Lilatọ Ahọluduta Tọn lẹ Na Linlin

Nuhudo Gbigbọmẹ Tọn Etọn lẹ Yin Pekọhẹnwana

KIPLU yin lopo de to agọ̀lẹ mẹ agewaji whèzẹtẹn Ohù Méditerranée tọn. To ojlẹ Biblu tọn mẹ, Kiplu diyin na gànvẹẹ po atin dagbe etọn lẹ po wutu. Paulu po Balnaba po lá wẹndagbe Ahọluduta tọn to finẹ to gbejizọnlin mẹdehlan tọn yetọn tintan whenu. (Owalọ lẹ 13:4-12) To egbehe, wẹndagbe lọ gbẹ́ pò to alemọyi hẹn wá na susu mẹhe nọ nọ̀ Kiplu lẹ tọn. Ehe yin nugbo gando Lucas go na taun tọn, yèdọ dawe de he tin to owhe 40 etọn lẹ mẹ. E dọmọ:

“Yẹn yin jiji do whẹndo he tindo ovi ṣinawe de mẹ do ogle fie yè nọ yìn oyìn te de mẹ. Sọn ovu-whenu, yẹn tindo ojlo vẹkuvẹku na wehihia. Owe he yẹn yiwanna hugan wẹ vọkan Owe-wiwe Glẹki Klistiani tọn pẹvi de. To whenuena yẹn yin owhe ao mẹvi, họntọn delẹ po yẹn po wleawuna pipli kleun Biblu pinplọn tọn de. Ṣigba, e ma dẹn-to-aimẹ na mẹhomẹ delẹ to gbétatò lọ mẹ nọ ylọ mí dọ atẹṣitọ lẹ.

“To godo mẹ, to whenuena yẹn to wehọmẹ yì to États-Unis, yẹn dukosọhẹ gbẹtọ lẹ he wá sọn sinsẹ̀n voovo lẹ mẹ. Enẹ vọ́ ojlo ṣie fọ́n dote na onú gbigbọmẹ tọn lẹ. Yẹn yí azán susu zan to wesẹdotẹn alavọ tọn mẹ nado to nuplọn gando sinsẹ̀n voovo lẹ go. Yẹn sọ dla ṣọṣi susu pọ́n, ṣigba mahopọnna vivẹnudido ṣie lẹ, yẹn ma tindo pekọ to gbigbọ-liho janwẹ.

“To whenuena yẹn ko dotana oplọn ṣie godo, yẹn lẹkọwa Kiplu bosọ kẹalọyi azọ́n de taidi anadenanutọ to amasinzọ́nwatẹn de. Dawe mẹhomẹ de he nọ yin Antonis, heyin dopo to Kunnudetọ Jehovah tọn lẹ mẹ, nọ saba dla mi pọ́n to fie yẹn nọ wazọ́n te. Nalete, dlapọn etọn lẹ yin ayidego gbọn Ṣọṣi Orthodoxe Grèce tọn dali.

“To madẹnmẹ, sinsẹ̀n-nuplọnmẹtọ de wá dla mi pọ́n bosọ gbẹ́ na mi ma nado nọ dọho hẹ Kunnudetọ Jehovah tọn lẹ. To whenuena e yindọ yẹn ko yin pinplọn sọn ovu-whenu gbọ́n dọ Ṣọṣi Orthodoxe Grèce tọn wẹ tindo nugbo lọ, yẹn kẹalọyi bo doalọtena hodọdopọ hẹ Antonis bosọ bẹ hodọdopọ sọn Biblu mẹ jẹeji hẹ sinsẹ̀n-nuplọnmẹtọ lọ. Yẹn sọ dla opá sinsẹ̀nhọ tọn susu pọ́n to Kiplu. Yẹn tlẹ sọ zìn gbejizọnlin yì agewaji Grèce tọn bo dla Osó Athos pọ́n, he nọ yin pinpọnhlan taidi osó wiwe hugan to lẹdo sinsẹ̀n Klistiani Orthodoxe tọn mẹ. Ṣogan, kanbiọ Biblu tọn ṣie ma ko mọ gblọndo yí gba.

“Enẹgodo yẹn hodẹ̀ hlan Jiwheyẹwhe nado gọalọna mi nado mọ nugbo lọ. Ojlẹ vude to enẹgodo, Antonis wá dla mi pọ́n whladopo dogọ to fie yẹn nọ wazọ́n te, podọ yẹn mọdọ ehe wẹ yin gblọndo de hlan odẹ̀ ṣie. Enẹwutu yẹn doalọtena sinsẹ̀n-nuplọnmẹtọ lọ dè yìyì bosọ jẹ Biblu plọn hẹ Antonis ji. Yẹn jẹ nukọnyiyi tindo ji, podọ to octobre 1997, yẹn basi yẹhiadonu klandowiwe ṣie tọn hlan Jehovah gbọn baptẹm osin tọn dali.

“Asi ṣie po viyọnnu mítọn mẹho awe lẹ po, he yin owhe 14 po 10 po mẹvi to ojlẹ lọ mẹ, jẹagọdonu to tintan whenu. Ṣigba na walọ dagbe ṣie wutu, asi ṣie basi nudide nado yì opli de to Plitẹnhọ Ahọluduta tọn mẹ. E yin nuyiwadeji sisosiso gbọn homẹdagbe Kunnudetọ lọ lẹ tọn dali podọ gbọn ojlo mẹdetiti tọn he yé dohia dali. Ewọ yin nuyiwadeji na titengbe tọn gbọn aliho he mẹ yé nọ yí Biblu zan te tọn dali. Taidi kọdetọn de, asi ṣie gọna viyọnnu mẹho awe lọ lẹ kẹalọyi oplọn Biblu tọn de hẹ Kunnudetọ Jehovah tọn lẹ. Yí nukun homẹ tọn do pọ́n ayajẹ ṣie to whenuena yé omẹ atọ̀n lẹ yí baptẹm to Plidopọ Agbegbe “Ohó Dọdai Jiwheyẹwhe Tọn” ji to 1999!

“Mọwẹ, dodinnanu ṣie na nugbo lọ yin pekọhẹnwana. Todin whẹndo mítọn blebu, he bẹ asi ṣie gọna ovi ẹnẹ hẹn, tin to kọndopọmẹ to sinsẹ̀n-bibasi wiwe-ṣeke Jehovah tọn mẹ.”