Yíyí Nugbonọ-Yinyin do Sẹ̀n Klisti Ahọlu

“Yè sọ yí ahọluigba na ẹn finẹ, po gigo po, po ahọludu de po, na gbẹtọ lẹpo, po akọta lẹ po, po ogbè lẹ po nido nọ sẹ̀n ẹn.”—DANIẸLI 7:14.

1, 2. Nawẹ mí wagbọn do yọnẹn dọ Klisti ma mọ huhlọn Ahọluduta tọn yí to gigọ́ mẹ to owhe 33 W.M.?

GANDUTỌ tẹwẹ sọgan yí ogbẹ̀ etọn do sanvọ́ na mẹjidugando etọn lẹ ṣogan bosọ gọwá nọgbẹ̀ nado duahọlu? Ahọlu tẹwẹ sọgan nọgbẹ̀ to aigba ji, bo whàn mẹjidugando etọn lẹ nado dejido e go bo yin nugbonọ hlan ẹn, podọ enẹgodo dugán sọn olọn mẹ? Omẹ dopo akàn he sọgan wà ehe po onú susu devo lẹ po wẹ Jesu Klisti. (Luku 1:32, 33) To Pẹntikọsti 33 W.M., to whenuena Klisti ko kú, bo yin finfọnsọnku, bosọ hẹji yì olọn mẹ godo, Jiwheyẹwhe “yí na ẹn nado yin ota to onú lẹpo ji [na] agun lọ.” (Efesunu lẹ 1:20-22; Owalọ lẹ 2:32-36) Klisti gbọnmọ dali jẹ gandu ji ṣigba e ma yin to gigọ́ mẹ. Mẹjidugando tintan etọn lẹ wẹ Klistiani yiamisisadode gbọn gbigbọ dali lẹ, he wleawuna Islaeli gbigbọmẹ tọn, yèdọ “Islaeli Jiwheyẹwhe tọn.”—Galatianu lẹ 6:16; Kọlọsinu lẹ 1:13.

² Diblayi owhe 30 to Pẹntikọsti 33 W.M. tọn enẹ godo, apọsteli Paulu dekunnu dọ Klisti ma ko mọ huhlọn Ahọluduta tọn yí to gigọ́ mẹ gba, ṣigba dọ e tin “to adusilọ Jiwheyẹwhe tọn mẹ; sọn dinvie, [bo] to todo kaka yè nado yí kẹntọ etọn lẹ do basi tokloafọligbe etọn tọn.” (Heblu lẹ 10:12, 13) To nukọn mẹ, sẹpọ vivọnu owhe kanweko tintan W.M. tọn, apọsteli Johanu yọnhonọ lọ mọ to numimọ de mẹ bọ Nupojipetọ Wẹkẹ tọn, Jehovah, to Klisti Jesu zedo ofìn ji taidi Ahọlu Ahọluduta olọn tọn he ṣẹṣẹ yin didoai lọ tọn. (Osọhia 11:15; 12:1-5) Sọn pọndohlan mítọn mẹ to whenuho mẹ, mí sọgan gbadopọnna kunnudenu he dutomẹji lẹ he dohia dọ Klisti jẹ gandu ji to 1914 taidi Ahọlu Mẹssia to olọn mẹ.a

3. (a) Diọdo yọyọ tẹwẹ ko wá aimẹ gando wẹndagbe Ahọluduta lọ tọn go sọn 1914 gbọ́n? (b) Kanbiọ tẹlẹ wẹ dopodopo mítọn sọgan kanse ede?

³ Mọwẹ, diọdo awuvivinamẹ tọn yọyọ de ko wá aimẹ gando wẹndagbe Ahọluduta lọ tọn go sọn 1914 gbọ́n. Klisti ko to gandu taidi Ahọlu Ahọluduta olọn mẹ Jiwheyẹwhe tọn, ṣigba “to ṣẹnṣẹn kẹntọ [etọn] lẹ tọn.” (Psalm 110:1, 2; Matiu 24:14; Osọhia 12:7-12) Humọ, mẹjidugando nugbonọ etọn lẹ lẹdo aihọn pé to gbeyina aṣẹpipa etọn po zohunhun po gbọn mahẹ tintindo to tito Biblu pinplọnmẹ lẹdo aihọn pé tọn de mẹ he nkọtọn ma ko wá aimẹ pọ́n to whenuho gbẹtọvi tọn mẹ. (Daniẹli 7:13, 14; Matiu 28:18) Klistiani yiamisisadode gbọn gbigbọ dali lẹ, “ovi ahọludu tọn” lẹ, to nuyiwa taidi “mẹdagun [kavi afọzedaitọ] na Klisti.” Yé tindo godonọnamẹ gligli gbẹtọ susugege “lẹngbọ devo” he to jijideji lẹ tọn, he to nuyiwa taidi dẹ́mẹnu Ahọluduta Jiwheyẹwhe tọn tọn lẹ. (Matiu 13:38; 2 Kọlintinu lẹ 5:20; Johanu 10:16) Etomọṣo, dopodopo mítọn dona gbeje ede pọ́n nado yọnẹn eyin mí to alọkẹyi aṣẹpipa Klisti tọn nugbonugbo. Be mí to nugbonọ yin hlan ẹn masẹafọ ya? Nawẹ mí sọgan do nugbonọ-yinyin hia hlan Ahọlu de he to gandu to olọn mẹ gbọn? Nalete, jẹnukọn whẹ́, mì gbọ mí ni gbadopọnna whẹwhinwhẹ́n he wutu mí dona yin nugbonọ hlan Klisti.

Ahọlu de He Nọ Whànmẹ Nado Yin Nugbonọ Hlan Ẹn

4. Etẹwẹ Jesu wadotana taidi Ahọlu Sọgodo tọn de to lizọnyizọn aigba ji tọn etọn whenu?

⁴ Pinpẹn-nutọn-yinyọnẹn na nuhe Klisti wà na mí podọ na jẹhẹnu ayidego tọn etọn lẹ wẹ nọ whàn mí nado yin nugbonọ hlan ẹn. (1 Pita 1:8) To whenuena e tin to aigba ji, Jesu taidi Ahọlu Sọgodo tọn lọ dohia to aliho kleun de mẹ nuhe e na wà to sọgodo lẹdo aihọn pé taidi Ahọlu he to gandu de to ojlẹ dide Jiwheyẹwhe tọn mẹ. E na núdùdù mẹhe huvẹ to hùhù lẹ. E hẹnazọ̀ngbọna awutunọ lẹ, nukuntọ́nnọ lẹ, sẹkunọ lẹ, tókunọ lẹ, po unbọpẹnnọ lẹ po. E tlẹ hẹn mẹhe ko kú delẹ gọwá ogbẹ̀. (Matiu 15:30, 31; Luku 7:11-16; Johanu 6:5-13) Humọ, yinyọ́n gbẹzan he Jesu zan to aigba ji zọ́n bọ mí yọ́n jẹhẹnu etọn lẹ taidi Ahọlu sọgodo tọn aigba tọn—titengbe owanyi mẹde-yido-sanvọ́ tọn etọn. (Malku 1:40-45) Gando ehe go, Napoléon Bonaparte wlan dọmọ: “Alẹkzandle, Sesali, Charlemagne, po yẹn po do ahọluigba lẹ ai, ṣigba etẹ ji wẹ mí ze azọ́n nuwadotana daho mítọn lẹ tọn sinai do? Do huhlọn yí do hẹnmẹ ji. Jesu Klisti kẹdẹ wẹ ze ahọluduta etọn sinai do owanyi ji, podọ mẹsusu to egbehe wẹ na yigbe nado kú do ota etọn mẹ.”

5. Naegbọn gbẹtọ-yinyin Jesu tọn do dọnmẹdogo sọmọ?

⁵ Na Jesu yin homẹmimiọnnọ po ayiha whiwhẹnọ po wutu, mẹhe kọgbidinamẹnu lẹ po magbọjẹ lẹ po doagban pinpẹn na lẹ yin homẹmiọnna gbọn nuplọnmẹ mẹjlọdote tọn po gbẹtọ-yinyin homẹdagbenọ etọn po dali. (Matiu 11:28-30) Ovivu lẹ voawu to e dè. Sunnu whiwhẹnọ, wuntuntunnọ lẹ lẹzun devi etọn lẹ po jejejininọ po. (Matiu 4:18-22; Malku 10:13-16) Walọ mẹtọnhopọn po sisi tọn etọn po zọ́n bọ yọnnu he dibusi Jiwheyẹwhe susu yin nugbonọ hlan ẹn, bọ susu to yé mẹ yí whenu, huhlọn, po nutindo agbasa tọn yetọn lẹ po do sanvọ́ nado penukundo e go to lizọnyizọn etọn whenu.—Luku 8:1-3.

6. Numọtolanmẹ awuvẹmẹ tọn tẹlẹ wẹ Jesu dohia to whenuena Lazalọsi kú?

⁶ Klisti do numọtolanmẹ sisosiso awuvẹmẹ tọn etọn delẹ hia to whenuena họntọn etọn vivẹ́ Lazalọsi kú. Awubla Malia po Malta po tọn yinuwado e ji sọmọ bọ e ma sọgan dava awufiẹsa ohò etọn mẹ tọn, bọ ewọ lọsu “viavi.” E ‘yin tuklado taun,’ bọ awufiẹsa po awubla po hẹn ẹn jẹflumẹ tlala, dile e tlẹ yọnẹn dọ emi na fọ́n Lazalọsi wá ogbẹ̀ to madẹnmẹ. To godo mẹ, na e yin whinwhàn gbọn owanyi po awuvẹmẹ po dali wutu, Jesu yí aṣẹpipa he Jiwheyẹwhe na ẹn zan bo fọ́n Lazalọsi sọnku.—Johanu 11:11-15, 33-35, 38-44.

7. Naegbọn e do jẹ dọ mí ni yin nugbonọ hlan Jesu? (Pọ́n apotin he tin to weda 31.)

⁷ Owanyi sisosiso Jesu tọn na nuhe sọgbe lẹ podọ wangbẹna sinsinyẹn etọn na yẹnuwiwa po ylanwiwa po sẹhundaga taun. Whlaawe wẹ e ze afọdide adọgbigbo tọn nado yàn ajọwatọ nukunkẹnnọ lẹ sọn tẹmpli lọ mẹ. (Matiu 21:12, 13; Johanu 2:14-17) Humọ, taidi gbẹtọvi de to aigba ji, e tindo numimọ yajiji wunmẹ lẹpo tọn, ehe zọ́n bọ e yọ́n kọgbidinamẹ po nuhahun he mí nọ pehẹ lẹ po ganji. (Heblu lẹ 5:7-9) Jesu sọ jiya wangbẹna po whẹdida mawadodo tọn po. (Johanu 5:15-18; 11:53, 54; 18:38–19:16) To godo mẹ, e yí adọgbigbo do ze ede jo na okú danuwiwa tọn nado hẹn ojlo Otọ́ etọn tọn di bo hẹn ogbẹ̀ madopodo yọnbasi na mẹjidugando etọn lẹ. (Johanu 3:16) Be jẹhẹnu Klisti tọn enẹlẹ ma whàn we nado to sinsẹ̀n ẹn po nugbonọ-yinyin po zọnmii ya? (Heblu lẹ 13:8; Osọhia 5:6-10) Ṣigba etẹwẹ mẹde dona wà nado yin mẹjidugando Klisti he yin Ahọlu lọ tọn?

Pipegan Nado Yin Mẹjidugando Etọn

8. Nubiọtomẹsi tẹlẹ kọ̀n wẹ mẹjidugando Klisti tọn lẹ dona jẹ?

⁸ Lẹnnupọndo nuyijlẹdonugo ehe ji: Nado lẹzun tòvi otò devo tọn nọ saba biọ dọ mẹlọ ni jẹ jẹhẹnu dodonu tọn tangan delẹ kọ̀n whẹ́. E sọgan yin bibiọ to mẹlọ si nado tindo walọ dagbe bosọ jẹ nujinọtedo agbasalilo tọn tangan delẹ kọ̀n. Mọdopolọ, mẹjidugando Klisti tọn lẹ dona hẹn nujinọtedo walọ dagbe tọn he yiaga lẹ go bosọ tindo agbasalilo gbigbọmẹ tọn dagbe.—1 Kọlintinu lẹ 6:9-11; Galatianu lẹ 5:19-23.

9. Nawẹ mí sọgan dohia dọ mí yin nugbonọ hlan Klisti gbọn?

⁹ Jesu Klisti sọ gbọn jlọjẹ dali biọ dọ mẹjidugando etọn lẹ ni yin nugbonọ hlan ewọ po Ahọluduta etọn po. Yé nọ do nugbonọ-yinyin mọnkọtọn hia gbọn gbẹninọ sọgbe hẹ nuhe e plọnmẹ to whenuena e yin Ahọlu Sọgodo tọn to aigba ji lẹ dali. Di dohia, yé nọ ze dagbenu Ahọluduta lọ tọn lẹ po ojlo Jiwheyẹwhe tọn wiwà po do otẹn tintan mẹ na yanwle agbasa tọn lẹ. (Matiu 6:31-34) Yé sọ dona nọ dovivẹnu vẹkuvẹku nado do gbẹtọ-yinyin he taidi Klisti tọn hia, etlẹ yin to ninọmẹ sinsinyẹn hugan lẹ mẹ. (1 Pita 2:21-23) Humọ, mẹjidugando Klisti tọn lẹ nọ hodo apajlẹ etọn gbọn afọdide tintan zize nado wà dagbe na mẹdevo lẹ dali.—Matiu 7:12; Johanu 13:3-17.

10. Nawẹ nugbonọ-yinyin hlan Klisti sọgan yin didohia to (a) whẹndo mẹ podọ (b) agun mẹ gbọn?

¹⁰ Hodotọ Jesu tọn lẹ sọ nọ do nugbonọ-yinyin yetọn hlan ẹn hia gbọn jẹhẹnu etọn lẹ didohia to whẹndo mẹ dali. Di dohia, asu lẹ nọ do nugbonọ-yinyin hia hlan Ahọlu olọn mẹ tọn yetọn gbọn apajlẹ Klisti tọn hihodo to aliho he mẹ yé nọ yinuwa hẹ asi po ovi yetọn lẹ po te mẹ dali. (Efesunu lẹ 5:25, 28-30; 6:4; 1 Pita 3:7) Asi lẹ nọ do nugbonọ-yinyin hlan Klisti hia gbọn walọ wiwe gọna “gbigbọ homẹmimiọn po dẹẹdẹ tọn po” didohia dali. (1 Pita 3:1-4; Efesunu lẹ 5:22-24) Ovi lẹ nọ yin nugbonọ hlan Klisti to whenuena yé hodo apajlẹ tonusise etọn tọn. Taidi jọja de, Jesu yin mẹmẹglọ hlan mẹjitọ etọn lẹ, dile etlẹ yindọ mapenọ wẹ yé yin. (Luku 2:51, 52; Efesunu lẹ 6:1) Mẹjidugando Klisti tọn lẹ nọ dovivẹnu nado hodo apajlẹ etọn gbọn ‘homẹ kinkọndai na yenọzo, bo yiwanna omẹ di mẹmẹsunnu’ dali podọ gbọn yinyin “awuvẹmẹtọ” dali. Yé nọ vánkan nado yinuwa di Klisti bo nọ yin ‘dagbewatọ kavi whiwhẹnọ to ayiha mẹ, he ma nọ yí oylan do sú oylan họ́, kavi ozun do sú ozun họ́.’—1 Pita 3:8, 9; 1 Kọlintinu lẹ 11:1.

Mẹjidugando Tonusetọ Lẹ

11. Osẹ́n tẹlẹ wẹ mẹjidugando Klisti tọn lẹ nọ nọgbẹ̀ sọgbe hẹ?

¹¹ Kẹdẹdile mẹhe jlo nado lẹzun tòvi otò devo tọn lẹ nọ setonuna osẹ́n otò yọyọ yetọn tọn lẹ do, mẹjidugando Klisti tọn lẹ lọsu nọ setonuna “osẹ́n Klisti tọn” gbọn gbẹninọ sọgbe hẹ nuhe Jesu plọnmẹ bo degbè etọn lẹpo dali. (Galatianu lẹ 6:2) Na taun tọn, yé nọ gbọn nugbonọ-yinyin dali nọgbẹ̀ sọgbe hẹ “tado osẹ́n tọn lọ” he yin owanyi. (Jakobu 2:8) Etẹwẹ osẹ́n ehelẹ bẹhẹn?

12, 13. Nawẹ mí nọ setonuna “osẹ́n Klisti tọn” po nugbonọ-yinyin po gbọn?

¹² Mẹjidugando Klisti tọn lẹ gbẹ́ yin mapenọ lẹ bo nọ ṣinuwa. (Lomunu lẹ 3:23) Enẹwutu, yé dona to awuwlena “owanyi mẹmẹsunnu tọn madoklọ” zọnmii nado sọgan “yiwanna [yenọzo] tlala po ayiha wiwe po.” (1 Pita 1:22) “Eyin mẹde tindo wiwọ́ do mẹde go,” Klistiani lẹ nọ yí nugbonọ-yinyin do yinuwa sọgbe hẹ osẹ́n Klisti tọn gbọn ‘linsinsinyẹn hẹ yenọzo po jijona yenọzo po’ dali. Tonusisena osẹ́n ehe nọ gọalọna yé nado nọ yí nukunpẹvi do pọ́n nuṣiwa mẹdevo lẹ tọn bo nọ mọ whẹwhinwhẹ́n lẹ nado yiwanna ode awetọ. Be homẹ towe ma hùn nado tin topọ hẹ mẹhe nọ yí nugbonọ-yinyin do litaina Ahọlu owanyinọ mítọn bo nọ ze owanyi he yin “pọninọ gbesisọ tọn” dogo lẹ ya?—Kọlọsinu lẹ 3:13, 14.

¹³ Yinukọn dogọ, Jesu basi zẹẹmẹ dọ owanyi he ewọ dohia lọ yiaga hú owanyi he gbẹtọ lẹ nọ dohia ode awetọ yetọn to paa mẹ. (Johanu 13:34, 35) Eyin mí yiwanna mẹhe yiwanna mí lẹ kẹdẹ, mí ma wà nude “hú mẹdevo lẹ.” Owanyi mọnkọtọn ma na yin owanyi pipé madoklọ gba. Jesu dotuhomẹna mí nado hodo apajlẹ owanyi Otọ́ etọn tọn gbọn owanyi he sinai do nunọwhinnusẹ́n ji didohia dali etlẹ yin hlan kẹntọ mítọn he gbẹwanna mí bo nọ dohomẹkẹn mí lẹ. (Matiu 5:46-48) Owanyi ehe sọ nọ whàn mẹjidugando Ahọluduta lọ tọn lẹ nado zindonukọn po nugbonọ-yinyin po to azọ́n tangan yetọn mẹ. Azọ́n tẹwẹ?

Nugbonọ-Yinyin Yetọn Yin Whiwhlepọn

14. Naegbọn azọ́n yẹwhehodidọ tọn lọ do yin nujọnu sọmọ?

¹⁴ Mẹjidugando Ahọluduta Jiwheyẹwhe tọn lẹ tindo azọ́n titengbe lọ nado ‘dekunnu ohó ahọluduta Jiwheyẹwhe tọn tọn mlẹnmlẹn.’ (Owalọ lẹ 28:23) Mọwiwà yin dandannu na Ahọluduta Mẹssia tọn na suwhẹna Jehovah taidi nupojipetọ wẹkẹ tọn. (1 Kọlintinu lẹ 15:24-28) Eyin mí dọyẹwheho wẹndagbe lọ tọn, dotẹnmẹ na hundote na sisetọ lẹ nado lẹzun mẹjidugando Ahọluduta Jiwheyẹwhe tọn tọn lẹ. Humọ, aliho he mẹ gbẹtọ lẹ yigbena owẹ̀n lọ te na yin nujlẹnu, kavi nujinọtedo de he Klisti Ahọlu lọ sọgan yí do dawhẹna gbẹtọvi lẹ. (Matiu 24:14; 2 Tẹsalonikanu lẹ 1:6-10) Enẹwutu, aliho titengbe hugan he mẹ mí nọ do nugbonọ-yinyin mítọn hlan Klisti hia te wẹ nado setonuna gbedide etọn nado lá Ahọluduta lọ na mẹdevo lẹ.—Matiu 28:18-20.

15. Naegbọn nugbonọ-yinyin Klistiani lẹ tọn do nọ yin whiwhlepọn?

¹⁵ Na nugbo tọn, Satani nọ wà nuhe go e pé lẹpo nado jẹagọdo azọ́n yẹwhehodidọ tọn, podọ gbẹtọvi he to gandu lẹ ma yọ́n aṣẹpipa he Jiwheyẹwhe na Klisti gba. (Psalm 2:1-3, 6-8) Enẹwutu, Jesu na avase devi etọn lẹ dọmọ: “Afanumẹ ma klohu oklunọ etọn. Eyin yé dohomẹkẹn mi, yé nasọ dohomẹkẹn mìwlẹ ga.” (Johanu 15:20) Taidi kọdetọn de, hodotọ Klisti tọn lẹ mọ yedelẹ to awhàn gbigbọmẹ tọn de mẹ ehe nọ whlé nugbonọ-yinyin yetọn pọ́n.—2 Kọlintinu lẹ 10:3-5; Efesunu lẹ 6:10-12.

16. Nawẹ mẹjidugando Ahọluduta lọ tọn lẹ nọ yí “nuhe yin Jiwheyẹwhe tọn hlan Jiwheyẹwhe” gbọn?

¹⁶ Nalete, mẹjidugando Ahọluduta Jiwheyẹwhe tọn tọn lẹ nọ yin nugbonọ hlan Ahọlu mayinukundomọ yetọn ṣogan bosọ nọ na sisi aṣẹpipa gbẹtọvi tọn lẹ. (Titu 3:1, 2) Jesu dọmọ: “Mì yí nuhe yin Sesali tọn hlan Sesali, podọ nuhe yin Jiwheyẹwhe tọn hlan Jiwheyẹwhe.” (Malku 12:13-17) Enẹwutu, mẹjidugando Klisti tọn lẹ nọ setonuna osẹ́n tohọluduta tọn he ma sọta osẹ́n Jiwheyẹwhe tọn lẹ. (Lomunu lẹ 13:1-7) Ṣigba, to whenuena whẹdatẹn daho Juvi lẹ tọn jẹagọdo osẹ́n Jiwheyẹwhe tọn lẹ gbọn gbedide na devi Jesu tọn lẹ nado doalọtena yẹwhehodidọ dali, yé yí nujikudo do gblọn po sisi po dọ yé “ma hà nọma setonuna Jiwheyẹwhe hú gbẹtọ.”—Owalọ lẹ 1:8; 5:27-32.

17. Naegbọn mí sọgan pehẹ whlepọn nugbonọ-yinyin tọn lẹ po adọgbigbo po?

¹⁷ Na nugbo tọn, e nọ biọ adọgbigbo daho to mẹjidugando Klisti tọn lẹ si nado yin nugbonọ hlan Ahọlu yetọn to whlepọn lẹ whenu. Etomọṣo, Jesu dọmọ: “Donanọ [kavi ayajẹnọ] wẹ mìwlẹ, whenuena gbẹtọ lẹ na to vivlẹ mì kò, bo to homẹkẹndo mì, bosọ to oylan hunkọhunkọ dọ do mì go to lalo mẹ, na ṣie wutu. Mì ni jaya, na mì nisọ to ayajẹ susu; na ale mìtọn wẹ daho to olọn mẹ.” (Matiu 5:11, 12) Hodotọ dowhenu Klisti tọn lẹ mọ nugbo-yinyin hogbe enẹlẹ tọn. Etlẹ yin to whenuena yè linú yé na nukọnzinzindo nado dọyẹwheho Ahọluduta lọ tọn godo, yé jaya “na yè lẹn yé jẹ nado jiya na oyín etọn wutu. Podọ egbesọegbesọ to tẹmpli mẹ podọ to owhé dopodopo gbè, yé ma nọ omẹ ma plọn, yé masọ nọ yẹwheho Jesu Klisti tọn ma dọ.” (Owalọ lẹ 5:41, 42) Hiẹ lọsu jẹ na pipà, dile hiẹ to gbigbọ nugbonọ-yinyin tọn dopolọ dohia to akọndidona awusinyẹnnamẹnu lẹ, azọ̀n, aluẹmẹninọ, kavi agọjẹdomẹ whenu.—Lomunu lẹ 5:3-5; Heblu lẹ 13:6.

18. Etẹwẹ hogbe Jesu tọn lẹ hlan Pọntiu Pilati dohia?

¹⁸ To whenuena Jesu gbẹ́ pò to Ahọlu Sọgodo tọn de yin, e basi zẹẹmẹ na Togán Lomu tọn Pọntiu Pilati dọmọ: “Ahọludu ṣie ma yin aihọn he tọn gba: eyin ahọludu ṣie ko yin aihọn he tọn, be awhàngán ṣie lẹ do hoavùn, na yè ma na do jo mi hlan Ju lẹ: ṣigba dinvie ahọludu ṣie ma yin sọn ofi gba.” (Johanu 18:36) Enẹwutu, mẹjidugando Ahọluduta olọn tọn lẹ ma nọ ze awhànfunnu lẹ sọta mẹdevo lẹ mọjanwẹ yé ma nọ nọgodona avùnhiho gbẹtọvi tọn depope do niyẹn. To nugbonọ-yinyin mẹ na “Ahọvi Jijọho tọn,” yé nọ gbọṣi kadaninọ mlẹnmlẹn mẹ gando whẹho aihọn tọn he nọ hẹn kinklan wá lẹ go.—Isaia 2:2-4; 9:6, 7.

Ale Madopodo lẹ Na Mẹjidugando Nugbonọ Lẹ

19. Naegbọn mẹjidugando Klisti tọn lẹ sọgan tindo nukundido he họnwun de na sọgodo?

¹⁹ Mẹjidugando nugbonọ Klisti, he yin “Ahọlu ahọlu lẹ tọn” tọn lẹ tindo nukundido he họnwun de na sọgodo. Yé to nukundo dohia jiawu huhlọn ahọlu lọ tọn to madẹnmẹ po jejejininọ po. (Osọhia 19:11–20:3; Matiu 24:30) Pipotọ nugbonọ, “ovi ahọludu tọn” yiamisisadode gbọn gbigbọ dali lẹ to nukọnpọnhlan na ogú họakuẹ yetọn he yin nado duahọlu hẹ Klisti to olọn mẹ. (Matiu 13:38; Luku 12:32) “Lẹngbọ devo” nugbonọ Klisti tọn lẹ to tenọpọn hogbe alọkẹyi Ahọlu yetọn tọn po jejejininọ po to whenuena Jesu na dọmọ: “Mì wá, mì donanọ Otọ́ ṣie tọn, mì dugu [lẹdo Paladisi aigba ji tọn to] ahọludu he yè ko wleawu etọn dai na mì sọn dòdó aihọn tọn wá” lọ mẹ. (Johanu 10:16; Matiu 25:34) Enẹwutu, mì gbọ mẹjidugando Ahọluduta lọ tọn lẹpo ni magbe nado zindonukọn to yíyí nugbonọ-yinyin do sẹ̀n Klisti Ahọlu lọ mẹ.

[Nudọnamẹ Odò Tọn]

Be Hiẹ Sọgan Basi Zẹẹmẹ Ya?

• Naegbọn e do jẹ dọ mí ni yin nugbonọ hlan Klisti?

• Nawẹ mẹjidugando Klisti tọn lẹ nọ do nugbonọ-yinyin yetọn hlan ẹn hia gbọn?

• Naegbọn mí jlo nado yin nugbonọ hlan Klisti he yin Ahọlu?

[Apotin to weda 31]

JẸHẸNU AYIDEGO KLISTI TỌN DEVO LẸ

Mẹnukuntamahopọn—Johanu 4:7-30.

Awuvẹmẹ—Matiu 9:35-38; 12:18-21; Malku 6:30-34.

Owanyi mẹde-yido-sanvọ́ tọn—Johanu 13:1; 15:12-15.

Nugbonọ-yinyin—Matiu 4:1-11; 28:20; Malku 11:15-18.

Mẹtọnhopọn—Malku 7:32-35; Luku 7:11-15; Heblu lẹ 4:15, 16.

Lẹnpọn dagbenọ-yinyin—Matiu 15:21-28.

[Yẹdide to weda 29]

Gbọn owanyi didohia ode awetọ dali, mí to tonusena “osẹ́n Klisti tọn” po nugbonọ-yinyin po

[Yẹdide to weda 31]

Be jẹhẹnu Klisti tọn lẹ nọ whàn we nado sẹ̀n ẹn po nugbonọ-yinyin po ya?