Ganmẹ Ji Ninọ, Má Adà lọ lẹ Ganji

DILE etlẹ yindọ ayidonugo tangan dona yin nina jẹhẹnu mẹpinplọn towe tọn, hihodo ganmẹ heyin nina hodidọ towe lẹ jẹna ayidonugo ga. Opli mítọn lẹ nọ yin titodohukanji nado bẹjẹeji bo wá vivọnu to ganmẹ tangan delẹ mẹ. E biọ gbekọndopọ mẹhe tindo azọ́n to tito-to-whinnu lọ mẹ lẹpo tọn nado jẹ ehe kọ̀n.

To ojlẹ Biblu tọn lẹ mẹ, nukun he gbẹtọ lẹ nọ yí do pọ́n ogbẹ̀ gbọnvo na nuhe e yin to ofi susu to egbehe. Ganmẹ nọ yin didohia po hogbe he sọgbe lẹ po taidi “afọnnu,” “whèmẹ,” podọ “whèjai.” (Gẹn. 24:11; 43:16; 1 Ahọ. 18:26) Ganmẹ tangan nuwiwa egbesọegbesọ tọn lẹ ma nọ duahunmẹna yé sọmọ gba. To adà aihọn tọn delẹ mẹ to egbehe, nukun mọnkọtọn wẹ yé do nọ pọ́n ganmẹ ga.

Ṣigba, dile etlẹ yindọ aṣa lẹdo tọn kavi nujlomẹ mẹdetiti tọn sọgan gọn ma hẹn gbẹtọ lẹ kiya na ganmẹ sọmọ, mí sọgan mọaleyi eyin mí plọn nado na ẹn ayidonugo he jẹ. To whenuena mẹsusu yin azọ́ndena to tito-to-whinnu de mẹ, ganmẹ heyin nina adà dopodopo dona yin zizedo lẹnpọn mẹ. Nunọwhinnusẹ́n lọ heyin “mì gbọ onú lẹpo ni yin wiwà dole e jẹ do, podọ to tẹnmẹtẹnmẹ” sọgan yin yiyizan na ganmẹ azọ́ndenamẹ mítọn lẹ tọn to opli ji.—1 Kọl. 14:40.

Ganmẹ Ji Ninọ. Awuwle wẹ họ̀nhungàn lọ. To paa mẹ, awugbopo nado wleawu ganji wẹ nọ hẹn hodọtọ delẹ dù ganmẹ. Yé sọgan nọ dejido yedelẹ go zẹjlẹgo. Kavi yé sọgan nọ sẹ̀ awuwle lọ do nukọn kakajẹ nukunwhiwhe godo tọn lẹ mẹ. Ganmẹ ji ninọ sinai do pinpẹn-nutọn tintindo na azọ́ndenamẹ towe po ojlo lọ nado wleawu ganji po ji.

Be wehihia wẹ yin didena we ya? Jẹnukọn whẹ́, gbadopọnna Oplọn 4 jẹ 7, ehe bẹ dẹ́didi, otán mìmì, nùzindo linlẹn ji, podọ nùzindo linlẹn tangan lẹ ji hẹn. Enẹgodo, yí ayinamẹ enẹ zan dile a to wehihia heyin didena we hia daga. Pọ́n ganmẹ na dewe. Be hiẹ dona hiawe po awuyiya dogọ po nado sọgan dotana ẹn to ganmẹ heyin didena we lọ gblamẹ wẹ ya? Yawu dogọ to adà he mayin nujọnu sọmọ lẹ hihia whenu, ṣigba nọ mìtán bosọ nọ wà dẹẹdẹ nado zinnudo linlẹn titengbe lẹ ji. Basi zepọn pludopludo. Dile dẹ́didi towe lẹzun nuhe pọnte, e na bọawu na we nado nọ ganmẹ ji.

Be kandai hodidọ tọn wẹ a jlo na yizan ya? E mayin dandan nado basi kandai susu—taidi alọnuwe hihia de—nado nọ ganmẹ ji gba. Hiẹ na ko plọn aliho he pọnte hugan de to whenuena a to azọ́nwa do Oplọn 25tọ ji. Hẹn nuagokun atọ́n ehelẹ do ayiha mẹ: (1) Wleawuna nujidọhodo dagbe, ṣigba ni ma sù hugan blo. (2) Hẹn linlẹn tangan lẹ do ayiha mẹ hezeheze, ṣigba ma hẹn hodidọ blebu lẹ do tamẹ blo. (3) Kàn sọha nukunwhiwhe he a na yizan na adà hodidọ towe tọn dopodopo kavi whenu he dona ko juwayi to whenuena hiẹ na jẹ nuagokun delẹ ji do todohukanji towe mẹ. (4) To awuwle whenu, lẹnnupọndo zẹẹmẹ flinflin he sọgan yin jijodo lẹ ji eyin a doayi e go dọ ganmẹ to yìyì. (5) Plọn hodidọ towe.

Zepọn yin nujọnu. Dile hiẹ to zepọn basi, pọ́n ganmẹ adà hodidọ lọ dopodopo tọn. Basi zepọn lọ pludopludo kakajẹ whenuena hodidọ towe sọgbe hẹ ganmẹ heyin nina we. Ma tẹnpọn nado yí nudọnamẹ susu hugan zan blo. Pò whenu lankan delẹ dai, na hodidọ towe nina to mẹplidopọ lẹ nukọn sọgan dẹn vude hugan whenue hiẹ to zepọn basi to whégbè.

Adà lọ lẹ Mimá. Ganmẹ ji ninọ tindo kanṣiṣa pẹkipẹki hẹ adà hodidọ de tọn lẹ mimá ganji. Suhugan ganmẹ lọ tọn dona yin yiyizan nado gbà nuagokun hodidọ lọ tọn lẹ do flinflin. Enẹlẹ wẹ yin nuplọnmẹ tangan hodidọ lọ tọn. Homẹbibiọ lọ dona dite pé nado jẹ yanwle atọ̀n heyin hodọdeji to Oplọn 38tọ mẹ lẹ kọ̀n. Hodidọ lọ ma dona dite sọmọ bọ whenu ma na tin nado basi tadona kọdetọn dagbe tọn de gba, to kọndopọmẹ hẹ Oplọn 39tọ.

Vivẹnudido towe nado nọ ganmẹ ji na dekọtọn do hodidọ he pọnte de mẹ bo na do sisi towe hia na mẹdevo he tindo azọ́n to tito-to-whinnu lọ mẹ lẹ podọ na agun lọ blebu ga.