Sinsẹ̀n po Nugbonọ-Yinyin po Hẹ Titobasinanu Jehovah Tọn

‘Hẹ nugbonọ hiẹ na do dewe hia to nugbonọ-yinyin mẹ.’—2 SAMUẸLI 22:26.

1, 2. Etẹwẹ yin delẹ to apajlẹ nugbonọ-yinyin tọn mẹ he mímẹpo sọgan mọ to agun lọ mẹ?

TO ZÁNHOMẸ whèjai dopo tọn mẹho de to awuwlena hodidọ de na opli Klistiani tọn de. Ewọ na jlo nado nọte bo gbọjẹ; kakatimọ, e to azọ́n wà janwẹ, to dindin apajlẹ Owe wiwe tọn lẹ po oló lẹ po he na biọ ahún mẹ bo na na tuli lẹngbọpa lọ. To zanmẹ opli lọ tọn, mẹjitọ awe he nuṣikọna taun lẹ to agun enẹ dopolọ mẹ na duvivi whèjai enẹ tọn to whégbè; kakatimọ, yé wleawuna ovi yetọn lẹ po sọwhiwhe po bo yì opli lọ. To opli lọ godo, pipli Klistiani lẹ tọn de dọho do hodidọ mẹho lọ tọn ji. Mẹmẹyọnnu dopo yin whiwhlepọn nado dọ dọ mẹmẹsunnu dopo enẹ lọ ko gbleawuna numọtolanmẹ etọn pọ́n; kakatimọ, e dọho po zohunhun po do dopo to nuagokun he e ko detọn lẹ ji. Be hiẹ mọ kanṣiṣa he tin to nujijọ ehe lẹpo mẹ ya?

² Kanṣiṣa enẹ lọ wẹ nugbonọ-yinyin. Mẹho lọ wazọ́n po nugbonọ-yinyin po nado wà sinsẹ̀nzọn na lẹngbọpa Jiwheyẹwhe tọn; mẹjitọ lẹ yì opli agun tọn lẹ po nugbonọ-yinyin po; mẹmẹyọnnu lọ nọgodona mẹho lọ po nugbonọ-yinyin po. (Heblu lẹ 10:24, 25; 13:17; 1 Pita 5:2) Mọwẹ, to adà gbẹninọ tọn lẹpo mẹ, mí nọ mọdọ omẹ Jiwheyẹwhe tọn lẹ yin nujikudonọ nado sẹ̀n hẹ titobasinanu Jehovah tọn po nugbonọ-yinyin po.

3. Naegbọn e do yin nujọnu sọmọ nado gbọṣi nugbonọ-yinyin mẹ hlan titobasinanu aigba ji tọn Jehovah tọn?

³ Whenuena Jehovah pọ́n aihọn he gblezọn ehe hlan odò, e nọ mọ nugbonọ-yinyin vude poun. (Mika 7:2) Lehe ahun etọn na yigbe po ayajẹ po do sọ whenuena e mọ nugbonọ-yinyin omẹ etọn lẹ tọn! Mọwẹ, nugbonọ-yinyin hiẹ lọsu tọn nọ hẹn homẹ etọn hùn. Ṣigba, e nọ hẹn homẹ gble Satani, atẹṣitọ dowhenu tọn, bosọ nọ do e hia taidi lalonọ de. (Howhinwhẹn lẹ 27:11; Johanu 8:44) Donukun dọ Satani na tẹnpọn nado hẹn nugbonọ-yinyin towe hlan Jehovah po titobasinanu aigba ji Etọn tọn po gble. Mì gbọ mí ni gbadopọnna aliho delẹ he mẹ Satani nọ wà ehe te. Gbọnmọ dali mí sọgan mọ ganji lehe mí sọgan yin nugbonọ jẹ opodo do.—2 Kọlintinu lẹ 2:11.

Nukun Zize do Mape lẹ ji Sọgan Dè Nugbonọ-yinyin Pò

4. (a) Naegbọn e do bọawu sọmọ nado tindo pọndohlan agọ̀ homọdọdomẹgo tọn jẹagọdo mẹhe tin to otẹn aṣẹpipa tọn mẹ lẹ? (b) Nawẹ Kola do nugbomadọ hia hlan titobasinanu Jehovah tọn gbọn?

⁴ Whenuena mẹmẹsunnu de tin to otẹn azọngban tọn mẹ, nuṣiwa etọn lẹ sọgan yawu họnwun. Lehe e bọawu do sọ nado mọhodọ do ‘núyọ he tin to nukun mẹmẹsunnu towe tọn mẹ ma lẹn atinpo he tin nukun hiẹ lọsu tọn mẹ tọn pọ́n’! (Matiu 7:1-5) Nalete, nulẹnpọn do nuṣiwa lẹ ji, sọgan ji nugbomadọ. Di dohia, lẹnnupọn do vogbingbọn he tin to Kola po Davidi po ṣẹnṣẹn ji. Kola tindo azọngban susu, podọ e sọgan ko yin nugbonọ na owhe susu lẹ, ṣigba e lẹzun ojlo sinsinyẹnnọ. E wá lẹzun adìnọ na aṣẹpipa Mose po Aalọn po tọn, ylọn-ylọvi etọn tintan lẹ. Dile etlẹ yindọ Mose wẹ yin homẹmimiọnnọ hugan to gbẹtọ lẹ mẹ, Kola po nujikudo po jẹ pinpọn ẹn hlan po nukun ylankan homọdọdomẹgo tọn po ji. Vlavo e mọ nuṣiwa lẹ to Mose mẹ. Ṣigba, nuṣiwa enẹlẹ, ma suwhẹna nugbomadọ Kola tọn hlan titobasinanu Jehovah tọn gba. E yin vivasudo sọn gblagbla agun lọ tọn mẹ.—Osọha lẹ 12:3; 16:11, 31-33.

5. Naegbọn Davidi do sọgan ko tindo numọtolanmẹ yinyin whiwhlepọn tọn nado ṣiatẹ sọta Sauli?

⁵ To alọ devo mẹ, Davidi, wà sinsẹ̀nzọn to Ahọlu Sauli glọ. Sauli he yin ahọlu dagbe to ojlẹ de mẹ, na nugbo tọn ko lẹzun mẹylankan. Davidi tindo nuhudo yise, akọndonanu, podọ etlẹ yin zinzin delẹ nado lùn mẹgbeyinyan awuwhàn Sauli tọn lẹ tọ́n. Ṣogan, to whenuena Davidi tindo dotẹnmẹ nado yiahọsu, e dọ dọ e yin ‘nuwiwa lẹnpọn matindo tọn, sọn pọndohlan Jehovah tọn mẹ,’ dọ emi ni wà nugbomadọnu mọnkọtọn jẹagọdo mẹhe Jehovah yiamisisadode.—1 Samuẹli 26:11.

6. Eyin mí tlẹ doayi madogán po nuṣiwa lẹ po go to mẹho lẹ mẹ, etẹwẹ mí ma dona wà gbede?

⁶ Whenuena e taidi dọ mẹhe to nukọntọ yin to ṣẹnṣẹn mítọn delẹ ṣinuwà to whẹdida mẹ, dọho sinsinyẹn lẹ, kavi e taidi dọ yé yin mẹnukuntahopọntọ, be mí na wule dogbọn yé dali wẹ, vlavo yidogọna gbigbọ homọdọdomẹgo sinsinyẹn tọn to agun lọ mẹ wẹ ya? Be mí na nọla na opli Klistiani tọn lẹ taidi aliho homẹgble didohia tọn de wẹ? Na jide tọn paali! Taidi Davidi, mí ma na dike nuṣiwa mẹdevo lẹ tọn ni sisẹ mí nado yin nugbomadọtọ hlan Jehovah po titobasinanu etọn po gbede gba!—Psalm 119:165.

7. Etẹwẹ yin nuwiwa gblezọn delẹ he wleawu to kọndopọmẹ hẹ tẹmpli lọ to Jelusalẹm, podọ numọtolanmẹ tẹwẹ Jesu tindo gando ehe go?

⁷ Apajlẹ klohugan gbẹtọ nugbonọ-yinyin tọn wẹ Jesu Klisti, heyin zẹẹmẹ basina to dọdai liho taidi “omẹ nugbonọ” Jehovah tọn. (Psalm 16:10 NW) Ṣiṣizan ylankan tẹmpli lọ tọn to Jelusalẹm na ko hẹn nugbonọ-yinyin yin avùnnukundiọsọmẹnu de. Jesu yọnẹn dọ azọ́n yẹwhenọ daho lọ tọn po avọ́sinsan lẹ po nọtena lizọnyizọn po okú avọ́sinsan tọn etọn po, podọ e yọ́n lehe eyin nujọnu na gbẹtọ lẹ do sọ nado plọnnu sọn ehelẹ mẹ. Enẹwutu e yin gigọ́ po homẹgble dodowiwa tọn po to whenuena e mọ dọ tẹmpli lọ ko lẹzun “odò ajotọ lẹ tọn.” Po huhlọn namẹ Jiwheyẹwhe tọn po, e ze afọdide whlaawe nado klọ ẹ wé.a—Matiu 21:12, 13; Johanu 2:15-17.

8. (a) Nawẹ Jesu do nugbonọ-yinyin hia hlan tito tẹmpli tọn lọ gbọn? (b) Nawẹ mí sọgan dohia dọ mí yọ́n pinpẹn sinsẹ̀n-bibasi dohlan Jehovah to kọndopọmẹ hẹ titobasinanu wiwe etọn gbọn?

⁸ Ṣogan, Jesu nọgodo na tito tẹmpli lọ tọn po nugbonọ-yinyin po. Sọn ovu whenu, e yì hùnwhẹ lẹ to tẹmpli lọ mẹ bo nọ saba plọnnu mẹ to finẹ. E tlẹ sú takuẹ tẹmpli tọn—dile etlẹ yindọ e ma tlẹ tin to osẹ́n glọ nado wàmọ na nugbo tọn. (Matiu 17:24-27) Jesu pà asuṣiọsi wamọnọ lọ na dindlan “yèdọ gbẹ̀mẹnu etọn lẹpo” do adọkunnu potin tẹmpli tọn lọ mẹ. To madẹnmẹ to enẹgodo, Jehovah gbẹ́ tẹmpli enẹ dai kakadoi. Ṣigba kakajẹ whenẹnu, Jesu yin nugbonọ dohlan ẹn. (Malku 12:41-44; Matiu 23:38) Titobasinanu aigba ji egbehe tọn heyin Jiwheyẹwhe tọn yiaga hugan titonu Juvi lẹ tọn po tẹmpli etọn po. Na nugbo tọn, e mayin pipé; enẹwutu wẹ vọjlado lẹ nọ yin bibasi to whedelẹnu. Ṣigba e mayin hinhẹn gẹdẹ po zọnlin gbigble lẹ po, mọdopolọ Jehovah Jiwheyẹwhe ma ko wleawufo nado diọtẹn na ẹn gba. Mí ni ma dike nuṣiwa lẹ depope he mí doayi e go to gblagbla etọn mẹ lẹ ni hẹn mí tindo numọtolanmẹ homẹgble kavi nado ze teninọ homọdọdonugo tọn, walọyizan lewuwu tọn blo. Kakatimọ, mì gbọ mí ni hodo apajlẹ nugbonọ-yinyin Jesu Klisti tọn.—1 Pita 2:21.

Mape Míwlọsu Tọn Lẹ

9, 10. (a) Nawẹ titonu Satani tọn nọ yí mape mítọn lẹ zan nado klọ mí biọ walọyizan nugbomadọ tọn mẹ gbọn? (b) Etẹwẹ mẹhe ko wà ylando sinsinyẹn de dona wà?

⁹ Satani sọ nọ tẹnpọn nado ze nugbomadọ daga gbọn yizan mape mítọn tọn lẹ dali. Titonu etọn nọ yinuwado madogán mítọn lẹ ji, nọ whle mí pọ́n nado wà nuhe yin oylan to nukun Jehovah tọn lẹ mẹ. Po awubla po, to owhe dopodopo mẹ fọtọ́n susu wẹ nọ joawuna fẹnnuwiwa. Mẹdelẹ nọ yí gbẹzan awe zinzan dogọna nugbomadọ ehe, bo nọ to nukọnyi to aliho ylanwiwa tọn mẹ bo nọ to yẹdoklọmẹ nado gbẹ́ pò to Klistiani nugbonọ lẹ yin. To gbeyiyi do hosọ ehe ji to “Les Jeunes S’interrogent. . .” mẹ gọna adà voovo lẹ to linlinnamẹwe Réveillez-vous! mẹ, jọja yọnnu dopo wlan dọmọ: “Hosọ lọ lẹ yin whenuho gbẹzan ṣie tọn.” To nuglọ, e ko wleawu họntọnjihẹmẹ tọn hẹ jọja lẹ he ma tindo owanyi depope na Jehovah lẹ. Kọdetọn etọn? E wlan dọmọ: “Ogbẹ̀ ṣie yido petepete, bọ yẹn wá tindo mahẹ to fẹnnuwiwa mẹ bo dona yin wiwọhẹ. Haṣinṣan ṣie hẹ Jehovah yin hinhẹngble, podọ jidedomẹgo sọn mẹjitọ lẹ po mẹho lẹ po dè busẹ.”b

¹⁰ Jọja yọnnu ehe mọ alọgọ yí sọn mẹho lẹ dè bo lẹkọ do sinsẹ̀nzọn nugbonọ hlan Jehovah mẹ. Nalete, po awubla po, mẹsusu nọ jiya kọdetọn he ylan hugan lẹ, podọ mẹdelẹ ma nọ lẹkọ do apó lọ mẹ gbede ba. Lehe e yọ́n hugan do nado yin nugbonọ bo nọavunte sọta whlepọn lẹ to aihọn ylankan ehe mẹ! Tuntóai na avase lẹ sọn linlinnamẹwe Atọ̀họ̀-Nuhihọ́ Lọ Tọn po Réveillez-vous! po mẹ do whẹho mọnkọtọn lẹ ji taidi gbẹdido po ayidedai ylankan aihọn tọn lẹ po. Na hiẹ ni ma jai biọ walọyizan nugbomadọ tọn mẹ gbede blo. Ṣigba eyin hiẹ wàmọ, ma wayẹblẹ nado yin nuhe a mayin blo. (Psalm 26:4) Kakatimọ, yí alọgọ. Enẹwutu wẹ mẹjitọ Klistiani lẹ po mẹho lẹ po do tin to finẹ.—Jakobu 5:14.

11. Naegbọn e na yin nuhe ma sọgbe nado pọ́n mídelẹ hlan taidi mẹylankan he ma tindo todido lẹ, podọ nujijọ jẹnukọn Biblu tọn tẹwẹ na gọalọna mí nado vọ́ pọndohlan mítọn jlado?

¹¹ Mape mítọn sọgan sọ yin owùnu na mí to aliho devo mẹ. Mẹdelẹ he jẹ nuṣiwa nugbomadọ tọn mẹ lẹ nọ jo vivẹnudido depope nado hẹn homẹ Jehovah tọn hun dai. Flindọ, Davidi wà ylando sinsinyẹn. Ṣogan, to owhe susu lẹ to okú etọn godo, Jehovah flin Davidi taidi devizọnwatọ nugbonọ. (Heblu lẹ 11:32; 12:1) Etẹwutu? Na e ma jo vivẹnudido nado hẹn homẹ Jehovah tọn hùn dai pọ́n gbede wutu. Howhinwhẹn lẹ 24:16 dọmọ: “Na nugbonọ jai whla ṣinawe, bosọ fọ́n.” Na jide tọn, eyin mí jai biọ ylando flinflin lẹ mẹ—mọwẹ to gbọzangbọzan—na madogán delẹ he mí to avunho hẹ wutu, mí sọgan sọ yin dodonọ to nukun Jehovah tọn lẹ mẹ eyin mí zindonukọn nado “fọ́n”—enẹ wẹ, lẹnvọjọ nugbo tọn bosọ gọ̀ sinsẹ̀nzọn nugbowiwa tọn bẹjẹeji.—Yijlẹdo 2 Kọlintinu lẹ 2:7 go.

Họ́ Dewe Sọta Wunmẹ Oklọ Nugbomadọ Tọn Lẹ!

12. To whẹho Falesi lẹ tọn mẹ, nawẹ hẹngogo, pọndohlan osẹ́n go titẹdo tọn planmẹ jẹ nugbomadọ mẹ gbọn?

¹² Nugbomadọ sọ nọ wá to aliho oklọ hugan tọn lẹ mẹ ga. E sọgan doyẹklọmẹ taidi nugbonọ-yinyin! Di apajlẹ, Falesi azán Jesu gbe tọn lẹ vlavo na ko pọ́n yedelẹ taidi nugbonọ he diyin lẹ.c Ṣigba yé gboawupo nado mọ vogbingbọn to yinyin nugbonọ podọ yinyin titẹdo osẹ́n gbẹtọ tọn go tọ́ ṣẹnṣẹn, na yé yin hẹngogonọ po whẹ̀danamẹtọ fifiẹtọ lẹ po wutu. (Yijlẹdo Yẹwhehodọtọ 7:16 go.) To ehe mẹ yé yin nugbomadọtọ lẹ na nugbo tọn—hlan gbẹtọ he yé dona ko to devizọnwana lẹ, hlan gbigbọ Osẹ́n tọn he yé sọalọakọn nado to pinplọn mẹ, podọ hlan Jehovah lọsu. To vogbingbọn mẹ, Jesu, yin nugbonọ hlan gbigbọ Osẹ́n tọn lọ, ehe yin zize sinai do owanyi ji. Gbọnmọ dali e jlọ agun dote bo na tuli gbẹtọ lẹ, dile dọdai Mẹssia tọn lẹ ko dọdai do.—Isaia 42:3; 50:4; 61:1, 2.

13. (a) Nawẹ mẹjitọ Klistiani lẹ sọgan yin nugbomadọtọ lẹ gbọn? (b) Naegbọn mẹjitọ lẹ dona dapana yinyin fifiẹtọ hugan, hẹngogonọ kavi mẹplọnlọdido ovi yetọn lẹ go to aliho agọ̀ mẹ?

¹³ Klistiani lẹ he tindo otẹn aṣẹpipa tọn delẹ nọ duale daho sọn apajlẹ Jesu tọn mẹ to aliho ehe mẹ. Di apajlẹ, mẹjitọ nugbonọ lẹ yọnẹn dọ yé dona do mẹplọnlọ ovi yetọn lẹ go. (Howhinwhẹn lẹ 13:24) Ṣogan yé nọ kudeji dọ yé ma nọ hẹn homẹgblena ovivu yetọn lẹ gbọn mẹplọnlọ fifiẹ tọn lẹ nina to homẹgble mẹ dali kavi homọdọdomẹgo kinkọndomẹji gbọzangbọzan tọn dali gba. Ovi lẹ he lẹndọ yé ma sọgan hẹn homẹ mẹjitọ yetọn lẹ tọn hùn kavi he tindo numọtolanmẹ dọ sinsẹ̀n-bibasi mẹjitọ yetọn lẹ tọn nọ hẹn yé yin agọjẹdomẹtọ po homọdọdomẹgotọ po lẹ sọgan lẹzun homẹgbletọ podọ, na kọdetọn de, wá tadona mẹ to yinyin hinhẹn jẹla sọn yise nugbo lọ tọn mẹ.—Kọlọsinu lẹ 3:21.

14. Nawẹ Klistiani lẹngbọhọtọ lẹ sọgan do nugbonọ-yinyin hia hlan lẹngbọpa he yé to nukunpedego lọ gbọn?

¹⁴ Mọdopolọ, Klistiani mẹho lẹ po nugopọntọ tomẹyitọ lẹ po nọ na ayidonugo hlan nuhahun po owù he apo lọ nọ pannukọn lẹ po. Taidi lẹngbọhọtọ nugbonọ lẹ, yé nọ na ayinamẹ to whenuena nuhudo tin, bo nọ hẹn diun dọ yé tindo nugbo lọ lẹpo jẹnukọn podọ nọ ze nuhe yé dọ lẹ sinai do Biblu po owe Ogbẹ́ tọn lẹ po ji po sọwhiwhe po. (Psalm 119:105; Howhinwhẹn lẹ 18:13) Yé yọnẹn, ga, dọ lẹngbọ lẹ ganjẹ yé go na mẹjlọdote po núdùdù gbigbọmẹ tọn po. Enẹwutu yé nọ din nado hodo apajlẹ Jesu Klisti tọn, Lẹngbọhọtọ Dagbe lọ. Yé nọ wadevizọn na lẹngbọ lẹ to osẹ dopodopo mẹ to opli Klistiani tọn lẹ mẹ—e mayin nado họ́ yé liai gba ṣigba, kakatimọ, jlọ yé dote bo na huhlọn yise yetọn.—Matiu 20:28; Efesunu lẹ 4:11, 12; Heblu lẹ 13:20, 21.

15. Nawẹ mẹdelẹ dohia to owhe kanweko tintan whenu dọ yé ko ze nugbonọ-yinyin do asisa agọ̀ mẹ gbọn?

¹⁵ Aliho oklọ nugbomadọ tọn devo wẹ yin nugbonọ-yinyin zize do asisa agọ̀ mẹ. Nugbonọ-yinyin nugbo tọn to pọndohlan Biblu tọn mẹ ma na dotẹnmẹ mẹdezejo depope do nukọnna nugbonọ-yinyin mítọn dohlan Jehovah Jiwheyẹwhe gba. Juvi susu lẹ to owhe kanweko tintan whenu tẹdo Osẹ́n Mose Tọn po titonu Juvi lẹ tọn po go pẹkipẹki. Ṣogan ojlẹ Jehovah tọn ko wá nado dè dona etọn sọn akọta atẹṣitọ enẹ ji do akọta Islaeli gbigbọmẹ tọn ji. Sọha vude yetọn wẹ yin nugbonọ hlan Jehovah bo diọ sọgbe hẹ diọdo daho ehe lọ. Etlẹ yin to Klistiani nugbonọ lẹ ṣẹnṣẹn, Juvi hẹngogonọ delẹ tẹkudo kọlilẹ yì “madogán ohẹnjẹ ojọgbe mẹ” he yin Osẹ́n Mose Tọn, he ko yin hinhẹndi to Klisti mẹ.—Galatianu lẹ 4:9; 5:6-12; Filippinu lẹ 3:2, 3.

16. Nawẹ devizọnwatọ nugbonọ Jehovah tọn lẹ nọ yigbena vọjlado lẹ gbọn?

¹⁶ To vogbingbọn mẹ, omẹ Jehovah tọn lẹ to egbezangbe ko do yede hia nado yin nugbonọ gbọn ojlẹ diọdo tọn lẹ gblamẹ. Dile hinhọ́n nugbo heyin dide hia lọ tọn to hinhọ́n deji, vọjlado lẹ nọ yin bibasi. (Howhinwhẹn lẹ 4:18) To agọe, “afanumẹ nugbonọ, nuyọnẹntọ lọ” ko gọalọna mí nado hẹn nukunnumọjẹnumẹ mítọn pọnte do hogbe lọ “whẹndo” ji dile e yin zinzan do to Matiu 24:34 mẹ do podọ ojlẹ whẹdida “lẹngbọ lẹ” po “gbọgbọẹ lẹ” po tọn he yin didọ to Matiu 25:31-46, podọ ga pọndohlan mítọn hlan tòzọ́n alọpa delẹ. (Matiu 24:45) Matin ayihaawe atẹṣitọ delẹ na ko yin homẹhunnọ eyin suhugan Kunnudetọ Jehovah Tọn lẹ ko yí hẹngogo do tẹdo nukunnumọjẹnumẹ hosọ mọnkọtọn dai tọn lẹ go bo gbẹ́ nado yinukọn. Onú mọnkọtọn de ma ko jọ gba. Etẹwutu? Omẹ Jehovah tọn lẹ yin nugbonọ.

17. Nawẹ mẹyiwanna lẹ sọgan ze nugbonọ-yinyin mítọn do whlepọn mẹ to whedelẹnu gbọn?

¹⁷ Nalete, whẹho nugbonọ-yinyin tọn zize do asisa agọ̀ mẹ sọgan yinuwado omẹ dopodopo ji. To whenuena họntọn vivẹ de kavi hagbẹ whẹndo tọn de basi nudide nado gbà nunọwhinnusẹ́n Biblu tọn lẹ, mí sọgan mọtolanmẹ dọ mí to yinyin hinhẹn tlẹn to ṣẹnṣẹn nugbonọ-yinyin mítọn tọn. To jọwamọ liho, mí nọ tindo numọtolanmẹ nugbonọ-yinyin tọn hlan hagbẹ whẹndo tọn lẹ. Ṣigba mí ma dona ze mẹdezejo mítọn na hagbẹ whẹndo tọn lẹ donukọnna nugbonọ-yinyin dohlan Jehovah pọ́n gbede gba! (Yijlẹdo 1 Samuẹli 23:16-18 go.) Mí ma dona gọalọna ylanwatọ lẹ nado ṣinyọnnudo ylando sinsinyẹn kavi kọngbedopọ hẹ yé nado jẹagọdo mẹho lẹ he to tintẹnpọn nado “hẹn omẹ mọhunkọ gọ̀ do otẹn etọn mẹ to gbigbọ walọmimiọn tọn mẹ” gba. (Galatianu lẹ 6:1) Mọwiwà na yin nugbonọ-mayin hlan Jehovah, titobasinanu etọn, po omẹ yiwanna de po. To popolẹpo mẹ, nado glọnalina ylandonọ de sọn mẹplọnlọ he e tindo nuhudo etọn mẹ, na nugbo tọn, zẹẹmẹdo aliginglọnna dohia owanyi Jehovah tọn sọn jijẹ omẹ lọ dè mẹ. (Heblu lẹ 12:5-7) Flin, ga, dọ “nugbo wẹ alán họntọn tọn.” (Howhinwhẹn lẹ 27:6) Na nugbo tọn, ayinamẹ owanyi tọn heyin zize sinai do Ohó Jiwheyẹwhe Tọn ji sọgan gbleawuna goyiyi mẹyiwanna he waylan de tọn, ṣigba e sọgan wá yin ogbẹ̀ whlẹngantọ to nukọn mẹ!

Nugbonọ-yinyin Nọ Doakọnnanu Mahopọnna Homẹkẹn

18, 19. (a) Etẹwẹ Ahabi jlo sọn Naboti si, podọ naegbọn Naboti gbẹ́? (b) Be nugbonọ-yinyin Naboti tọn sọzẹn hẹ kọdetọn etọn? Basi zẹẹmẹ.

¹⁸ To whedelẹnu mẹgbeyinyan Satani tọn do nugbonọ-yinyin mítọn ji nọ yin tlọlọ. Lẹnnupọn do whẹho Naboti tọn ji. Whenuena Ahọlu Ahabi gbidikọna ẹn nado sa vẹngle etọn, e gblọn dọmọ: “Oklunọ ni pa ẹ na mi, bọ yẹn nado na ogú otọ́ ṣie lẹ tọn hlan we.” (1 Ahọlu lẹ 21:3) Naboti ma to yinyin tasinyẹntọ gba; e to yinyin nugbonọ. Osẹ́n Mose Tọn degbe dọ Islaelivi depope ma dona sa ogú aigba otọ́ tọn kakadoi gba. (Levitiku 25:23-28) Naboti yọnẹn taun dọ ahọlu kanylantọ ehe sọgan hù emi, na Ahabi ko dike na asi etọn, Jẹzebẹli, ni hù yẹwhegan Jehovah tọn susu lẹ! Ṣogan Naboti nọte gligli.—1 Ahọlu lẹ 18:4.

¹⁹ To whedelẹnu nugbonọ-yinyin nọ biọ nuhọakuẹ de. Jẹzebẹli, po alọgọ ‘sunnu hlònọ’ delẹ tọn po, sawhẹdokọna Naboti na sẹ́nhẹngba de he e ma ko wà. Taidi kọdetọn de, e yin hùhù po visunnu etọn lẹ po. (1 Ahọlu lẹ 21:7-16; 2 Ahọlu lẹ 9:26) Be enẹ zẹẹmẹdo dọ nugbonọ-yinyin Naboti tọn yin nuṣiwa de wẹ? Lala! Naboti tin to sunnu po yọnnu susu nugbonọ lẹ po mẹ he tin to ‘ogbẹ̀’ to oflin Jehovah tọn mẹ todin, to amlọndọ to abọẹmẹ to yọdo mẹ kakajẹ ojlẹ fọnsọnku tọn whenu.—Luku 20:38; Owalọ lẹ 24:15.

20. Nawẹ todido sọgan gọalọna mí nado hẹn nugbonọ-yinyin mítọn go gbọn?

²⁰ Opagbe dopolọ nọ na todido gbẹtọ nugbonọ egbezangbe Jehovah tọn lẹ. Mí yọnẹn dọ nugbonọ-yinyin mítọn sọgan gbleawuna mí sinsinyẹn to aihọn ehe mẹ. Jesu Klisti suahọ na nugbonọ-yinyin etọn po ogbẹ̀ etọn po, podọ e dọna hodotọ etọn lẹ dọ yé ma na yin nuyiwa hẹ pọnte hugan mọ gba. (Johanu 15:20) Dile todido etọn na sọgodo hẹn ẹn dote do, mọjanwẹ mítọn lọsu nọ hẹn mí dote do niyẹn. (Heblu lẹ 12:2) Gbọnmọ dali mí sọgan gbọṣi nugbonọ-yinyin mẹ to homẹkẹn alọpa lẹpo tọn nukọn.

21. Jidide tẹlẹ wẹ Jehovah zedonukọnna omẹ nugbonọ etọn lẹ?

²¹ Nugbo, vude mítọn to egbehe nọ jiya mẹgbeyinyan nugbonọ-yinyin tlọlọ mọnkọtọn tọn. Ṣigba omẹ Jiwheyẹwhe tọn lẹ sọgan pannukọn homẹkẹn suhugan mọ whẹpo opodo lọ nido wá. Nawẹ mí sọgan yin jidenọ nado hẹn nugbonọ-yinyin mítọn go gbọn? Gbọn nugbonọ-yinyin mítọn go hinhẹn todin dali mẹ. Jehovah ko na azọ́ndenamẹ daho de mí—yèdọ yẹwhehodidọ po mẹpinplọn dogbọn Ahọluduta etọn po dali. Mì gbọ mí ni tẹdo azọ́n nujọnu tọn ehe go po nugbonọ-yinyin po. (1 Kọlintinu lẹ 15:58) Eyin mí ma dike na mape gbẹtọ tọn lẹ ni hẹn nugbonọ-yinyin mítọn hlan titobasinanu Jehovah tọn jẹkò podọ eyin mí basi hihọ́ na aliho oklọ nugbomadọ tọn heyin nugbonọ-yinyin zize do asisa agọ̀ mẹ, whenẹnu mí na yin awuwlena ganji eyin nugbonọ-yinyin mítọn tlẹ wá yin whiwhlepọn sinsinyẹn. To popolẹpo mẹ, mí sọgan yin jidenọ dọ Jehovah nọ yin nugbonọ hlan devizọnwatọ nugbonọ etọn lẹ matin awugbopo. (2 Samuẹli 22:26) Mọwẹ, e na basi hihọ́ na omẹ nugbonọ etọn lẹ!—Psalm 97:10.

[Nudọnamẹ Odò Tọn]

Nawẹ Hiẹ Na Na Gblọndo Gbọn?

◻ Nawẹ míwlẹ sọgan dapana didike na mape mẹdevo lẹ tọn ni plan mí biọ nugbomadọ mẹ gbọn?

◻ To aliho tẹlẹ mẹ wẹ mape mítọn lẹ sọgan plan mí biọ walọyizan nugbomadọ tọn mẹ te?

◻ Nawẹ mí sọgan nọavunte sọta linlẹn lọ nado ṣi nugbonọ-yinyin mítọn zan gbọn?

◻ Etẹwẹ na gọalọna mí nado hẹn nugbonọ-yinyin mítọn go etlẹ yin to ojlẹ homẹkẹn tọn lẹ whenu?