Jaya to Aigba Klọwe He Tin to Yakẹ lọ Mẹ!
LEHE mí sọgan yin ayajẹnọ dọ Jehovah, Jiwheyẹwhe nutonukannu po wiwejininọ tọn po, na hẹn lẹndai dowhenu etọn tọn di nado diọ aigba zùn paladisi globu tọn de do sọ! (Isaia 11:6-9) E dopagbe dọmọ: “Mọkẹdẹ wẹ ohó ṣie he tọ́n sọn onù ṣie ... ma na lẹ́gọ̀ wá dee agbá, ṣigba e na dotana onú he yẹn jlo, e na wadagbe to onu he mẹ yẹn do e hlan te.” “E glo Jiwheyẹwhe nado dolalo,” enẹwutu hogbe ehelẹ ma yin hogblo gba.—Isaia 55:11; Heblu lẹ 6:18.
Mí sọgan yin awumiọnna dọ Jehovah na gbọn owanyi dali whlẹ́n mí whẹpo gbẹtọvi lẹ nado hẹn lẹdo lọ kudiho dogọ bọ gbakija mlẹnmlẹn aigba fininọ lọ tọn ma na sọgan yin didapana ba!—Osọhia 11:18
Jehovah na dè mẹhe nọ hẹn lẹdo kudiho he ma lẹnvọjọ lẹ, po mẹhe yí atẹṣiṣi do gbẹkọ nunọwhinnusẹn etọn heyin nutonukannu tọn po wiwejininọ po go lẹ sẹ̀. Mẹdepope ma na yin dotẹnmẹ jodona nado hẹn Paladisi heyin hinhẹn gọwa lọ gble bà.—Howhinwhẹn lẹ 2:20-22.
To gandudu Ahọluduta Jiwheyẹwhe tọn whenu, to anademẹ Klisti Jesu tọn glọ, gbẹtọvi lẹ na yin pinplọn lehe yè nọ dè pipotọ depope nuhe nọ hẹn lẹdo agbasamẹ tọn kudido sẹ do. Enẹgodo—e ma yin dinvie—wẹ yin whenuena e na yin onu niyaniya tọn he devizọnwatọ Jiwheyẹwhe tọn lẹpo na ylọ́n yede po zohunhun po do nuyiwa mẹdetiti tọn po pọmẹ tọn po mẹ he na gọalọ na nukiklọwe matin awetọ globu tọn de gba.—Yijlẹdo Ezekiẹli 39:8-16 go.
Mẹhe na lùn opodo titonu ylankan dintọn tọ́n lẹ na nọgodona tito-to-whinnu nukiklọwe nujọnu tọn ehe po mẹdezejo zohunhun tọn dopolọ po ehe yé do to mahẹ tindo to nujijla nukiklọwe gbigbọmẹ tọn mẹ to egbehe.—Psalm 110:3.
Aigba klọwe de na wá dandan, he na yin anadena po huhlọn po gbọn nujijla nukiklọwe daho hugan ojlẹ lẹpo tọn, he na yin wiwadotana gbọn Ahọluduta Jiwheyẹwhe tọn dali. Nuhe nọ hẹn lẹdo kudiho lẹpo na yin didesẹ. Nukinkan do adó go ma na tin to fidepope ba. Ogò lẹ, panu-tló lẹ, saki lọba tọn lẹ, ṣingọmu po wema bonbon tọn lẹ po, linlinwe lẹ, po linlinnamẹwe lẹ po ma na sọ yin bibẹdlan nado hẹn aigba kavi otẹ̀n paladisi lọ tọn depope kudiho bà.
Jaya to aigba klọwe he tin to yakẹ lọ mẹ! (Pọ́n w-F 15/2/93, weda 7)
[Yẹdide]
Be hiẹ na tindo mahẹ to nukiklọwe globu tọn he ja lọ mẹ ya?