Nukunnumimọjẹ Biblu mẹ—Awuvivinu de He Hùndonuvo Hlan We

BIBLU bẹ nugbo họakuẹ lẹ hẹn sọn Jiwheyẹwhe dè. E dọhona mí gando lẹndai ogbẹ̀ tọn, nuhe zọ́n bọ yajiji do tin, po sọgodo gbẹtọvi lẹ tọn po go. E plọn mí lehe mí sọgan mọ ayajẹ gbọn, lehe mí sọgan jihọntọn lẹ gbọn, podọ lehe mí sọgan didẹ nuhahun lẹ do. Humọ, e plọnnu mí dogbọn Mẹdatọ podọ Otọ́ olọn mẹ tọn mítọn, Jehovah dali. Oyọnẹn mọnkọtọn nọ hùnhomẹ na mí bosọ nọ hẹn gbẹzan mítọn tindo zẹẹmẹ.

To Biblu mẹ, oyọnẹn Jiwheyẹwhe tọn tintindo yin yiyijlẹdo núdùdù go. Jesu dọmọ: “Gbẹtọ ma to ogbẹ̀ gbọn akla dopo kẹdẹ sinmẹ gba, adavo gbọn ohó he tọ́nsọn onù Jiwheyẹwhe tọn mẹ lẹpo dali.” (Matiu 4:4; Heblu lẹ 5:12-14) Kẹdẹdile mí dona nọ dù núdùdù hunsindagbe tọn egbesọegbesọ nado sọgan nọgbẹ̀ do, dandannu wẹ e yin dọ mí ni nọ hia Ohó Jiwheyẹwhe tọn gbọzangbọzan nado sọgan mọaleyi sọn opagbe ogbẹ̀ madopodo tọn he Jiwheyẹwhe dó lọ mẹ.

Mí nọ mọ awuvivi to núdùdù mẹ na aliho he mẹ mí yin didá te wutu podọ na núdùdù nọ hẹn pekọwana nuhudo tangan de wutu. Nalete, mí tindo nuhudo tangan devo he mí dona hẹn pekọwana eyin mí jlo na tindo ayajẹ. Jesu dọmọ: “Ayajẹnọ wẹ mẹhe nuhudo gbigbọmẹ tọn yetọn nọ duahunmẹna lẹ.” (Matiu 5:3, NW) E yọnbasi nado tindo ayajẹ na nuhudo enẹ sọgan yin pekọhẹnwana gbọn nukunnumimọjẹ Ohó Jiwheyẹwhe tọn mẹ dali.

Nugbo wẹ dọ mẹdelẹ nọ mọ dọ e ma bọawu nado mọnukunnujẹ Biblu mẹ. Di apajlẹ, hiẹ sọgan tindo nuhudo alọgọ tọn do wefọ he dlẹnalọdo aṣa he mẹsusu ma jẹakọ hẹ lẹ kavi dehe yí hodidọ yẹhiadonu tọn zan lẹ ji. Podọ, dọdai delẹ tin he yin kinkàn po hogbe yẹhiadonu tọn he ma sọgan yin nukunnumọjẹemẹ lẹ po adavo alọdlẹndonu yin bibasi hlan wefọ Biblu tọn devo he dọhodo hosọ dopolọ ji lẹ. (Daniẹli 7:1-7; Osọhia 13:1, 2) Etomọṣo, hiẹ sọgan mọnukunnujẹ Biblu mẹ nugbonugbo. Naegbọn hiẹ sọgan tindo jide enẹ?

Awuvivinu de He Hùndonuvo Hlan Mẹlẹpo

Ohó Jiwheyẹwhe tọn wẹ Biblu yin. Jiwheyẹwhe do ojlo etọn hia mí to e mẹ. Be Jiwheyẹwhe na wleawuna owe de he ma sọgan yin nukunnumọjẹemẹ kavi ehe mẹhe sewé taun lẹ kẹdẹ wẹ sọgan mọnukunnujẹemẹ ya? Lala, Jehovah ma na yinuwa po kanyinylan mọnkọtọn po gba. Klisti Jesu dọmọ: “Eyin ovi biọ [whèvi] to mẹdepope mìtọn he yin otọ́ dè, . . . be to whèvi tẹnmẹ, e na yí odàn na ẹn? Kavi eyin e biọ azìn, be e na dike yí aklekle na ẹn? Enẹwutu, eyin mìwlẹ he yin mẹylankan yọ́n le yè nọ na nunina dagbe hlan ovi mìtọn lẹ do, nẹmunẹmu wẹ Otọ́ mìtọn olọn tọn na na [gbigbọ wiwe] hlan yé he biọ to e dè lẹ.” (Luku 11:11-13) Enẹwutu, deji dọ hiẹ sọgan mọnukunnujẹ Biblu mẹ podọ dọ eyin a biọ vivẹvivẹ sọn Jiwheyẹwhe dè, e na na we alọgọ he a tindo nuhudo etọn nado mọnukunnujẹ Ohó etọn mẹ. Na nugbo tọn, yọpọvu lẹ lọsu tlẹ sọgan mọnukunnujẹ nuplọnmẹ dodonu Biblu tọn lẹ mẹ!—2 Timoti 3:15.

Dile etlẹ yindọ e nọ biọ vivẹnudido nado mọnukunnujẹ Biblu mẹ, mọwiwà sọgan tindo nuyiwadomẹji sinsinyẹn mẹhẹnlodo tọn do mí ji. To fọnsọnku Jesu tọn godo, e sọawuhia awe to devi etọn lẹ mẹ bo dọhona yé do dọdai Biblu tọn lẹ ji. Kandai Luku tọn dọmọ: “E sọ hẹn ẹn sọn Mose, po yẹwhegán lẹpo po ji, e sọ detana onú he yè dọ gbọn ewlọsu tọn dali lẹ hlan yé to Owe-wiwe lẹpo mẹ.” Etẹwẹ yin kọdetọn lọ? To whèjai enẹ, dile devi lọ lẹ to nulẹnpọndo nuhe yé ko plọn lẹ ji, yé dọ hlan yenọzo dọmọ: “Be ayiha mítọn ma hunzo to ohò mítọn mẹ, whenuena e to hodọ hẹ mí to aliho, podọ whenuena e hùn Owe-wiwe hlan mí?” (Luku 24:13-32) Nukunnumimọjẹ Ohó Jiwheyẹwhe tọn mẹ hẹn awuvivi wá na yé na e hẹn yise yetọn lodo to opagbe Jiwheyẹwhe tọn lẹ mẹ bo na yé nukundido dagbe na sọgodo.

Kakati nido yin nupẹnagbanmẹ de, nukunnumimọjẹ Biblu mẹ yin awuvivinu bo nọ hẹn ale wá, bosọ sọgan yin vivi etọn dù taidi núdùdù hunsindagbe tọn de. Etẹwẹ hiẹ dona wà nado tindo nukunnumọjẹnumẹ mọnkọtọn? Hosọ he bọdego do lehe hiẹ sọgan mọ awuvivi to “oyọnẹn Jiwheyẹwhe tọn” mẹ do hia.—Howhinwhẹn lẹ 2:1-5.

[Yẹdide to weda 4]

Taidi otọ́ owanyinọ de, Jehovah nọ na gbigbọ wiwe nado gọalọna mí nado mọnukunnujẹ Biblu mẹ