Kanbiọ lẹ sọn Wehiatọ lẹ Dè
Be e na yin nuyọnẹnnu na Klistiani nugbo de nado yì hùnwhẹ ṣiọdidi kavi alọwle tọn to ṣọṣi de mẹ ya?
Mahẹ tintindo to wunmẹ sinsẹ̀n lalo tọn depope mẹ mítọn nọ hẹn homẹgble Jehovah bo dona yin didapana. (2 Kọlintinu lẹ 6:14-17; Osọhia 18:4) Hùnwhẹ ṣiọdidi ṣọṣi mẹ tọn de yin nuyiwa sinsẹ̀n tọn he sọgan bẹ hodidọ he nọ nọgodona linlẹn he ma sọgbe hẹ Owe-wiwe lẹ hẹn, taidi jọmaku alindọn tọn po ahọsumẹ olọn mẹ tọn po na omẹ dagbe lẹpo. E sọgan sọ bẹ nuyiwa lẹ hẹn taidi ohia satin tọn bibasi po awukinkọndopọ hẹ yẹwhenọ kavi sinsẹ̀ngán lọ po to odẹ̀ mẹ. Odẹ̀ po nuwiwa sinsẹ̀n tọn devo he jẹagọdo nuplọnmẹ Biblu tọn lẹ po sọgan sọ yin apadewhe hùnwhẹ alọwle sinsẹ̀n tọn heyin bibasi to ṣọṣi dẹ mẹ kavi to fidevo. E na sinyẹnawu na Klistiani de nado nọavunte sọta kọgbidinamẹ lọ nado tindo mahẹ to nuwiwa sinsẹ̀n lalo tọn mẹ to whenuena e yindọ mẹhe tin to finẹ lẹpo wẹ to mọwà. Lehe e yin nululu do sọ nado ze míde do ninọmẹ kọgbidinamẹ tọn mọnkọtọn mẹ!
Etẹwẹ lo eyin Klistiani de dona yì hùnwhẹ ṣiọdidi kavi alọwle tọn heyin bibasi to ṣọṣi mẹ de tẹnmẹ dandan? Di apajlẹ, asu mayisenọ de sọgan biọ to asi Klistiani etọn si nado zọnhẹ ẹ yì nujijọ mọnkọtọn de tẹnmẹ. Be asi lọ sọgan hodo e yì taidi nupọntọ de poun wẹ? Na sisi tintindo na nuhe asu etọn jlo lọ, asi lọ sọgan de nado yì hẹ ẹ, ṣigba e na magbe ma nado tindo mahẹ to nuwiwa sinsẹ̀n tọn depope mẹ. To alọ devo mẹ, e sọgan de ma nado yì, po linlẹn lọ po dọ numọtolanmẹ kọgbidinamẹ ninọmẹ lọ lẹ tọn sọgan sinyẹn hugan na emi, vlavo nado hẹn ẹn nado gbà nunọwhinnusẹ́n Jiwheyẹwhe tọn lẹ. Ewọ wẹ dona basi nudide lọ. Na taun tọn, e na jlo nado vò to ahun mẹ, bo tindo ayihadawhẹnamẹnu wiwe de.—1 Timoti 1:19.
Depope he whẹho lọ yin, dagbe asi lọ tọn wẹ e na yin nado basi zẹẹmẹ na asu etọn dọ ayihadawhẹnamẹnu emitọn ma sọgan dike emi ni tindo mahẹ to nuyiwa sinsẹ̀n tọn lẹ mẹ kavi kọnawudopọ to sinsẹ̀n-hàn lẹ jiji mẹ kavi dẹ́ ota do odò to whenue odẹ̀ to yìyì. Sinai do zẹẹmẹ he e basi ji, asu lọ sọgan wá tadona kọ̀n dọ tintin to finẹ asi etọn tọn sọgan hẹn ninọmẹ he ma na hẹn homẹ emitọn hùn de wá. E sọgan de nado yì ede ṣo na owanyi he e tindo na asi etọn, sisi na nuyise asi lọ tọn lẹ, kavi ojlo nado dapana winyandomẹ depope wutu. Ṣigba eyin e tẹkudeji dọ e dona yì hẹ emi janwẹ, asi lọ sọgan yì taidi nupọntọ de poun.
Nugandomẹgo he hùnwhẹ de yìyì to sinsẹ̀nhọ de mẹ sọgan tindo do yisenọ hatọ lẹ ji sọ dona yin nulẹnpọndeji ganji ga. Be e sọgan hẹn ayihadawhẹnamẹnu mẹdevo lẹ tọn hoapa wẹ ya? Be avunteninọ yetọn nado dapana mahẹ tintindo to boṣiọ-sinsẹ̀n mẹ na yin hinhẹn gbọjọ wẹ ya? ‘Mì mọdona nuhe yin nujọnu hugan lẹ,’ wẹ apọsteli Paulu dọ, “na mì nido yin mẹpipe, mawaylando kakajẹ azán Klisti tọn gbè.”—Filippinu lẹ 1:10.
Eyin nujijọ lọ gando hẹnnumẹ sẹpọmẹ de go, kọgbidinamẹ whẹndo tọn dogọ lẹ tlẹ sọgan sọ tin. Depope he whẹho lọ yin, Klistiani de dona lẹnnupọndo whẹwhinwhẹ́n lẹpo ji kitokito. To ninọmẹ delẹ glọ, ewọ sọgan wá tadona kọ̀n dọ hùnwhẹ ṣiọdidi kavi alọwle tọn de yìyì to ṣọṣi de mẹ taidi nupọntọ de poun ma na fọ́n nuhahun depope dote gba. Ṣigba, ninọmẹ lẹ sọgan yin dehe mẹ, awugble he e yọnbasi dọ e ni basi na ayihadawhẹnamẹnu edetiti kavi mẹdevo lẹ tọn na sù hugan ale he na wá sọn tintin to finẹ etọn mẹ. Depope he whẹho lọ yin, Klistiani lọ dona hẹn ẹn diun dọ nudide etọn ma na glọnalina ẹn sọn ayihadawhẹnamẹnu dagbe de tintindo to Jiwheyẹwhe po gbẹtọ po nukọn mẹ gba.