Gbedewema-Yitọ Giliadi Tọn lẹ Tọ́njẹgbonu Yì Taidi Azọ́nwatọ Zohunhunnọ lẹ to Ojijẹ lọ Mẹ! — WESẸDOTẸN INTẸNẸT JI TỌN Watchtower Tọn

Gbedewema-Yitọ Giliadi Tọn lẹ Tọ́njẹgbonu Yì Taidi Azọ́nwatọ Zohunhunnọ lẹ to Ojijẹ lọ Mẹ!

“OJIJẸ sù nugbo, ṣigba azọ́nwatọ lẹ ma sù: enẹwutu mì hodẹ̀ hlan Oklunọ ojijẹ tọn, na e ni do azọ́nwatọ lẹ hlan ojijẹ etọn mẹ.” (Matiu 9:37, 38) Hogbe enẹlẹ tindo zẹẹmẹ vonọtaun na gbedewema-yitọ klasi 116tọ Wehọmẹ Biblu Pinplọn Watchtower Giliadi tọn lẹ dile yé wleawufo nado yì azọ́ndenamẹ mẹdehlan tọn yetọn lẹ mẹ.

To samedi 13 mars 2004, gbẹtọ 6 684 wẹ pli to Nọtẹn Wepinplọn Watchtower tọn to Patterson, New York, podọ to nọtẹn devo lẹ mẹ nado dotoaina tito-to-whinnu gbedewema-yíyí tọn lọ, to ehe mẹ gbedewema-yitọ lẹ mọ ayinamẹ po tulinamẹ po yí te jẹnukọnna yìyì yetọn. Mímẹpo sọgan mọaleyi sọn ayinamẹ heyin nina yé mẹ, dile mí to azọ́nwa po zohunhun po to ojijẹ gbigbọmẹ tọn lọ mẹ.

Hodidọ bẹjẹeji tọn lọ gbọn Theodore Jaracz dali, heyin dopo to Hagbẹ Anademẹtọ lọ mẹ bo ko sọ yí gbedewema klasi ṣinawetọ Giliadi tọn, zinnudo hogbe Jesu tọn lẹ ji dọmọ: “Mì yì, bo hẹn akọta lẹpo zun nuplọntọ.” (Matiu 28:19, 20) Lehe enẹ sọgbe do sọ, to whenuena e yindọ otò dopodopo 20 mẹ wẹ gbedewema-yitọ lọ lẹ to yinyin didohlan! E flinnu wehọmẹvi lọ lẹ dọ anademẹ Ohó Jiwheyẹwhe tọn ko hẹn yé pegan mlẹnmlẹn nado yin azọ́nwatọ zohunhunnọ lẹ to ojijẹ gbigbọmẹ tọn heyin azọ́n titengbe hugan lọ mẹ.—Matiu 5:16.

Lehe Yé Na Yin Azọ́nwatọ He Nọ De Sinsẹ́n Tọ́n lẹ Do

Mẹhe yin hodọtọ tintan to tito-to-whinnu lọ mẹ wẹ Robert Wallen, he ko to azọ́nwa to kọndopọmẹ hẹ Wehọmẹ Giliadi tọn na owhe susu. E dọhodo hosọ lọ ji “Whanpẹ Awuvẹmẹ Tọn,” bo dọna wehọmẹvi lẹ dọmọ: “Awuvẹmẹ yin ogbè de he tókunọ lẹ sọgan sè bọ nukuntọ́nnọ lẹ lọsu sọgan mọ.” Jesu mọnukunnujẹ oyà he mẹdevo lẹ to jiji mẹ ganji bosọ tẹnpọn nado na yé kọgbọ. (Matiu 9:36) Dotẹnmẹ susu wẹ na hundote na wehọmẹvi lọ lẹ nado wà nudopolọ—to kunnudegbe, to agun mẹ, to owhé mẹdehlan tọn gbè, podọ to alọwle yetọn titi mẹ. Hodọtọ lọ dotuhomẹna yé dọmọ: “Mì dike whanpẹ awuvẹmẹ tọn ni do ede hia to gbẹzan mìtọn mẹ dile mì to lizọnyina mẹdevo lẹ. Walọ dagbe mìtọn wẹ na gọalọna mì hugan to owhé mẹdehlan tọn gbè. Enẹwutu, mì magbe nado ze lẹblanu kavi awuvẹmẹ dogo.”—Kọlọsinu lẹ 3:12.

Enẹgodo, Gerrit Lösch, heyin dopo to Hagbẹ Anademẹtọ lọ mẹ bo ko sọ yí gbedewema klasi 41tọ Giliadi tọn, gbà hosọ lọ “Owẹ̀n Whlẹngán Tọn Dótọ Lẹ” do flinflin. (Isaia 52:7) Eyin gbẹtọ lẹ na luntọ́n to whenuena aihọn ylankan ehe na yin vivasudo, yé dona tindo oyọnẹn he pegan Ohó Jiwheyẹwhe tọn, basi gbeyiyi gbangba tọn na yise yetọn, bosọ yin bibaptizi. (Lomunu lẹ 10:10; 2 Timoti 3:15; 1 Pita 3:21) Ṣigba, whẹwhinwhẹ́n tintan he wutu owẹ̀n whlẹngán tọn to yinyin didó mayin nado whlẹn gbẹtọ lẹ gba, ṣigba nado pagigona Jiwheyẹwhe. Enẹwutu, Mẹmẹsunnu Lösch dotuhomẹna mẹhe jlo na lẹzun mẹdehlan lọ lẹ dọmọ: “Mì hẹn owẹ̀n Ahọluduta lọ tọn yì opodo aihọn tọn bo yin owẹ̀n whlẹngán tọn dótọ zohunhunnọ lẹ, popolẹpo nado pagigona Jehovah.”—Lomunu lẹ 10:18.

“Nawẹ Hiẹ Nọ Do Hinhọ́n Gbigbọmẹ Tọn Hia Sọ?” wẹ kanbiọ he nuplọnmẹtọ Giliadi tọn Lawrence Bowen fọndote. E dlẹnalọdo ohó Jesu tọn he tin to Matiu 6:22 mẹ lẹ bo na tuli gbedewema-yitọ lọ lẹ nado hẹn nukun yetọn yin “dopo” nado sọgan “do hinhọ́n gbigbọmẹ tọn he nọ pagigona Jehovah bo nọ hẹn ale wá na gbẹtọvi hatọ lẹ hia.” Sọn bẹjẹeji lizọnyizọn Jesu tọn, e ze apajlẹ dagbe hugan dai to ehe mẹ gbọn ayidonugo gigọ́ zizedo ojlo Jiwheyẹwhe tọn wiwà ji dali. Ayihamẹlinlẹnpọn do onú jiawu he Otọ́ etọn ko plọn ẹn to olọn mẹ lẹ ji gọalọna Jesu nado doakọnna whlepọn he Satani zedonukọnna ẹn to zungbo mẹ lẹ. (Matiu 3:16; 4:1-11) Jesu ganjẹ Jehovah go mlẹnmlẹn to azọ́n he Jiwheyẹwhe dena ẹn nado wà lẹ hinhẹndi mẹ. Mọdopolọ, nado sọgan duto avùnnukundiọsọmẹnu he yé na pehẹ lẹ ji, mẹdehlan lọ lẹ dona to Biblu plọn zọnmii bo ganjẹ Jehovah go mlẹnmlẹn.

Mark Noumair, nuplọnmẹtọ Giliadi tọn he ko sọ yí gbedewema klasi 77tọ Giliadi tọn, hẹn hodidọ debọdo-dego tọn ehe wá tadona kọ̀n po hosọ lọ po “Alọ Towe mẹ Wẹ Mí Te.” (Jọṣua 9:25) E na tuli wehọmẹvi lọ lẹ nado hodo apajlẹ pọndohlan Gebiọninu hohowhenu tọn lẹ tọn. Dile etlẹ yindọ Gebiọni yin “tòdaho de . . . [bọ] omẹ etọn lẹpo sọ yin huhlọnnọ,” Gebiọninu lẹ ma dín yindidi kavi tẹnpọn nado wà nuhe jlo yé lẹ gba. (Jọṣua 10:2) Yé yí ahundopo do wazọ́n taidi “didàtọ nake tọn lẹ po dindọ̀ntọ osin tọn lẹ po” to Levinu lẹ glọ nado nọgodona sinsẹ̀n-bibasi Jehovah tọn. (Jọṣua 9:27) Na taun tọn, gbedewema-yitọ lọ lẹ ko dọna Jọṣua Daho lọ, Jesu Klisti dọ, “Alọ towe mẹ wẹ mí te.” Todin, dile yé to awuwle nado yì azọ́ndenamẹ tògodo tọn yetọn lẹ mẹ, yé dona kẹalọyi azọ́n depope he Jọṣua Daho lọ dena yé nado wà.

Numimọ po Hokansemẹ lẹ Po

“Mì Nọ Hùn Owe-Wiwe lẹ Ganji” wẹ hosọ hodọdopọ he Wallace Liverance, dopo to nuplọnmẹtọ lẹ mẹ, he ko sọ yí gbedewema klasi 61tọ Giliadi tọn, deanana hẹ pipli wehọmẹvi delẹ tọn. Yé dọ numimọ he yé ko duvivi etọn to lizọnyizọn kunnudegbe tọn mẹ to ojlẹ wehọmẹ tọn lọ whenu lẹ bosọ basi wadohia yetọn. E họnwun dọ nupinplọn sisosiso do Owe-wiwe lẹ ji he yé ko mọyi to osun atọ́n lọ lẹ gblamẹ biọ ahun yetọn mẹ bosọ whàn yé nado má nuhe yé ko plọn lẹ hẹ mẹdevo lẹ. (Luku 24:32) To nupinplọn osun atọ́n tọn lọ whenu, wehọmẹvi de penugo nado má nuhe e to pinplọn lẹ hẹ nọvisunnu etọn jọnwun. Ehe whàn nọvisunnu etọn nado dín agun he tin to lẹdo etọn mẹ mọ bo jẹ Biblu plọn ji. Todin, e ko pegan taidi wẹnlatọ he ma ko yí baptẹm de.

Bọdo numimọ ehelẹ go, Richard Ashe po John Gibbard po kanhose devizọnwatọ Jehovah tọn he ko yin nugbonọ na whenu dindẹn lẹ, he bẹ nugopọntọ tomẹyitọ he to azọ́nplọnmẹ vonọtaun de mọyi to Nọtẹn Wepinplọn Watchtower tọn lẹ hẹn. Yé ko yí gbedewema Wehọmẹ Giliadi tọn to klasi he jẹnukọn lẹ mẹ. Dopo to yé mẹ flin dọ Mẹmẹsunnu Knorr ko dọ to nupinplọn de whenu to klasi yetọn dọmọ: “To Giliadi, mì na plọn nususu. Ṣigba eyin mì lẹzun glòlò-jlatọ, e dohia dọ mí ma jẹ yanwle mítọn kọ̀n. Yanwle mítọn wẹ yindọ mí ni tọ́n yì sọn fi po ahun he gọ́ na owanyi po.” Mẹmẹsunnu tomẹyitọ lọ lẹ na ayinamẹ gbedewema-yitọ lẹ nado dike gbẹtọ lẹ po nuhudo yetọn po ni nọ duahunmẹna yé, na yé ni nọ yinuwa hẹ mẹdevo lẹ dile Klisti wà do, bosọ nọ yí whiwhẹ do kẹalọyi azọ́n depope heyin didena yé. Matin ayihaawe, ayinamẹ ehe yíyí-do-yizan mẹ na gọalọna mẹdehlan yọyọ lọ lẹ nado de sinsẹ́n tọ́n to azọ́ndenamẹ yetọn lẹ mẹ.

Mì Tọ́njẹgbonu Yì Taidi Azọ́nwatọ Zohunhunnọ lẹ to Ojijẹ lọ Mẹ!

Mẹhe tin to finẹ lẹ hùnhomẹ nado dotoaina Stephen Lett, heyin mẹdevo sọn Hagbẹ Anademẹtọ lọ mẹ. E na hodidọ titengbe tito-to-whinnu lọ tọn, he hosọ etọn yin “Mì Tọ́njẹgbonu Yì Taidi Azọ́nwatọ Zohunhunnọ lẹ to Ojijẹ lọ Mẹ!” (Matiu 9:38) To ojijẹ mẹ, whenu vude wẹ jinukun-gbẹ̀ntọ lẹ nọ tindo. Yé dona wazọ́n sinsinyẹn. Lehe enẹ yin nujọnu do sọ titengbe to vivọnu titonu ehe tọn whenu! To ojijẹ gbigbọmẹ tọn daho lọ mẹ, ogbẹ̀ lẹ tin to owù mẹ. (Matiu 13:39) Mẹmẹsunnu Lett na tuli gbedewema-yitọ lẹ, ma nado ‘whleawu to azọ́n yetọn mẹ,’ kakatimọ yé dona “hùnzo to gbigbọ mẹ; bosọ nọ to [Jehovah] sẹ̀n” to azọ́n ojijẹ tọn he ma na yin vivọ́basi pọ́n gbede ehe mẹ. (Lomunu lẹ 12:11) Hodọtọ lọ yihodọ sọn ohó Jesu tọn lẹ mẹ dọmọ: “Mì ze nukun mìtọn daga, bo pọ́n odanji; na yé ko whẹ́n na gbingbẹ̀n.” (Johanu 4:35) Enẹgodo e na tuli gbedewema-yitọ lẹ nado do zohuhun yetọn hia na azọ́n ojijẹ lọ tọn gbọn vivẹnudido po ahundopo po nado jẹ gbẹtọ lẹ dè to ojlẹ podọ to fie yé sọgan yin mimọ te dali bosọ yí dotẹnmẹ hundote lẹpo zan nado dekunnu mayin aṣa tọn. Aṣejininọ nado hùn dotẹnmẹ lẹ dote sọgan hẹn ẹn bọawu nado dekunnu po kọdetọn dagbe po. Jiwheyẹwhe zohunhunnọ de wẹ Jehovah yin, podọ e nọ donukun dọ mímẹpo ni hodo apajlẹ etọn bo wazọ́n sinsinyẹn to ojijẹ gbigbọmẹ tọn lọ mẹ.—2 Ahọlu lẹ 19:31; Johanu 5:17.

Nado dotana tito-to-whinnu lọ, azinponọ lọ, Mẹmẹsunnu Jaracz, hia nudọdomẹ lẹ sọn wekantẹn alahọ tọn susu mẹ bosọ ze gbedewema wehọmẹvi lọ lẹ tọn do alọmẹ na yé. Dopo to gbedewema-yitọ lọ lẹ mẹ hia wekanhlanmẹ klasi lọ tọn, to ehe mẹ yé do pinpẹn-nutọn sisosiso hia te na azọ́nplọnmẹ he yé ko mọyi. E họnwun dọ tito-to-whinnu gbedewema-yíyí klasi 116tọ lọ tọn hẹn mẹplidopọ lẹpo magbe hú gbede pọ́n tọn nado tọ́njẹgbonu yì taidi azọ́nwatọ zohunhunnọ lẹ to ojijẹ lọ mẹ.

[Apotin to weda 25]

SỌHA NULINLẸN KLASI TỌN

Sọha otò he mẹ yé wá sọn tọn: 6

Sọha otò he mẹ yé yin didohlan tọn: 20

Sọha wehọmẹvi lẹ tọn: 46

Madozẹnzẹn owhe mẹhodido tọn: 34,2

Madozẹnzẹn owhe to nugbo mẹ tọn: 17,2

Madozẹnzẹn owhe lizọnyizọn whenu-gigọ́ tọn: 13,9

[Yẹdide to weda 26]

Gbedewema-Yíyí Klasi 116tọ Wehọmẹ Biblu Pinplọn Watchtower Giliadi Tọn

To yinkọ he tin to odò lẹ mẹ, hukan lẹ yin sọha yí na sọn nukọn yì godo, bọ yinkọ lẹ yin sislẹ sọn amiyọnwhé yì adusiwhé to hukan dopodopo ji.

(1) Ceansu, R.; Sparks, T.; Piña, C.; Turner, P.; Cheney, L. (2) Suardy, M.; Sjöqvist, Å.; Amadori, L.; Smith, N.; Jordan, A.; Boissonneault, L. (3) Matlock, J.; Ruiz, C.; Dular, L.; Vigneron, M.; Henry, K. (4) Sjöqvist, H.; Laux, J.; Ruzzo, J.; Gustafsson, K.; Boissonneault, R.; Jordan, M. (5) Henry, D.; Turner, D.; Kirwin, S.; Florit, K.; Ceansu, S. (6) Amadori, S.; Cheney, J.; Ross, R.; Nelson, J.; Ruiz, J.; Vigneron, M. (7) Florit, J.; Matlock, D.; Ross, B.; Laux, C.; Ruzzo, T.; Dular, D.; Kirwin, N. (8) Gustafsson, A.; Nelson, D.; Suardy, W.; Piña, M.; Smith, C.; Sparks, T.