Dide Lẹdo Hinhẹn Kudiho Sẹ̀—Sọn Ahun po Ayiha po Mẹ

JEHOVAH ma na gbẹtọvi lẹ ojlo na diho kavi po ninọmẹ numanọnukannu de gba. Owhé planẹti yetọn tọn yin yẹdena nado yin paladisi wiwe-jininọ tọn, he tin to nukannu, po whanpẹnọ de po. Jiwheyẹwhe ma basi lẹndai etọn dọ e ni diọada nado lẹzun gbóta mayọ́npọ́n de gba.—Gẹnẹsisi 2:8, 9.

Nalete, to whenuena gbẹtọvi lẹ gbẹ́ anademẹ sọn olọn mẹ wá dai godo, yé jẹ gbigbá wunmẹ titonu aihọn yelọsu titi tọn ji. Matin alemọyi nuyọnẹn sọn olọn mẹ wá po numimọ matindo po, yé yin hinhẹn po huhlọn po gbọn avididla po nuṣiwa po dali. Whenuho aihọn tọn lẹ kẹalọyi nugbo-yinyin Biblu tọn dọ gbẹtọvi lẹ ma sọgan dugan do yedelẹ ji po kọdetọn dagbe po gba; Na owhe fọtọn fọtọn lẹ “mẹde to gandu do omẹ awetọ ji te na awugble etọn.” (Yẹwhehodọtọ 8:9; Jẹlemia 10:23) Nuhahun egbezangbe tọn heyin lẹdo hinhẹn kudiho tọn, to wunmẹ etọn lẹpo mẹ, yin kọdetọn gandudu agọ̀ gbẹtọvi lẹ tọn wutu.

Tintindo Pọndohlan Jiwheyẹwhe Tọn

Mẹhe tindo ojlo nado hẹn homẹ Jiwheyẹwhe tọn hùn lẹ nọ dovivẹnu vẹkuvẹku nado nọgbẹ̀ sọgbe hẹ nujinọtedo Mẹdatọ lọ tọn lẹ do wiwenọ-yinyin ji. Gbọnmọ dali, Kunnudetọ Jehovah tọn lẹ pannukọn nuhahun de to whenuena plidopọ akọjọpli tọn de yin tito basina nado yin bibasi to Prague, Tchécoslovaquie, to gblagbla juin 1991 tọn whenu.a Nudi gbẹtọ 75 000 wẹ na tin to finẹ, yedọ gbẹtọgun he Bọlu-hotẹn Strahov tọn na hẹn po awubibọ po. Ṣigba bọlu-hotẹn lọ ma ko yin yiyizan na owhe atọ́n. E ma sọ nọ yin jijlado ba, yedọ otẹ̀n lọ ko yin hinhẹngble gbọn nugonu jọwamọ tọn lẹ dali. Kunnudetọ Jehovah tọn 1 500 delẹ yí ganhiho he hugan 65 000 lẹ zan to hinhẹn jẹ yọyọ po vivọ ẹ jlado po mẹ. To ojlẹ plidopọ tọn whenu titobibasi nukiklọwe ehe tọn ko hẹn bọlu-hotẹn lọ zun otẹ̀n he jẹ de nado sẹ̀n Jiwheyẹwhe nugbo lọ, yedọ Jehovah.

Etẹwẹ whàn Kunnudetọ Jehovah tọn lẹ nado gbọnvo, to whenuena aihọn lọ pete nọ do pinpẹn nutọn yinyọnẹn mọnkọ vude poun hia na wiwejininọ po tintin to kannu kannu onu lẹ tọn po? Pinpẹn nutọn yinyọnẹn na ayinamẹ Biblu tọn dọ Klistiani lẹ dona dè nuyiwa agọ̀ lẹ sẹ̀, taidi ṣejannabi, mẹtọnmahopọn, nukunkẹn, po matin owanyi tọn po. “Klọ́n gbẹtọ hoho nẹ dai po azọ́n etọn po,” wẹ Biblu dọ. Bo diọ ẹ po “dawe yọyọ nẹ [po], ehe yè diọ zun yọyọ jẹ oyọnẹn mẹ kẹdẹdi apajlẹ mẹhe da ẹ tọn.” Walọyizan de heyin bibẹdopọ gbọn owanyi na wiwe-jininọ, tintin to kannu kannu onu lẹ tọn, po whanpẹ po ma tindo dotẹnmẹ depope na ayilinlẹn lẹdo hinhẹn kudiho tọn lẹ gba.—Kọlọsinu lẹ 3:9, 10; 2 Kọlintinu lẹ 7:1; Filippinu lẹ 4:8; Titu 2:14.

Gbẹtọ yọyọ lọ biọ dọ Klistiani lẹ dona tin to lẹnpọn mẹ dogbọn lẹdo hinhẹn kudiho dali, e ma yin nado nọ yí ojlo do hẹn lẹdo kudiho kavi gbọn tolivivẹ dali gbẹkọ osẹ́n he jẹagọ do lẹdo hinhẹn kudiho he tohọluduta lẹ zedai go gba. E nọ gọalọna yé nado dapana tintindo walọ nuzedlan, ṣejannabi, po adidọ tọn po he nọ dekọtọn do lẹdo hinhẹn kudiho mẹ. Gbọn tintindo osi na nutindo mẹdevo lẹ tọn dali, e nọ hẹnalọdotena yiyi nukinkan do adó go lẹ zan taidi aliho de na dido linlẹn po numọtolanmẹ po hia, taidi aihun poun de, kavi taidi aliho wunmẹ nudide de tọn. E biọ dọ owhé lẹ, mọto lẹ, avọ̀ lẹ, po agbasa lẹ po ni yin hinhẹn do wiwe ji.—Yijlẹdo Jakobu 1:21 go.

Gando gbẹtọ he ma jlo nado zé gbẹtọ yọyọ lọ dogo lẹ dali, be nuṣiwa de sọgan yin mimọ na Jiwheyẹwhe na dide yé sẹ̀ sọn ogbẹ̀mẹ to Paladisi etọn he ja mẹ ya? Gbede pọ́n. Mẹdepope he gbẹsọ tindo ayilinlẹn lẹdo hinhẹn kudiho tọn lẹ he yin zizewhla do ahun kavi ayiha etọn mẹ na yin owù na whanpẹ paladisi heyin hinhẹn gọwa Aigba planẹti lọ ji tọn, titengbe na awubla enẹnọ he jlo nado hẹn ẹn dote lẹ tọn. Dide Jiwheyẹwhe tọn “nado hùsúdo yé he to aihọn hùsúdo lẹ” yin dodo po owanyi tọn po.—Osọhia 11:18; 21:8.

Be Mí Dona yí Zohunhun do Tindo Mahẹ To e mẹ Ya?

Nalete, be ehe zẹẹmẹdo dọ, e yin bibiọ to Klistiani lẹ si nado zé tito avunhiho sọta lẹdo hinhẹn kudiho kavi kiklọwe tọn daga ya?

E họnwun hezeheze dọ lẹdo hinhẹn kudiho nọ yin awugble na agbalilo po dagbemẹninọ otò tọn po. Jehovah tindo tintin to lẹnpọn mẹ he jẹ dogbọn whẹho mọnkọtọn lẹ dali, dile mí sọgan mọ do sọn osẹ́n he e na Islaelivi lẹ mẹ. (Eksọdusi 21:28-34; Deutelonomi 22:8; 23:12-14) Ṣigba ewọ ma yí whedepopenu do deanana yé nado diọ linlẹn na mẹdevo lẹ do whẹho wiwe-jininọ otò tọn ji gba; mọjanwẹ Klistiani owhe kanweko tintan whenu tọn lẹ ma yin didọ na nado wà mọ gba.

To egbehe, whẹho lẹdo jijlado tọn lẹ sọgan lẹzun whẹho tonudidọ tọn po awubibọ po. Na nugbo tọn, ada tonudidọ tọn delẹ ko yin awuwlena titengbe na lẹndai pọngbọ hinhẹn wá na nuhahun lẹdo jijlado tọn. Klistiani de he jó ede do nado yin dudu deji nado tindo mahẹ to hukan tonudidọ tọn ji ma sọ tin to kada gando whẹho tonudidọ tọn go bà gba. Jesu zé nunọwhinnusẹn lọ dai na devi etọn lẹ dọmọ: “Yé ma yin aihọn tọn, yedọ dile yẹn ma yin aihọn tọn do.” Klistiani depope he ma tindo osi na nubiọtomẹsi enẹ tin to owù lọ mẹ nado yin apadewhe “ahọvi aihọn he tọn lẹ tọn, he nọ lẹzun ovọ́.”—Johanu 17:16; 1 Kọlintinu lẹ 2:6.

Jesu ma tẹnpọn nado hẹn pọngbọ wá na nuhahun otò tọn lẹpo to azán etọn gbè gba; mọjanwẹ e ma dọ na devi etọn lẹ nado wà mọ gba. Gbedide etọn hlan yé wẹ yindọ: “Enẹwutu mì yì, bo hẹn akọta lẹpo zun nuplọntọ, bo sọ nọ baptizi yé ... , na mì ni sọ nọ plọn yé nado nọ doayi onu lẹpo go, nudepope he yẹn degbena mì.” E ma degbena yé dogbọn nuyiwa lẹdo hinhẹn do wiwe ji tọn lẹ dali gba.—Matiu 28:19, 20.

To zẹẹmẹ bibasi dogbọn nuhe dona tin to otẹ̀n tintan mẹ to gbẹzan Klistiani de tọn mẹ dali, Klisti dọmọ: “Ṣigba mì din ahọludu Jiwheyẹwhe tọn, po dodo etọn po whẹ́.” (Matiu 6:33) To whenuena Jehovah, gbọn yizan Ahọluduta Mẹssia etọn dali, na zé nunọwhinnusẹn dodo etọn lẹ dai jẹ oba globu tọn de mẹ, nuhahun lẹdo tọn lẹ na yin pọngbọ hẹnwána kakadoi podọ hlan pekọ mẹlẹpo tọn.

Gbọnmọ dali, Kunnudetọ Jehovah tọn lẹ nọ yí otẹ̀n jlẹkaji tọn. To pọndohlan mẹ na Lomunu lẹ 13:1-7, dandannu wẹ e yin dọ yé dona yí ayiha dopo do setonuna osẹ́n ahọlu tọn lẹ he nọ deanana ninọmẹ lẹdo tọn. To yidogọ mẹ, owanyi jijọ-di-Jiwheyẹwhe tọn hlan kọmẹnu nọ whan yé nado do osi hia na nutindo mẹdevo lẹ tọn—yedọ otò tọn kavi mẹdetiti tọn—gbọn ma yin hinhẹn kudiho podọ gbọn ma bẹ ogbó dlan fidepope poun dali. Ṣigba e họnwun hezeheze dọ yé ma yin gbedena nado yin nukọntọ to nukiklọwe aihọn lọ tọn mẹ gba. Yé nọ gbọn jlọjẹ dali do zé yẹwhehodidọ owẹ̀n Ahọluduta Jiwheyẹwhe tọn do otẹn tintan mẹ, to yinyọnẹn mẹ dọ ehe wẹ yin aliho lọ nado wà dagbe he na dẹn to aimẹ.

Nukiklọwe Gbigbọmẹ Tọn De

Islaelivi hohowhenu tọn lẹ yin avase na pludopludo dogbọn kọdetọn lọ lẹ dali eyin yé hẹn aigba kudiho gbọn ohùn sinsọ̀nkọnai, gbọn zinzan aliho gbẹ̀zan fẹnnuwiwa tọn, kavi gbọn dido osi matindo hia na onu wiwe lẹ dali. (Osọha lẹ 35:33; Jẹlemia 3:1, 2; Malaki 1:7, 8) Po ayidonugo po, yé yin whẹgbledo na diho gbigbọmẹ tọn ehe, e ma yin na owhẹ diho agbasamẹ tọn depope he yé sọgan ko hù tọn wutu gba.b

Enẹwutu, diho kavi mawe gbigbọmẹ tọn wẹ Klistiani de to egbehe nọ dovivẹnu nado dapana jẹnukọn. E nọ basi ehe gbọn “gbẹtọ yọyọ” lọ zize dogo dali, ehe nọ dè ayilinlẹn lẹdo hinhẹn kudiho tọ́n sẹ sọn ahun po ayiha po mẹ. Hugan livi ẹnẹ Kunnudetọ Jehovah tọn lẹ tọn wẹ to alemọyi sọn nukiklọwe gbigbọmẹ tọn ehe mẹ, bo nọ duale wiwe-jininọ sinsẹ̀n po walọyizan po tọn to gblagbla yedelẹ tọn mẹ, gọna wiwe-jininọ agbasamẹ tọn heyin ayidego tọn.—Efesunu lẹ 4:22-24.

Egbehe wẹ yin ojlẹ lọ na nujijla nukiklọwe gbigbọmẹ tọn de. Nujijla nukiklọwe agbasa tọn lẹdo aihọn pe na bọdego to osaa sisọ etọn mẹ bo na whlẹ́n planẹti mítọn sọn lilẹzun ogbóta globu tọn de mẹ gbọn nina ẹn lẹdo onu he ma nọ hẹn diho wá tọn he e jẹ na dali.—Yẹwhehodọtọ 3:1. (Pọ́n w-F 15/2/93, weda 4.)

[Nudọnamẹ Odò Tọn]