Nọavunte Sọta Gbigbọ Aihọn He to Didiọ Tọn
“Míwlẹ ko mọyi, e ma yin gbigbọ aihọn tọn gba, adavo [gbigbọ] he yin Jiwheyẹwhe tọn.”—1 KỌLINTINU LẸ 2:12.
1. Aliho tẹlẹ mẹ wẹ Evi yin kiklọ te?
“ODÀN wẹ blu mi.” (Gẹnẹsisi 3:13) Po hogbe kleun enẹlẹ po, yọnnu tintan lọ, Evi, tẹnpọn nado basi zẹẹmẹ nuhewutu e do ṣiatẹ sọta Jehovah Jiwheyẹwhe tọn. Nugbo wẹ e dọ be, ṣigba enẹ ma suwhẹna ylanwiwa etọn gba. Apọsteli Paulu yin gbigbọdo nado wlan to nukọn mẹ dọmọ: “[Evi wẹ] yè klọ.” (1 Timoti 2:14) E yin kiklọ nado yise dọ nuyiwa tolivivẹ tọn dopo—yèdọ atin-sinsẹ́n heyin gbigbẹdai lọ dùdù—na hẹn ale wá na ẹn, bọ e na tin di Jiwheyẹwhe. E sọ yin kiklọ dogbọn omẹ nankọ he mẹhe blu i lọ yin dali. E ma yọnẹn dọ Satani Lẹgba wẹ to hodọ gbọn odàn lọ gblamẹ.—Gẹnẹsisi 3:1-6.
2. (a) Nawẹ Satani nọ klọ gbẹtọ lẹ to egbehe gbọn? (b) Etẹwẹ yin “gbigbọ aihọn tọn,” podọ kanbiọ tẹlẹ wẹ mí na gbadopọnna todin?
2 Sọn ojlẹ Adam po Evi po tọn whenu gbọ́n, Satani ko zindonukọn to gbẹtọ lẹ kiklọ mẹ. Na nugbo tọn, ewọ “to aihọn lẹpo klọ.” (Osọhia 12:9) Ayiha wintinwintin etọn lẹ ma ko diọ gba. Dile etlẹ yindọ e ma nọ yí odàn zan ba, e gbẹ́ nọ whlá ede. Gbọn ayidedai delẹ, linlinnamẹnu, po aliho devo lẹ po yiyizan dali, Satani nọ klọ gbẹtọ lẹ nado yise dọ yé ma tindo nuhudo anademẹ owanyinọ Jiwheyẹwhe tọn podọ ale depope ma tin to e mẹ gba. Nujijla oklọnọ Lẹgba tọn lẹ ko dó gbigbọ atẹṣiṣi tọn sọta osẹ́n po nunọwhinnusẹ́n Biblu tọn lẹ po do ahun mẹ na gbẹtọ lẹ to filẹpo. Biblu ylọ ehe dọ “gbigbọ aihọn tọn.” (1 Kọlintinu lẹ 2:12) Gbigbọ ehe nọ yinuwado nuyise, nuyiwa, po walọyizan mẹhe ma yọ́n Jiwheyẹwhe lẹ tọn po ji to aliho sinsinyẹn de mẹ. Nawẹ gbigbọ enẹ nọ yin didohia gbọn, podọ nawẹ mí sọgan nọavunte sọta nuyiwadomẹji mẹhẹnflu tọn etọn gbọn? Mì gbọ mí ni dindona.
Nujinọtedo Walọdagbe Tọn lẹ to Doyi
3. Naegbọn “gbigbọ aihọn tọn” to awusọhia yinukọn dogọ to egbehe?
3 To egbehe, “gbigbọ aihọn tọn” ko sọawuhia hezeheze dogọ. (2 Timoti 3:1-5) Hiẹ sọgan ko doayi e go dọ nujinọtedo walọdagbe tọn lẹ to doyi. Owe-wiwe basi zẹẹmẹ nuhewutu ehe do yinmọ tọn. To whenuena Ahọluduta Jiwheyẹwhe tọn ko yin didoai to 1914 godo, awhàn de yin fùnfùn to olọn mẹ. Satani po angẹli ylankan etọn lẹ po ṣí-awhàn bo yin yinyan hlan lẹdo aigba tọn ji. Po homẹgble po, Satani ko hẹn vivẹnudido etọn jideji nado klọ gbẹtọ lẹ lẹdo aihọn pé. (Osọhia 12:1-9, 12, 17) E to nuhe go e pé lẹpo wà “nado hẹnmẹ [buali], eyin e sọgan yin wiwà, yèdọ mẹṣinyanṣinyan lẹ [lọsu].” (Matiu 24:24) Taidi omẹ Jiwheyẹwhe tọn lẹ, ogbé mítọn yàn wẹ e te hugan. E nọ dovivẹnu nado hẹn gbigbọnọ-yinyin mítọn gble na mí nido sọgan hẹn nukundagbe Jehovah tọn po nukundido ogbẹ̀ madopodo tọn po bu.
4. Nukun tẹwẹ devizọnwatọ Jehovah tọn lẹ nọ yí do pọ́n Biblu, podọ nawẹ aihọn lọ nọ pọ́n ẹn hlan gbọn?
4 Satani nọ tẹnpọn nado fọ́n ayihaawe dote gando Biblu go, yèdọ owe họakuẹ he nọ plọnnu mí gando Mẹdatọ owanyinọ mítọn go. Devizọnwatọ Jehovah tọn lẹ yiwanna Biblu bosọ yọ́n pinpẹn etọn. Mí yọnẹn dọ Ohó gbọdo Jiwheyẹwhe tọn wẹ e yin, e mayin ohó gbẹtọ lẹ tọn gba. (1 Tẹsalonikanu lẹ 2:13; 2 Timoti 3:16) Ṣigba, aihọn Satani tọn na jlo dọ mí ni tindo linlẹn devo. Di apajlẹ, homẹbibiọ owe de he jẹagọdo Biblu tọn dọmọ: “Biblu mayin owe ‘wiwe’ gba, mọjanwẹ e masọ yin ‘ohó Jiwheyẹwhe tọn’ do niyẹn. E mayin omẹ wiwe he Jiwheyẹwhe gbọdo lẹ wẹ kàn ẹn gba, ṣigba yẹwhenọ he tindo ojlo zogbe na huhlọn lẹ.” Mẹhe yin kiklọ nado yí ohó mọnkọtọn lẹ sè sọgan jai jẹ omọ̀ lọ mẹ po awubibọ po dọ yé vò nado sẹ̀n Jiwheyẹwhe to aliho depope he yé jlo mẹ—kavi ma nado sẹ̀n ẹn paali.—Howhinwhẹn lẹ 14:12.
5. (a) Etẹwẹ wekantọ dopo dọ gando sinsẹ̀n he nọ yí Biblu zan lẹ go? (b) Nawẹ linlẹn aihọn tọn he gbayipe delẹ sọta nuhe Biblu dọ lẹ gbọn? (Yihodọ sọn apotin he tin to weda he bọdego mẹ.)
5 Mẹgbeyinyan tlọlọ kavi he mayin tlọlọ lẹ sọta Biblu, gọna yẹnuwiwa sinsẹ̀nnọ he sọalọakọ́n nado nọgodona ẹn lẹ tọn, ko hẹn mẹsusu dogọ nado gbẹ́ sinsẹ̀n dai, gọna sinsẹ̀n he nọ yí Biblu zan lẹ lọsu ga. To linlinnamẹnu lẹ mẹ podọ to wesetọ gbóogbó lẹ ṣẹnṣẹn, sinsẹ̀n tin to mẹgbeyinyan glọ. Wekantọ dopo dọmọ: “Pọndohlan agọ̀ wẹ gbayipe gando sinsẹ̀n Ju po sinsẹ̀n Klistiani tọn po go. To paa mẹ, yé nọ yin pinpọnhlan taidi nuhe ko dohó; podọ to aliho devo mẹ, taidi linlẹn he ko ṣá he nọ glọnalina whinwhẹ́n apọ̀nmẹ tọn bosọ nọ hẹnalọdotena nukọnyiyi lẹnunnuyọnẹn tọn. To owhe agọe tọn lẹ mẹ, numọtolanmẹ wangbẹna tọn ko diọ zun vlẹko sinsinyẹn po kanyinylan po tọn.” Mẹhe ma yise dọ Jiwheyẹwhe tin lẹ bo ko lẹzun “ovọ́ to linlẹn yetọn lẹ mẹ” wẹ nọ saba yin adọ̀ kanyinylan ehe tọn.—Lomunu lẹ 1:20-22.
6. Etẹwẹ yin pọndohlan aihọn tọn gando kọndopọ zanhẹmẹ tọn he Jiwheyẹwhe gblewhẹdo lẹ go?
6 Enẹwutu, e mayin nupaṣamẹ dọ gbẹtọ lẹ to dindanbu yinukọn dogọ sọn nujinọtedo walọyizan tọn he Jiwheyẹwhe doai lẹ kọ̀n. Di apajlẹ, Biblu dọ dọ zanhẹmẹ to vijinu dopolọ lẹ ṣẹnṣẹn yin “nuhe ma jẹ.” (Lomunu lẹ 1:26, 27) E sọ dọ dọ mẹhe nọ lọga kavi deayọ lẹ ma na dugu Ahọluduta Jiwheyẹwhe tọn. (1 Kọlintinu lẹ 6:9) Etomọṣo, to otò susu mẹ, e mayin dọ kọndopọ zanhẹmẹ tọn enẹlẹ yin alọkẹyi kẹdẹ wẹ gba ṣigba yé sọ nọ yin didohia taidi awuvivinu to owe, linlinwe, ohàn, sinimọto lẹ mẹ, podọ to televiziọn ji. Mẹhe nọ dọho jẹagọdo walọyizan mọnkọtọn lẹ nọ yin pinpọnhlan taidi hẹngogonọ he ma hunnukun lẹ. Kakati nado pọ́n nujinọtedo Jiwheyẹwhe tọn lẹ hlan taidi dohia mẹtọnhopọn owanyinọ tọn lẹ, aihọn nọ pọ́n yé hlan taidi nuhe nọ glọnalina mẹdekannujẹ po gbẹdudu po lẹ.—Howhinwhẹn lẹ 17:15; Juda 4.
7. Kanbiọ tẹlẹ wẹ mí dona kanse mídelẹ?
7 To aihọn he to nukundiọsọ Jiwheyẹwhe hú gbede pọ́n tọn de mẹ, nuyọnẹnnu wẹ e na yin dọ mí ni gbadopọnna walọyizan po nujinọtedo mítọn titi lẹ po. Sọn ojlẹ de mẹ jẹ devo mẹ, mí dona nọ yí ahundopo do dindona míde to odẹ̀ mẹ nado hẹn ẹn diun dọ mí ma to dindanbu vudevude sọn nulẹnpọn po nujinọtedo Jehovah tọn lẹ po mẹ. Di apajlẹ, mí sọgan kanse míde dọ: ‘Be yẹn nọ duvivi nujidọhodo he yẹn na ko gbẹdai to owhe delẹ die tọn wẹ ya? Be yẹn ko jẹ awujona walọyizan he Jiwheyẹwhe gbẹwanna lẹ ji wẹ ya? Be yẹn nọ yí nukunpẹvi do pọ́n gbigbọnu lẹ todin hú dai wẹ ya? Be aliho gbẹzan ṣie tọn nọ dohia dọ yẹn to dagbenu Ahọluduta tọn lẹ zedo otẹn tintan mẹ ya?’ (Matiu 6:33) Dodinnanu mọnkọtọn lẹ na gọalọna mí nado nọavunte sọta gbigbọ aihọn tọn.
‘Mì Buali Gbede Blo’
8. Nawẹ mẹde sọgan buali sọn Jehovah dè gbọn?
8 Apọsteli Paulu wlanwe hlan Klistiani hatọ lẹ dọmọ: “E jẹ mí ni nọ doayi nuhe mí ko sè lẹ go tlala, na mí sọ dike yé dùdú kọnyinai to whedepopenu blo,” kavi na mí nikaa buali gbede blo. (Heblu lẹ 2:1) Bato he buali ma nọ jẹ fihe e jei. Eyin bato-kùntọ de ma na ayidonugo sọwhiwhe tọn hlan jẹhọn po asisa po, bato etọn sọgan buali po awubibọ po bo yì gbà do osé lẹ go. Mọdopolọ, eyin mí ma na ayidonugo sọwhiwhe tọn hlan nugbo họakuẹ Ohó Jiwheyẹwhe tọn tọn lẹ, mí sọgan buali po awubibọ po sọn Jehovah dè bo siọ to gbigbọ-liho. E mayin dandan dọ mí ni gbẹ́ nugbo lọ dai mlẹnmlẹn whẹpo do siọ to gbigbọ-liho gba. Na nugbo tọn, mẹsusu ma nọ gbẹ́ Jehovah dai mlẹnmlẹn to afọdopolọji gba. To paa mẹ, vudevude wẹ yé nọ jẹ mahẹ tindo ji to nude he nọ fẹayihasẹna yé sọn ayidonugo nina hlan Ohó Jiwheyẹwhe tọn mẹ. Diblayin to mayọnẹn mẹ, yé nọ jai biọ ylando mẹ. Taidi bato-kùntọ he ko damlọn yì kanmẹ, omẹ mọnkọtọn lẹ ma nọ fọ́n kaka bọ whenu nọ fẹ́ do yé.
9. Aliho tẹlẹ mẹ wẹ Jehovah dona Sọlọmọni te?
9 Lẹnnupọndo gbẹzan Sọlọmọni tọn ji. Jehovah yí ì do doahọlu do Islaeli ji. Jiwheyẹwhe na dotẹnmẹ Sọlọmọni nado gbá tẹmpli lọ bo deanana ẹn nado wlan apadewhe Biblu tọn. Whla awe wẹ Jehovah dọho hẹ ẹ bo na ẹn adọkun, yindidi, po gandudu jijọho tọn de po. Hú popolẹpo, Jehovah dona Sọlọmọni po nuyọnẹn susu po. Biblu dọmọ: “Jiwheyẹwhe sọ na nuyọnẹn po wuntuntun po Sọlọmọni gege gbọ̀pọ̀, po [kiklo] ayiha tọn po, yèdọ di okẹ́n he tin to huto. Nuyọnẹn Sọlọmọni tọn sọ hugan nuyọnẹn ovi whèzẹtẹn tọn lẹpo tọn, po nuyọnẹn Egipti tọn lẹpo po.” (1 Ahọlu lẹ 4:21, 29, 30; 11:9) Na jide tọn, mẹde sọgan lẹndọ, eyin mẹdepope na penugo bo gbọṣi nugbonọ-yinyin mẹ hlan Jiwheyẹwhe, be Sọlọmọni wẹ e na yin. Ṣogan, Sọlọmọni jai biọ atẹṣiṣi mẹ. Nawẹ enẹ jọ gbọn?
10. Anademẹ tẹwẹ Sọlọmọni vẹtolina, podọ etẹwẹ yin kọdetọn lọ?
10 Sọlọmọni yọ́n Osẹ́n Jiwheyẹwhe tọn bo mọnukunnujẹemẹ ganji. Ayihaawe matin dọ e na ko tindo ojlo vonọtaun to nudọnamẹ heyin nina mẹhe lẹzun ahọlu to Islaeli lẹ mẹ. Dopo to nudọnamẹ enẹlẹ mẹ wẹ yindọ: “[Ahọlu lọ] ma na dà asi lẹ pli sù hlan ede gba, na ayiha etọn ma nado lẹ́ yì gba.” (Deutelonomi 17:14, 17) Mahopọnna anademẹ he họnwun enẹ, Sọlọmọni dà asi nuọntọ̀n-kanweko po asi-mọwhlá fọde-kanweko po. Suhugan yọnnu ehelẹ tọn wẹ nọ sẹ̀n yẹwhe lalo lẹ. Mí ma yọ́n nuhewutu Sọlọmọni dà asi susu sọmọ, podọ mí ma yọ́n whẹjijọ he e na gba. Nuhe mí yọnẹn wẹ yindọ e vẹtolina anademẹ he họnwun Jiwheyẹwhe tọn. Kọdetọn lọ yin nuhe Jehovah ko dọ pẹpẹ. Mí hia dọmọ: “Asi [Sọlọmọni tọn] lẹ sọ lẹ́ ayiha etọn . . . do yẹwhe devo lẹ godo.” (1 Ahọlu lẹ 11:3, 4) Vudevude, nuyọnẹn he Jiwheyẹwhe na ẹn busẹ mlẹnmlẹn. E buali. To nukọn mẹ, ojlo Sọlọmọni tọn nado hẹn homẹ asi etọn heyin kosi lẹ tọn hùn yíta to ojlo etọn nado setonuna Jiwheyẹwhe bo hẹn homẹ etọn hùn si. Lehe e blawu do sọ, na Sọlọmọni lọsu wẹ ko wlan ohó ehelẹ wayi dọmọ: “Ovi ṣie, yin nuyọnẹntọ, bosọ hẹn homẹ ṣie hùn; na yẹn nido gblọnhona ewọ he to vivlẹ mi”!—Howhinwhẹn lẹ 27:11.
Gbigbọ Aihọn Tọn Tindo Huhlọn
11. Nawẹ nuhe mí yí do ayiha mẹ nọ yinuwado nulẹnpọn mítọn ji gbọn?
11 Apajlẹ Sọlọmọni tọn plọnnu mí dọ owùnu wẹ e yin nado lẹndọ na mí ko yọ́n nugbo lọ wutu, nuyiwadomẹji aihọn tọn lẹ ma sọgan bẹpla lẹnpọn mítọn lẹ. Kẹdẹdile núdùdù nọ yinuwado agbasa mítọn ji do, mọjanwẹ nuhe mí yí do ayiha mẹ tin taidi núdùdù bo nọ yinuwado ayiha mítọn ji do niyẹn. Ehe nọ wá yinuwado nulẹnpọn po walọyizan mítọn po ji. Na azọ́nwhé lẹ yọ́n ehe wutu, yé nọ yí akuẹ dọla liva susu zan to whemẹwhemẹ nado jla ajọ́ yetọn. Ajọjlatọ he bikan lẹ nọ vivi-nù bo nọ yí yẹdide he dọnmẹdogo lẹ zan nado fọ́n ojlo ahisinọ lẹ tọn dote. Ajọjlatọ lẹ sọ yọnẹn dọ ajọ́jijla de mimọ whla dopo kavi awe poun ma nọ saba diọlinlẹn na gbẹtọ lẹ nado whlẹndo bo yì họ̀ nuhe sà yé te lẹ gba. Ṣigba, ajọ́jijla lọ mimọ pludopludo nọ saba hẹn ahisinọ lẹ nado yí nukun nujọnu tọn do pọ́n ẹn dile whenu to yìyì. Ajọ́jijla nọ jẹ yanwle etọn kọ̀n—eyin e ma yinmọ, mẹdepope ma na nọ và akuẹ do e mẹ gba. E nọ tindo nuyiwadomẹji sinsinyẹn do nulẹnpọn po walọyizan gbẹtọ lẹ tọn po ji.
12. (a) Nawẹ Satani nọ yinuwado nulẹnpọn gbẹtọ lẹ tọn ji gbọn? (b) Etẹwẹ dohia dọ Klistiani lẹ lọsu sọgan yin nuyiwadeji?
12 Taidi ajọjlatọ de, Satani nọ jla linlẹn etọn lẹ gbọn hinhẹn yé tin taidi nuhe fọnjlodotenamẹ dali, to yinyọnẹn mẹ dọ dile whenu to yìyì emi sọgan duto gbẹtọ lẹ ji nado kẹalọyi nulẹnpọn emitọn. Gbọn ayidedai po aliho devo lẹ po gblamẹ, Satani nọ klọ gbẹtọ lẹ nado yise dọ dagbe yin oylan bọ oylan yin dagbe. (Isaia 5:20) Klistiani nugbo delẹ tlẹ ko jai jẹ omọ̀ nudọnamẹ agọ̀ jijlá Satani tọn mẹ. Biblu na avase dọmọ: “Gbigbọ ko dọ dódó dọ, to ojlẹ godo tọn lẹ mẹ mẹdelẹ na jai sọn yise mẹ, bo nasọ na otó gbigbọ oklọ, po oplọn aovi tọn po; yé na nọ dolalo to yẹnuwiwa mẹ; mẹhe yè yí ogàn miyọnawu do sí ayiha na.”—1 Timoti 4:1, 2; Jẹlemia 6:15.
13. Etẹwẹ ogbẹ́ ylankan yin, podọ nawẹ gbẹdido mítọn nọ yinuwado mí ji gbọn?
13 Depope to mí mẹ ma gán sọn gbigbọ aihọn tọn si gba. Gbigbọ aihọn Satani tọn tindo huhlọn. Biblu na mí avase nuyọnẹn tọn dọmọ: “Yè klọ mì blo: ogbẹ́ ylankan nọ hẹn walọ dagbe gble.” (1 Kọlintinu lẹ 15:33) Ogbẹ́ ylankan sọgan bẹ nudepope kavi mẹdepope he nọ do gbigbọ aihọn tọn hia hẹn—etlẹ yin to agun Klistiani tọn mẹ. Eyin mí lẹndọ ogbẹ́ ylankan ma sọgan gbleawuna mí, be e mayin didọ mí te dọ ogbẹ́ dagbe ma sọgan gọalọna mí ya? Lehe enẹ na yin lẹnpọn agọ̀ do sọ! Biblu basi zẹẹmẹ he họnwun hezeheze do whẹho lọ ji dọmọ: “Ewọ he to zọnlinzin hẹ nuyọnẹntọ na yọnnuin: ṣigba ogbẹ́ nulunọ lẹ tọn na sudo.”—Howhinwhẹn lẹ 13:20.
14. Aliho tẹlẹ mẹ wẹ mí sọgan nọavunte sọta gbigbọ aihọn tọn te?
14 Nado nọavunte sọta gbigbọ aihọn tọn, mí dona dogbẹ́ hẹ nuyọnẹntọ lẹ—yèdọ mẹhe nọ sẹ̀n Jehovah lẹ. Nuhe nọ jlọ yise dote lẹ wẹ mí dona yí do gọ́ ayiha mítọn mẹ. Apọsteli Paulu wlan dọmọ: “Nudepope heyin nugbo, nudepope heyin yẹyi, nudepope heyin jijlọ, nudepope heyin wiwe, nudepope heyin owanyi, nudepope he do wẹndagbe; eyin jijọdagbe de tin, eyin pipà de tin, mì nọ yí onú helẹ lẹnpọn.” (Filippinu lẹ 4:8) Na mí yin nudida he tindo mẹdekannujẹ lẹ wutu, mí vò nado de nudepope he ji mí jlo nado lẹnnupọn do. Mì gbọ mí ni nọ de nado lẹn nuhe na dọ̀n mí sẹpọ Jehovah pẹkipẹki lẹ pọ́n to whepoponu.
Gbigbọ Jiwheyẹwhe Tọn Wẹ Tindo Huhlọn Hugan
15. Nawẹ Klistiani lẹ to Kọlinti hohowhenu tọn mẹ gbọnvona tòmẹnu devo lẹ to tòdaho enẹ mẹ gbọn?
15 To vogbingbọn mẹ na mẹhe gbigbọ aihọn tọn nọ klọ lẹ, gbigbọ wiwe Jiwheyẹwhe tọn wẹ nọ deanana Klistiani nugbo lẹ. Paulu wlanwe hlan agun he tin to Kọlinti dọmọ: “Míwlẹ ko mọyi, e mayin gbigbọ aihọn tọn gba, adavo [gbigbọ] he yin Jiwheyẹwhe tọn: na mí nido yọ́n nuhe yè na mí vọnu gbọn Jiwheyẹwhe dali.” (1 Kọlintinu lẹ 2:12) Gbigbọ aihọn tọn wẹ pavava do tòdaho Kọlinti hohowhenu tọn blebu ji. Suhugan tòmẹnu lọ lẹ tọn gble do fẹnnuwiwa ji sọmọ bọ hogbe lọ “gbẹzan Kọlintinu lẹ tọn” nọ yin yiyizan nado zẹẹmẹdo “alọdido to fẹnnuwiwa mẹ.” Satani ko tọ́nnukunna yé. Enẹwutu, yé ma mọnukunnujẹ nudepope mẹ gando Jiwheyẹwhe nugbo lọ go. (2 Kọlintinu lẹ 4:4) Ṣogan, gbọn gbigbọ wiwe etọn gblamẹ, Jehovah hùn nukun na Kọlintinu delẹ, bo hẹn yé penugo nado tindo oyọnẹn nugbo tọn. Gbigbọ etọn whàn yé bo deanana yé nado basi diọdo titengbe lẹ to gbẹzan yetọn mẹ na yé nido sọgan mọ nukundagbe po dona etọn po. (1 Kọlintinu lẹ 6:9-11) Dile etlẹ yindọ gbigbọ aihọn tọn tindo huhlọn, gbigbọ Jehovah tọn wẹ tindo huhlọn hugan.
16. Nawẹ mí sọgan mọ gbigbọ Jiwheyẹwhe tọn yí bo hẹn e go gbọn?
16 Onú dopolọ wẹ to jijọ to egbehe. Gbigbọ wiwe Jehovah tọn wẹ dohuhlọn hugan to wẹkẹ mẹ, podọ e nọ na ẹn hlan mẹhe biọ ẹ to yise mẹ lẹpo vọnu. (Luku 11:13) Ṣigba, nado mọ gbigbọ Jiwheyẹwhe tọn yí, mí dona wà nususu hugan avunteninọ sọta gbigbọ aihọn tọn. Mí sọ dona nọ plọn Ohó Jiwheyẹwhe tọn to gbesisọmẹ bo nọ yí ì zan to gbẹzan mítọn mẹ na gbigbọ mítọn—ninọmẹ apọ̀nmẹ tọn mítọn—nido sọgbe hẹ nulẹnpọn etọn. Eyin mí wàmọ, Jehovah na hẹn mí lodo nado nọavunte sọta ayiha wintinwintin depope he Satani sọgan yizan nado hẹn gbigbọnọ-yinyin mítọn gble.
17. Aliho tẹlẹ mẹ wẹ numimọ Lọti tọn sọgan miọnhomẹna mí te?
17 Nugbo wẹ dọ Klistiani lẹ mayin apadewhe aihọn tọn ṣigba aihọn lọ mẹ wẹ yé tin te. (Johanu 17:11, 16) Depope to mí mẹ ma sọgan dapana gbigbọ aihọn tọn mlẹnmlẹn gba, na mí sọgan nọ wazọ́n kavi tlẹ nọ nọ̀ hẹ mẹhe ma yiwanna Jiwheyẹwhe kavi aliho etọn lẹ. Be mí nọ tindo numọtolanmẹ dopolọ hẹ Lọti, mẹhe “homẹ etọn gble,” bo tlẹ yin yasana, na jijọ ylankan omẹ Sọdọmi he ṣẹnṣẹn e nọ nọ̀ lẹ tọn wutu ya? (2 Pita 2:7, 8) Eyin mọwẹ, mí sọgan deji. Jehovah whlá Lọti bo whlẹn ẹn gán, podọ e sọgan wà nudopolọ na mí ga. Otọ́ owanyinọ mítọn nọ mọ ninọmẹ mítọn lẹ bosọ yọ́n yé, podọ e sọgan gọalọna mí bo hẹn mí lodo nado hẹn gbigbọnọ-yinyin mítọn go. (Psalm 33:18, 19) Eyin mí ganjẹ ewọ go, bo dejido e go, bosọ dawhá ylọ ẹ, e na gọalọna mí nado nọavunte sọta gbigbọ aihọn tọn, mahopọnna lehe ninọmẹ mítọn sọgan vẹawu do.—Isaia 41:10.
18. Naegbọn mí dona wlebòna haṣinṣan he mí tindo hẹ Jehovah?
18 To aihọn he ko jẹla na Jiwheyẹwhe bo ko joawuna oklọ Satani tọn de mẹ, míwlẹ he yin omẹ Jehovah tọn lẹ yin didona po oyọnẹn nugbo lọ tọn po. Taidi kọdetọn de, mí nọ duvivi ayajẹ po jijọho he aihọn lọ ma tindo po tọn. (Isaia 57:20, 21; Galatianu lẹ 5:22) Mí yọ́n pinpẹn todido jiawu ogbẹ̀ madopodo to Paladisi mẹ tọn, fie gbigbọ aihọn he to kukujei ehe tọn ma na tin te ba. Enẹwutu, mì gbọ mí ni wlebòna haṣinṣan họakuẹ he mí tindo hẹ Jiwheyẹwhe bo tin to aṣeji nado glọnalina ayilinlẹn depope nado buali to gbigbọ-liho. Mì gbọ mí ni dọnsẹpọ Jehovah hugan gbede pọ́n tọn, podọ ewọ na gọalọna mí nado nọavunte sọta gbigbọ aihọn tọn.—Jakobu 4:7, 8.
Be Hiẹ Sọgan Basi Zẹẹmẹ Ya?
• Aliho tẹlẹ mẹ wẹ Satani ko klọ gbẹtọ lẹ bo ko hẹn yé buali te?
• Nawẹ mí sọgan wagbọn bo ma na buali sọn Jehovah dè?
• Etẹwẹ dohia dọ gbigbọ aihọn tọn tindo huhlọn?
• Nawẹ mí sọgan mọ gbigbọ Jiwheyẹwhe tọn yí bo hẹn e go gbọn?
[Apotin to weda 11]
NUYỌNẸN AIHỌN TỌN PO NUYỌNẸN JIWHEYẸWHE TỌN PO
Nugbo mlẹnmlẹn ma tin—gbẹtọ lẹ wẹ nọ magbe nuhe yin nugbo tọn na yede.
“Ohó [Jiwheyẹwhe tọn] wẹ nugbo.”—Johanu 17:17.
Nado yọ́n nuhe yin dagbe kavi oylan, dejido dewe go.
“Ayiha yin oklenọ hugan onú lẹpo, podọ e sọ yin awutunọ tupinpẹnnọ.”—Jẹlemia 17:9.
Wà nuhe jlo we.
“E ma tin to mẹhe to zọnlinzin mẹ nado do afọdide etọn lẹ gba.”—Jẹlemia 10:23.
Adọkun wẹ nọ hẹn ayajẹ wá.
“Owanyi akuẹ tọn wẹ adọ̀ walọ oylan lẹpo tọn.”—1 Timoti 6:10.
[Yẹdide to weda 10]
Sọlọmọni buali sọn sinsẹ̀n-bibasi nugbo mẹ bo lẹhlan yẹwhe lalo lẹ dè
[Yẹdide to weda 12]
Taidi ajọjlatọ de, Satani nọ jla gbigbọ aihọn lọ tọn. Be hiẹ nọ nọavunte sọta ẹ ya?