Lehe Asuṣiọsi-Yinyin Yinuwado Yọnnu Awe Ji Do
SANDRA yin asuṣiọsi de he nọ nọ̀ Australie. To whenuena asu etọn kú to owhe delẹ die wayi, Sandra tindo numọtolanmẹ flumẹjijẹ pete tọn to afọdopolọji. “Yinyọnẹn to ajiji mẹ dọ yẹn ko hẹn alọwlemẹ po họntọn vivẹ́ hugan ṣie po bu hẹn mi gbọjọ. Yẹn ma sọgan flin lehe yẹn lẹkọ wá whégbè sọn dotowhé lọ gbọn kavi nuhe yẹn wà na pipòtọ azán lọ tọn na taun tọn gba. To osẹ kleun he bọdego lẹ mẹ, obu ṣie lẹ lẹzun awufiẹsa gbọzangbọzan agbasamẹ tọn.”
Sandra tindo họntọn mẹhomẹ de, yèdọ Elaine, he ko yin asuṣiọsi na owhe ṣidopo delẹ. Elaine penukundo asu etọn, David go, na osun ṣidopo whẹpo azọ̀n agbasa wiwọ̀ tọn do hù asu lọ. Awubla etọn siso sọmọ bọ to madẹnmẹ to okú asu etọn tọn godo, ewọ lọsu tọ́nnukun na ojlẹ gli de. Owhe awe to godo mẹ e dáku to gbangba. Doto etọn ma mọ ohia azọ̀n agbasamẹ tọn depope gba. Ṣigba, e mọdọ Elaine ma ko do awubla etọn hia to gbangba wẹ, enẹwutu e dọna ẹn dọ e ni yì whégbè bo dovivẹnu tlala nado viavi. “E yí ojlẹ de nado duto awubla ṣie ji,” wẹ Elaine yigbe dọ, bo yidogọ dọ to whenuena emi tin emide ṣo, “yẹn nọ yì abò mẹ bosọ nọ yí avọ̀ David tọn lẹ ṣinyọ́n ota.”
Mọwẹ, okú alọwlemẹ yiwanna de tọn sọgan hẹn numọtolanmẹ voovo lẹ wá, na asuṣiọsi-yinyin na taun tọn bẹ nususu hẹn hugan gbẹninọ matin asu de poun. Di dohia, Sandra tindo numọtolanmẹ lọ na ojlẹ de dọ emi masọ yin omẹ dopolọ ba. Taidi asuṣiọsi he ṣẹṣẹ hẹn asu yetọn bu devo lẹ, e sọ tindo numọtolanmẹ mẹhe yin hunhundonuvo, bo ma tindo hihọ́ tọn. Sandra flin dọmọ: “Na asu ṣie wẹ ko nọ basi nudide godo tọn lẹ wutu, yẹn yin jijodo dee ṣo to ajiji mẹ nado nọ basi nudide lẹ. Yẹn masọ nọ dámlọn yì tóji ba. Onú nọ ṣikọna mi bọ agbọ́ nọ pé mi. E nọ sinyẹnawu nado yọ́n nuhe dona yin wiwà.”
Numimọ taidi enẹlẹ heyin Sandra po Elaine po tọn nọ wá aimẹ egbesọegbesọ lẹdo aihọn pé. Awutu, owù nujijọ ajiji lẹ, awhàn lẹ, akọ̀ zizasẹ̀, po danuwiwa po to paa mẹ to yiyidogọna sọha he to jijideji asuṣiọsi lẹ tọn.a Susu yọnnu ehelẹ tọn ma nọ do awubla yetọn hia to gbangba gba, yèdọ ma nọ yọ́n nuhe yé na wà. Etẹwẹ họntọn po hẹnnumẹ lẹ po sọgan wà nado gọalọna mẹhe to adadiọ biọ asuṣiọsi-yinyin mẹ lẹ? Hosọ he bọdego tindo ayinamẹ delẹ he sọgan sọawuhia nado yin alọgọnamẹnu.
[Nudọnamẹ Odò Tọn]
a Yọnnu devo lẹ tin to ninọmẹ he taidi asuṣiọsi tọn lẹ mẹ na asu yetọn lẹ ko jo yé do wutu. Dile etlẹ yindọ kinklan po gbẹdai po nọ wleawuna nuhahun vonọtaun yedetiti tọn lẹ, nunọwhinnusẹ́n delẹ heyin hodọdeji to hosọ he bọdego mẹ sọgan sọ gọalọna yọnnu he tin to ninọmẹ ehelẹ mẹ lẹ.