Be Nugbonọ-Yinyin Doale Ya?
“AKUẸ he a nọ sú na alọgọ mimọyi na owù-nujijọ agbasalilo tọn ko sù gbau,” wẹ Karl he yin afọzedaitọ azọ́nwhé he nọ gọalọ to owù-nujijọ whenu tọn de dọ.a “Eyin a gbọ bo wá azọ́nwhé ṣie, [10 000 F CFA] wẹ na nọ gọ̀ biọ apò towe mẹ to sunmẹsunmẹ, ehe ma whè paali.”
“E sọgan yinmọ nugbo” wẹ Jens gblọn. “Ṣigba azọ́nwhé dopolọ ko to nukunpedo alọgọ mimọyi na owù-nujijọ agbasalilo tọn ṣie go na owhe lẹ. Yé gọalọna mi taun wayi, podọ yẹn jlo na yin nugbonọ na yé.”
“Nugbonọ-yinyin yọ́n ganji,” wẹ Karl dọ. “Ṣigba nugbonọ-yinyin to akuẹ dù na we!”
Owhẹ̀ Karl tọn whẹ́n. Nugbonọ-yinyin hlan mẹdevo sọgan dù akuẹ namẹ to ninọmẹ susu mẹ. E sọ nọ biọ whenu, huhlọn, po gbemima numọtolanmẹ tọn po. Be nugbonọ-yinyin doale ya?
Jẹhẹnu He Nọ Yin Pipà Tlala Ṣigba He Ma Nọ Yin Didohia Sọmọ
To dodinnanu he yin bibasi to Allemagne gbọn Azọ́nwatẹn Dodinnanu Allensbach tọn dali de mẹ, 96 to kanweko ji mẹhe yin hokanse lẹ tọn dọ dọ nugbonọ-yinyin yin jẹhẹnu dagbe de. Dodinnanu Allensbach tọn devo he yin bibasi to mẹhe tindo owhe 18 jẹ 24 lẹ ṣẹnṣẹn dohia dọ to mẹhe yin hokanse lẹ mẹ omẹ 2 to 3 ji yise dọ nujọnu wẹ e yin nado yin nugbonọ.
Dile etlẹ yindọ nugbonọ-yinyin nọ yin pipà lẹdo pé, onú devo pete wẹ nado yin nugbonọ to nuyiwa mẹ. Di apajlẹ, to otò Europe tọn susu mẹ, asu po asi po lẹ kavi hagbẹ whẹndo tọn lẹ ma nọ saba yin nugbonọ na ode awetọ yetọn sọmọ. Họntọn lẹ nọ gboawupo whlasusu nado yin nugbonọ na ode awetọ yetọn. Podọ nugbonọ-yinyin he nọ kọ̀n azọ́nmẹyimẹdotọ po mẹyidoazọnmẹ po kavi ajọwhé de po ahisinọ etọn lẹ po dopọ to ojlẹ de mẹ wayi ko dibla busẹ sọn aimẹ todin. Etẹwutu?
To whedelẹnu yidọn-yide gbẹ̀mẹ tọn lẹ ma nọ pò whenu po huhlọn numọtolanmẹ tọn po dai namẹ sọmọ nado wleawuna gbemima he nugbonọ-yinyin nọ biọ. Vlavo mẹhe ko yin hinhẹn jẹflumẹ to haṣinṣan yetọn hẹ mẹdevo lẹ mẹ nọ whleawu todin nado yin nugbonọ hlan mẹdepope. Mẹdevo lẹ sọgan yiwanna gbẹzan he nọ to didiọ mapote taidi agànma, ehe mẹ nugbonọ-yinyin ma yin dandan te.
Depope he whẹwhinwhẹ́n lọ yin, nugbonọ-yinyin yin jẹhẹnu de he nọ yin pipà tlala ṣigba he ma nọ yin didohia sọmọ. Enẹwutu, kanbiọ he fọndote todin wẹ yindọ: Be nugbonọ-yinyin doale ya? Eyin mọwẹ, mẹnu wẹ mí dona yin nugbonọ hlan, podọ to aliho tẹlẹ mẹ? Ale tẹlẹ wẹ nugbonọ-yinyin nọ hẹnwa?
[Nudọnamẹ odò tọn]
a Yinkọ delẹ yin didiọ to hosọ ehe po dehe bọdego po mẹ.
[Yẹdide to weda 3]
Nugbonọ-yinyin yin jẹhẹnu de he nọ yin pipà tlala ṣigba he ma nọ yin didohia sọmọ