Wefọ lẹ Yin Dide po Kọdetọn Dagbe Po

OWE-WIWE wẹ yin dodonu na nudọnamẹ he nọ yin nina to opli agun mítọn tọn ji lẹ. Wefọ Biblu tọn lẹ sọ yin adà tangan to nuhe mí dọ to lizọnyizọn kunnudegbe tọn mẹ. Ṣigba, to apadewhe, lehe ehelẹ nọ hẹn hodọdopọ mítọn pọnte do, sinai do lehe yé yin dide po kọdetọn dagbe po ji.

E biọ nususu hugan wefọ lọ dide bo basi oylọna mẹde nado hia ẹ hẹ we poun. To wefọ de dide whenu, dovivẹnu nado basi wadotana yanwle awe tọn: (1) Fọ́n nukundido dote, podọ (2) ze ayidonugo do whẹwhinwhẹ́n he wutu hiẹ to wefọ lọ yizan ji. Hiẹ sọgan jẹ yanwle ehelẹ kọ̀n to aliho voovo lẹ mẹ.

Kàn Kanbiọ Sè. Ehe nọ tindo kọdetọn dagbe hugan eyin mẹplidopọ lẹ ma ko yọ́n gblọndo lọ. Dovivẹnu nado kàn kanbiọ lọ sè to aliho he na hẹn gbẹtọ lẹ lẹnnupọn mẹ. Jesu wà ehe. To whenuena Falesi lẹ dọnsẹpọ ẹ to tẹmpli mẹ bo tẹ́n nukunnumọjẹnumẹ Owe-wiwe etọn tọn pọ́n to gbangba, Jesu kanse yé dọmọ: “Nawẹ mì lẹn Klisti tọn do? Ovi mẹnu tọn wẹ ewọ yin?” Yé gblọn dọmọ: “Ovi Davidi tọn.” Enẹgodo Jesu kanse dọmọ: “Be etẹwutu wẹ Davidi to gbigbọ mẹ to yiylọ ẹ, Oklunọ?” To ehe didọ godo e zindonukọn nado yihodọ sọn Psalm 110:1 mẹ. Falesi lẹ bọnudo. Ṣigba, gbẹtọgun lọ dotoaina Jesu po homẹhun po.—Mat. 22:41-46.

To lizọnyizọn kunnudegbe tọn mẹ, hiẹ sọgan yí kanbiọ homẹbibiọ tọn mọnkọtọn lẹ zan taidi dehe bọdego helẹ: “Mí omẹ awe lẹ tindo yinkọ mítọn titi lẹ. Be Jiwheyẹwhe tindo yinkọ mẹdetiti tọn de ya? Mí sọgan mọ gblọndo lọ to Psalm 83:18 mẹ.” “Be gandudu dopo na wá tin na gbẹtọvi lẹpo gbede ya? Doayi lehe ehe yin gblọndo etọn na to Daniẹli 2:44 mẹ do go.” “Be Biblu dọhodo ninọmẹ he tin to azán mítọn gbè lẹ ji na nugbo tọn ya? Yí nuhe yin didọ to 2 Timoti 3:1-5 mẹ jlẹdo ninọmẹ he hiẹ jẹakọ hẹ lẹ go.” “Be opodo na tin na yajiji po okú po gbede ya? Gblọndo Biblu tọn sọgan yin mimọ to Osọhia 21:4, 5 mẹ.”

To hodidọ de mẹ, kanbiọ lẹ yiyizan po sọwhiwhe po nado deananamẹ yì wefọ lẹ ji sọgan whàn mẹplidopọ towe lẹ nado hùn wefọ lẹ po jejejininọ po, etlẹ yin dehe yé ko jẹakọ hẹ dai lẹ. Ṣigba be yé na wàmọ ya? Enẹ sọgan sinai do vlavo eyin kanbiọ he hiẹ fọndote lẹ duahunmẹna yé nugbonugbo kavi lala ji. Eyin hosọ lọ tlẹ fọnjlodotena mẹplidopọ lẹ, yé sọgan yin ayihafẹsẹna to whenuena hiẹ to wefọ he yé ko sè whlasusu lẹ hia. Nado dapana enẹ, a dona lẹnnupọndo whẹho lọ ji ganji nado hẹn nuzedonukọnnamẹ towe yin dehe dọnmẹdogo.

Ze Nuhahun de Dote. Hiẹ sọgan ze nuhahun de dote bo deanana ayidonugo to enẹgodo hlan wefọ he tindo kanṣiṣa hẹ pọngbọ lọ ji. Ma deanana mẹplidopọ lẹ nado donukun hugan nuhe yé na mọ blo. Wefọ de nọ saba wleawuna apadewhe pọngbọ lọ tọn poun. Ṣigba, dile hiẹ to wefọ lọ hia, hiẹ sọgan biọ to mẹplidopọ lẹ si nado lẹnnupọndo anademẹ heyin nina nado pehẹ ninọmẹ lọ ji.

To aliho dopolọ mẹ, hiẹ sọgan dọ nunọwhinnusẹ́n walọyizan jijọ-di-Jiwheyẹwhe tọn de bo yí kandai Biblu tọn de zan to enẹgodo nado basi dohia nuyọnẹn he tin to hihodo e mẹ tọn. Eyin wefọ de bẹ nuagokun tangan awe (kavi vlavo humọ) hẹn gando nuhe to yinyin hodọdeji go, hodọtọ delẹ nọ biọ to mẹplidopọ lẹ si nado doayi ehelẹ go. Eyin nuhahun de taidi nuhe sinyẹn hugan na mẹplidopọ de, hiẹ sọgan hẹnmẹ lẹnnupọn gbọn yọnbasi voovo lẹ zizedonukọnnamẹ dali bo na dotẹnmẹ wefọ lọ po yọn-na-yizan etọn po nado wleawuna gblọndo lọ.

Do Biblu Hia Taidi Asisa Dejidego Lọ. Eyin hiẹ ko fọ́n ojlo dote to hosọ towe mẹ bo ko dọ pọndohlan dopo kavi humọ do adà etọn delẹ ji, hiẹ sọgan de wefọ de gbọn didọ poun dali dọmọ: “Doayi nuhe Ohó Jiwheyẹwhe tọn dọ do nuagokun ehe ji go.” Ehe nọ do nuhewutu nudọnamẹ he hiẹ jlo na hia do yin asisa dejidego hia.

Jehovah yí sunnu lẹ taidi Johanu, Luku, Paulu, po Pita po zan nado wlan delẹ to adà Biblu tọn lẹ mẹ. Ṣigba wekantọ poun wẹ yé yin; Jehovah wẹ Dowatọ lọ. Titengbe to whenuena mí to hodọna mẹhe mayin nuplọntọ Owe Wiwe lọ tọn lẹ, wefọ de dide gbọn didọ dali dọ “Pita wlan dọ” kavi “Paulu dọ dọ” sọgan nọ ma tindo huhlọn dopolọ taidi homẹbibiọ he do wefọ lọ hia taidi ohó Jiwheyẹwhe tọn. E jẹ na ayidego dọ to nujijọ delẹ mẹ, Jehovah degbe na Jẹlemia nado bẹ nulila delẹ jẹeji gbọn didọ dali dọ: “Mì sè ohó [Jehovah, NW ] tọn.” (Jẹl. 7:2; 17:20; 19:3; 22:2) Vlavo mí yí oyín Jehovah tọn zan to wefọ lẹ dide whenu kavi lala, whẹpo mí nido dotana hodọdopọ mítọn, mí dona dovivẹnu nado zinnudeji dọ ohó etọn wẹ tin to Biblu mẹ.

Ze Lẹdo Hodidọ lọ Tọn do Lẹnpọn Mẹ. To whenuena hiẹ to dide basi gando lehe hiẹ na de wefọ de do go, hiẹ dona yọ́n lẹdo hodidọ lọ tọn. To whẹho delẹ mẹ hiẹ na donù lẹdo hodidọ lọ tọn go tlọlọ poun; ṣigba, lẹdo hodidọ tọn sọgan yinuwado nuhe hiẹ dọ ji to aliho devo lẹ mẹ. Di dohia, be hiẹ na bẹ hodidọ Job budisi-Jiwheyẹwhe tọ́ tọn lẹ jẹeji to aliho dopolọ he mẹ hiẹ na bẹ hodidọ dopo to homẹmiọnnamẹtọ lalonọ etọn lẹ tọn jẹeji te wẹ ya? Luku wẹ kàn owe Owalọ lẹ tọn, ṣigba e yihodọ sọn Jakobu, Pita, Paulu, Filipi, Stefani, po angẹli lẹ po dè, gọna Gamaliẹli po Juvi devo he ma yin Klistiani lẹ po. Yinkọ mẹnu tọn wẹ hiẹ na yí do ylọ wefọ he mẹ hiẹ to hoyidọ sọn? Di apajlẹ, flin dọ e mayin psalm lẹpo wẹ yin kinkàn gbọn Davidi dali gba podọ e mayin owe Howhinwhẹn tọn lẹpo wẹ yin kinkàn gbọn Sọlọmọni dali gba. Alemọyinu wẹ e sọ yin ga nado yọ́n mẹhe wekantọ Biblu tọn lọ to hodọna po hosọ paa he to yinyin hodọdeji po.

Yí Nudọnamẹ Dodonu Tọn Zan. Na taun tọn ehe nọ tindo kọdetọn dagbe eyin hiẹ sọgan dohia dọ ninọmẹ he tin to ojlẹ kandai Biblu tọn lọ mẹ lẹ taidi dehe ji hiẹ to hodọdo lẹ. To nujijọ devo lẹ mẹ nudọnamẹ dodonu tọn yin dandannu nado sọgan mọnukunnujẹ wefọ tangan de mẹ. Di apajlẹ, eyin hiẹ jlo na yí Heblu lẹ 9:12, 24 zan to hodidọ do ofligọ ji mẹ, whẹpo do hia ẹ, hiẹ sọgan mọ ẹn yin dandannu nado basi zẹẹmẹ kleun de do abò homẹ tọn gòhọtúntún lọ tọn ji, ehe, wefọ lọ dohia nado nọtena fihe Jesu biọ to whenuena e hẹji yì olọn mẹ. Ṣigba ma yí nudọnamẹ dodonu tọn susu lẹ dogọ sọmọ bọ e na ṣinyọ́nyẹ̀ wefọ he hiẹ jlo na hia lọ ji blo.

Nado hẹn aliho he mẹ hiẹ nọ de wefọ lẹ te pọnte, gbadopọnna nuhe hodọtọ numimọnọ lẹ nọ wà. Doayi aliho voovo he yé nọ yizan lẹ go. Gbadopọnna kọdetọn dagbe aliho ehelẹ tọn. To awuwiwlena hodidọ towe lẹ mẹ, yọ́n wefọ tangan lẹ gbọnvo, bo na ayidonugo vonọtaun hlan nuhe wefọ dopodopo dona wadotana. Yí sọwhiwhe do wleawuna lehe hiẹ na de wefọ dopodopo do na e nido sọgan yin yiyizan to aliho dagbe hugan mẹ. To nukọn mẹ, hẹn nugopipe towe jideji nado bẹ wefọ he hiẹ nọ yizan lẹpo hẹn. Dile adà nuzedonukọnnamẹ towe tọn ehe pọnte dogọ, hiẹ na to ayidonugo susu ze do Ohó Jiwheyẹwhe tọn ji.