Opodo Yajiji Lẹpo Tọn Ko Sẹpọ!

To whedelẹnu to gbẹzan towe mẹ, hiẹ sọgan ko kanse dọmọ: ‘Naegbọn yajiji do tin sọmọ?’ Na owhe fọtọ́n susu lẹ, awhàn, ohẹ́n, nugbajẹmẹji, sẹ́nhẹngba, whẹdida mawadodo, azọ̀n, po okú po ko sayana gbẹtọvi lẹ taun. To owhe kanweko he wayi gblamẹ, gbẹtọvi lẹ ko jiya hugan gbede pọ́n. Be yajiji ehe lẹpo na doalọte gbede ya?

Homẹmiọnnamẹnu wẹ e yin nado yọnẹn dọ yajiji na doalọte, podọ ehe na jọ to madẹnmẹ! Ohó Jiwheyẹwhe tọn, Biblu, dọ dọ, “Mẹylankan lẹ ma na tin ba . . . Ṣigba homẹmiọnnọ lẹ na dugu aigba tọn; yé na hẹn homẹhun yede to jijọho susu mẹ.” Nawẹ ehe na dẹnsọ? “Dodonọ wẹ na dugu aigba tọn, bo nasọ nọ nọ̀ e mẹ kakadoi.”—Psalm 37:10, 11, 29.

To whenuena Jiwheyẹwhe na ko súnsún kanyinylan po yajiji po sẹ̀ godo, aigba na yin didiọzun paladisi de. To whenẹnu, gbẹtọ lẹ na penugo nado nọgbẹ̀ kakadoi to agbasalilo pipé po ayajẹ po mẹ. Ohó Jiwheyẹwhe tọn dọ dọdai dọ: “Jiwheyẹwhe nasọ súnsún dasin lẹpo sẹ̀ sọn nukun yetọn mẹ; okú ma nasọ tin ba, kavi awubla, kavi avi, mọ awufiẹsa ma na tin ba.”—Osọhia 21:4.

To aihọn yọyọ enẹ mẹ, mẹhe tlẹ ko kú lẹ na yin hinhẹngọwa ogbẹ̀ nado duvivi onú dagbe enẹlẹ tọn: “Fọnsọnku dodonọ lẹ tọn, po mawadodonọ lẹ po tọn de na tin.” (Owalọ lẹ 24:15) Nuhe zọ́n niyẹn bọ Jesu Klisti sọgan dọna ylandonọ de he lẹnvọjọ bo do yise hia to ewọ mẹ dọmọ: ‘Hiẹ na nọ̀ hẹ mi to Paladisi mẹ.’—Luku 23:43.

Naegbọn Yajiji Do Bẹjẹeji?

To whenuena lẹndai Jiwheyẹwhe tọn wẹ yindọ gbẹtọvi lẹ ni tindo sọgodo jiawu mọnkọtọn, naegbọn e do dike bọ yajiji bẹjẹeji? Naegbọn e do na dotẹnmẹ yajiji na ojlẹ dindẹn sọmọ?

To whenuena Jiwheyẹwhe dá Adam po Evi po, agbasa po ayiha pipé de po mẹ wẹ E dá yé do. E ze yé do jipa paladisi tọn de mẹ bo de azọ́n dagbe de na yé nado wà. Biblu dọmọ: “Jiwheyẹwhe . . . mọ nuhe e dá lẹpo, bo doayi e go e yọ́n tlala.” (Gẹnẹsisi 1:31) Eyin yé ko setonuna Jiwheyẹwhe wẹ, yé na ko jì ovi pipé lẹ, podọ aigba blebu na ko lẹzun paladisi, fie gbẹtọ lẹ na nọgbẹ̀ kakadoi to jijọho po ayajẹ po mẹ te.

Jiwheyẹwhe dó nunina jiawu mẹdekannujẹ nudide bibasi tọn do ahun mẹ na Adam po Evi po taidi adà gbẹtọ-yinyin yetọn tọn de. Yé ma na taidi maṣinu he ma nọ lẹnnupọn (robot) lẹ gba. Etomọṣo, nado sọgan to ayajẹ tindo zọnmii, yé dona yí mẹdekannujẹ nudide bibasi tọn yetọn zan to aliho dagbe mẹ—yèdọ nado setonuna osẹ́n Jiwheyẹwhe tọn lẹ. Dile Jiwheyẹwhe dọ do: “Yẹn wẹ [Jehovah] Jiwheyẹwhe towe, he plọn we na ale, he plan we gbọn aliho he ji hiẹ na gbọ̀n.” (Isaia 48:17) Mẹdekannujẹ nudide bibasi tọn yiyizan to aliho agọ̀ mẹ na dekọtọn do nugbajẹmẹji mẹ, na gbẹtọ ma yin didá nado tindo kọdetọn dagbe matin anademẹ Jiwheyẹwhe tọn wutu. Biblu dọmọ: “Aliho gbẹtọ tọn ma tin to ewọ lọsu mẹ gba: e ma tin to mẹhe to zọnlinzin mẹ nado do afọdide etọn lẹ gba.”—Jẹlemia 10:23.

E blawu dọ, mẹjitọ mítọn tintan lẹ mọdọ emi sọgan gbẹ́ tindo kọdetọn dagbe matin anademẹ Jiwheyẹwhe tọn. Ṣigba, to whenuena yé gbẹkọ gandudu etọn go, Jiwheyẹwhe ma jo yé do pipé-yinyin mẹ gba. Enẹwutu, agbasa yetọn jẹ godo yì ji bọ to godo mẹ, yé poyọnho bosọ kú. To whenuena e yindọ ovi nọ di mẹjitọ he jì lẹ janwẹ, mí dugu mape enẹ po okú po tọn.—Lomunu lẹ 5:12.

Whẹho Titengbe lọ—Nupojipetọ-Yinyin

Naegbọn Jiwheyẹwhe ma và Adam po Evi po sudo bo dá asu po asi po devo? Na nupojipetọ-yinyin wẹkẹ tọn Jiwheyẹwhe tọn, he yin jlọjẹ etọn nado dugán, ko yin avùnnukundiọsọ wutu wẹ. Kanbiọ lọ wẹ yindọ, Mẹnu wẹ tindo jlọjẹ nado dugán, podọ gandudu mẹnu tọn wẹ sọgbe? Humọ, Be gbẹtọvi lẹ sọgan tindo kọdetọn dagbe eyin yé tọ́nsọn gandudu Jiwheyẹwhe tọn glọ ya? Gbọn whenu he pé nina gbẹtọvi lẹ nado tẹ́n gandudu lẹ pọ́n matin anademẹ Jiwheyẹwhe tọn dali, Jiwheyẹwhe na dohia hezeheze vlavo gbẹtọvi lẹ sọgan vò hugan to gandudu etọn glọ kavi to yedetiti tọn glọ. Whenu he yin jijodo lọ dona pé na gbẹtọvi lẹ nido sọgan tẹ́n wunmẹ tonudidọ, gbekọndopọ, akuẹzinzan, po sinsẹ̀n po tọn lẹpo pọ́n matin anademẹ Jiwheyẹwhe tọn.

Etẹwẹ yin kọdetọn lọ? Owhe fọtọ́n susu whenuho gbẹtọvi tọn ko dohia dọ yajiji fọ́n bo to susudeji. To owhe kanweko he wayi gblamẹ, whẹndo gbẹtọvi tọn ko tindo numimọ yajiji he ylan hú gbede pọ́n tọn. Gbẹtọ livi susu wẹ yin hùhù to Mẹvasudo Nazi lẹ tọn mẹ. Hugan livi donu 100 wẹ ko yin vivà to awhàn lẹ mẹ. Sẹ́nhẹngba po danuwiwa po gbayipe. Amasin adínọ ṣiṣizan gbọ̀n kámẹ-gòmẹ. Asamẹzọ̀n lẹ fọ́n bo to gbigbayipe. Gbẹtọ livi donu ao lẹ wẹ huvẹ po azọ̀n po nọ hù to whemẹwhemẹ. Gbẹzan whẹndo tọn po nujinọtedo walọ dagbe tọn lẹ po ko yìdo to filẹpo. Gandudu gbẹtọvi tọn depope ma tindo pọngbọ na nuhahun ehelẹ. Dopo tata to yé mẹ ma ko duto yọnhopipo, azọ̀n, po okú po ji gba.

Ninọmẹ gbẹtọvi tọn tin dile Biblu dọ dọdai etọn na ojlẹ mítọn do pẹpẹ. Ohó Jiwheyẹwhe tọn do ojlẹ mítọn hia taidi ‘azán godo tọn’ titonu ehe tọn lẹ he mẹ “ojlẹ awusinyẹn tọn lẹ na wá” te. Podọ kẹdẹdile Biblu dọ do, ‘mẹylankan lẹ, po mẹklọtọ lẹ po to yinylan yinukọn.’—2 Timoti 3:1-5, 13.

Yajiji Ko Sẹpọ Vivọnu

Kunnudenu lẹpo dohia dọ mí to dindọnsẹpọ vivọnu dotẹnmẹ he ko yin nina gbẹtọvi lẹ nado dugán matin anademẹ Jiwheyẹwhe tọn. E ko yin hinhẹn họnwun gblegede dọ gandudu gbọn gbẹtọvi lẹ dali matin anademẹ Jiwheyẹwhe tọn ma sọgan tindo kọdetọn dagbe gbede. Gandudu Jiwheyẹwhe tọn kẹdẹ wẹ sọgan hẹn jijọho, ayajẹ, agbasalilo pipé, po ogbẹ̀ mavọmavọ po wá. Enẹwutu, dotẹnmẹ he Jehovah na kanyinylan po yajiji po to dindọnsẹpọ vivọnu etọn. To madẹnmẹ, Jiwheyẹwhe na dádo whẹho gbẹtọvi tọn mẹ bo na và titonu ylankan ehe pete sudo.

Dọdai Biblu tọn dọmọ: “To azán ahọlu nẹlẹ [gandudu gbẹtọvi tọn he tin to egbehe lẹ] tọn lẹ mẹ wẹ Jiwheyẹwhe olọn tọn na ze ahọludu de daga [to olọn mẹ], he ma na yin vivà gbede . . . ; ṣigba e na gbà ahọludu do flinflin bo sú ahọludu he lẹpo [gandudu egbezangbe tọn lẹ] do, ewọ bo nasọ nọte kakadoi.” (Daniẹli 2:44) Whẹsuna nupojipetọ-yinyin Jehovah tọn, yèdọ jlọjẹ etọn nado dugán, gbọn Ahọluduta olọn mẹ tọn etọn dali wẹ yin nuhe ji nuplọnmẹ Biblu tọn lẹ sinai do. To whenuena Jesu to dọdai adà titengbe ohia ‘azán godo tọn lẹ’ tọn de dọ, e dọmọ: “Yè nasọ dọyẹwheho wẹndagbe ahọludu tọn helẹ to aigba fininọ lẹpo mẹ na okunnu de hlan akọta lẹpo; whenẹnu wẹ opodo na wá.”—Matiu 24:14.

Eyin opodo wá, mẹnu lẹ wẹ na luntọ́n? Biblu na gblọndo dọmọ: “Nugbonọ wẹ na nọ̀ aigba lọ ji, yé he pé lẹ wẹ na nọ̀ e mẹ. Ṣigba mẹylankan lẹ wẹ yè na sán sọn aihọn mẹ.” (Howhinwhẹn lẹ 2:21, 22) Nugbonọ lẹ wẹ yin mẹhe plọn ojlo Jehovah tọn bo wà ẹ lẹ. Jesu Klisti dọmọ: “Podọ ehe wẹ ogbẹ̀ madopodo, dọ yé ni yọ́n hiẹ ṣokẹdẹ Jiwheyẹwhe nugbo, podọ ewọ mẹhe hiẹ dohlan, yèdọ Jesu Klisti.” (Johanu 17:3) Mọwẹ, “aihọn . . . to jujujei . . . ṣigba ewọ he to ojlo Jiwheyẹwhe tọn wà wẹ na nọte kakadoi.”—1 Johanu 2:17.

Adavo e yin didohia to alọpa devo mẹ, wefọ he yin dide lẹpo wá sọn Biblu Wiwe Lọ Gun Alada mẹ.