Naegbọn Yè Dona Wleawuna Jijọ Dagbe?

DAWE mẹhomẹ Japonnu de he yinkọ etọn yin Kunihito sẹtẹn yì États-Unis to agọe.a To osẹ kleun delẹ godo he e jẹ finẹ, e pannukọn ninọmẹ de tlọlọ he sọgan ko hẹn yanwle gbẹzan tọn etọn gble. Kunihito basi zẹẹmẹ dọmọ: “To whenuena ogán ṣie kanse mi eyin yẹn sọgan kẹalọyi azọngban delẹ, yẹn yin nujikudonọ taun gando alọkikẹyi i go. Ṣogan, na yinyin pinpọn whẹ́n nado pọ́n jlẹkajininọ hlan taidi jijọ dagbe de wutu, yẹn gblọn dọ: ‘Yẹn ma sọgan dọ ẹ taun eyin yẹn sọgan wà ẹ gba, ṣigba yẹn na wà nuhe go yẹn pé lẹpo.’ Hlan ogán Amelikanu ṣie, ehe dọnú taidi dọ yẹn ma pegan bo masọ tindo nujikudo nkọtọn. To whenuena yẹn yọ́n ehe, yẹn yọnẹn dọ yẹn dona basi vọjlado delẹ.”

Maria, he nọ nọ̀ Tòdaho New York tọn mẹ, yin wehọmẹvi dagbe tlala de, bo nọ saba tindo ojlo nado gọalọna klasigbẹ́ etọn lẹ. Juan yin wehọmẹvi hatọ de he nọ dín alọgọ Maria tọn sọn ojlẹ de mẹ jẹ devo mẹ. Ṣigba e sọ nọ tindo ojlo zanhẹmẹ tọn to Maria mẹ bosọ nọ tẹnpọn nado yinuwado ewọ ji. Mahopọnna ojlo etọn nado gbọṣi wiwejininọ mẹ to walọyizan mẹ, Maria joawuna nubiọtomẹsi mawé tọn Juan tọn lẹ bo tindo mahẹ to walọyizan zanhẹmẹ tọn he ma sọgbe mẹ.

Jijọ dagbe didohia to aihọn egbezangbe tọn he tindo aṣa he gbọnvo tlala lẹ bosọ gblezọn to walọyizan liho ehe mẹ yin avùnnukundiọsọmẹnu de na taun tọn. Enẹwutu naegbọn yè dona wleawuna jijọ dagbe? Na walọyizan jijọ dagbe tọn nọ hẹn homẹ Jiwheyẹwhe tọn hùn wutu wẹ, podọ suhugan mítọn wẹ jlo nado tindo nukundagbe etọn na jide tọn.

Ohó Jiwheyẹwhe tọn, Biblu, dotuhomẹna hihiatọ etọn lẹ nado wleawuna jijọ dagbe. Di apajlẹ, apọsteli Paulu wlan dọmọ: “Eyin jijọ dagbe de tin, eyin pipà de tin, mì nọ yí onú helẹ lẹnpọn.” (Filippinu lẹ 4:8) Podọ apọsteli Pita dotuhomẹna mí nado ‘dovivẹnu sinsinyẹn to jijọ dagbe yíyí dogọ yise mítọn’ mẹ. (2 Pita 1:5) Ṣigba etẹwẹ jijọ dagbe yin? Be e sọgan yin pinplọnmẹ to wehọmẹ ya? Nawẹ mí sọgan wleawuna ẹn gbọn?

[Nudọnamẹ Odò Tọn]