NUPINPLỌN 21

Etẹwẹ Bẹtẹli Yin?

Awe to Kunnudetọ Jehovah tọn lẹ mẹ to azọ́nwa to Azọ́nwatẹn Yẹdide tọn to Bẹtẹli — Azọ́nwatẹn Yẹdide tọn, États-Unis

Kunnudetọ Jehovah tọn de to azọ́nwa to wezintẹn Bẹtẹli Allemagne tọn — Allemagne

Kunnudetọ Jehovah tọn de to azọ́nwa to avọ̀yantẹn Bẹtẹli Kenya tọn — Kenya

Mẹmẹsunnu lẹ to tafo lẹ jlado to núdùtẹn Bẹtẹli tọn to Colombie — Colombie

Hogbe Heblu tọn lọ Bẹtẹli zẹẹmẹdo “Owhé Jiwheyẹwhe tọn.” (Jenẹsisi 28:17, 19, nudọnamẹ odò tọn) Yinkọ ehe sọgbe na azọ́nwatẹn he Kunnudetọ Jehovah tọn lẹ ko doai lẹdo aihọn pé lẹ, fihe yé nọ deanana bo nọ nọgodona azọ́n yẹwhehodidọ tọn lọ te. Hagbẹ Anademẹtọ lọ tin to tatọ́-tẹnnọ aihọn tọn lọ to New York, États-Unis d’Amérique bo nọ deanana nuyiwa alahọ he to otò voovo mẹ lẹ tọn sọn finẹ. Taidi pipli de, mẹhe nọ wazọ́n to azọ́nwatẹn ehelẹ nọ yin yiylọdọ whẹndo Bẹtẹli tọn. Taidi whẹndo de, yé nọ nọpọ́, wazọ́n dopọ, dùnú dopọ bosọ nọ plọn Biblu dopọ.—Salmu lẹ 133:1.

E yin nọtẹn vonọtaun de fie hagbẹ whẹndo lọ tọn lẹ nọ ze yede jo te. Sunnu po yọnnu Klistiani lẹ po he ze yede jo nado wà ojlo Jiwheyẹwhe tọn bo yí whenu gigọ́ do nọgodona azọ́n Ahọluduta lọ tọn wẹ nọ nọ̀ owhé Bẹtẹli tọn lọ lẹpo gbè. (Matiu 6:33) Depope to yé mẹ ma nọ yí sunmẹ-kuẹ, ṣigba adọtẹn po núdùdù po nọ yin nina yemẹpo gọna apòmẹ-kuẹ kleun de nado gọalọna yé na akuẹzinzan mẹdetiti tọn lẹ. Mẹhe to Bẹtẹli lẹpo wẹ nọ mọ azọ́ndenamẹ de yí vlavo to wekantẹn, to nudatẹn kavi to núdùtẹn. Mẹdelẹ nọ wazọ́n to wezintẹn, to fie owe lẹ nọ yin bibladopọ te, to avọ̀yantẹn, kavi nọ wazọ́n taidi họmẹjladotọ, nujladotọ po mọmọ po.

E yin nọtẹn de fie azọ́n sinsinyẹn nọ yin wiwà te nado nọgodona azọ́n yẹwhehodidọ Ahọluduta lọ tọn. Yanwle tangan Bẹtẹli lẹpo tọn wẹ nado hẹn nugbo Biblu tọn tin-to-aimẹ na mẹsusu dile e sọgan yọnbasi do. Apajlẹ ehe tọn dopo wẹ yin alọnuwe ehe. E yin kinkan to anademẹ Hagbẹ Anademẹtọ lọ tọn glọ, yin didohlan pipli lẹdogbedevomẹ-basitọ lẹ tọn susu lẹdo aihọn pé gbọn ọdinatẹẹ gblamẹ, yin zinzinjẹgbonu to maṣinu he nọ zín owe tọ́n po awuyiya po lẹ ji to Bẹtẹli voovo lẹ, bosọ yin didohlan agun he hugan 110 000 lẹ mẹ. To ehe lẹpo wiwà mẹ, hagbẹ whẹndo Bẹtẹli tọn lẹ nọ nọgodona azọ́n he dona yin wiwà to niyaniya mẹ hugan lọ—enẹ wẹ yẹwheho wẹndagbe lọ tọn didọ.—Malku 13:10.

Mẹnu lẹ wẹ nọ sẹ̀n to Bẹtẹli, podọ nawẹ yé nọ yin nukunpedego gbọn?
Azọ́n niyaniya tọn tẹwẹ Bẹtẹli dopodopo nọ nọgodona?