Weta Ṣinatọ̀n
‘Ahidídí hẹ Huhlọn Gbigbọ Ylankan lẹ Tọn’
1. Naegbọn mí dona tindo ojlo taun to lehe gbigbọ ylankan lẹ nọ yinuwado mẹ?
MẸSUSU wẹ nọ yí nukunpẹvi do pọ́n linlẹn lọ dọ gbigbọ ylankan lẹ tin. Ṣigba e ma yin whẹho he yè na yí nukunpẹvi do pọ́n de gba. Eyin gbẹtọ lẹ kẹalọyi kavi lala, gbigbọ ylankan lẹ tin, podọ yé nọ tẹnpọn nado gbidikọna mẹlẹpo. Devizọnwatọ Jehovah tọn lẹ ma gán sọn e mẹ gba. Na nugbo tọn, yewlẹ wẹ tlẹ yin yanwle tintan. Apọsteli Paulu na avase mí dọmọ: “E ma yin agbasalan po ohun po wẹ míwlẹ to ahidi hẹ gba, ṣigba hẹ ogán [mayinukundomọ] lẹ, hẹ huhlọn lẹ, hẹ nukọntọ zinvlu aihọn he tọn lẹ, hẹ nútẹgbẹ̀ gbigbọnọ lẹ to otẹn he tin to olọn lẹ mẹ.” (Efesunu lẹ 6:12) Kọgbidinamẹ he huhlọn gbigbọ ylankan lẹ tọn to hinhẹnwa ko sinyẹn hugan gbede pọ́n, na Satani ko yin yinyan sọn olọn mẹ bo tin to homẹgble sinsinyẹn ji, na e yọnẹn dọ whenu gli de wẹ emi tindo.—Osọhia 12:12.
2. Nawẹ e yọnbasi na mí nado duto avùnhiho hẹ huhlọn gbigbọnọ he hú jọwamọ tọn lẹ ji gbọn?
2 Be e yọnbasi nado duto avùnhiho hẹ huhlọn gbigbọnọ he hú jọwamọ tọn lẹ ji ya? Mọwẹ, ṣigba gbọn ginganjẹ Jehovah go mlẹnmlẹn kẹdẹ dali. Mí dona dotoai na ẹn bosọ setonuna Ohó etọn. Gbọn mọwiwa dali, mí sọgan dapana suhugan hẹngble agbasalan, walọyizan, po numọtolanmẹ tọn po he mẹhe tin to anademẹ Satani tọn glọ lẹ nọ jiya etọn.—Jakobu 4:7.
Ogán Aihọn Tọn lẹ to Otẹn Olọn Tọn lẹ Mẹ
3. Mẹnu lẹ wẹ Satani diọnukunsọ sinsinyẹn, podọ gbọnna?
3 Jehovah basi zẹẹmẹ ninọmẹ aihọn tọn na mí to aliho he họnwun mẹ dile ewọ mọ ẹn pẹpẹ sọn olọn lẹ mẹ do. E do numimọ de hia apọsteli Johanu, to ehe mẹ Satani yin didehia taidi “dlagọni vẹẹ daho de” te. E tin to aṣeji nado tlẹ́n Ahọluduta Jiwheyẹwhe tọn gbọn Mẹssia dali dù, eyin e yọnbasi, to tlolo he eyin zizedai to 1914 to olọn mẹ. Na e gboawupo nado wàmọ wutu, Satani fọ́n nukundiọsọmẹ sinsinyẹn de dote sọta nukunmọnu Ahọluduta lọ tọn he to aigba ji lẹ. (Osọhia 12:3, 4, 13, 17) Nawẹ Satani na funawhàn ehe gbọn? Gbọn gbẹtọ heyin nukunmọnu etọn lẹ dali.
4. Mẹnu wẹ yin asisa huhlọn gandudu gbẹtọvi lẹ tọn, podọ nawẹ mí yọ́n enẹ gbọn?
4 Bọdego, gbekanlin de he tindo ota ṣinawe azò ao yin didohia Johanu, yèdọ gbekanlin de he tindo huhlọn do “hẹnnu lẹpo ji, to ogbè po akọta lẹpo po ji.” Gbekanlin enẹ nọtena tito tonudidọ tọn lẹpo lẹdo aihọn pé. Johanu yin didọna dọ “dlagọni lọ [Satani Lẹgba] sọ na huhlọn etọn [gbekanlin lọ], po aisinnu etọn po po aṣẹ daho po.” (Osọhia 13:1, 2, 7) Mọwẹ, Satani wẹ yin asisa huhlọn po aṣẹpipa gandudu gbẹtọ lẹ tọn po. Enẹwutu, dile apọsteli Paulu wlan do, mẹhe yin ‘ogán aihọn tọn lẹ taun’ wẹ ‘huhlọn ylankan gbigbọnọ lẹ to otẹn olọn tọn lẹ mẹ,’ he nọ deanana gandudu gbẹtọ tọn lẹ. Mẹhe jlo nado sẹ̀n Jehovah lẹpo dona mọnukunnujẹ nuhe enẹ zẹẹmẹdo mẹ to gigọ́mẹ.—Luku 4:5, 6.
5. Etẹwẹ ogán tonudidọ tọn lẹ to yinyin bibẹpli na?
5 Dile etlẹ yindọ ogán tonudọtọ susu lẹ wẹ yigbe dọ yé yin sinsẹ̀nnọ, depope to akọta lọ lẹ mẹ ma kẹalọyi gandudu Jehovah tọn kavi Ahọlu dide etọn, yèdọ Jesu Klisti tọn gba. Yemẹpo wẹ nọ hoavùn sinsinyẹn nado gbọṣi otẹn aṣẹpipa tọn yetọn mẹ. To egbehe, dile kandai Osọhia tọn dohia do, “yé lẹ wẹ gbigbọ aovi lẹ” he to ogán aihọn tọn lẹ bẹpli na “awhàn azán daho Jiwheyẹwhe Ganhunupo tọn lọ” to Amagẹdọni.—Osọhia 16:13, 14, 16; 19:17-19.
6. Naegbọn e do biọ aṣejininọ ma nado yin kiklọ nado nọgodona titonu Satani tọn?
6 To egbesọegbesọ wẹ avùnhiho he kinklan tonudidọ tọn, lẹdo tọn, akuẹzinzan tọn nọ hẹn wá lẹ, gọna sinsẹ̀n tọn he nọ hẹn gbakija whẹndo tọn wá nọ yinuwa do ogbẹ̀ gbẹtọ lẹ tọn ji. To avùnhiho lọ lẹ mẹ, e gbayipe na gbẹtọ lẹ nado nọgodona avùnhiho akọta tọn, akọ̀ tọn, pipli ogbè tọn, kavi lẹdo he mẹ yé te tọn lẹ gbọn hogbe kavi nuyiwa yetọn lẹ dali. Eyin gbẹtọ lẹ ma tlẹ hoavùn tlọlọ, yé nọ saba nọgodona adà dopo. Ṣigba mahopọnna mẹhe kavi ogbẹ́ he yé nọgodona, mẹnu wẹ yé to godonọna na taun tọn? Biblu dọ hezeheze dọmọ: “Aihọn lẹpo [wẹ] mlọnai to omẹ ylankan lọ mẹ.” (1 Johanu 5:19) To whelọnu lo, etẹwẹ na gọalọna mẹde ma nado yin kiklọ dopọ hẹ pipòtọ gbẹtọvi lẹ tọn? Ehe yọnbasi eyin mí nọgodona Ahọluduta Jiwheyẹwhe tọn to gigọ́mẹ bosọ nọ kada mlẹnmlẹn sọn avùnhiho aihọn tọn lẹ mẹ.—Johanu 17:15, 16.
Omọ̀ Wintinwintin Mẹylankan lọ Tọn Lẹ
7. Nawẹ ayiha wintinwintin Satani tọn yin didohia to aliho he mẹ e nọ yí sinsẹ̀n lalo zan te mẹ gbọn?
7 To ojlẹ whenuho tọn lẹpo mẹ, Satani ko yí hogbe mẹhẹngble po homẹkẹndomẹ po tọn zan nado dọ̀n gbẹtọ lẹ sọn sinsẹ̀n-bibasi nugbo kọ̀n. E ko sọ yí aliho oklọ tọn susu zan—nuyiwa oklọ tọn po omọ̀ wintinwintin lẹ po. E ko yí ayiha wintinwintin zan nado hẹn suhugan gbẹtọvi lẹ tọn do zinvlu mẹ gbọn sinsẹ̀n lalo dali, bo nọ hẹn yé nado lẹndọ Jiwheyẹwhe sẹ̀n wẹ yé te. Na yé ma tindo nuyọnẹn he pegan Jiwheyẹwhe tọn po owanyi na nugbo lọ po wutu, yé sọgan yin dindọ̀n gbọn nujiawu po hùnwhẹ sinsẹ̀n tọn he nọ fọnjlodotenamẹ lẹ po dali kavi sọgan yin nuyiwadeji gbọn azọ́n huhlọnnọ lẹ dali. (2 Tẹsalonikanu lẹ 2:9, 10) Ṣigba mí ko mọ avase yí dọ etlẹ yin sọn mẹhe to sinsẹ̀n nugbo basi lẹ mẹ, “mẹdelẹ na jai . . . bo nasọ na otó gbigbọ oklọ, po oplọn aovi tọn po.” (1 Timoti 4:1) Nawẹ enẹ sọgan jọ gbọn?
8. Nawẹ Satani sọgan klọ mí biọ sinsẹ̀n lalo mẹ gbọn eyin mí tlẹ yin devizọnwatọ Jehovah tọn?
8 Po ayiha wintinwintin po, Lẹgba nọ yí madogán mítọn zan nado duto mí ji. Be obu gbẹtọ tọn gbẹsọ nọ di mí wẹ ya? Eyin mọwẹ, e na vẹawu na mí nado duto kọgbidinamẹnu lẹ ji sọn hẹnnumẹ lẹ kavi kọmẹnu lẹ dè eyin yé biọ dọ mí ni tindo mahẹ to aṣa sinsẹ̀n lalo tọn lẹ mẹ. Be mí nọ yigo wẹ? Eyin mọwẹ, mí sọgan nọ gblehomẹ eyin mí mọ ayinamẹ yí kavi eyin mẹdevo lẹ ma kẹalọyi linlẹn mítọn. (Howhinwhẹn lẹ 15:10; 29:25; 1 Timoti 6:3, 4) Kakati nado jla pọndohlan mítọn do bo hẹn ẹn sọgbe hẹ apajlẹ Klisti tọn, mí sọgan lẹhlan mẹhe nọ ‘hẹn otó mítọn tli’ gbọn didọ dali dọ Biblu hihia po gbẹzan dagbe de zinzan po kẹdẹ ko pé lẹ. (2 Timoti 4:3) Vlavo mí kọnawudopọ hẹ pipli sinsẹ̀n tọn devo kavi tẹdo linlẹn sinsẹ̀n mítọn tọn go ma yin nujọnu na Satani gba, ṣigba yanwle etọn poun wẹ yindọ mí ni ma sẹ̀n Jehovah to aliho he Jiwheyẹwhe dehia gbọn Ohó etọn po titobasinanu etọn po dali blo.
9. Nawẹ Satani nọ gbọn ayiha wintinwintin dali yí zanhẹmẹ zan nado jẹ yanwle etọn lẹ kọ̀n gbọn?
9 Satani sọ nọ klọ gbẹtọ lẹ nado hẹn pekọ wá na nujlomẹ paa yetọn lẹ to aliho agọ̀ mẹ. E ko basi ehe gando ojlo kọndopọ zanhẹmẹ tọn go. Na yé gbẹ́ walọ dagbe Biblu tọn dai wutu, mẹsusu to aihọn mẹ nọ mọdọ zanhẹmẹ to mẹhe ma ko wlealọ lẹ ṣẹnṣẹn sọgbe kavi dọ eyin aliho de nado dohia dọ yé ko whẹ́n. Podọ etẹwẹ dogbọn alọwlemẹ lẹ dali? Susu to yé mẹ nọ deayọ. Podọ eyin yé tlẹ yin nugbonọ to alọwle yetọn mẹ, suhugan yetọn nọ dín gbẹdai kavi kinklan na yé nido sọgan dà mẹdevo. Yanwle he wutu Satani nọ yí oklọ zan wẹ nado yinuwado gbẹtọ lẹ ji nado jó yéde na gbẹdudu todin. E nọ klọ gbẹtọ lẹ ma nado doayi nugandomẹgo whenu dindẹn tọn lẹ go, e mayin do yedetiti kavi do mẹdevo lẹ kẹdẹ ji gba, ṣigba na titengbe tọn do haṣinṣan yetọn hẹ Jehovah po Ovi etọn po ji.—1 Kọlintinu lẹ 6:9, 10; Galatianu lẹ 6:7, 8.
10. Etẹlẹ wẹ Satani nọ yizan nado hẹn mí yí nukunpẹvi do pọ́n fẹnnuwiwa po danuwiwa po?
10 Ojlo jọwamọ tọn devo wẹ ayidedai. Eyin yè basi i to aliho dagbe mẹ, e sọgan jlọmẹdote to agbasa-liho, to apọ̀nmẹ, podọ to numọtolanmẹ-liho. Ṣigba nawẹ mí na yinuwa do eyin Satani gbọn ayiha wintinwintin dali yí ojlẹ ayidedai tọn lẹ zan nado tẹnpọn bo fẹayihasẹ na mí sọn ojlo Jiwheyẹwhe tọn lẹ ji? Di apajlẹ, mí yọnẹn dọ Jehovah gbẹwanna fẹnnuwiwa po danuwiwa po. Eyin sinimoto lẹ, tito-to-whinnu televiziọn tọn lẹ, kavi aihundida devo lẹ do onú mọnkọtọn lẹ hia, be mí nọ sinai do e kọ̀n bo nọ zindonukọn to nupinpọn lọ mẹ wẹ ya? Hẹn do ayiha mẹ ga dọ, Satani na mọdọ onú mọnkọtọn lẹ ni gblezọn dogọ dile ojlẹ he mẹ e na yin zizedo odò mapote mẹ to sisẹpọ, to whenuena e yindọ “mẹylankan lẹ, po mẹklọtọ lẹ po na to yinylan yì nukọn, yé na to mẹklọ, yè nasọ to yé klọ.” (2 Timoti 3:13; Osọhia 20:1-3) Enẹwutu mí dona họ́ míde whepoponu gando oklọ Satani tọn lẹ go.—Gẹnẹsisi 6:13; Psalm 11:5; Lomunu lẹ 1:24-32.
11. Aliho tẹlẹ mẹ wẹ mẹde he tlẹ yọ́n owù he tin to afinyọnnuwiwa mẹ sọgan yin wiwle do omọ̀ mẹ te eyin e ma tin to nukle?
11 Mí sọ yọnẹn dọ mẹhe nọ tindo mahẹ to wunmẹ afinyọnnuwiwa tọn depope mẹ lẹ—dọṣẹdidọ, azé, kavi tintẹnpọn nado dọho hẹ oṣiọ lẹ—yin osùnú de hlan Jehovah. (Deutelonomi 18:10-12) Eyin mí hẹn enẹ do ayiha mẹ, mí ma na jlo nado yì mẹhe nọ dọho hẹ gbigbọ mayọnmọ lẹ dè, podọ e họnwun dọ mí ma na kẹalọyi yé do owhé mítọn gbè nado yí nuyizan aovi tọn yetọn lẹ zan. Ṣigba be mí na dotoai hlan yé eyin yé sọawuhia to televiziọn mítọn mẹ kavi to Internet ji wẹ ya? Dile etlẹ yindọ mí ma na kẹalọyi nukunpedomẹgo sọn afinyọnnọ de si, be mí sọgan sìn okàn de do alọkọ kavi alinkàn na oviyẹyẹ mítọn, bo tindo linlẹn lọ dọ e sọgan họ́ ovivu lọ sọn owù mẹ to aliho de mẹ ya? To yinyọnẹn mẹ dọ Biblu gblewhẹdo bogbèsisa do mẹdevo lẹ, be mí na na dotẹnmẹ ayiha mítọn nado yin anadena gbọn wedehẹ gbigbọtọ de dali wẹ ya?—Galatianu lẹ 5:19-21.
12. (a) Nawẹ húnhiho lẹ nọ yin yiyizan nado hẹn mí lẹnnupọndo linlẹn he mí yọnẹn dọ e ma sọgbe lẹ ji gbọn? (b) Nawẹ avọ̀dido, dapipa, kavi lehe mẹde nọ dọho gbọn sọgan dohia dọ e kẹalọyi mẹhe Jehovah ma kẹalọyi gbẹzan yetọn lẹ gbọn? (c) Etẹwẹ yin bibiọ to mí si eyin mí ma na jai jẹ omọ̀ wintinwintin Satani tọn lẹ mẹ?
12 Biblu dọ dọ galilọ po mawé wunmẹ lẹpo po (gọna ojlo mawé lẹ) ma tlẹ dona yin nùdego to ṣẹnṣẹn mítọn. (Efesunu lẹ 5:3-5) Ṣigba etẹwẹ na yin wiwà, eyin húnhiho, hàngbe vivi, hàngbe-pli he dọnmẹdogo, kavi nuhiho he fọnjlodotenamẹ lẹ bẹ hogbe mawé tọn lẹ hẹn? Be mí dona nọ jihàn he doyẹyigona zanhẹmẹ matin alọwle, awuvivi amasin adínọ yiyizan tọn, po nuyiwa ylankan devo lẹ po wẹ ya? Kavi dile e yindọ mí yọnẹn dọ mí ma dona hodo aliho gbẹzan mẹhe ko tlọ́ biọ onú mọnkọtọn mẹ lẹ tọn, be mí nọ dovivẹnu nado sọawuhia taidi yé gbọn aṣọdido, dapipa, kavi aliho he mẹ yé nọ dọho te lẹ hihodo dali wẹ ya? Lehe aliho he Satani nọ yizan nado klọ gbẹtọ lẹ nado yinuwa sọgbe hẹ linlẹn gblezọn etọn lẹ gẹdẹ sọ! (2 Kọlintinu lẹ 4:3, 4) Ma nado jai jẹ omọ̀ wintinwintin etọn lẹ mẹ, mí dona dapana nuyiwa aihọn tọn lẹ. Mí dona hẹn mẹhe yin ‘ogán aihọn zinvlu tọn ehe tọn’ do ayiha mẹ bo diahi vẹkuvẹku sọta nuyiwadomẹji etọn lẹ.—1 Pita 5:8.
Yin Awuwlena Nado Lẹzun Awhàngbatọ
13. Mahopọnna mapenọ-yinyin mítọn, nawẹ e yọnbasi na depope to mí mẹ nado gbawhàn aihọn he Satani to gandudeji tọn gbọn?
13 Jesu dọna apọsteli etọn lẹ jẹnukọnna okú etọn dọmọ: “Mì deji; yẹn ko gbawhàn aihọn tọn.” (Johanu 16:33) Yé lọsu sọgan yin awhàngbatọ. To nudi owhe 60 godo, apọsteli Johanu wlanwe dọmọ: “Mẹnu wẹ ewọ he gbawhàn aihọn tọn, adavo ewọ he yise dọ Jesu wẹ Ovi Jiwheyẹwhe tọn?” (1 Johanu 5:5) Yise mọnkọtọn nọ yin didohia eyin mí setonuna gbedide Jesu tọn bo ganjẹ Ohó Jiwheyẹwhe tọn go, yèdọ dile Jesu wà do. Nudevo tẹwẹ yin bibiọ? Mí sọ dona tin to kọndopọmẹ hẹ agun he ewọ yin Tatọ́ na lọ. Eyin mí ṣinuwa, mí dona lẹnvọjọ mlẹnmlẹn bo dín jona Jiwheyẹwhe tọn to dodonu avọ́sinsan Jesu tọn ji. To aliho ehe mẹ, mahopọnna mapenọ-yinyin po nuṣiwa mítọn lẹ po, mílọsu sọgan yin awhàngbatọ.—Psalm 130:3, 4.
14. Hia Efesunu lẹ 6:13-17, bo yí kanbiọ po wefọ heyin awuwlena to hukan ehe mẹ lẹ po zan taidi dodonu de nado dọho do ale he gbaja gbigbọmẹ tọn dopodopo nọ hẹnwa ji.
14 Nado tindo kọdetọn dagbe, mí dona ze “gbaja Jiwheyẹwhe tọn lẹpo blá dogo,” bo ma dona gbẹ́ depope to gbaja lọ lẹ mẹ dai. Jaale hùn Biblu towe do Efesunu lẹ 6:13-17, bo hia zẹẹmẹ he yin bibasi gando gbaja enẹ go. Enẹgodo, gbọn gblọndo kanbiọ he tin to odò lẹ tọn nina dali, lẹnnupọndo lehe hiẹ sọgan mọaleyi sọn hihọ́ he gbaja dopodopo nọ hẹnwa mẹ ji.
“Yí gbaja nugbo tọn do blá adaja”
Eyin mí tlẹ yọ́n nugbo lọ, nawẹ nupinplọn gbesisọ tọn, ayihamẹlinlẹnpọn do nugbo Biblu tọn ji, po opli yìyì po na basi hihọ́na mí gbọn? (1 Kọlintinu lẹ 10:12, 13; 2 Kọlintinu lẹ 13:5; Filippinu lẹ 4:8, 9)
“Tùnudo dodo tọn”
Nujinọtedo dodowiwa tọn mẹnu tọn wẹ ehe? (Osọhia 15:3)
Basi dohia lehe awugbopo nado hodo nujinọtedo dodowiwa Jehovah tọn lẹ nọ hẹn owù gbigbọmẹ tọn wá do. (Deutelonomi 7:3, 4; 1 Samuẹli 15:22, 23)
“Wẹndagbe jijọho tọn do doafọpana afọ”
Nawẹ afọ mítọn lẹ yiyizan to whepoponu nado yì dọho hẹ gbẹtọ lẹ dogbọn awuwledainanu jijọho tọn Jiwheyẹwhe tọn lẹ dali nọ basi hihọ́na mí gbọn? (Psalm 73:2, 3; Lomunu lẹ 10:15; 1 Timoti 5:13)
“Sagba yise tọn”
Eyin mí tindo yise he lodo ganji, nawẹ mí na yinuwa to whenuena vivẹnu yin dido nado hẹn mí tindo ayihaawe kavi dibu gbọn? (2 Ahọlu lẹ 6:15-17; 2 Timoti 1:12)
“Ogàngbakun whlẹngán tọn”
Nawẹ todido whlẹngán tọn nọ gọalọnamẹ ma nado yin wiwle do omọ̀ ojlo glanglan tintindo to agbasanu lẹ mẹ tọn mẹ gbọn? (1 Timoti 6:7-10, 19)
“Ohí gbigbọ tọn”
Etẹ go wẹ mí dona nọ dejido to whepoponu eyin mí to ahidihẹ owù sinsinyẹn he na yinuwa do gbigbọnọ-yinyin mítọn kavi mẹdevo lẹ tọn ji? (Psalm 119:98; Howhinwhẹn lẹ 3:5, 6; Matiu 4:3, 4)
Nudevo tẹwẹ yin titengbe eyin mí na duto awhànfunfun gbigbọmẹ tọn ji? Nawẹ mí dona nọ yí ì zan gbọzangbọzan sọ? Na mẹnu lẹ? (Efesunu lẹ 6:18, 19)
15. Nawẹ mí dona yiavunlọ to avùnhiho gbigbọmẹ tọn lọ mẹ gbọn?
15 Taidi awhànfuntọ Klisti tọn lẹ, mí yin apadewhe awhànpa daho de tọn he to mahẹ tindo to awhànfunfun gbigbọmẹ tọn mẹ. Eyin mí tin to aṣeji bo yí gbaja he sọn Jiwheyẹwhe dè zan ganji to gigọ́mẹ, mí ma na ṣíawhàn gba. Kakatimọ, mí na yin alọgọ mẹhẹnlodo tọn na devizọnwatọ Jiwheyẹwhe tọn hatọ lẹ. Mí na tin to aṣeji bo na dovivẹnu nado yiavunlọ, nado to wẹndagbe Ahọluduta Jiwheyẹwhe tọn gbọn Mẹssia dali hẹn gbayipe, yèdọ gandudu olọn mẹ tọn he Satani diọnukunsọ sinsinyẹn.
Hodọdopọ Dogbapọn Tọn
• Naegbọn devizọnwatọ Jehovah tọn lẹ nọ nọ̀ kada to avùnhiho aihọn tọn lẹ mẹ?
• Omọ̀ wintinwintin tẹlẹ wẹ Satani nọ yizan nado hẹn Klistiani lẹ gblezọn to gbigbọ-liho?
• Nawẹ gbaja gbigbọmẹ tọn he Jiwheyẹwhe wleawuna nọ basi hihọ́na mí to awhànfunfun gbigbọmẹ tọn mítọn mẹ gbọn?
[Yẹdide to weda 76]
Akọta lẹ to yinyin bibẹpli hlan Amagẹdọni