Be Hiẹ Flin Ya?

Be hiẹ ko yọ́n pinpẹn zinjẹgbonu agọe Atọ̀họ̀-Nuhihọ́ Lọ Tọn lẹ tọn hihia ya? Eyọn, pọ́n vlavo eyin hiẹ sọgan na gblọndo na kanbiọ he bọdego helẹ:

• Tito-to-whinnu he gando Yẹwhehodidọ Osó ji tọn go tẹwẹ hiẹ sọgan hodo nado de apọṣimẹ pò?

To azán dopodopo gbè, hiẹ sọgan hia dopo to nuplọnmẹ tangan Jesu tọn he sọawuhia to yẹwhehodidọ enẹ mẹ kavi to fidevo to Wẹndagbe lẹ mẹ. Gbọn ayihamẹlinlẹnpọn do nuplọnmẹ enẹ ji bo dín nado yí ì do yizan mẹ dali, e yọnbasi dọ hiẹ na mọ ayajẹ susugege bo de apọṣimẹ pò.—15/12, weda 12-14.

• Whẹwhinwhẹ́n dagbe atọ̀n tẹlẹ wutu wẹ mẹho agun tọn lẹ dona plọnazọn devizọnwatọ lizọnyizọnwiwa tọn lẹ nado didá azọngban dogọ lẹ?

Na sọha Kunnudetọ Jehovah tọn lẹ tọn he to jijideji wutu, sunnu nugopetọ susu dogọ yin nuhudo etọn tindo nado gọalọna mẹhe ṣẹṣẹ yí baptẹm lẹ nado yinukọn. Yọnhowhe kavi nuhahun agbasalilo tọn lẹ ko de azọ́n he mẹho whenu-dindẹn tọn delẹ sọgan wà todin pò. Podọ mẹho nugopetọ delẹ to nukunpedo azọngban devo lẹ go zẹ̀ agun yetọn tọn go, enẹwutu yé sọgan nọma penugo nado wà susọ lehe yé ko nọ wà do dai to agun yetọn mẹ.—1/1, weda 29.

• Nawẹ gbẹtọ lẹ dejido yẹwhe he mayin nujọnu lẹ go gbọn?

Mẹsusu nọ sẹ̀n yẹwhe sinsẹ̀n yetọn tọn lẹ, ṣigba ehelẹ sọgan yin yẹwhe he ma tindo gbọfufu lẹ poun he ma sọgan whlẹnmẹ dile Baali ma sọgan wà do to azán Elija tọn gbè. (1 Ahọlu lẹ 18:26, 29; Psalm 135:15-17) Mẹdevo lẹ nọ sẹ̀n omẹ nukundeji ayidedai tọn lẹ kavi aihundatọ lanmẹyiya tọn lẹ, he ma sọgan wleawuna todido nujọnu tọn depope na sọgodo. To vogbingbọn mẹ, Jehovah tin na nugbo tọn bo nọ hẹn lẹndai etọn lẹ di.—15/1, weda 3-5.

• Etẹwẹ mí sọgan plọn sọn aliho he mẹ Kaini yinuwa hlan avase Jiwheyẹwhe tọn te mẹ?

Jiwheyẹwhe ko na mí mẹdekannujẹ, podọ mí sọgan de nado wà nuhe sọgbe kakati nado lẹkọ sọn dagbewiwa kọ̀n, dile Kaini wà do. Kandai Biblu tọn lọ sọ dohia dọ Jehovah nọ hẹn whẹdida etọn ṣẹ do mẹhe ma lẹnvọjọ lẹ ji.—15/1, weda 22-3.

• Naegbọn wiwejininọ do yin onú titengbe todin?

Po aliho gbẹninọ tọn he to didiọ po, mẹsusu ma nọ yí whenu susu zan nado hẹn owhé yetọn do wiweji dile yé ko nọ wà do dai ba. Gbigbẹkọ wiwejininọ go gando núdùdù po osin po go sọgan ze agbasalilo do owù mẹ. To yidogọmẹ na wiwejininọ agbasa tọn, Biblu zinnudo ayidonugo nina hlan wiwejininọ gbigbọmẹ, walọyizan, po apọ̀nmẹ tọn po ji.—1/2, weda 3-6.

• Gando kunnudetọ he jẹnukọnna ojlẹ Klistiani tọn lẹ go, Paulu dọ dọ yé ma na ‘yin hinhẹn sọgbe matin míwlẹ gba.’ Nawẹ enẹ yinmọ gbọn? (Heblu lẹ 11:40)

To owhe Fọtọ́n he ja lọ whenu, Klisti po mẹmẹsunnu yiamisisadode etọn he tin to olọn mẹ lẹ po, he to nuyiwa taidi ahọlu po yẹwhenọ lẹ po, na hẹn alemọyi ofligọ lọ tọn lẹ wá na mẹhe yin finfọnsọnku lẹ. Omẹ nugbonọ mọnkọtọn lẹ po dehe yin nùdego to Heblu lẹ weta 11 mẹ lẹ po na gbọnmọ dali ‘yin hinhẹn sọgbe.’—1/2, weda 23.

• Etẹ dọ wẹ Paulu te to whenuena e dọna Heblunu lẹ dọmọ: “Mìwlẹ ma saa ko pannukọn avùn jẹ ohùn [kọ̀n]”? (Heblu lẹ 12:4)

Nuhe dọ e te wẹ nado doakọnnanu kakajẹ okú. Apajlẹ whenuho mẹhe ko yin nugbonọ kakajẹ okú lẹ tọn tin. Dile etlẹ yindọ Heblunu he Paulu wlanwe hlan lẹ ma ko yin whiwhlepọn jẹ obá enẹ mẹ, yé dona yinukọn jẹ whinwhẹ́n kọ̀n, bo hẹn yise yetọn lodo nado doakọnna nudepope he yé sọgan pannukọn.—15/2, weda 29.

• Naegbọn e na yọnhugan ma nado nọ dọ dọ lẹblanu Jehovah tọn nọ de huhlọn pò na whẹdida dodo etọn?

To ogbè delẹ mẹ, “depò” sọgan zẹẹmẹdo nado hẹn onú do jlẹkaji kavi glọnalina ẹn. Jehovah yin Jiwheyẹwhe whẹdida dodo po lẹblanu po tọn, podọ to jẹhẹnu enẹlẹ didohia mẹ, awe lẹ nọ yì afọsu-afọsi. (Eksọdusi 34:6, 7; Deutelonomi 32:4; Psalm 116:5; 145:9) Lẹblanu ma dona de huhlọn pò kavi glọnalina whẹdida dodo Jehovah tọn gba.—1/3, weda 30.

• Be e sọgbe na Klistiani de nado hẹn oṣiọ mẹyiwanna de tọn gbọṣi aimẹ gbọn amasin yiyizan dali ya?

Oṣiọ hinhẹn gbọṣi aimẹ gbọn amasin yiyizan dali yin aliho de nado whlá oṣiọ sọta wanvu. Omẹ hohowhenu tọn delẹ nọ hodo aṣa lọ na whẹwhinwhẹ́n sinsẹ̀n tọn lẹ wutu. Enẹ ma dona yinmọ na sinsẹ̀n-basitọ nugbo lẹ gba. (Yẹwhehodọtọ 9:5; Owalọ lẹ 24:15) Oṣiọ hinhẹn gbọṣi aimẹ na hẹn nuhe mananọma jọ lọ dọngbàn poun wẹ, yèdọ agbasa na lẹkọ do kọ́gudu mẹ. (Gẹnẹsisi 3:19) Ṣigba mí ma dona hanú gba eyin osẹ́n biọ dọ yè ni hẹn oṣiọ gbọṣi aimẹ, kavi hagbẹ whẹndo tọn delẹ jlo, kavi e dona yin bibasi na mẹdelẹ na zin gbejizọnlin gaa wá ṣiọdidi lọ tẹnmẹ wutu.—15/3, weda 29-31.

• Apajlẹ Biblu tọn tẹwẹ plọn mí dọ akọta lẹpo wẹ Jiwheyẹwhe nọ kẹalọyi?

Jehovah do yẹwhegán Jona hlan nado na avase Ninevenu lẹ, podọ Jiwheyẹwhe dotuhomẹna Jona nado kẹalọyi lẹnvọjọ yetọn. Gbọn ohó po apajlẹ po dali, Jesu na tuli owanyi didohia hlan Samalianu lẹ. Apọsteli Pita po apọsteli Paulu po yí azọngban de wà to wẹndagbe lọ lilá na mẹhe mayin Juvi lẹ mẹ. Sọn apajlẹ enẹlẹ mẹ, mí sọgan mọ nuhewutu mí dona tẹnpọn nado gọalọna gbẹtọ lẹpo.—1/4, weda 21-4.