Lilatọ Ahọluduta Tọn lẹ Na Linlin
“To Ahi mẹ Egbesọegbesọ”
APỌSTELI Paulu yí dotẹnmẹ hundote lẹpo zan nado hẹn owẹ̀n Ahọluduta lọ tọn gbayipe. Nado sọgan dín mẹhe jẹ lẹ mọ, ewọ yihojlẹdohogo “to sinagọgu mẹ hẹ Ju lẹ . . . podọ to ahi mẹ egbesọegbesọ hẹ omẹ he dukosọ na ẹn lẹ.”—Owalọ lẹ 17:17.
Zohunhun mọnkọtọn ko yin ohia titengbe sinsẹ̀n-basitọ nugbonọ Jehovah tọn lẹ tọn sọn owhe kanweko tintan W.M. gbọ́n. (Matiu 28:19, 20) To egbehe, Kunnudetọ Jehovah tọn lẹ mọdopolọ nọ yí aliho voovo lẹ zan dile yé to zohunhun yí do to alọgọna omẹ ahunjijlọnọ lẹ nado wá oyọnẹn he pegan nugbo tọn kọ̀n. (1 Timoti 2:3, 4) Numimọ he bọdego ehe sọn Australie do ehe hia.
Azán atọ́n to osẹ dopodopo mẹ, Sid po Harold po nọ diọ yedelẹ to nukunpipedo owe Biblu tọn kleun delẹ didohia to pínpàn glintẹn de to Sydney go mẹ. Yé ko to wẹndagbe Ahọluduta Jiwheyẹwhe tọn lá to aliho ehe mẹ na nudi owhe atọ́n lẹ todin. Sid, mẹhe yin owhe 95-mẹvi, basi zẹẹmẹ dọmọ: “To whenuena yẹn lẹzun owhe 87-mẹvi, yẹn ma penugo nado kùn mọto ba. Enẹ hẹn mi jẹflumẹ na yẹn nọ duvivi nuwiwa kunnudide gbangba tọn. Gbedopo dile yẹn sẹpọ lẹdo sadidi tọn he diyin taun de he nọ yin yiylọ dọ Echo Point to Katoomba, yẹn mọ yẹdenanutọ de he to yẹdide whanpẹnọ otò tọn he e sanudo lẹ sà. Yẹn pọ́n yẹdide heyin nusado lẹ ganji bo dọ na dee dọ, ‘Yẹn tindo yẹdide he yọnwhanpẹ hugan enẹlẹ to apo kunnudegbe tọn ṣie mẹ—po akuẹ he whè tlala hugan yẹdide heyin nusado lẹ tọn po!’ Enẹwutu yẹn basi dide nado ze nuhe ji owe lẹ sọgan yin didohia te de dote, ze e dote to saditẹn he diyin de, bo nọ ze owe yọnwhanpẹ Biblu tọn lẹ he nọ yin mima gbọn Kunnudetọ Jehovah tọn lẹ dali donukọnna mẹhe to jujujei lẹ.
“Owhe ẹnẹ die wayi, yẹn sẹtẹn na nuhe ji owe lẹ nọ nọ̀ yì Sydney, podọ Harold kọnawudopọ hẹ mi. Mí nọ diọ mídelẹ to nukunpipedo owe lọ lẹ go po azọ́nwiwa hẹ agun okọ́ mítọn mẹ tọn lẹ po.” Harold, owhe 83-mẹvi todin, dọmọ: “Sọn lundi jẹ vendredi gbẹtọ vude lẹ wẹ nọ tin to whégbè. Enẹwutu owẹ̀n Ahọluduta lọ tọn mima to aliho ehe mẹ nọ hẹn mí jẹ fie gbẹtọ lẹ tin te. To jọwamọ liho, mí nọ mọ kọdetọn dagbe lẹ. Owe lẹ didogbonu mítọn yin vonọtaun tọn na otò ehe.”
“Dile etlẹ yindọ mí ko nọ̀ ofi voovo ẹnẹ kavi atọ́n lẹ to owhe lẹ gblamẹ,” wẹ Sid dọ, “e ma nọ dẹn whẹpo mí do nọ yin yinyọnẹn gba. Mẹdelẹ nọ wá mí dè nado yí owe lẹ. Mẹdevo lẹ nọ tindo kanbiọ he yé to gblọndo dín na lẹ. Podọ mẹdelẹ nọ jlo nado dọho na nukunwhiwhe kleun delẹ poun. Ehe wẹ yin ojlẹ dopo gee lọ mẹ he gọyìpọn ṣie lẹ nọ wá dee,” wẹ e dọ po nukiko yẹsẹ po.
“Mẹsusu tindo ojlo to Biblu mẹ na nugbo tọn,” wẹ Harold yidogọ. “To osun dopo mẹ omẹ ẹnẹ jẹ Biblu plọn hẹ Kunnudetọ lẹ ji na kọdetọn owe he yé mọyi sọn mí dè podọ na kanbiọ lẹ he mí penugo nado na gblọndo yetọn sọn Biblu mẹ wutu. Numimọ lẹ taidi enẹ nọ na tuli mí tlala.”
Taidi Sid po Harold po—podọ taidi apọsteli Paulu—Kunnudetọ Jehovah tọn lẹ to filẹpo nọ yí aliho he yọnbasi lẹpo zan nado hẹn owẹ̀n titengbe yetọn gbayipe. Gbọnmọ dali, “wẹndagbe” lọ to yinyin yẹwheho etọn dọ yinukọn dogọ “to aigba fininọ lẹpo mẹ.”—Matiu 24:14.