Mẹdevo lẹ Mọnukunnujẹemẹ

DILE a to hodọ, wà hugan nudọnamẹ lẹ zizedonukọnnamẹ poun. Dovivẹnu nado hẹn nuhe dọ a te yin nukunnumọjẹemẹ na mẹhe to todoai lẹ. Ehe sọgan gọalọna we nado dọho po kọdetọn dagbe po, vlavo a to hodọ na agun lọ kavi na mẹhe mayin Kunnudetọ lẹ.

Hodidọ heyin nukunnumọjẹemẹ ganji bẹ nususu hẹn. Delẹ to yé mẹ yin dogbapọnna to Oplọn 26tọ mẹ, “Nudọnamẹ lọ lẹ Yin Zizedonukọnnamẹ Kannukannu.” Devo lẹ yin hodọdeji to Oplọn 30tọ mẹ, “Do Ojlo Hia to Mẹdevo Mẹ.” To oplọn ehe mẹ, mí na dọhodo nuagokun vude ji yinukọn dogọ.

Hogbe po Aliho Nuzedonukọnnamẹ Tọn He Bọawu lẹ Po. Hogbe he bọawu bo ma dite gbau lẹ yin azọ́nwanu huhlọnnọ hodọdopọ tọn lẹ. Yẹwhehodidọ Osó ji Jesu tọn yin apajlẹ ayidego tọn na hodidọ he gbẹtọ lẹ sọgan mọnukunnujẹemẹ mahopọnna mẹhe yé yin kavi fie yé nọ nọ̀. Linlẹn lọ lẹ sọgan yin nuyọyọ na yé. Ṣogan, yé sọgan mọnukunnujẹ nuhe Jesu dọ mẹ na e gando whẹho he to ahunmẹduna mímẹpo go wutu: lehe mí na yin ayajẹnọ do, lehe mí na hẹn haṣinṣan mítọn hẹ mẹdevo lẹ pọnte do, lehe mí na pehẹ magbọjẹ do, podọ lehe mí na yọ́n lẹndai ogbẹ̀ tọn do. Podọ e dọ linlẹn etọn lẹ to aliho tlọlọ de mẹ. (Mat., weta 5-7) Na nugbo tọn, Biblu wleawuna apajlẹ susu gando tedidi hodidọ lẹ tọn po lehe yé yin awuwlena po do go. Yanwle tangan towe dona yin nado dọ linlẹn lẹ to aliho he họnwun bo yin nukunnumọjẹemẹ mẹ.

To whenuena a tlẹ to hodọdo nudọnamẹ he siso lẹ ji, hodidọ to aliho he bọawu mẹ sọgan gọalọ nado hẹn ẹn yin nukunnumọjẹemẹ. Nawẹ a sọgan wà ehe gbọn? Ma yí zẹẹmẹ he ma yin dandan lẹ do gbidikọna mẹplidopọ towe lẹ blo. Tò nudọnamẹ towe lẹ na yé nido sọgan de nuagokun tangan towe lẹ tọ́n. Yí sọwhiwhe do de wefọ tangan he a jlo na yizan lẹ. Kakati nado họ̀nwezun sọn wefọ de ji jẹ devo ji, hia wefọ ehelẹ bo dọhodo yé ji. Ma hẹn linlẹn dagbe lẹ dózin po ohó susu didọ po blo.

Yí nunọwhinnusẹ́n dopolọ lẹ zan to anadidena plọnmẹ Biblu whégbè tọn de whenu. Ma tẹnpọn nado basi zẹẹmẹ gigọ́ lẹpo blo. Gọalọna nuplọntọ lọ nado mọnukunnujẹ linlẹn tangan lẹ mẹ hezeheze. Dile ojlẹ to yìyì, e na plọn nususu dogọ to oplọn mẹdetiti tọn po opli agun tọn lẹ po mẹ.

Nado sọgan ze nudọnamẹ de donukọnnamẹ to aliho he bọawu mẹ, awuwle dagbe yin dandannu. Hiẹ dona mọnukunnujẹ hosọ towe mẹ hezeheze eyin a jlo na hẹn ẹn họnwun na mẹdevo lẹ. Eyin a mọnukunnujẹ nude mẹ nugbo, a na penugo nado na whẹwhinwhẹ́n he wutu e do yinmọ lẹ. Humọ, a na penugo nado dọ ẹ to hogbe towe titi lẹ mẹ.

Basi Zẹẹmẹ Hogbe He Mẹplidopọ lẹ Ma Jẹakọ hẹ lẹ Tọn. To whedelẹnu, onú lẹ hinhẹn họnwun nọ biọ dọ a ni basi zẹẹmẹ hogbe he mẹplidopọ towe lẹ ma jẹakọ hẹ lẹ tọn. Ma lẹndọ mẹplidopọ towe lẹ na yọ́n nulẹpo blo, mọdopolọ ma yí nukunpẹvi do pọ́n nuyọnẹn yetọn blo. Taidi kọdetọn Biblu pinplọn towe tọn, a sọgan zan hogbe delẹ he mẹdevo lẹ ma na jẹakọ hẹ. Eyin a ma basi zẹẹmẹ depope, mẹhe mayin Kunnudetọ Jehovah tọn lẹ ma na yọnẹn dọ “pipòtọ,” “hagbẹ afanumẹ nugbonọ, nuyọnẹntọ,” “lẹngbọ devo,” po “gbẹtọ susugege” po nọ dlẹnalọdo pipli gbẹtọ tangan delẹ tọn. (Lom. 11:5; Mat. 24:45; Joh. 10:16; Osọ. 7:9) Mọdopolọ, eyin mẹde ma jẹakọ hẹ titobasinanu Kunnudetọ Jehovah tọn lẹ tọn, e sọgan nọma mọnukunnujẹ hogbe mọnkọtọn lẹ mẹ taidi “wẹnlatọ,” “gbehosọnalitọ,” “nugopọntọ lẹdo tọn,” po “Oflin” po.

Hogbe Biblu tọn delẹ he mẹhe ma tlẹ yin Kunnudetọ lẹ nọ yizan gbọzangbọzan dona yin zẹẹmẹ basina. Di apajlẹ, mẹsusu nọ lẹndọ “Amagẹdọni” zẹẹmẹdo nuvasudo nulẹpo tọn. Yé sọgan dọ dọ “Ahọluduta Jiwheyẹwhe tọn” yin ninọmẹ de to ahun mẹdopodopo tọn mẹ kavi dọ e yin ninọmẹ de to olọn mẹ kakati nido yin gandudu de. Alọdlẹndonu hlan “alindọn” sọgan fọ́n linlẹn agọ̀ lọ dote dọ adà gbigbọnọ de to gbẹtọvi mẹ nọ luntọ́n to okú godo. Nuhe ko yin pinplọn livi susu gbẹtọ lẹ tọn wẹ yindọ, “gbigbọ wiwe” yin omẹ de, bo yin apadewhe Atọ̀n-to-dopomẹ tọn. Na mẹsusu ko gbẹkọ nujinọtedo walọ dagbe Biblu tọn lẹ go wutu, yé sọgan tindo nuhudo alọgọ tọn nado mọnukunnujẹ nuhe dọ Biblu te mẹ to whenuena e dọmọ: “Mì họ̀n na ogalilọ.”—1 Kọl. 6: 18.

Eyin gbẹtọ lẹ ma nọ hia Biblu to gbesisọmẹ, yé sọgan biọ bẹwlu mẹ eyin a dọ poun dọ, “Paulu wlan dọmọ . . . ” kavi “Luku dọmọ . . . ” Yé sọgan tindo họntọn kavi kọmẹnu he tindo yinkọ enẹlẹ. Vlavo hiẹ dona basi zẹẹmẹ kleun delẹ nado do omẹ lọ hia taidi Klistiani apọsteli de kavi Biblu kàntọ de.

To paa mẹ, gbẹtọ lẹ to egbehe dona yin alọgọna nado mọnukunnujẹ wefọ he bẹ tedidi nujijlẹ tọn kavi aṣa hohowhenu tọn lẹ hẹn mẹ. Di apajlẹ, hodidọ lọ dọ tedidi aki Noa tọn yin awagbà 300 bọ gbigblo etọn yin awagbà 50, podọ jiyiyi etọn yin awagbà 30 sọgan dáblu do yé. (Gẹn. 6:15) Ṣigba eyin a yí tedidi nujijlẹ lọ tọn jlẹdo tedidi fide jẹ fidevo tọn go to lẹdo lọ mẹ, mẹplidopọ towe lẹ na mọnukunnujẹ lehe aki lọ klo sọ mẹ to afọdopolọji.

Basi Zẹẹmẹ He Jẹ Lẹ. Nado hẹn whẹho de họnwun na mẹplidopọ towe lẹ, e sọgan biọ nususu hugan zẹẹmẹ he sọgbe hogbe tangan de tọn poun. To Jelusalẹm to azán Ẹzla tọn lẹ gbè, Osẹ́n lọ nọ yin hihia bo nọ yin zẹẹmẹ basina. Nado gọalọna gbẹtọ lẹ nado mọnukunnujẹemẹ ganji, Levinu lẹ nọ basi zẹẹmẹ po yọn-na-yizan Osẹ́n lọ tọn po sọgbe hẹ ninọmẹ he gbẹtọ lẹ to pipehẹ to ojlẹ enẹ mẹ. (Nẹh. 8:8, 12) Mọdopolọ, yì agbọji bo basi zẹẹmẹ po yọn-na-yizan wefọ he a hia lẹ tọn po.

To okú po fọnsọnku etọn po godo, Jesu basi zẹẹmẹ na devi etọn lẹ dọ nuhe ṣẹṣẹ jọ lọ yin hẹndi Owe-wiwe tọn. E sọ zinnudo azọngban yetọn ji taidi kunnudetọ onú enẹlẹ tọn. (Luku 24:44-48) Eyin a gọalọna gbẹtọ lẹ nado mọ lehe nuhe ko yin pinplọn yé dona yinuwado gbẹzan yetọn lẹ ji do, yé na mọnukunnujẹ nuhe e zẹẹmẹdo mẹ po awubibọ po.

Lehe E Gando Ahun Go Do. Na nugbo tọn, eyin zẹẹmẹ towe lẹ tlẹ họnwun, onú devo lẹ sọgan dohia vlavo eyin hosetọ towe mọnukunnujẹ nuhe dọ a te mẹ kavi lala. Eyin ahun mẹde tọn ma hùndonuvo, enẹ sọgan glọnalina ẹn nado mọnukunnujẹ nuhe yin didọ mẹ. (Mat. 13:13-15) Nululu wẹ whẹho gbigbọmẹ tọn lẹ yin na mẹhe magbe nado pọ́n onú lẹ hlan sọn pọndohlan gbẹtọvi tọn mẹ. (1 Kọl. 2:14) To whenuena mẹde do gbigbọ mọnkọtọn hia, e sọgan yin nuyọnẹnnu nado dotana hodọdopọ lọ to ojlẹ enẹ mẹ.

Ṣigba, to whẹho delẹ mẹ, ahun ma nọ hùndonuvo na ninọmẹ awusinyẹn gbẹ̀mẹ tọn lẹ wutu. Nalete, ahun omẹ mọnkọtọn tọn sọgan hùndonuvo eyin dotẹnmẹ lọ hundote na ẹn nado sè nugbo Biblu tọn na ojlẹ delẹ. To whenuena Jesu dọna apọsteli etọn lẹ dọ emi na yin yasana bo yin hùhù, yé ma mọnukunnujẹ nuhe dọ e te mẹ gba. Etẹwutu? Na enẹ ma yin nuhe yé to nukundo kavi nuhe yé jlo wutu! (Luku 18:31-34) Ṣigba, to nukọnmẹ, 11 to apọsteli enẹlẹ mẹ mọnukunnujẹ nuhe dọ e te mẹ, bo do enẹ hia gbọn nuyiwa to kọndopọmẹ hẹ nuhe Jesu ko plọn yé lẹ dali.

Nuyiwadomẹji Apajlẹ Dagbe Tọn. E mayin hogbe mítọn lẹ kẹdẹ wẹ nọ gọalọna gbẹtọ lẹ nado mọnukunnujẹnumẹ, ṣigba nuyiwa mítọn lẹ ga. Nuhe mẹsusu flin to ojlẹ tintan he yé dla Plitẹnhọ Ahọluduta tọn mítọn pọ́n wẹ owanyi he sọawuhia, e mayin nuhe yin didọ lẹ gba. Mọdopolọ, ayajẹ he mí nọ dohia ko gọalọna whétọ susu nado kẹalọyi nugbo Biblu tọn. Mẹdelẹ ko yin whinwhàn nado wá tadona lọ kọ̀n dọ Kunnudetọ lẹ wẹ tindo sinsẹ̀n nugbo lọ na yé mọ owanyi he omẹ Jehovah tọn lẹ tindo na yedelẹ po mẹtọnhopọn he nọ yin didohia mẹhe to yaji lẹ po wutu. Enẹwutu, dile a to vivẹnudo nado gọalọna mẹdevo lẹ nado mọnukunnujẹ nugbo Biblu tọn mẹ, na ayidonugo hlan lehe a basi zẹẹmẹ etọn do po apajlẹ he a to zizedai po.