Etẹwẹ Ahọluduta Jiwheyẹwhe Tọn Yin?

NUGBAJẸMẸJI mẹhẹnjọsi tọn nankọ die gbẹtọ lẹ tindo numimọ etọn to bẹjẹeji whenuho gbẹtọvi tọn! Angẹli de diọnukunsọ aṣẹpipa Omẹ lọ he dá ẹ tọn. Atẹṣitọ ehe klọ yọnnu tintan lọ, Evi, nado dù atin-sinsẹ́n he yin gbigbẹ́ lọ. Angẹli lọ dọ gando ewọ po asu etọn, Adam po go dọmọ: “Mì ma na kú dandan gba: na Jiwheyẹwhe yọnẹn dọ azán he gbè mìwlẹ dù to e mẹ te, whenẹnu wẹ yè na hùn nukun mìtọn, bọ mìwlẹ na tin di Jiwheyẹwhe, bo nọ yọ́n onú dagbe po oylan po.” (Gẹnẹsisi 2:16, 17; 3:1-5) Angẹli atẹṣitọ lọ wá yin yiylọdọ Lẹgba podọ Satani.—Osọhia 12:9.

Be Evi dotoaina nuhe Satani dọ lẹ ya? Biblu dọna mí dọmọ: “Yọnnu lọ mọdọ atin lọ yọ́n na núdùdù, podọ e sọ yọnwhanpẹ to nukunta, podọ atin he yè na jlo nado hẹn mẹde yọnnuin, e yí sọn sinsẹ́n etọn mẹ, bo dù, bosọ na asu etọn po e po, ewọ sọ dù.” (Gẹnẹsisi 3:6) Mọwẹ, asu po asi po tintan lọ, yèdọ Adam po Evi po, kọnawudopọ hẹ Satani to atẹṣiṣi etọn mẹ. Taidi kọdetọn de, yé hẹn Paladisi lọ bú na yedelẹ podọ na kúnkan yetọn lẹ. E blawu dọ ovi he dona yin jiji taidi mẹpipe po nukundido lọ po nado nọgbẹ̀ kakadoi lẹ na wá dugu ylando po okú po tọn.—Lomunu lẹ 5:12.

Nawẹ Jehovah Jiwheyẹwhe, Gandutọ Nupojipetọ wẹkẹ lọ tọn, yinuwa gbọn? E basi tito nado wleawuna jona ylando lẹ tọn. (Lomunu lẹ 5:8) Jehovah Jiwheyẹwhe ko sọ ze tito gandudu tọn de dai nado didẹ nuhahun lọ. Tito ehe nọ yin yiylọdọ ‘ahọluduta Jiwheyẹwhe tọn.’ (Luku 21:31) Taidi adà awetọ gandudu lẹdo aihọn pé Jiwheyẹwhe tọn, Ahọluduta ehe yin zizedai na lẹndai tangan de wutu.

Etẹwẹ yin lẹndai Ahọluduta Jiwheyẹwhe tọn tọn? Etẹwẹ yin delẹ to adà etọn lẹ mẹ, podọ nawẹ yé gbọnvona gandudu gbẹtọ tọn gbọn? Whetẹnu wẹ Ahọluduta lọ dona jẹ gandu ji? Kanbiọ ehelẹ na yin dogbapọnna to hosọ he bọdego mẹ.