Kunnudide to Ahimẹ
TO WHENUENA apọsteli Paulu tin to tòdaho Atẹni tọn mẹ, e nọ yì ahimẹ egbesọegbesọ nado lá wẹndagbe lọ gando Jesu go. (Owalọ 17:17) Paulu de nado nọ yì dọyẹwheho to ahimẹ na finẹ wẹ Atẹninu lẹ nọ zan suhugan whenu yetọn tọn te.
To nudi owhe 2 000 godo, omẹ Jehovah tọn lẹ gbẹ́ nọ dọyẹwheho to ahi lẹ mẹ nado hẹn wẹndagbe Ahọluduta Jiwheyẹwhe tọn gbayipe. Etẹwutu? Na mẹsusu wẹ nọ yin mimọ to finẹ. To egbehe, ahi lọ sọgan yin ṣọfu kavi nusatẹn daho de. To whenuena Kunnudetọ delẹ ko biọgbè ogán nusatẹn de tọn kavi mẹhe tindo nusatẹn lọ godo, yé nọ yí tafo kavi azava kleun de zan nado tẹ́ owe sinai do Biblu ji lẹ.
Di apajlẹ, to nusatẹn daho de to New Jersey, États-Unis, mẹmẹsunnu lẹ tẹ́ owe voovo he dọnmẹdogo lẹ gando hosọ lọ go dọ “Lehe Hiẹ Sọgan Tẹdo Nujinọtedo Whẹndo Tọn lẹ Go Gbọn.” Etẹwẹ yin kọdetọn lọ? To azán dopo gblamẹ, owe 153 sọn ogbè voovo ṣidopo mẹ wẹ yin didogbonu.
Nawe de dọnsẹpọ owe-gbàn he yin titẹ́ lọ bo dotoai po sọwhiwhe po na zẹẹmẹ he dopo to Kunnudetọ lọ lẹ mẹ to bibasi. Nawe lọ kọngbedopọ dọ nujọnu wẹ e yin dọ ojlo Jiwheyẹwhe tọn ni nọ duahunmẹna mí to gbẹzan po whẹndo mítọn po mẹ. E kẹalọyi owe ehelẹ: Plọnnu sọn Mẹplọntọ Daho lọ Dè, Aṣli Ayajẹ Whẹndo Tọn, gọna Kanbiọ He Jọja lẹ Nọ Kanse—Gblọndo He Wazọ́n Lẹ.
To whèmẹ, dawe de gbọn owe-gbàn lọ pá dile e jlo na biọ ṣọfu he sẹpọ finẹ de mẹ. Nukun etọn yì jẹ owe Kanbiọ He Jọja lẹ Nọ Kanse ji. Mẹmẹyọnnu he to ote to owe-gbàn lọ kọ̀n doayi e go dọ dawe lọ tindo ojlo to owe lọ mẹ. Mẹmẹyọnnu lọ kanse e dọmọ: “Be ode to owe lọ lẹ mẹ jlo mì ya?” E yí ota do yigbe bo dlẹnalọdo owe Kanbiọ He Jọja lẹ Nọ Kanse. Whẹpo mẹmẹyọnnu lọ na do ze owe lọ na ẹn, ewọ lọsu ko to alọdlẹn. E dọ dọ ovi atọ̀n wẹ emi tindo. Dile hodọdopọ lọ zindonukọn, e dọ dọ emi nọ dọhodopọ hẹ ovi emitọn lẹ whladopo to osẹ mẹ. Ovi etọn awe tintan lẹ ko biọ owhe aflanmẹ tọn lẹ mẹ. Dile e to nukun yìn gbọn owe lọ mẹ, e dọ dọ e na bọawu na emi nado nọ yí i zan to hodọdopọ whẹndo yetọn tọn delẹ whenu. Wẹnlatọ lọ sọ dọ̀n ayidonugo etọn wá owe lọ Aṣli Ayajẹ Whẹndo Tọn ji, bo hẹn ẹn deji dọ ewọ po asi etọn po na mọ ayinamẹ dagbe delẹ to e mẹ he na gọalọna yé nado nọ basi nudide lẹ to whẹndo yetọn mẹ. Dawe lọ dọnudo e na nuzedonukọnnamẹ enẹ, bo basi nunina bosọ yigbe dọ wẹnlatọ de ni wá dla whẹndo etọn pọ́n.
Nawẹ Kunnudetọ lọ lẹ mọ yẹwhehodidọ nusatẹn tọn lọ do to azán enẹ gbè? “N’duvivi aliho yẹwhehodidọ tọn enẹ tọn taun,” wẹ mẹmẹyọnnu de dọ. “Numimọ dagbe nankọ die!” Mẹmẹyọnnu devo dọmọ: “Jehovah dọ dọ wẹndagbe lọ dona yin lilá kakajẹ opodo aigba tọn. To egbehe, wẹndagbe ehe jẹ gbẹtọ he nọ dó ogbè voovo lẹ dè to Paramus, New Jersey. E vivi na mi tlala dọ n’tindo mahẹ to tito ehe mẹ. Mẹhe doalọ to e mẹ lẹpo wẹ hùnhomẹ. Depope to mí mẹ ma jlo na lẹkọyi whé to whèjai lọ.”
Be hiẹ sọgan hẹn aliho he mẹ a nọ lá wẹndagbe lọ te gbloada dogọ ya? Aliho titengbe he mẹ mí nọ dọyẹwheho te wẹ nado nọ yì sọn whédegbè jẹ whédegbè. (Owalọ 20:20) Ṣigba, be hiẹ sọgan lẹnnupọndo yẹwhehodidọ to ahimẹ kavi to nusatẹn de mẹ ji ya?