Aliho Kunnudide Gbangba Tọn Yọyọ de He Fọnjlodotenamẹ
1. Tuli tẹwẹ yin nina agun he tindo aigba-denamẹ he ji afọzọ̀ntọ susu nọ gbọn lẹ?
1 Agun he tindo aigba-denamẹ he ji afọzọ̀ntọ susu nọ gbọn lẹ ko yin tulina nado basi tito kunnudide gbangba tọn gbọn tafo kavi kẹkẹvi he ji yé na nọ tẹ́ owe mítọn lẹ do lẹ yiyizan dali. Eyin kẹkẹvi de wẹ yin yiyizan, e whè gbau wẹnlatọ dopo na nọte kavi sinai sẹpọ kẹkẹvi lọ. Ṣigba, wẹnlatọ awe wẹ dona nọ tafo de kọ̀n. Mẹhe to kẹkẹvi kavi tafo lọ kọ̀n lẹ dona jọmẹ bo dọnmẹ dogo. Eyin mẹde jẹ wema lọ lẹ pọ́n ji, dopo to wẹnlatọ lọ lẹ mẹ sọgan jẹ hodọ po e po ji, vlavo po kanbiọ ehe po, “Be mì ko kàn nuhe Biblu dọ gando hosọ enẹ go sè mìde pọ́n ya?” To ojlẹ dopolọ mẹ, wẹnlatọ dopo kavi awe devo sọgan to kunnude to aliho mayin aṣa tọn mẹ to mẹtlu delẹ do tafo lọ.
2. Tafo kavi kẹkẹvi he ji owe mítọn lẹ nọ yin titẹdo yiyizan nado dekunnu gbangba tọn yin nujọnu. Na apajlẹ de he do enẹ hia.
2 Aliho kunnudide tọn ehe ko dekọtọn do plọnmẹ Biblu yọyọ susu mẹ. Di apajlẹ, viyọnnu de he to wehọmẹ alavọ tọn basi dide nado kanwe gando Kunnudetọ Jehovah tọn lẹ go, ṣigba e ma penugo nado mọ Plitẹnhọ Ahọluduta tọn de. To osẹ he bọdego mẹ, e mọ tafo he ji owe mítọn lẹ yin titẹdo de to wehọmẹ lọ. Kunnudetọ lẹ jẹ Biblu plọn hẹ ẹ ji, podọ todin e ko yí baptẹm bo nọ doalọ to kunnudide wunmẹ ehe mẹ.
3. Etẹwẹ wẹnlatọ delẹ dọ gando aliho kunnudide tọn yọyọ ehe go?
3 Mẹmẹyọnnu de he duvivi aliho kunnudide gbangba tọn wunmẹ ehe tọn dọmọ: “Mẹdelẹ nọ nọte to tafo kavi kẹkẹvi lọ kọ̀n nado yí linlinnamẹwe agọe tọn lẹ. Mẹdevo lẹ tin bo ma ko sèhó gando Kunnudetọ Jehovah tọn lẹ go pọ́n. N’mọdọ po aliho kunnudide tọn ehe po, owẹ̀n lọ sọgan jẹ mẹsusu dè.” Mẹmẹyọnnu devo dọmọ: “Aliho kunnudide tọn yọyọ he fọnjlodotenamẹ de wẹ ehe yin; mẹlẹ wẹ nọ dọnsẹpọ mí, na owe lọ lẹ nọ fọ́n tlintlindo dindin yetọn dote.”
4. Naegbọn e nọ yin alenu nado nọ ze kẹkẹvi kavi tafo he ji owe mítọn lẹ yin titẹdo lọ do nọtẹn dopolọ, podọ to ogàn dopo lọ lẹ mẹ to sẹmẹsẹmẹ?
4 Alenu wẹ e nọ yin nado ze kẹkẹvi kavi tafo lọ do nọtẹn dopolọ, to azán dopolọ lẹ ji, podọ to ogàn dopolọ lẹ mẹ to sẹmẹsẹmẹ. Ehe nọ zọ́n bọ gbẹtọ lẹ nọ ko mọ owe lọ lẹ whlasusu podọ ehe nọ whàn yé nado wá kàn kanbiọ lẹ sè kavi yí owe lẹ. Be agun towe ko basi tito kunnudide gbangba tọn ya? Eyin mọ wẹ, hiẹ sọgan “lá ahọluduta Jiwheyẹwhe tọn pé” dile a na to mahẹ tindo to aliho kunnudide tọn dagbedagbe he nọ de sinsẹ́n tọ́n ehe lọ mẹ.—Luku 9:60.