Be Hiẹ Flin Ya?

Be a duvivi zinjẹgbonu Atọ̀họ̀-Nuhihọ́ Lọ Tọn agọe tọn lẹ hihia tọn ya? Pọ́n eyin a sọgan na gblọndo na kanbiọ he bọdego helẹ:

• Etẹwẹ yin delẹ to whẹwhinwhẹ́n he wutu oylan do sù sọmọ to egbehe lẹ mẹ?

Dopo to nuhe nọ hẹn gbẹtọvi lẹ nado wà onú ylankan lẹ mẹ wẹ ayilinlẹn gbẹtọ tọn nado waylan. (Gẹnẹsisi 8:21) Devo wẹ yindọ gbẹtọ susu ma tindo oyọnẹn he pegan gando ojlo Jiwheyẹwhe tọn go. Humọ, Satani, dowatọ oylan tọn, fọ́n bo to nùdo whẹho gbẹtọvi lẹ tọn mẹ.—1/1, weda 4-6.

• Ale tẹlẹ wẹ ohó dagbe didọ to ojlẹ etọn mẹ sọgan hẹnwa? (Howhinwhẹn lẹ 12:25)

E sọgan gọalọna mẹhe yin pipà lọ nado wleawuna jidedo-mẹdetiti go, na ẹn tuli bosọ whàn ẹn, podọ e sọgan wleawuna kanṣiṣa pẹkipẹki de. Humọ, tintẹnpọn nado pà mẹdevo lẹ na gọalọna mí nado mọ onú dagbe to yé mẹ.—1/1, weda 16-17.

• Etẹlẹ wẹ to aki alẹnu tọn lọ mẹ?

E bẹ tafo zannu tọn awe he ji Osẹ́n lọ yin winwlan do lẹ po mana vude po hẹn. To atẹṣiṣi Kola tọn godo, opò Aalọn tọn yin zizedo Aki lọ mẹ nado yin kunnudenu de sọta whẹndo atẹṣitọ lọ. (Heblu lẹ 9:4) Opò lọ po mana lọ po sọgan ko yin didesẹ sọn Aki lọ mẹ jẹnukọnna klandowiwe tẹmpli Sọlọmọni tọn.—15/1, weda 31.

• Naegbọn Ju azán Nẹhemia gbè tọn lẹ dona hẹn nake wá tẹmpli mẹ?

Osẹ́n Mose tọn ma biọ nunina nake tọn gba. Ṣigba, to ojlẹ Nẹhemia tọn mẹ, nuhudo nake tọn tin taun nado sọgan mẹ̀n avọ́sinsan lẹ to agbà ji.—1/2, weda 11.

• Etẹwẹ Kandai Muratori tọn yin?

E yin apadewhe alọnuwe-hihia Latin-gbè mẹ tọn de. Glẹkigbe mẹ wẹ e yin kinkàn do jẹnukọn to vivọnu owhe kanweko awetọ W.M. tọn mẹ. E bẹ todohukanji he ko dẹn-to-aimẹ hugan owe he tin to Owe-wiwe Glẹki Klistiani tọn lẹ tọn mẹ he nọ yin jidedego hẹn, bosọ basi zẹẹmẹ do owe lọ lẹ po mẹhe kàn yé po ji.—15/2, weda 13-14.

• Etẹwutu wẹ Ahọsi Vaṣti Pẹlsia tọn gbẹ́ nado wá ahọlu dè? (Ẹsteli 1:10-12)

Biblu ma dọ mẹwhinwhàn etọn gba. Weyọnẹntọ delẹ dọ dọ e gbẹ́ na e ma jlo na de ede pò to jonọ ahọlu tọn he ko nùahànmú lẹ nukọn wutu. Kavi e sọgan yindọ ahọsi he awusọhia gbonu tọn etọn yọnwhanpẹ ehe ma yin taliaitọ nugbo, bo gbọnmọ dali ze apajlẹ ylankan de dai na whési lẹpo to Ahọluigba Pẹlsia tọn mẹ.—1/3, weda 9.

• Nawẹ ofligọ lọ nọ tún mí dote gbọn?

Avọ́sinsan Jesu tọn sọgan tún mí dote sọn ylando he mí dugu etọn mẹ bo sọgan de mí sọn nugandomẹgo okú tọn he ylando nọ hẹnwa lẹ mẹ. (Lomunu lẹ 6:23) Avọ́sinsan ehe hẹn Klistiani nugbo lẹ jẹ yedekannu sọn ayihadawhẹnamẹnu he hoapa mẹ. Podọ gbọn yise yiyizan to ofligọ lọ mẹ dali, mí sọgan yin tuntundote sọn obu gando teninọ mítọn to Jiwheyẹwhe nukọn go si. (1 Johanu 2:1)—15/3, weda 8.

• Etẹwẹ mí sọgan plọn sọn nugbẹnamẹ Osẹ́n lọ tọn ma nado sọakusìn gbọgbọẹvu de to anọ́sin onọ̀ etọn tọn mẹ? (Eksọdusi 23:19)

Nuwiwa mọnkọtọn sọgan ko yin aṣa kosi lẹ tọn nado dọ̀n jikun. (Levitiku 20:23) Jiwheyẹwhe wleawuna anọ́sin gbọgbọẹ tọn nado na núdùdù ovivu lọ bo gọalọna ẹn nado whẹ́n. Kanlin-vu lọ didà to anọ́sin enẹ mẹ na do sisi matindo na haṣinṣan he Jiwheyẹwhe ko doai to onọ̀ po ovi po ṣẹnṣẹn hia. Osẹ́n ehe do awuvẹmẹ lẹblanunọ Jiwheyẹwhe tọn hia.—1/4, weda 31.