Kanbiọ lẹ sọn Wehiatọ lẹ Dè

Be e sọgbe dọ Kunnudetọ Jehovah tọn de ni yì alọwle hẹnnumẹ kavi mẹyọnmẹ he ma yin Kunnudetọ de tọn ya?

Alọwle yin nuwiwa ayajẹ tọn, podọ nude ma ylan to e mẹ dọ Klistiani de ni jlo nado yì nuwiwa ayajẹ tọn enẹ tẹnmẹ. Nugbo wẹ dọ, yọpọvu he yin oylọ-basina nado yì nuwiwa mọnkọtọn tẹnmẹ lẹ dona setonuna mẹjitọ yetọn kavi mẹhe to nukunpedo yé go lẹ he tindo jlọjẹ lọ nado dọ eyin yé na yì kavi lala. (Efesunu lẹ 6:1-3) Ṣigba etẹwẹ eyin sunnu he ma yin Kunnudetọ Jehovah tọn de biọ to asi Klistiani tọn etọn si nado plan ẹn yì alọwle he na yin bibasi to ṣọṣi mẹ de tẹnmẹ? Ayihadawhẹnamẹnu etọn sọgan na ẹn dotẹnmẹ nado yì taidi nupọntọ de poun po gbemima lọ po ma nado tindo mahẹ to nuwiwa sinsẹ̀n tọn depope he tindo kanṣiṣa hẹ nuwiwa lọ mẹ.

Na taun tọn, nudide mẹdetiti tọn wẹ e yin vlavo nado yì alọwle tangan de tẹnmẹ kavi lala. Ṣigba, Klistiani dopodopo dona hẹn ẹn do ayiha mẹ dọ emi na dogbè nudide emitọn lẹ tọn na Jehovah podọ e dona lẹnnupọndo nunọwhinnusẹ́n Owe-wiwe tọn delẹ ji whẹpo do de nado yì alọwle mẹhe ma yin Kunnudetọ de tọn tẹnmẹ.

Onú titengbe hugan he dona tin to ayiha Klistiani de tọn mẹ wẹ ojlo lọ nado mọ nukundagbe Jiwheyẹwhe tọn. Jesu dọmọ: “Gbigbọ wẹ Jiwheyẹwhe: e jẹ yé he to sinsẹ̀n ẹn lẹ ni nọ sẹ̀n ẹn to gbigbọ mẹ podọ to nugbo mẹ.” (Johanu 4:24) Enẹwutu, Kunnudetọ Jehovah tọn lẹ ma nọ tindo mahẹ to nuwiwa sinsẹ̀n devo tọn lẹ mẹ, taidi dẹ̀hiho, nuyiwa aṣa tọn lẹ, kavi hùnwhẹ he sọta nugbo Biblu tọn lẹ.—2 Kọlintinu lẹ 6:14-17.

Klistiani lẹ yọnẹn dọ nudide yetọn sọ sọgan yinuwado mẹdevo lẹ ji. Eyin hiẹ de nado yì, be hẹnnumẹ towe lẹ na gblehomẹ eyin a ma tindo mahẹ gigọ́ to hùnwhẹ alọwle tọn lọ lẹ mẹ ya? Hiẹ sọ dona lẹnnupọndo nuyiwadomẹji he e sọgan tindo do yisenọ hatọ lẹ ji ga. (Lomunu lẹ 14:13) Eyin hiẹ kavi hagbẹ whẹndo towe tọn devo lẹ tlẹ wá tadona lọ kọ̀n dọ alọwle mẹhe ma yin Kunnudetọ de tọn yìyì ma ylan, be e yọnbasi dọ mẹmẹsunnu po mẹmẹyọnnu gbigbọmẹ tọn towe lẹ po ni yin nuyiwadeji to aliho agọ̀ mẹ ya? Be e ma na hẹn ayihadawhẹnamẹnu mẹdelẹ tọn hoapa nẹ?

Hùnwhẹ alọwle hẹnnumẹ he ma yin Kunnudetọ lẹ tọn sọgan hẹn ninọmẹ sinsinyẹn lẹ wá. Etẹwẹ eyin yè biọ to asiwe nado yin dopo to mẹhe na hodo alọwlemẹ yọyọ lọ lẹ? Kavi etẹwẹ eyin alọwlemẹ towe ma yin Kunnudetọ bo jlo nado tindo mahẹ gigọ́ to nuwiwa lọ lẹ mẹ? Eyin alọwle ahọluwhé tọn he na yin anadena gbọn whẹdatọ kavi ahọluzọnwatọ de dali wẹ, otẹn lọ mẹ yìyì ma na biọ hugan nuwiwa lọ pinpọ́n poun.

To alọ devo mẹ, hùnwhẹ alọwle tọn he yin bibasi to ṣọṣi mẹ kavi gbọn sinsẹ̀ngán de dali nọ fọ́n ahunmẹdunamẹnu devo lẹ dote. Nado setonuna ayihadawhẹnamẹnu towe he yin pinplọn gbọn Biblu dali bo dapana nuyiwa jẹagọdo nuyise sinsẹ̀n tọn towe lẹ kavi nado wà nuhe sọgan hẹn homẹgble mẹhe go alọwle lọ gando lẹ, hiẹ sọgan basi dide ma nado yì. (Howhinwhẹn lẹ 22:3) Hiẹ sọgan de dewe po whẹndo towe po sọn ayimajai susu glọ gbọn zẹẹmẹ nuyise sinai do Biblu ji tọn towe lẹ bibasi jẹnukọn dali, bo do obá he mẹ a jlo na tindo mahẹ jẹ hia kavi dọ aliho devo he mẹ a na yinuwa te.

To nulẹpo gbigbejepọn po sọwhiwhe po godo, Klistiani delẹ sọgan basi dide dọ alọwle mẹhe ma yin Kunnudetọ de tọn yìyì taidi nupọntọ de poun ma ylan. Ṣigba eyin Klistiani de mọdọ alọwle lọ yìyì sọgan whlé e pọ́n nado tùnafọ nunọwhinnusẹ́n Jiwheyẹwhe tọn lẹ ji, e sọgan wá tadona lọ kọ̀n dọ owù he e bẹhẹn lẹ sù hugan ale lọ lẹ. Eyin e de ma nado yì alọwle lọ to ṣọṣi mẹ, ṣigba basi dide nado yì jonọyitẹn lọ taidi jonọ he yin oylọ-basina de, e dona magbe nado “wà [onú] popo hlan gigo Jiwheyẹwhe tọn.” (1 Kọlintinu lẹ 10:31) To nudide mọnkọtọn lẹ bibasi mẹ, “omẹ dopodopo wẹ na hẹn agbàn ede tọn.” (Galatianu lẹ 6:5) Enẹwutu, dide depope he a basi, flindọ ayihadawhẹnamẹnu dagbe de tintindo to Jehovah Jiwheyẹwhe nukọn wẹ yin onú titengbe hugan.