ lẹ hugan nudevo depope he mílọsu lẹ sọgan dọ. Fie e ma yọnbasi nado hia Biblu te, hiẹ sọgan de nado yihodọ sọn e mẹ. To owhe kanweko tintan whenu, vọkan owe-hihá Owe-wiwe tọn lẹ ma tin-to-aimẹ to filẹpo gba. Ṣogan, Jesu po apọsteli etọn lẹ po yihodọ pludopludo sọn Owe-wiwe mẹ. Mílọsu dona dovivẹnu nado hẹn wefọ lẹ do tamẹ bo yí ehelẹ zan dile e jẹ do to lizọnyizọn mítọn mẹ, bo yihodọ sọn yé mẹ poun to whedelẹnu.
To whenuena hiẹ penugo nado hia Biblu, hẹn e go na whétọ towe nido sọgan hodo we dile hiẹ to wehia. Eyin whétọ lọ hodo to vọkan Biblu etọn titi mẹ, e tlẹ sọgan kẹalọyi nuhe e hia to aliho dagbe hugan mẹ.
Ṣigba, hiẹ dona yọnẹn dọ lẹdogbedevomẹ-basitọ Biblu tọn delẹ ko gbọn numakiya dali diọ Ohó Jiwheyẹwhe tọn. Lẹdogbedevomẹ yetọn sọgan nọ ma sọgbe to adà lẹpo mẹ hẹ nuhe tin to ogbè dowhenu Biblu tọn lẹ mẹ. Lẹdogbedevomẹ egbezangbe tọn delẹ ko de oyín mẹdetiti Jiwheyẹwhe tọn sẹ̀, hẹn nuhe kandai ogbè dowhenu tọn dọ gando ninọmẹ oṣiọ lẹ tọn go dózin, bo ze nuhe Biblu dọ dogbọn lẹndai Jiwheyẹwhe tọn na aigba dali whlá. Nado sọgan do nuhe ko yin wiwà hia mẹde, hiẹ sọgan yí wefọ tangan delẹ jlẹdo devo lẹ go sọn Biblu voovo lẹ mẹ kavi sọn lẹdogbedevomẹ dowhenu tọn lẹ mẹ to ogbè dopolọ mẹ. Comment raisonner à partir des Écritures wleawuna nuyijlẹdonugo do hosọ susu ji, gando aliho he mẹ lẹdogbedevomẹ voovo lẹ yí hogbe tangan delẹ zan to wefọ he nọ saba yin yiyizan lẹ mẹ do. Mẹdepope he yiwanna nugbo na yọ́n pinpẹn oyọnẹn nugbo tọn enẹlẹ.
To Opli Agun Tọn lẹ Ji. Mẹlẹpo dona yin tulina nado yí Biblu yetọn lẹ zan to opli agun tọn lẹ ji. Ehe nọ wà dagbe to aliho susu mẹ. E nọ gọalọ nado hẹn ayidonugo mẹplidopọ lẹ tọn go do nuhe ji yè to hodọdo. E nọ yí mẹwhinwhàn he sọgan yin mimọ dogọ anademẹ he hodọtọ lọ to nina po onù po. Podọ e nọ zín do ayiha mẹ na jlodotọ yọyọ lẹ dọ Biblu wẹ asisa nuyise mítọn tọn lẹ nugbonugbo.
Vlavo mẹplidopọ towe lẹ to hihodo wefọ Owe-wiwe tọn he hiẹ to hihia lẹ to Biblu yetọn titi lẹ mẹ na sinai susu do tulinamẹ he hiẹ na ji. Oylọ-basinamẹ tlọlọ yin dopo to aliho he yọ́n hugan lẹ mẹ.
E pò to hiẹ, heyin hodọtọ lọ si, nado basi dide wefọ he hiẹ jlo na zinnudeji lẹ tọn gbọn bibiọ to mẹplidopọ lẹ si nado hùn yé dali. E na yọ́n hugan nado hia wefọ he na gọalọna we nado basi gbadoflinflin nuagokun tangan towe lẹ tọn. Enẹgodo, eyin whenu tin, yí wefọ vude devo he nọgodona hoyijlẹdohogo towe lẹ dogọ.
Na nugbo tọn, to paa mẹ wefọ lọ yiylọ kavi oylọ-bibasina mẹplidopọ lẹ nado hùn wefọ lọ poun ma ko pé gba. Eyin hiẹ hia wefọ de bo yì devo ji to enẹgodo whẹpo mẹplidopọ towe lẹ na tlẹ do penugo bo mọ tintan lọ, yé na gbọjọ to madẹnmẹ bo na doalọtena vivẹnudido yetọn nado hodo we to Biblu hihia mẹ. Yin ayidonugotọ. Eyin omẹ suhugan ko mọ wefọ lọ, hia ẹ.
Lẹnnupọn jẹnukọn. Ylọ wefọ towe jẹnukọn ganji whẹpo do hia ẹ. Ehe na de whenu hinhẹngú he nọ wá sọn teninọ pọ́n mẹplidopọ lẹ nado dín wefọ lọ mọ pò. Dile etlẹ yindọ nudọnamẹ he na yin dogbapọnna ma na sù sọmọ eyin hiẹ nọtepọn mẹplidopọ lẹ nado dín wefọ lọ mọ, alemọyi lọ lẹ na hẹn ẹn yin nuhọakuẹ.