OPLỌN 36

Gbà Hosọ Do Flinflin

HODỌTỌ numimọnọ lẹ yọ́n nuhọakuẹ-yinyin hosọ de tintindo tọn. Eyin yé to awuwlena hodidọ de, hosọ lọ nọ gọalọna yé nado ze ayidonugo do adà tangan nudọnamẹ he gbloada de tọn ji bo lẹnnupọndeji sisosiso. Kọdetọn lọ wẹ yindọ kakati nado dọho to plaplaji do nuagokun susu ji, yé nọ gbà hosọ yetọn do flinflin to aliho he na hẹn ale susu wá na mẹplidopọ yetọn lẹ mẹ. To whenuena nuagokun lọ lẹ dopodopo tindo kanṣiṣa tlọlọ hẹ hosọ lọ bo gọalọ nado gbà ẹ do flinflin, e nọ gọalọna mẹplidopọ lẹ lọsu nado flin nuagokun enẹlẹ bo yọ́n nujọnu-yinyin yetọn.

Dile etlẹ yindọ e sọgan yin didọ dọ hogo he ji a jlo na dọhodo wẹ hosọ towe, hiẹ na mọ dọ jẹhẹnu hodidọ towe lẹ tọn na pọnte eyin a hẹn do ayiha mẹ dọ hosọ towe wẹ yin adà tangan he a jlo na gbà do flinflin to hogo lọ mẹ. Di apajlẹ, Ahọluduta, Biblu, po fọnsọnku po yin hogo he gbloada lẹ. Hosọ voovo lẹ sọgan yin gbigbà do flinflin do hogo ehelẹ ji. Delẹ die: “Ahọluduta lọ, Gandudu Nujọnu Tọn De,” “Ahọluduta Jiwheyẹwhe Tọn Na Diọ Aigba Zun Paladisi De,” “Biblu Yin Gbingbọ́n sọn Jiwheyẹwhe Dè,” “Biblu Yin Anademẹ Yọn-na-Yizan de na Azán Mítọn,” “Fọnsọnku Ze Todido Dote na Mẹhe to Awubla Lẹ,” podọ “Todido Fọnsọnku Tọn Nọ Gọalọna Mí Nado Gbọṣi Tenọglinọ-Yinyin Mẹ to Homẹkẹn Glọ.” Hosọ ehe lẹpo dona yin hodọdeji to aliho he gbọnvo pete mẹ.

To gbesisọmẹ hẹ hosọ tangan Biblu tọn, yẹwhehodidọ Jesu Klisti tọn to lizọnyizọn aigba ji tọn etọn whenu zinnudo hosọ lọ ji dọmọ: “Ahọludu olọn tọn sẹpọ.” (Mat. 4:17) Nawẹ hosọ lọ yin gbigbà do flinflin gbọn? Alọdlẹndonu yin bibasi hlan Ahọluduta enẹ hugan whla 110 to Owe Wẹndagbe tọn ẹnẹ lẹ mẹ. Ṣigba Jesu wà hugan hogbe lọ “ahọluduta” yiyizan pludopludo. Gbọn nuhe e plọnmẹ po azọ́njiawu he e basi lẹ po dali, Jesu hẹn ẹn họnwun dọ emi, mẹhe mọ yé te lọ, wẹ Visunnu Jiwheyẹwhe tọn, Mẹssia lọ, mẹhe Jehovah na ze Ahọluduta lọ do alọmẹ na. Jesu sọ dohia dọ aliho lọ to yinyin hunhundonuvo na mẹdevo lẹ gbọn emi dali nado tindo mimá to Ahọluduta enẹ mẹ. E dọ jẹhẹnu he dona yin didohia gbọn mẹhe na mọ lẹblanulọkẹyi enẹ yí lẹ dali. Gbọn nuplọnmẹ etọn po azọ́n huhlọnnọ he e basi lẹ po dali, e hẹn nuhe Ahọluduta Jiwheyẹwhe tọn na zẹẹmẹdo to gbẹzan gbẹtọ lẹ tọn mẹ họnwun bosọ zinnudeji dọ nugopipe emitọn nado yàn aovi lẹ jẹgbonu po gbigbọ Jiwheyẹwhe tọn po dohia dọ ‘ahọluduta Jiwheyẹwhe tọn ko zẹ̀’ hosetọ etọn lẹ go nugbonugbo. (Luku 11:20) Jesu degbena hodotọ etọn lẹ nado dekunnu dogbọn Ahọluduta enẹ dali.—Mat. 10:7; 24:14.

Hosọ He Sọgbe Yiyizan. Yè ma biọ to asi we nado gbà hosọ do flinflin dile Biblu wà do pẹpẹ gba. Etomọṣo, nujọnu wẹ e yin nado tindo hosọ he sọgbe de.

Eyin hiẹ lọsu wẹ na de hosọ lọ, lẹnnupọndo lẹndai nuzedonukọnnamẹ towe tọn ji whẹ́. Enẹgodo dile a to nuagokun he todohukanji towe na bẹhẹn lẹ de, hẹn ẹn diun dọ ehelẹ nọgodona hosọ he a ko de lọ.

Eyin hosọ lọ ko yin didena we, yí sọwhiwhe do gbadopọnna aliho he mẹ azọ́n towe na yin gbigbà do flinflin te. E sọgan biọ vivẹnudido delẹ nado mọnukunnujẹ nuhọakuẹ po alemọyi hosọ mọnkọtọn tọn po mẹ. Eyin hiẹ lọsu wẹ na de nudọnamẹ he a na yí do gbà hosọ lọ do flinflin lẹ, yí sọwhiwhe do de yé na ayidonugo nido sọgan tin to hosọ lọ ji. To alọ devo mẹ, eyin nudọnamẹ lọ ko yin awuwlena, a dona vọ́ dogbapọnna lehe e na yin yiyizan do to kọndopọmẹ hẹ hosọ lọ. A sọ dona lẹnnupọndo nuhewutu nudọnamẹ lọ yin onú titengbe na mẹplidopọ towe lẹ ji podọ nuhe dona yin yanwle towe dile a to azọ́n lọ wà. Ehe na gọalọna we nado yọ́n nuhe dona yin nùzindeji lẹ to hodidọ towe mẹ.

Lehe Hosọ lọ Na Yin Nùzindeji Do. Nado sọgan zinnudo hosọ lọ ji ganji, a dona ze dodonu lọ dai to whenue a to nudọnamẹ towe lẹ de, bo to yé tò. Eyin nudọnamẹ he nọgodona hosọ towe lẹ kẹdẹ wẹ a yizan bo hodo nunọwhinnusẹ́n he awuwiwlena todohukanji dagbe biọ, hiẹ na zinnudo hosọ lọ ji to jọwamọ-liho.

Dọvọdọ sọgan gọalọna we nado zinnudo hosọ lọ ji. Di apajlẹ, to húnhiho he nọ yin yiylọ dọ masẹ-gòhún mẹ, hànjitọ lọ nọ kehàn de, ehe nọ yin vivọji gbọn hànyítọ etọn lẹ dali. Mọwẹ e nọ yin wiwà do kakajẹ vivọnu nuhiho lọ tọn nado sọgan zinnudo hosọ ohàn lọ tọn ji. Lehe e dona yin po hosọ hodidọ towe tọn po do niyẹn. Dọvọdọ hogbe tangan lẹ tọn sọn hosọ lọ mẹ taidi hàngbe he hànyítọ lẹ nọ vọji pludopludo. Hogbe he tindo zẹẹmẹ dopolọ lẹ yiyizan kavi hosọ lọ vivọdọ to aliho devo mẹ nọ gọalọ nado de hosọ lọ tọ́n to aliho he gbọnvo mẹ. Aliho mọnkọtọn lẹ yiyizan na hẹn hosọ lọ nado yin linlẹn tangan he mẹplidopọ towe lẹ na flin.

Nunọwhinnusẹ́n ehelẹ yọn-na-yizan na hodidọ sọn oplò ji podọ hodọdopọ to lizọnyizọn kunnudegbe tọn mẹ. Hodọdopọ kleun de nọ yin finflin ganji eyin hosọ lọ yin nùzindeji. Anademẹ heyin nina to plọnmẹ Biblu de whenu na yin finflin po awubibọ po eyin hosọ de ko yin nùzindeji. Kọdetọn dagbenọ-yinyin towe taidi hodọtọ po mẹplọntọ Ohó Jiwheyẹwhe tọn po na yin hinhẹn pọnte tlala eyin a nọ dovivẹnu nado de hosọ he sọgbe lẹ bo gbà yé do flinflin.

HOSỌ AYIDEGO TỌN TO BIBLU MẸ

Nado mọnukunnujẹ lehe hosọ nọ yin yiyizan do mẹ, alọgọnamẹnu wẹ e na yin nado plọn lehe Jehovah Jiwheyẹwhe yí azọ́nyinyọnẹn do wleawuna hosọ ayidego tọn de to owe 66 Biblu tọn lẹpo mẹ do. Hosọ enẹ wẹ whẹsuna jlọjẹ Jehovah tọn nado dugán do gbẹtọvi lẹ ji podọ lẹndai owanyinọ etọn hinhẹndi gbọn Ahọluduta etọn gblamẹ.

Hosọ ehe jẹ awusọhia ji to weta bẹjẹeji Gẹnẹsisi tọn lẹ mẹ, podọ to enẹgodo, adà etọn lẹ yin gbigbà do flinflin to Biblu blebu mẹ. Ayidonugo yin dindọn wá oyín sọn olọn mẹ wá lọ ji pludopludo, hugan whla 7 000. Jlọjẹ Jehovah tọn nado dugán lẹzun nuhe họnwun to kandai nudida tọn mẹ. Lehe gandudu etọn yin avùnnukundiọsọ do po nugandomẹgo ylankan tolivivẹ tọn po yin linlin etọn na. Owanyi yiaga hugan Jehovah tọn, nuyọnẹn etọn, whẹdida dodo etọn, po huhlọn ganhunupotọ etọn po yin didohia to nuyiwa etọn hẹ nudida etọn lẹ mẹ. Apajlẹ susu do ale he tin to tonusise na Jiwheyẹwhe po nugbajẹmẹji he nọ dekọtọn sọn tolivivẹ na ẹn po mẹ hia. Awuwledainanu Jehovah tọn gbọn Jesu Klisti gblamẹ nado de ylando po okú po sẹ̀ yin zẹẹmẹ basina bo yin didohia. Zẹẹmẹ gigọ́ yin bibasi do gandudu olọn mẹ tọn de ji he na và gbigbọ ylankan po mẹylankan he gbẹ́ nado kẹalọyi jlọjẹ Jehovah tọn nado dugán do nudida etọn ji lẹpo sudo. E yin hinhẹn họnwun dọ Ahọluduta lọ na hẹn lẹndai Jehovah tọn di—yèdọ nado diọ aigba zun paladisi fie mẹhe yiwanna Jiwheyẹwhe nugbo dopo lọ bosọ nọ sẹ̀n ẹn lẹ po mẹhe yiwanna ode awetọ yetọn lẹ po na nọ nọ̀.