Yin Nuyọnẹntọ bo Dibusi Jiwheyẹwhe!
“Osi [kavi obu] OKLUNỌ tọn wẹ dòdó nuyọnẹn tọn.”—HOWHINWHẸN LẸ 9:10.
1. Naegbọn mẹsusu nọ mọ linlẹn lọ nado dibusi Jiwheyẹwhe taidi nuhe vẹawu nado mọnukunnujẹemẹ?
TO OJLẸ de mẹ wayi, hogbe mẹpipa tọn wẹ e nọ yin nado dlẹnalọdo mẹde taidi budisi Jiwheyẹwhe tọ́. To egbehe, mẹsusu nọ mọ linlẹn lọ nado dibusi Jiwheyẹwhe taidi nuhe ko dohó bosọ vẹawu nado mọnukunnujẹemẹ. Yé sọgan kanse dọ, ‘Eyin Jiwheyẹwhe yin owanyi, naegbọn yẹn na do dibuna ẹn?’ To linlẹn yetọn mẹ, obu yin numọtolanmẹ agọ̀ de he tlẹ sọgan hẹn awukumẹ. Ṣigba, obu nujọnu tọn tintindo na Jiwheyẹwhe zẹẹmẹdo nususu humọ, podọ dile mí na wá mọ do, e ma yin numọtolanmẹ de poun gba.
2, 3. Etẹwẹ obu nujọnu tọn tintindo na Jiwheyẹwhe bẹhẹn?
2 To Biblu mẹ, budisi Jiwheyẹwhe yin jẹhẹnu dagbe de. (Isaia 11:3) Gbégbò daho podọ sisi sisosiso tintindo na Jiwheyẹwhe wẹ e yin, yèdọ ojlo vẹkuvẹku de nado hẹn homẹ etọn hùn. (Psalm 115:11) E bẹ alọkikẹyi po titẹdo nujinọtedo walọ dagbe Jiwheyẹwhe tọn lẹ go gbanun-gbanun po hẹn gọna ojlo lọ nado nọgbẹ̀ sọgbe hẹ nuhe Jiwheyẹwhe dohia taidi dagbe kavi oylan. Owe alọdlẹndonu tọn de dọ dọ obu he sọgbe mọnkọtọn nọtena “pọndohlan titengbe de gando Jiwheyẹwhe go, ehe nọ whànmẹ nado yinuwa po nuyọnẹn po bo dapana ylanwiwa wunmẹ lẹpo.” Abajọ, Ohó Jiwheyẹwhe tọn dọna mí dọ: “Osi [kavi obu] OKLUNỌ tọn wẹ dòdó nuyọnẹn tọn.”—Howhinwhẹn lẹ 9:10.
3 Na nugbo tọn, budisi Jiwheyẹwhe bẹ adà nuyiwa gbẹtọvi tọn susu hẹn. Gbọnvona nuyọnẹn, e sọ yin kinkọndopọ hẹ ayajẹ, jijọho, adọkun, gbẹ̀gaa, todido, tudido, po jidide po. (Psalm 2:11; Howhinwhẹn lẹ 1:7; 10:27; 14:26; 22:4; 23:17, 18; Owalọ lẹ 9:31) E tindo kanṣiṣa pẹkipẹki hẹ yise po owanyi po. Na taun tọn, e gando haṣinṣan mítọn lẹpo hẹ Jiwheyẹwhe podọ hẹ gbẹtọvi hatọ mítọn lẹ go. (Deutelonomi 10:12; Job 6:14; Heblu lẹ 11:7) Budisi Jiwheyẹwhe bẹ nujikudo mlẹnmlẹn lọ hẹn dọ Otọ́ olọn mẹ tọn mítọn nọ hò dopodopo mítọn tọn pọ́n bosọ wleawufo nado jona ylando mítọn lẹ. (Psalm 130:4) Mẹylankan he ma lẹnvọjọ lẹ kẹdẹ wẹ tindo whẹwhinwhẹ́n nado jọsi to Jiwheyẹwhe nukọn.a—Heblu lẹ 10:26-31.
Pinplọn Nado Nọ Dibusi Jehovah
4. Etẹwẹ sọgan gọalọna mí nado “plọn nado nọ dibusi” Jehovah?
4 To whenuena e yindọ budisi Jiwheyẹwhe yin dandannu nado sọgan basi nudide nuyọnẹn tọn lẹ bo mọ dona Jiwheyẹwhe tọn lẹ yí, nawẹ mí sọgan “plọn nado nọ dibusi” Jehovah to aliho he sọgbe mẹ gbọn? (Deutelonomi 17:19) Apajlẹ susu sunnu po yọnnu budisi Jiwheyẹwhe tọ́ lẹ tọn po yin kinkàndai to Owe-wiwe mẹ “na oplọn mítọn.” (Lomunu lẹ 15:4) Nado sọgan mọnukunnujẹ nuhe e zẹẹmẹdo nugbonugbo nado dibusi Jiwheyẹwhe mẹ, mì gbọ mí ni lẹnnupọndo gbẹzan dopo to omẹ enẹlẹ mẹ tọn ji, yèdọ Ahọlu Davidi Islaeli hohowhenu tọn.
5. Nawẹ lẹngbọ-yìnyìn gọalọna Davidi nado plọn obu Jehovah tọn gbọn?
5 Jehovah gbẹ́ ahọlu tintan Islaeli tọn, Sauli dai, na e dibuna gbẹtọ lẹ bo gboawupo nado dibusi Jiwheyẹwhe wutu. (1 Samuẹli 15:24-26) To alọ devo mẹ, gbẹzan Davidi tọn po haṣinṣan pẹkipẹki etọn hẹ Jehovah po do e hia taidi dawe budisi Jiwheyẹwhe tọ́ de. Sọn ovu whenu, Davidi nọ saba tin to gbonu nado yìn lẹngbọ otọ́ etọn tọn lẹ. (1 Samuẹli 16:11) Ozán susu he Davidi yizan nado to lẹngbọ yìn to gbangba lẹ sọgan ko gọalọna ẹn nado mọnukunnujẹ obu Jehovah tọn mẹ. Dile etlẹ yindọ adà kleun de janwẹ Davidi sọgan mọ sọn wẹkẹ gblagada lọ go, e wá tadona he sọgbe lọ kọ̀n—enẹ wẹ yindọ Jiwheyẹwhe jẹna sisi po sinsẹ̀n-bibasi mítọn po. E wlan to godo mẹ dọmọ: “Whenuena yẹn lẹn olọn towe lẹ pọ́n, azọ́n alọviyẹyẹ towe tọn lẹ, osun po sunwhlẹvu lẹ po he hiẹ ko zẹ̀ali dai na; etẹwẹ gbẹtọ, bọ hiẹ do to nuflin jẹ e go? Podọ ovi gbẹtọ tọn, bọ hiẹ do to didla ẹ pọ́n?”—Psalm 8:3, 4.
6. Numọtolanmẹ tẹwẹ Davidi tindo to whenuena e mọ kiklo-yinyin Jehovah tọn?
6 Nuhe sọgbe wẹ e yin dọ awuji Davidi to whenuena e yí whiwhè ede tọn jlẹdo olọn yinukundomọ gblagada lọ go. Kakati oyọnẹn ehe nido dobuna ẹn, e whàn ẹn nado pà Jehovah dọmọ: “Olọn lẹ to gigo Jiwheyẹwhe tọn hodọ; agahomẹ sọ to alọnuzọ́n etọn lá.” (Psalm 19:1) Gbégbò he Davidi tindo na Jiwheyẹwhe ehe dọ̀n ẹn sẹpọ Jehovah dogọ bosọ hẹn ẹn tindo ojlo nado hodo aliho pipé Etọn lẹ. Lẹnnupọndo numọtolanmẹ Davidi tọn ji to whenuena e jihàn hlan Jehovah dọmọ: “Hiẹ klo, bosọ nọ wà nujiawu: hiẹ dopokẹdẹ wẹ Jiwheyẹwhe. OKLUNỌ E, plọn ali towe mi; yẹn na nọ zinzọnlin to nugbo towe mẹ; hẹn ayiha ṣie do dopo nado nọ dibusi oyín towe.”—Psalm 86:10, 11.
7. Nawẹ budisi Jiwheyẹwhe gọalọna Davidi nado hoavùn hẹ Goliati gbọn?
7 To whenuena Filistininu lẹ yangbé aigba Islaeli tọn, dawe asuka yetọn Goliati he dibla dite sọ mẹtlu atọ̀n, deafu do Islaelivi lẹ, bo dọ to kleun mẹ dọmọ: ‘Mì de mẹdopo nado pehẹ mi tlọlọ! Eyin e duto ji e, mí na lẹzun mẹmẹsi mìtọn.’ (1 Samuẹli 17:4-10) Sauli po awhànpa etọn blebu po tin to obu ji, ṣigba Davidi ma savò gba. E yọnẹn dọ gbẹtọ depope, mahopọnna lehe e tindo huhlọn sọ, ma dona yin budisi, adavo Jehovah kẹdẹ. “Yẹn ja dè we to oyín OKLUNỌ awhànpa lẹ tọn mẹ,” wẹ Davidi dọhlan Goliati, “na agunpipli he lẹpo nido yọnẹn dọ OKLUNỌ ma nọ yí ohí po owhán po do whlẹnmẹ gba: na OKLUNỌ tọn wẹ awhàn lọ.” Po akòtopẹ́ etọn gọna zannu dopo tata po—podọ gbọn alọgọ Jehovah tọn gblamẹ—Davidi hò dawe gángánsu lọ liai.—1 Samuẹli 17:45-47.
8. Etẹwẹ apajlẹ Biblu tọn he gando budisi Jiwheyẹwhe tọ́ lẹ go plọn mí?
8 Vlavo mí to pipehẹ aliglọnnamẹnu kavi kẹntọ he sẹhundaga taidi dehe Davidi diahi hẹ lẹ. Etẹwẹ mí sọgan wà? Mí sọgan pehẹ yé kẹdẹdile Davidi po nugbonọ hohowhenu tọn devo lẹ po wà do—yèdọ po obu Jiwheyẹwhe tọn po. Obu Jiwheyẹwhe tọn sọgan duto obu gbẹtọ tọn ji. Devizọnwatọ nugbonọ Jiwheyẹwhe tọn Nẹhemia dotuhomẹna Islaelivi hatọ etọn he kẹntọ lẹ to kọgbidina lẹ dọmọ: “Mì yin avosatọ yetọn blo: mì nọ flin OKLUNỌ, he yin daho dobu.” (Nẹhemia 4:14) Po godonọnamẹ Jehovah tọn po, Davidi, Nẹhemia po devizọnwatọ nugbonọ Jiwheyẹwhe tọn devo lẹ po tindo kọdetọn dagbe to azọngban he Jiwheyẹwhe dena yé lẹ hinhẹndi mẹ. Po obu Jiwheyẹwhe tọn po, mílọsu sọgan wàmọ.
Pipehẹ Nuhahun lẹ po Obu Jiwheyẹwhe Tọn Po
9. Ninọmẹ tẹlẹ mẹ wẹ Davidi do obu Jiwheyẹwhe tọn hia te?
9 To whenuena Davidi ko hù Goliati godo, Jehovah na ẹn awhàngbigba susu dogọ. Ṣigba, Sauli awuwhàntọ tẹnpọn nado hù Davidi—tintan to ajijimẹ, awetọ gbọn ayiha wintinwintin yiyizan dali, podọ to godo mẹ po awhànpa de po. Dile etlẹ yindọ Jehovah ko na jide Davidi dọ ewọ na wá duahọlu, Davidi dona họ̀njẹgbé na owhe susu, bo hoavùn, bosọ nọtepọn ojlẹ Jehovah tọn nado yí ì do doahọlu. To ehe lẹpo mẹ, Davidi dohia dọ emi nọ dibusi Jiwheyẹwhe nugbo lọ.—1 Samuẹli 18:9, 11, 17; 24:2.
10. Nawẹ Davidi do obu Jiwheyẹwhe tọn hia to whenuena e tin to owù mẹ gbọn?
10 To nujijọ de mẹ, Davidi yì dín fibẹtado to Akiṣi he yin ahọlu Gati tọn dè, yèdọ tòdaho Filistininu lẹ tọn he mẹ Goliati wá sọn. (1 Samuẹli 21:10-15) Devizọnwatọ ahọlu lọ tọn lẹ de Davidi gbà taidi kẹntọ akọta yetọn tọn. Nawẹ Davidi yinuwa to ninọmẹ owù tọn enẹ mẹ gbọn? E kọ̀n ahun etọn jẹgbonu hlan Jehovah to odẹ̀ mẹ. (Psalm 56:1-4, 11-13) Dile etlẹ yindọ Davidi dona yinuwa taidi alẹnọ nado họ̀ngán, e yọnẹn dọ na taun tọn, Jehovah wẹ whlẹn ẹn gán gbọn didona vivẹnudido etọn lẹ dali. Ahundopo he Davidi yí do ganjẹ Jehovah go po jidide he e tindo to ewọ mẹ po dohia dọ e nọ dibusi Jiwheyẹwhe nugbonugbo.—Psalm 34:4-6, 9-11.
11. Nawẹ mí sọgan do obu Jiwheyẹwhe tọn hia to whlepọn glọ dile Davidi wà do gbọn?
11 Taidi Davidi, mí sọgan do obu Jiwheyẹwhe tọn hia gbọn jidide do opagbe etọn go dọ e na gọalọna mí nado duto nuhahun mítọn lẹ ji dali. “Jo ali towe do alọ OKLUNỌ tọn mẹ, dotudo e go ga; ewọ nasọ basi i,” wẹ Davidi dọ. (Psalm 37:5) Ehe ma zẹẹmẹdo dọ mí nọ ze nuhahun mítọn lẹ do alọ Jehovah tọn mẹ poun bo ma nọ yí nudepope wà bosọ nọ donukun dọ ewọ na didẹ yé na mí. Davidi ma hodẹ̀ hlan Jiwheyẹwhe na alọgọ bo jo whẹho lọ lẹ do domọ poun gba. E yí nugopipe agbasa tọn po apọ̀nmẹ tọn he Jehovah na ẹn lẹ po zan nado pehẹ nuhahun he e pannukọn lọ. Ṣogan, Davidi yọnẹn dọ vivẹnudido gbẹtọ tọn kẹdẹ ma sọgan hẹn kọdetọn dagbe wá. Nudopolọ wẹ mílọsu dona wà. Eyin mí ko wà nuhe go mí pé lẹpo, mí dona jo dehe pò do alọ Jehovah tọn mẹ. Na nugbo tọn, to ninọmẹ susu mẹ, mí ma sọgan wà nudepope hugan nado ganjẹ Jehovah go. Fihe dopodopo mítọn nọ do budisi Jiwheyẹwhe hia te niyẹn. Mí sọgan mọ homẹmimiọn yí sọn hodidọ ahundopo Davidi tọn mẹ dọmọ: “Aṣli OKLUNỌ tọn tin to yé he dibusi i lẹ dè.”—Psalm 25:14.
12. Naegbọn mí dona nọ ylọ odẹ̀ mítọn lẹ dọ nujọnu, podọ walọyizan tẹwẹ mí ma dona dohia gbede?
12 Enẹwutu, mí dona nọ ylọ odẹ̀ mítọn lẹ po haṣinṣan mítọn hẹ Jiwheyẹwhe po dọ nujọnu. Eyin mí dọnsẹpọ Jehovah, mí dona “yise dọ e tin, podọ ewọ wẹ ahọsutọ yé he whesọ do dín in lẹ tọn.” (Heblu lẹ 11:6; Jakobu 1:5-8) Podọ to whenuena e gọalọna mí, mí dona “nọ dopẹ́,” kẹdẹdile apọsteli Paulu na ayinamẹ etọn mí do. (Kọlọsinu lẹ 3:15, 17) Mí ma dona tin taidi mẹhe Klistiani yiamisisadode numimọnọ de basi zẹẹmẹ yetọn dole: “Yé nọ pọ́n Jiwheyẹwhe hlan taidi lizọnyitọ olọn mẹ tọn de. Eyin yé tindo nuhudo nude tọn, yé nọ jlo nado mìalọ hlan ẹn na e ni wá. Podọ eyin yé ko mọ nuhe dín yé te, yé nọ jlo dọ e ni lẹkọyi sọn nukọn yetọn.” Walọyizan mọnkọtọn nọ do obu Jiwheyẹwhe tọn matindo hia.
To Whenuena Obu Jiwheyẹwhe Tọn Depò
13. Whetẹnu wẹ Davidi gboawupo nado na sisi Osẹ́n Jiwheyẹwhe tọn?
13 Alọgọ he Davidi mọyi sọn Jehovah dè to ojlẹ ayimajai tọn mẹ hẹn obu etọn na Jiwheyẹwhe siso deji bosọ hẹn jidide etọn to ewọ mẹ lodo. (Psalm 31:22-24) Nalete, to nujijọ ayidego tọn atọ̀n delẹ mẹ, obu he Davidi tindo na Jiwheyẹwhe depò, bọ ehe hẹn nugbajẹmẹji sinsinyẹn lẹ wá. Nujijọ tintan lọ gando tito he e basi go nado yí kẹkẹ de do sẹtẹnna aki alẹnu Jehovah tọn yì Jelusalẹm kakati nido yin to abọ́ Levinu lẹ tọn ji, kẹdẹdile Osẹ́n Jiwheyẹwhe tọn degbè etọn do. To whenuena Uza, he to kẹkẹ lọ dọ̀n, doalọ Aki lọ go nado hẹn ẹn dote, e kú to afọdopolọji na “nuṣiwa” kavi nuyiwa mẹmasi tọn etọn wutu. Nugbo wẹ dọ ylando sinsinyẹn de wẹ Uza wà, ṣigba yigodo yinukọn, awugbopo Davidi tọn nado na sisi he jẹ Osẹ́n Jiwheyẹwhe tọn wẹ hẹn nugbajẹmẹji enẹ wá. Budisi Jiwheyẹwhe zẹẹmẹdo nado nọ yí nulẹ wà sọgbe hẹ tito etọn.—2 Samuẹli 6:2-9; Osọha lẹ 4:15; 7:9.
14. Etẹwẹ yin kọdetọn lọ to whenuena Davidi hia omẹ Islaeli tọn lẹ?
14 Enẹgodo, to nuyiwadomẹji Satani tọn glọ, Davidi hia awhànfuntọ Islaeli tọn lẹ. (1 Otannugbo lẹ 21:1) To mọwiwà mẹ, Davidi dohia dọ obu etọn na Jiwheyẹwhe ko depò, ehe dekọtọn do okú Islaelivi 70 000 tọn mẹ. Dile etlẹ yindọ Davidi lẹnvọjọ to Jehovah nukọn, ewọ po mẹhe lẹdo e lẹ po jiya sinsinyẹn.—2 Samuẹli 24:1-16.
15. Etẹwẹ hẹn Davidi nado jai jẹ ylando zanhẹmẹ tọn mẹ?
15 To whedevonu he obu Davidi tọn na Jiwheyẹwhe depò na ojlẹ gli de, ehe hẹn ẹn tindo kọndopọ zanhẹmẹ tọn hẹ Bati-ṣeba, asi Ulia tọn. Davidi yọnẹn dọ ayọdide kavi etlẹ yin ojlo tintindo na alọwlemẹ mẹdevo tọn ma sọgbe. (Eksọdusi 20:14, 17) Nuhahun lọ bẹjẹeji dile nukun Davidi tọn yì dukosọ hẹ Bati-ṣeba to whenuena e to awulẹ. Obu he sọgbe tintindo na Jiwheyẹwhe dona ko whàn Davidi to afọdopolọji nado de nukun etọn sẹ̀ bo ze ayiha etọn do nudevo ji. Kakatimọ, e họnwun dọ Davidi ‘to pinpọn ẹn zọnmii’ kakajẹ whenue ojlo zogbe owanyi tọn yitẹn to obu etọn na Jiwheyẹwhe si. (Matiu 5:28; 2 Samuẹli 11:1-4) Davidi wọnji dọ adà gbẹzan etọn tọn lẹpo mẹ wẹ Jehovah tindo ojlo te.—Psalm 139:1-7.
16. Nugbajẹmẹji tẹlẹ wẹ Davidi jiya etọn na nuṣiwa etọn wutu?
16 Visunnu de yin jiji sọn kọndopọ Davidi tọn hẹ Bati-ṣeba mẹ. Ojlẹ kleun de to enẹgodo, Jehovah do yẹwhegán etọn Natani hlan nado de ylando Davidi tọn hia ẹ. Davidi gọ̀ biọ ede mẹ, bo vọ́ awuwlena obu etọn na Jiwheyẹwhe, bosọ lẹnvọjọ. E vẹ̀ Jehovah ma nado gbẹ́ ẹ dai kavi yí gbigbọ wiwe Etọn sọn e dè. (Psalm 51:7, 11) Jehovah jona Davidi bo de yasanamẹ lọ pò, ṣigba E ma basi hihọ́na ẹn sọn kọdetọn ylankan nuyiwa etọn tọn lẹpo mẹ gba. Visunnu Davidi tọn kú, podọ sọn whenẹnu sọyi whẹndo etọn jiya awubla po nugbajẹmẹji po tọn. Ahọ́ daho nankọtọn die he yin súsú na obu Jiwheyẹwhe tọn he depò wutu!—2 Samuẹli 12:10-14; 13:10-14; 15:14.
17. Basi dohia awubla he ylanwiwa nọ hẹnwa tọn.
17 Mọdopolọ to egbehe, awugbopo nado dibusi Jiwheyẹwhe to whẹho walọ dagbe tọn lẹ mẹ sọgan hẹn nugbajẹmẹji sinsinyẹn he na dẹn-to-aimẹ lẹ wá. Yí nukun homẹ tọn do pọ́n awufiẹsa asi jọja de tọn to whenuena e sè dọ asu etọn he yin Klistiani de ma yin nugbonọ na ẹn to ojlẹ he mẹ e yì wazọ́n to tògodo. E dokọdò po awubla daho po, ṣinyọ́n alọ nukunmẹ bo viavi badabada. Nawẹ e na dẹnsọ whẹpo e nasọ dejido asu etọn go bo na ẹn sisi? Nugbajẹmẹji ylankan mọnkọtọn lẹ sọgan yin didapana gbọn obu nujọnu tọn tintindo na Jiwheyẹwhe dali.—1 Kọlintinu lẹ 6:18.
Obu Jiwheyẹwhe Tọn Nọ Glọnalina Mí Ma Nado Waylan
18. Etẹwẹ yin yanwle Satani tọn, podọ aliho nuyiwa tọn tẹwẹ e nọ yizan?
18 Satani to nujinọtedo walọ dagbe aihọn tọn lẹ hẹnflu po awuyiya po, podọ na taun tọn e jlo na hẹn Klistiani nugbo lẹ gblezọn. Nado jẹ yanwle ehe kọ̀n, e nọ yí aliho he yì ahun po ayiha mítọn po mẹ tlọlọ zan—yèdọ gbọn awutugonu numọtolanmẹ tọn mítọn lẹ gblamẹ, titengbe nukun po otó mítọn lẹ po. (Efesunu lẹ 4:17-19) Nawẹ hiẹ na yinuwa gbọn eyin a wá tọ́n jẹ yẹdide, hodidọ, kavi gbẹtọ gblewanọ lẹ ji to ajijimẹ?
19. Nawẹ obu Jiwheyẹwhe tọn gọalọna Klistiani de nado duto whlepọn ji gbọn?
19 Lẹnnupọndo apajlẹ mẹho agun tọn he nọ yin Andréb tọn ji, he yin otọ́ podọ dotozọ́nwatọ de to Europe. Eyin André to azọ́nwa to dotowhé to zánmẹ, azọ́nwatọgbẹ́ yọnnu lẹ nọ tẹ́ wekanhlanmẹ owanyi tọn kleun kleun lẹ do kọ̀donu etọn go gbọzangbọzan, ehe nọ to oylọ-basina ẹn nado tindo kọndopọ zanhẹmẹ tọn hẹ yé. André gbọn tenọgligo-hinhẹn dali gbẹ́ nado lẹnnupọndo nuzedonukọnnamẹ yetọn ji. Humọ, nado de ede sọn lẹdo ylankan lọ mẹ, e dín azọ́n do fidevo. Budisi Jiwheyẹwhe sọawuhia nado yin nuyọnẹnnu bo hẹn dona lẹ wá na André, na to egbehe, e to devizọn ojlẹ gli tọn wà to alahọ Kunnudetọ Jehovah tọn lẹ tọn mẹ to otò etọn mẹ.
20, 21. (a) Nawẹ obu Jiwheyẹwhe tọn sọgan gọalọna mí nado dapana ylanwiwa gbọn? (b) Etẹwẹ na yin dogbapọnna to hosọ he bọdego mẹ?
20 Nulinlẹnpọn glanglan do linlẹn agọ̀ lẹ ji sọgan hẹn mẹde tindo ayilinlẹn lọ nado gbẹkọ haṣinṣan họakuẹ etọn hẹ Jehovah go nado sọgan mọ nuhe e ma tindo jlọjẹ etọn de yí. (Jakobu 1:14, 15) To alọ devo mẹ, eyin mí nọ dibusi Jehovah, mí na nọla, kavi họ̀nna gbẹtọ, nọtẹn, nuwiwa, po ayidedai lẹ po he sọgan hẹn mí nado de aṣejininọ mítọn pò to walọyizan-liho. (Howhinwhẹn lẹ 22:3) Mahopọnna winyan kavi avọ́sinsan depope he e sọgan biọ to mí si, enẹ pọnte hú nukundagbe Jiwheyẹwhe tọn hinhẹnbu. (Matiu 5:29, 30) Na nugbo tọn, budisi Jiwheyẹwhe zẹẹmẹdo ma nado joawuna onú mawé depope sọn ojlo mẹ wá, ehe bẹ yẹdide fẹnnuwiwa tọn wunmẹ lẹpo hẹn. Kakatimọ, mí dona nọ de nukun mítọn sẹ̀ “sọn ovọ́ pinpọn go.” Eyin mí wàmọ, mí sọgan deji dọ Jehovah na “nagbẹ̀” mí bo na wleawu nuhe mí tindo nuhudo etọn nugbonugbo lẹpo tọn na mí.—Psalm 84:11; 119:37.
21 Na nugbo tọn, nuyọnẹnnu wẹ e nọ yin to whepoponu nado yinuwa po obu nujọnu tọn tintindo na Jiwheyẹwhe po. E sọ yin asisa ayajẹ nujọnu tọn ga. (Psalm 34:9) Ehe na yin hinhẹn họnwun to hosọ he bọdego mẹ.
[Nudọnamẹ Odò Tọn]
a Pọ́n hosọ lọ “Craindre un Dieu d’amour: en quel sens?” to zinjẹgbonu Réveillez-vous! 8 janvier 1998 tọn mẹ, he Kunnudetọ Jehovah tọn lẹ zinjẹgbonu.
b Yinkọ lọ ko yin didiọ.
Be Hiẹ Sọgan Basi Zẹẹmẹ Ya?
• Jẹhẹnu Klistiani tọn tẹlẹ wẹ obu Jiwheyẹwhe tọn bẹhẹn?
• Nawẹ obu Jiwheyẹwhe tọn sọgan duto obu gbẹtọ tọn ji gbọn?
• Nawẹ mí sọgan dohia gbọn dọ mí tindo pọndohlan he sọgbe gando odẹ̀ go?
• Nawẹ obu Jiwheyẹwhe tọn sọgan glọnalina mí ma nado waylan gbọn?
[Yẹdide to weda 23]
Davidi plọn obu Jiwheyẹwhe tọn to whenuena e mọ alọnuzọ́n Jehovah tọn
[Yẹdide to weda 24]
Nawẹ hiẹ na yinuwa gbọn eyin a pehẹ ninọmẹ whlepọn tọn de to ajijimẹ?