Be Hiẹ to Avunnukundiọsọ Gbigbọ Aihọn Tọn Ya?
“Ṣigba míwlẹ ko mọyi, e ma yin gbigbọ aihọn tọn gba, adavo gbigbọ he yin Jiwheyẹwhe tọn.”—1 KỌLINTINU LẸ 2:12.
1, 2. Nugbajẹmẹji he bẹ gazi adínọ hẹn tẹwẹ jọ to Bhopâl, to Inde, ṣigba “gazi” he nọ hùmẹ hugan tọn tẹwẹ to yinyin gbigbọ́n lẹdo aihọn pé?
TO OZÁN avivọ whenu décembre tọn de mẹ to 1984, onu he hẹnmẹ jọsi de jọ to Bhopâl, to Inde. To todaho enẹ mẹ, zomọ lẹtliki tọn he nọ zan osìn adínọ de tin, podọ to ozán décembre enẹ tọn mẹ, nugonu etọn de doazọ́nte to amìhẹnnu gazi tọn lẹ dopo mẹ. To ajijimẹ, tọnu osìn adínọ methyl isocyanate lẹ jẹ kinkọ̀n dlan jẹhọnmẹ ji. Na yinyin zizé gbọn jẹhọn dali, gazi he nọ hùmẹ ehe fún biọ owhé lẹ gbè kọ̀n do whẹndo he to amlọndọ lẹ ji. Sọha mẹhe kú lẹ tọn biọ fọtọ́n lẹ mẹ, podọ mẹsusu lẹzun awukunnọ. Nujijọ ajiji azọ́nwhé tọn he ylan hugan wẹ e yin he ma ko jọ pọn gbede kaka jẹ to ojlẹ enẹ mẹ.
2 Mẹsusu wẹ blawu whenue yé sèhó dogbọn Bhopâl dali. Ṣigba dile etlẹ yin nuhe hùmẹ taun to ojlẹ enẹ do sọ, gazi he gbajẹgbonu to finẹ lọ hù gbẹtọ he whè tlala hu dehe yin hùhù to gbigbọ liho gbọn “gazi” he gbẹtọ lẹ lẹdo aihọn pe nọ gbọ́n do lanmẹ to egbesọegbesọ. Biblu ylọ ẹ dọ “gbigbọ aihọn tọn.” Lẹdo okú hẹnplamẹ tọn enẹ wẹ apọsteli Paulu yijlẹdo gbigbọ he sọn Jiwheyẹwhe dè go to whenuena e dọmọ: “Ṣigba míwlẹ ko mọyi, e ma yin gbigbọ aihọn tọn gba, adavo gbigbọ he yin Jiwheyẹwhe tọn: na mí nido yọ́n onú he yè na mí vọnu gbọn Jiwheyẹwhe dali.”—1 Kọlintinu lẹ 2:12.
3. Etẹwẹ “gbigbọ aihọn tọn” yin?
3 Etẹwẹ yin “gbigbọ aihọn tọn” taun? Sọgbe hẹ The New Thayer’s Greek English Lexicon of the New Testament, zẹẹmẹ paa hogbe lọ “gbigbọ” (Glẹki, pneuʹma) tọn wẹ “ayilinlẹn kavi nuyiwadomẹji lọ he nọ gọ́ podọ he nọ deanana alindọn mẹdepope tọn.” Mẹde sọgan tindo gbigbọ dagbe kavi ylankan de, kavi ayilinlẹn. (Psalm 51:10; 2 Timoti 4:22) Pipli gbẹtọ lẹ tọn sọgan tindo gbigbọ de, kavi ayilinlẹn tangan de ga. Apọsteli Paulu wlan hlan họntọn etọn Filemọni dọmọ: “Ojọmiọn Jesu Klisti Oklunọ mítọn tọn ni tin to gbigbọ mìtọn de.” (Filemoni 25) Mọdopolọ—ṣigba to dodonu he gblo hugan de mẹ—aihọn lọ na paa tọn tindo ayilinlẹn tangan de, podọ ehe wẹ yin “gbigbọ aihọn tọn” heyin alọdlẹndo gbọn Paulu dali. Sọgbe hẹ owe Word Studies in the New Testament Vincent tọn, “hodidọ lọ zẹẹmẹdo nunọwhinnusẹ́n aovi tọn lẹ he nọ whàn aihọn he ma jlo na diọ bà lọ.” Ayilinlẹn ylando tọn wẹ e yin he pavava do linlẹn aihọn ehe tọn ji bo nọ yinuwa do aliho nuwiwa gbẹtọ lẹ tọn ji po huhlọn po.
4. Mẹnu wẹ yin asisa gbigbọ aihọn tọn, podọ nuyiwadomẹji tẹwẹ gbigbọ ehe tindo do gbẹtọvi lẹ ji?
4 Gbigbọ ehe yin adínọ taun. Etẹwutu? Na e nọ wá sọn “ahọvi aihọn he tọn,” Satani de wutu. Na nugbo tọn, ewọ yin yiylọdọ “ahọvi huhlọn [jẹhọn, NW] tọn, gbigbọ he to azọ́nwa to dinvie to ovi tólivivẹ tọn lẹ mẹ.” (Johanu 12:31; Efesunu lẹ 2:2) Nuhe vẹawu wẹ e yin nado dapana “jẹhọn” ehe, kavi “gbigbọ he to azọ́nwa to dinvie to ovi tólivivẹ tọn lẹ mẹ.” E tin to filẹpo to lẹdo gbẹtọvi lẹ tọn mẹ. Eyin mí gbọ́n ẹn do homẹ, mí na jẹ walọ etọn lẹ yizan ji, yedọ yanwle etọn lẹ. Gbigbọ aihọn tọn nọ na tuli ‘gbẹninọ to kọndopọmẹ hẹ agbasalan,’ enẹ wẹ yin, to kọndopọmẹ hẹ mapenọ-yinyin ylandonọ mítọn tọn. Okú hẹnwátọ wẹ e yin, “na eyin mì nọgbẹ̀ di agbasalan tọn, mì na kú.”—Lomunu lẹ 8:13.
Didapana Gbigbọ Aihọn ehe Tọn
5. Nawẹ Kunnudetọ de yinuwa po nuyọnẹn po to nugbajẹmẹji Bhopâl tọn whenu gbọn?
5 To nujijọ lọ whenu to Bhopâl, dopo to Kunnudetọ Jehovah tọn lẹ mẹ yin finfọ́n gbọn ogàn mẹfinfọ́n tọn lẹ podọ gbọn owán vẹadi gazi adínọ lọ tọn dali. Matin gbàndindọn e fọ́n whẹndo etọn bọ yé bẹwezun biọ tohomẹ. To teninọ na ojlẹ vude poun nado pọ́n fihe jẹhọn to yìyì go, e klẹ́n aliho gbọn gbẹtọ susugege he tin to bẹwlu mẹ lẹ ṣẹnṣẹn bo deanana whẹndo etọn sọyì osó de ji to gbonu todaho lọ tọn. To finẹ yé penugo nado gbọ̀ jẹhọn fifa, he mẹ́n he to yìnyìn sọn otọ̀ he sẹpọ de mẹ do afuje yetọn lẹ mẹ.
6. Fie wẹ mí sọgan yì nado họngan sọn gbigbọ aihọn tọn mẹ?
6 Be fihe yiaga de tin fie mí sọgan yì na fibẹtado sọn “jẹhọn” adínọ aihọn ehe tọn si ya? Biblu dọ dọ e tin. To pinpọn nukọn hlan azán mítọn gbè, Yẹwhegan Isaia wlan dọmọ: “To enẹgodo to azán podo gbè, yè na yí yonu owhé Oklunọ tọn hẹnai to aga osó daho lẹ tọn ji, yè na sọ ze e yì oji hú osó pẹvipẹvi lẹ; akọta lẹ na sọ lìn biọ e mẹ. Gbẹtọ susu wẹ na yì bo na dọmọ, mì wá na mí ni yì osó Oklunọ tọn ji, yì owhé Jiwheyẹwhe Jakobu tọn tọn gbè ewọ na sọ plọn ali etọn mí, mí na sọ zinzọnlin to omọ́ etọn mẹ, na Ziọni wẹ osẹ́n na tọ́n sọn yì, ohó Oklunọ tọn sọn Jelusalẹm.” (Isaia 2:2, 3) Ofi sinsẹ̀n-bibasi tọn he yiaga, yedọ “osó Oklunọ tọn” he yin zize daga lọ, wẹ yin ofi dopolọ to planẹti ehe ji he ma tindo yozo, gbigbọ adínọ agbọ́whlẹnhẹmẹ aihọn ehe tọn. Finẹ wẹ gbigbọ Jehovah tọn nọ sà po awubibọ po te to Klistiani nugbo lẹ ṣẹnṣẹn.
7. Nawẹ mẹsusu ko yin whinwhlẹngan sọn gbigbọ aihọn tọn mẹ gbọn?
7 Susu mẹhe ko gbọ́n gbigbọ aihọn ehe tọn lẹ dai ko duvivi kọgbọ dopolọ tọn he yin numimọ etọn tindo gbọn Kunnudetọ enẹ dali to Bhopâl. To hodidọ dogbọn “ovi tolivivẹ tọn lẹ” he nọ gbọ́n jẹhọn, kavi gbigbọ, aihọn ehe tọn godo, apọsteli Paulu dọmọ: “To mẹhe mẹ mí omẹ pó ga ko do owalọ mítọn to hóhó whenu to wantuntun agbasalan mítọn tọn mẹ, bọ mí sọ to ojlo agbasalan tọn po homẹ tọn po hẹn di; gbọn jijọ dali ovi homẹgble tọn wẹ mí, yedọ, kẹdẹdi mẹdevo lẹ. Ṣigba Jiwheyẹwhe, he yin adọkunnọ to lẹblanu mẹ, gbọn owanyi daho etọn mẹ ehe é do yiwanna mí, yedọ whenuena míwlẹ ko kú to ylando mẹ, e ko sọ fọ́n mí do ogbẹ̀ dopọ hẹ Klisti.” (Efesunu lẹ 2:3-5) Mẹhe gbọ́n jẹhọn adínọ titonu ehe tọn lẹ ko kú to gbigbọ liho. Ṣigba, opẹ wẹ hlan Jehovah dọ, livi lẹ to egbehe to hinhọ̀n sọyì ofi yiaga gbigbọmẹ tọn ji bo to hinhọngan sọn ninọmẹ mẹhùtọ enẹ mẹ.
Awusọhia “Gbigbọ Aihọn tọn” Lẹ
8, 9. (a) Etẹwẹ dohia dọ mí dona nọ tin to aṣeji gbọzangbọzan sọta gbigbọ aihọn tọn? (b) Nawẹ gbigbọ Satani tọn sọgan hẹn mí gblezọn gbọn?
8 Jẹhọn okú hẹnplamẹ Satani tọn lọ gbẹsọ nọ yìn lẹdo mí pe. Mí dona tin to aṣeji ma nado jẹte wádò, yedọ lẹgọ biọ aihọn lọ mẹ, vlavo nado yin agbọ́hẹndotena to gbigbọ liho gba. Ehe nọ biọ aṣejininọ to whepoponu. (Luku 21:36; 1 Kọlintinu lẹ 16:13) Di apajlẹ, gbadopọnna nugbo ehe. Klistiani lẹpo jẹakọ hẹ nujinọtedo Jehovah tọn lẹ heyin walọ dagbe tọn lẹ bo ma na kẹalọyi gbede pọn dọ walọyizan mawé mọnkọtọn lẹ taidi ayọdide, ogalilọ, po zanhẹmẹ sunnu po sunnu po tọn lẹ po yin alọkẹyi gba. Ṣogan, to owhe dopodopo mẹ nudi gbẹtọ 40 000 lẹ wẹ nọ yin didesẹ sọn titobasinanu Jehovah tọn mẹ. Etẹwutu? To whẹho susu mẹ na nuyiwa mawé ehelẹ tọn dopolọ wutu wẹ. Nawẹ enẹ sọgan jọ gbọn?
9 Na mímẹpo yin mapenọ wutu wẹ. Agbasa yin madogannọ, podọ mí dona nọ diahi hẹ ayilinlẹn agọ̀ lẹ he nọ sọawuhia to ahun mítọn mẹ to whepoponu. (Yẹwhehodọtọ 7:20; Jẹlemia 17:9) Nalete, ayilinlẹn agọ̀ enẹlẹ nọ yin tulina gbọn gbigbọ aihọn lọ tọn dali. Mẹsusu to aihọn ehe mẹ ma nọ mọ nudepope he ylan to fẹnnuwiwa mẹ gba, podọ linlẹn lọ dọ nudepope he yin alọkẹyi paa yin apadewhe ayilinlẹn apọnmẹ titonu Satani tọn. Eyin mí jó mídelẹ do na linlẹn mọnkọtọn, yọnbasi sinsinyẹn de tin dọ mí na jẹ nulẹnpọn ji taidi aihọn lọ. To ojlẹ vude godo, linlẹn mawé mọnkọtọn lẹ sọgan wleawuna ojlo agọ̀ he na dekọtọn do ylando sinsinyẹn mẹ. (Jakobu 1:14, 15) Mí na ko jẹte sọn osó sinsẹ̀n-bibasi wiwe-ṣeke Jehovah tọn ji wá odò he ko yin bibẹpla aihọn Satani tọn mẹ. Mẹdepope he yí ojlo do gbọṣi finẹ ma na dugu ogbẹ̀ madopodo tọn gba.—Efesunu lẹ 5:3-5, 7.
10. Etẹwẹ yin awusọhia jẹhọn Satani tọn dopo, podọ etẹwutu wẹ Klistiani lẹ dona dapana ehe?
10 Gbigbọ aihọn tọn yin kunnudenu he lẹdo mí pe. Di apajlẹ, walọ osi matindo, numọtolanmẹ agọ̀ tọn tin gbọn ehe dali mẹsusu nọ pọn ogbẹ̀ hlan te. Na yinyin kiklọ gbọn tonudọtọ he gblezọn kavi nulunọ lẹ dali podọ gbọn fẹnnuwiwa sinsẹngan nukunkẹnnọ lẹ tọn dali, yé nọ dọho he ma sọgbe dogbọn onu he tlẹ yin nujọnu lẹ dali. Klistiani lẹ nọ diọavunnukunsọ ayilinlẹn ehe. To whenuena mí sọgan nọ yìnaslan he jẹ, mí na dapana hinhẹn gbigbọ numọtolanmẹ agọ̀ osi matindo tọn biọ agun lọ mẹ. Hogbe Klistiani de tọn nọ do osi Jehovah tọn po wiwenọ yinyin ahun tọn po hia. (Jakobu 3:10, 11; yijlẹdo Howhinwhẹn lẹ 6:14 go.) Vlavo mí yin yọpọ wẹo kavi mẹho, hogbe mítọn dona “tin po ojọmiọn po to whepoponu, ehe ojẹ̀ pé, na mìwlẹ nido yọ́n le mì na nọ gblọnhona gbẹtọ lẹ dopodopo do.”—Kọlọsinu lẹ 4:6.
11. (a) Etẹwẹ yin nuyiwa awetọ gbigbọ aihọn tọn? (b) Etẹwutu wẹ Klistiani lẹ do gbọnvo na mẹhe nọ do nuyiwa ehe hia lẹ?
11 Ayilinlẹn gbayipe devo he nọ do gbigbọ aihọn ehe tọn hia wẹ wangbẹna. Aihọn lọ yin mimá gbọn wangbẹna po danuwiwa lẹ po he sinai do vogbigbọn hẹnnu tọn, akọ̀ tọn, akọta tọn, po mẹdetiti tọn po dali. Lehe onu dagbe hugan lẹ tin to fie gbigbọ Jiwheyẹwhe tọn to nuyiwa te do sọ! Apọsteli Paulu wlan dọmọ: “Mì yí oylan do yiahọsu oylan tọn to omẹ de go blo. Mì nọ wleawu onú he yọ́n lẹ tọn dai to gbẹtọ lẹpo nukọn. Eyin e yin wiwà, le é te to huhlọn mẹ na mì, mì nọ nọ jijọho hẹ omẹ popo. Mẹvivẹ ṣie emi, mì yiahọsu mìde tọn blo, ṣigba mì kuku gbọ bo jotẹn hlan homẹgble: na yè wlan ẹn dọ, ‘ahọsuyi wẹ ṣie; yẹn na suahọ, wẹ Oklunọ dọ.’ Enẹwutu eyin huvẹ hù kẹntọ towe, na núdùdù i; eyin nugblahu i, na núnùnù in; na to mọ wiwà mẹ hiẹ na bẹ́ akán miyọn tọn pli do ota etọn. A dike yè yí oylan do hugan we blo, ṣigba yí dagbe do hugan oylan.”—Lomunu lẹ 12:17-21.
12. Etẹwutu wẹ Klistiani lẹ do nọ dapana owanyi na adọkunnu zẹjlẹgo?
12 Gbigbọ aihọn ehe tọn sọ nọ whàn adọkunnu bibẹpli ga. Na yinyin tulina gbọn aihọn ajọwiwa tọn dali, mẹsusu nọ to nulẹnpọn glanglan dogbọn zomọ he ṣẹṣẹ yin didetọ́n, aṣọnú heyin didetọ́n tlolo lẹ, po gbẹduhún he ṣẹṣẹ tọ́n po. Yé nọ yin wiwle do kanlinmọgbenu gbọn “wantuntun nukun tọn” dali. (1 Johanu 2:16) Mẹsusu nọ pọ́n kọdetọn dagbe tintindo to gbẹmẹ yetọn gbọn kiklo-yinyin owhé yetọn kavi akuẹ he tin to akuẹbẹsẹdotẹn yetọn lẹ mẹ dali. Klistiani lẹ, he to jẹhọn mimẹ́n gbigbọmẹ tọn gbọ́n to osó yiaga sinsẹ̀n-bibasi wiwe-ṣeke Jehovah tọn ji lẹ, nọ diọavunnukunsọ ayilinlẹn ehe. Yé yọnẹn dọ afọdona adọkunnu agbasa tọn po nujikudo po sọgan yin mẹhusudotọ. (1 Timoti 6:9, 10) Jesu flinnu devi etọn lẹ dọmọ: “To ogégé gbẹtọ tọn de mẹ ma wẹ ogbẹ̀ etọn nọte te sọn onu he ewọ tindo lẹ mẹ gba.”—Luku 12:15.
13. Etẹwẹ yin awusọhia dogọ gbigbọ aihọn ehe tọn lẹ?
13 Awusọhia “jẹhọn” ylankan aihọn ehe tọn devo lẹ tọn gbẹsọ tin ga. Dopo wẹ yin gbigbọ atẹṣiṣi tọn. (2 Timoti 3:1-3) Be hiẹ ko doayi e go dọ mẹsusu ma sọ nọ kọngbedopọ hẹ tohọluduta lẹ ba ya? Be hiẹ ko doayi e go to agbasazọ́n towe mẹ nuyiwa gbayipe heyin azọ́nmawà tọn adavo mẹde ni to mẹṣọ whẹ́ ya? Omẹ nẹmu wẹ hiẹ yọnẹn he ko gbà osẹ́n lẹ—vlavo ma yin nugbonọ to amlọnkuẹ nina lẹ liho kavi jajo to agbasazọ́n etọn mẹ? Eyin hiẹ gbẹsọ po to wehọmẹ yì, be hiẹ ko yin hinhẹn gbọjọ pọn gbede sọn wiwà nuhe go a pe na klasigbẹ́ towe lẹ nọ yí nukun pẹvi do pọ́n mẹhe tindo kọdetọn dagbe to wepinplọn mẹ ya? Ehe lẹpo yin awusọhia gbigbọ aihọn tọn ehe Klistiani lẹ dona diọavunnukunsọ.
Lehe Yè na Diọavunnukunsọ Gbigbọ Aihọn ehe tọn Do
14. To aliho tẹlẹ mẹ wẹ Klistiani lẹ gbọnvo na mẹhe ma yin Klistiani lẹ te?
14 Nalete, nawẹ mí sọgan diọavunnukunsọ gbigbọ aihọn lọ tọn to whenuena na nugbo tọn mí nọ nọ aihọn lọ mẹ gbọn? Mí dona flin dọ mahopọnna fie mí tin te to agbasa mẹ, to gbigbọmẹ mí ma yin apadewhe aihọn tọn gba. (Johanu 17:15, 16) Yanwle mítọn lẹ ma yin yanwle aihọn ehe tọn lẹ gba. Pọndohlan mítọn gando onu lẹ go gbọnvo. Gbẹtọ gbigbọnọ lẹ wẹ mí yin, he nọ dọho bo nọ lẹnnupọn “e ma yin to ohó he mẹ nuyọnẹn gbẹtọ tọn to mẹplọ́n te gba, adavo ehe gbigbọ wiwe to mẹplọ́n; bo sọ to onu gbigbọnọ lẹ yí jlẹ́ do onu gbigbọnọ lẹ go.”—1 Kọlintinu lẹ 2:13.
15. Nawẹ mí sọgan diọavunnukunsọ gbigbọ aihọn tọn gbọn?
15 Etẹwẹ mẹde sọgan wà eyin e mọ ede to awa de he jẹhọn etọn yin hinhẹn gble po gazi adínọ po? Vlavo e sọgan ṣinyọn nukunmẹ-ṣinyọnnu gazi tọn heyin ṣiṣadopọ po jẹhọn he wé de po, kavi e sọgan tọ́n sọn awa lọ ji. Aliho lọ nado dapana jẹhọn Satani tọn bẹ aliho nuyiwa tọn ehelẹ hẹn. Dile e na yọnbasi do sọ, mí na nọ tẹnpọn nado dè mídelẹ sẹ̀ sọn nudepope he na hẹn gbigbọ aihọn tọn penugo nado gando lẹnpọn mítọn go. Gbọnmọ, mí nọ dapana ogbẹ́dido agọ̀, podọ mí ma nọ jó mídelẹ do na wunmẹ ayidedai tọn depope he nọ nọgodona danuwiwa, fẹnnuwiwa, afinyọnnọnuwiwa, atẹṣiṣi, kavi azọ́n agbasa tọn devo depope gba. (Galatianu lẹ 5:19-21) Ṣigba, to whenuena e yindọ mí nọ nọ aihọn lọ mẹ, mí ma sọgan dapana onu ehelẹ pete gba. Enẹwutu mí to nuyiwa po nuyọnẹn po eyin mí joawuna jẹhọn dagbe gbigbọmẹ tọn. Nalete, mí na hẹn afuje gbigbọmẹ tọn mítọn lẹ gọ́, gbọn opli yìyì to gbesisọmẹ, oplọn mẹdetiti tọn bibasi, nuyiwa Klistiani tọn lẹ po gbẹdido po, gọna odẹ̀ dali. To aliho ehe mẹ, eyin jẹhọn Satani tọn depope yìn biọ afuje gbigbọmẹ tọn mítọn mẹ, gbigbọ Jiwheyẹwhe tọn na ná mí huhlọn nado gbẹ ẹ dai.—Psalm 17:1-3; Howhinwhẹn lẹ 9:9; 13:20; 19:20; 22:17.
16. Nawẹ mí nọ do gbigbọ Jiwheyẹwhe tọn tintindo hia gbọn?
16 Gbigbọ Jiwheyẹwhe tọn nọ diọada na Klistiani de zun mẹde he nọ gbọnvo na mẹhe yin apadewhe aihọn ehe tọn lẹ. (Lomunu lẹ 12:1, 2) Paulu dọmọ: “Ṣigba sinsẹ́n gbigbọ tọn wẹ, owanyi, ayajẹ, jijọho, linsinyẹn, homẹdagbe dagbewa, nugbowa, walọmimiọn, mawazẹjlẹgo; osẹ́n depope ma tin to ehelẹ nkọ ji.” (Galatianu lẹ 5:22, 23) Gbigbọ Jiwheyẹwhe tọn sọ nọ na Klistiani de nukunnumọjẹnumẹ he siso onu lẹ tọn. Paulu dọmọ: “Mẹde ma yọ́n onu Jiwheyẹwhe tọn lẹ, adavo gbigbọ Jiwheyẹwhe tọn.” (1 Kọlintinu lẹ 2:11) To linlẹn paa mẹ, “onu Jiwheyẹwhe tọn lẹ” bẹ nugbo mọnkọtọn lẹ taidi avọsinsan ofligọ tọn, Ahọluduta Jiwheyẹwhe tọn to Jesu Klisti glọ, todido ogbẹ̀ madopodo tọn, po didesẹ aihọn ylankan ehe he tin to yakẹ tọn po hẹn. Po alọgọ gbigbọ Jiwheyẹwhe tọn po, Klistiani lẹ yọnẹn bo nọ kẹalọyi onu ehelẹ taidi nugbo, podọ ehe nọ hẹn aliho he yé nọ pọ́n ogbẹ̀ do gbọnvo na enẹ heyin gbẹtọ aihọn tọn lẹ. Yé tindo pekọ nado nọ mọ ayajẹ yetọn to Jehovah sinsẹ̀n mẹ todin, po nukundido nado sẹ̀n ẹn na ojlẹ madopodo he ja po.
17. Mẹnu wẹ zé apajlẹ daho hugan dai to avunnukundiọsọ gbigbọ aihọn tọn mẹ, podọ gbọnna?
17 Jesu wẹ nuyiwa apajlẹ daho hugan tọn na mẹhe nọ diọavunnukunsọ gbigbọ aihọn ehe tọn lẹ. To baptẹm Jesu tọn godo tlolo, Satani tẹnpọn nado diọkọ na ẹn sọn Jehovah sinsẹ̀n mẹ gbọn whlepọn atọ̀n zize do nukọn na ẹn dali. (Matiu 4:1-11) Godo tọn lọ bẹ yọnbasi lọ dọ Jesu sọgan duale gandudu do aihọn lọ pete ji hẹn na nuyiwa sinsẹ̀n-bibasi dopo tọn poun hlan Satani. Jesu sọgan ko lẹnnupọn to aliho ehe mẹ dọmọ: ‘Eyọn, yẹn na basi nuyiwa sinsẹ̀n-bibasi lọ tọn, podọ to whenuena yẹn na mọ gandudu aihọn lọ tọn yí godo, yẹn na lẹnvọjọ bo na lẹgọ do Jehovah sinsẹ̀n kọ̀n. Taidi ahọlu aihọn tọn, yẹn na tin to otẹn dagbe hugan mẹ nado hẹn alè wá na gbẹtọvi lẹ hugan lehe yẹn te do todin taidi atínpatọ de sọn Nazalẹti.’ Jesu ma lẹnnupọn to aliho enẹ mẹ gba. Ewọ tindo ojlo nado nọte kaka jẹ whenuena Jehovah na ẹn gandudu aihọn tọn. (Psalm 2:8) To nujijọ enẹ whenu, podọ to nujijọ devo lẹpo whenu to gbẹ̀zan etọn mẹ, e diọavunnukunsọ nuyiwadomẹji jẹhọn adínọ Satani tọn. Gbọnmọ, e gbawhàn aihọn he kudiho to gbigbọmẹ ehe tọn.—Johanu 16:33.
18. Nawẹ avunnukundiọsọ gbigbọ aihọn tọn mítọn nọ hẹn pipa wá na Jiwheyẹwhe gbọn?
18 Apọsteli Pita dọ dọ mí dona hodo afọdomẹ Jesu tọn lẹ pẹkipẹki. (1 Pita 2:21) Apajlẹ dagbe hugan tẹwẹ mí sọgan tindo? To azán godo tọn ehelẹ mẹ, na yinyin nuyiwadeji gbọn gbigbọ aihọn tọn dali, gbẹtọvi lẹ to sisiọ sisosiso biọ ylanwiwa mẹ. Lehe e yin nujiawu do sọ dọ to aihọn mọnkọtọn ṣẹnṣẹn, wẹ ofi yiaga sinsẹ̀n-bibasi Jehovah tọn tin to ote bo we-ṣeke bosọ mẹ́n! (Mika 4:1, 2) Po jide po, huhlọn gbigbọ Jiwheyẹwhe tọn to yinyin mimọ to ehe mẹ gbẹtọ livi lẹ to lìnlìn biọ otẹn sinsẹ̀n-bibasi Jiwheyẹwhe tọn mẹ, bo to avunnukundiọsọ gbigbọ ylankan hugan aihọn ehe tọn bo to gigo po pipa po hẹnwá na Jehovah! (1 Pita 2:11, 12) Na mímẹpo ni yin nujikudonọ nado gbọṣi ofi yiaga enẹ lọ mẹ kaka jẹ whenuena Ahọlu yiamisisadode Jehovah tọn na dè aihọn ylankan ehe sẹ̀ bo na zé Satani Lẹgba po aovi etọn lẹ po do odò mapote mẹ. (Osọhia 19:19–20:3) Enẹgodo, gbigbọ aihọn ehe tọn ma na sọ tin pọn gbede bà. Lehe ojlẹ enẹ na yin dona tọn do sọ! (Pọ́n w-F 1/4/94, weda 14.)
Be Hiẹ Sọgan Basi Zẹẹmẹ Ya?
◻ Etẹwẹ gbigbọ aihọn tọn yin?
◻ Nuyiwadomẹji tẹwẹ gbigbọ aihọn ehe tọn nọ tindo do mẹdopodopo ji?
◻ Etẹwẹ yin awusọhia gbigbọ aihọn tọn delẹ, podọ nawẹ mí sọgan dapana ẹn gbọn?
◻ Nawẹ mí nọ dohia dọ mí tindo gbigbọ Jiwheyẹwhe tọn gbọn?
◻ Dona tẹlẹ wẹ nọ wá na mẹhe diọavunnukunsọ gbigbọ aihọn tọn lẹ?
[Yẹdide to weda 12, 13]
Gbigbọ aihọn tọn yin sọn Satani dè
Nado dapana gbigbọ aihọn tọn, họ̀n sọyì ofi yiaga sinsẹ̀n-bibasi Jehovah tọn ji