Afanumẹ Gbẹtọ Tọn lẹ Kavi Devizọnwatọ Jiwheyẹwhe Tọn Lẹ?

“KUNNUDETỌ JEHOVAH tọn lẹ dona nọ yin pinpọn po nukun nujọnu tọn po.” Mọwẹ owe Allemagnegbè tọn lọ Seher, Grübler, Enthusiasten (Numọtọ lẹ, Nulẹnpọntọ lẹ, po Zohunhunnọ lẹ Po) dọ. Dile etlẹ mọhodọ do Kunnudetọ lẹ go do sọ, e yigbe dọmọ: “To paa mẹ, yé nọ zan gbẹzan he ma tindo mọdọ, yèdọ gbẹzan jlẹkaji tọn de. Yé nọ yin vivẹnunọ po nugbonọ po to azọ́n yetọn mẹ, bo yin tovi abọẹ-abọẹ lẹ po takuẹ-natọ nugbonọ lẹ po. Yé nọ họ̀n na afọdidona adọkunnu zẹjlẹgo lẹ yèdọ dile yé nọ wà na afọdidona gbẹdudu aihọn tọn lẹ do. . . . Mẹplọnlọ he yé nọ do yedelẹ go to plidopọ lẹ ji jẹ na pipà. Gbigbọ mẹde-yido-sanvọ́ tọn yetọn sọzẹn hẹ pipli sinsẹ̀n devo depope tọn; gando lizọnyizọn lọ go yé zẹ̀ mẹdevo lẹpo go. Ṣigba nuhe ze yé daga hugan ṣọṣi Klistiani tọn po pipli devo lẹ po to azán mítọn gbè wẹ gbemima mlẹnmlẹn he ma sọgan yin gbigbà he susu yetọn do nọ lá sinsẹ̀n-nuplọnmẹ yetọn to ninọmẹ lẹpo glọ podọ to owù lẹpo nukọn. . . . Taidi apajlẹ vonọtaun, he to hinhọ́n ta de yé jẹ na osi sisosiso.”a

Mahopọnna pipà dagbe mọnkọtọn lẹ, linlẹn delẹ heyin finfọn dote to Allemagne po otò kleun devo lẹ po mẹ do Kunnudetọ Jehovah tọn lẹ hia to aliho he gbọnvo mlẹnmlẹn de mẹ. To suhugan otò lẹ tọn mẹ lẹdo aihọn pé, Kunnudetọ lẹ ko wà sinsẹ̀nzọn yetọn lẹ to gbangba na owhe ao ao lẹ matin alọhẹndotenamẹ. Gbẹtọ livi susu wẹ yọ́n yé, na sisi yé, bosọ yigbe dọ yé tindo jlọjẹ nado basi sinsẹ̀n yetọn. To whelọnu lo, naegbọn, bọ ayihaawe gando mẹhe Kunnudetọ Jehovah tọn lẹ yin go do tin?

Vlavo whẹwhinwhẹ́n dopo na ayihaawe lọ wẹ yindọ to ojlẹ agọe tọn lẹ mẹ sọha pipli sinsẹ̀n devo lẹ tọn ko tindo mahẹ to fifiẹ do ovi lẹ go mẹ, mẹdehuhu pọmẹ tọn, po gufinfọn mẹgbeyinyan tọn lẹ po mẹ. Na nugbo tọn, onú agọ̀ taidi ehelẹ gbayipe to filẹpo, e mayin to sinsẹ̀nnọ lẹ kẹdẹ ṣẹnṣẹn gba. Etomọṣo, gando sinsẹ̀n go, mẹsusu ko lẹzun ayihaawenọ, mẹdelẹ tlẹ nọ jẹagọdo mlẹnmlẹn.

Owù Gbẹtọ lẹ Hihodo Tọn

“Hagbẹ klandovo de” ko yin zẹẹmẹ basina taidi “pipli de he tẹdo sinsẹ̀n-nuplọnmẹ he gbọnvo de kavi nukọntọ de go.” Mọdopolọ, mẹhe yin “hagbẹ sinsẹ̀n lalo tọn de” tindo “mẹdezejo mlẹnmlẹn hlan mẹde, linlẹn, kavi nude.” Na nugbo tọn, hagbẹ pipli sinsẹ̀n depope tọn he tẹdo nukọntọ gbẹtọ lẹ tọn go sinsinyẹn tin to owù lilẹzun afanumẹ gbẹtọ lẹ tọn mẹ. Haṣinṣan sinsinyẹn yise-to-nukọntọ mẹ tọn sọgan planmẹ jẹ jidedomẹgo numọtolanmẹ po gbigbọmẹ tọn he ma sọgbe de po mẹ. Owù lọ sọgan yin yiyigọna to whenuena mẹde yin pinpọn e go whẹ́n to lẹdo hagbẹ klandovo tọn de mẹ sọn ovuwhenu.

To pọndohlan mẹ na owù mọnkọtọn, hosọ linlinwe Allemagnegbè tọn de to agọe na avase dọmọ: “Sọgbe hẹ azọ́nyọnẹntọ do hagbẹ klandovo lẹ ji, nudi ovi po jọja aflanmẹ 200 000 lẹ po to Allemagne wẹ tin to owù nuyiwahẹmẹ agọ̀ walọyizan gbẹtọ tọn mẹ.” Mẹhe basi alọsọakọn mọnkọtọn lẹ gbọ̀ nuagokun lọ go to whenuena yé yí pọndohlan sinsinyẹn yetọn lẹ zan na Kunnudetọ Jehovah tọn lẹ. Yé sọgan sọalọakọn dọ Kunnudetọ lẹ yin apadewhe titobasinanu sinsẹ̀n tọn de he hẹn hagbẹ etọn lẹ do kanlinmọgbenu, nọ yí huhlọn mlẹnmlẹn zan do yé ji, nọ glọnalina mẹdekannujẹ yetọn zẹjlẹgo, bosọ nọ hẹn yé gbọnvona ogbẹ́ mlẹnmlẹn. Ṣigba be alọsọakọn ehelẹ yin zize sinai do nugbo ji ya?

Kunnudetọ Jehovah tọn lẹ basi oylọ na we nado gbadopọnna na dewe. To dogbapọnnanu sọwhiwhe tọn godo, wá tadona towe titi lẹ kọ̀n. Be Kunnudetọ lẹ yin devizọnwatọ Jiwheyẹwhe tọn lẹ, dile yé sọalọakọn do, kavi afanumẹ gbẹtọ lẹ tọn wẹ yé yin na nugbo tọn ya? Etẹwẹ yin asisa huhlọn yetọn tọn? Hosọ awe he tin to weda 12-23 lẹ na wleawuna gblọndo pekọ tọn lẹ na kanbiọ mọnkọtọn lẹ.

[Nudọnamẹ Odò Tọn]