Be sinsẹ̀n klandovo Amelika tọn de wẹ Kunnudetọ Jehovah tọn lẹ yin ya?

Ahọnkan sinsẹ̀n mítọn tọn tin to États-Unis, Amelika. Etomọṣo, mí ma yin sinsẹ̀n klandovo Amelika tọn de, na whẹwhinwhẹ́n he bọdego ehelẹ wutu:

• Mẹdelẹ nọ dọ dọ sinsẹ̀n klandovo de yin pipli de he klan sọn sinsẹ̀n he ko yin didoai de go. Kunnudetọ Jehovah tọn lẹ ma klan sọn pipli sinsẹ̀n tọn de go. Kakatimọ, sinsẹ̀n Klistiani tọn he ko tin sọn owhe kanweko tintan whenu gbọ́n lọ wẹ mí tẹnpọn bo vọ́ doai.

• Kunnudetọ Jehovah tọn lẹ nọ dọyẹwheho to otò po aigba he hugan 230 po ji. Mahopọnna fidepope he mí nọ nọ̀, Jehovah Jiwheyẹwhe po Jesu Klisti po wẹ mí nọ ze míde jo na pete, e ma yin na gandudu États-Unis tọn kavi gandudu gbẹtọvi tọn devo depope.​—Johanu 15:19; 17:15, 16.

• Nuplọnmẹ mítọn lẹpo wẹ nọ sinai do Biblu ji, yé ma nọ sinai do owe depope he nukọntọ sinsẹ̀n tọn États-Unis tọn de kàn ji gba.​—1 Tẹsalonikanu lẹ 2:13.

• Jesu Klisti wẹ mí nọ hodo, mí ma nọ hodo gbẹtọvi depope taidi nukọntọ.​—Matiu 23:8-10.