Be Mẹdevo lẹ Kẹdẹ Wẹ Dona Nọ Dọ Nugbo Ya?

“YẸN gbẹwanna lalo, bo masọ nọ jlo dọ mẹde ni dolalo na mi!” wẹ viyọnnu owhe 16 mẹvi de dọ. Suhugan mítọn wẹ nọ tindo numọtolanmẹ dopolọ. Mí nọ jlo nado mọ dọ nudọnamẹ he yin nina mí—vlavo sọn nùmẹ kavi gbọn kandai gblamẹ lẹ—yin nugbo. Ṣigba, be mílọsu nọ dọ nugbo eyin mí to nudọnamẹ lẹ na mẹdevo lẹ ya?

To dodinnanu he yin bibasi to Allemagne de mẹ, suhugan mẹhe yin hokanse lẹ tọn dọ dọ “lalodido do whẹho flinflin lẹ ji nado basi hihọ́na mẹdetiti kavi nado whlá mẹdevo lẹ sọn oylan mẹ yin alọkẹyi, bo tlẹ sọ yin dandannu na gbẹtọ lẹ nido sọgan jẹpọ.” Podọ linlinwekantọ de wlan dọmọ: “E yọ́n nado nọ dọ nugbo to whepoponu bo ma yí nudepope dogọ, ṣigba apọṣimẹnu wẹ e nọ yin.”

Be vlavo mí nọ jlo dọ mẹdevo lẹ ni dọ nugbo ṣogan bo nọ lẹn to whedelẹnu dọ mílọsu tindo whẹwhinwhẹ́n dagbe ma nado dọ nugbo wẹ ya? Be nujọnu wẹ e yin nado nọ dọ nugbo ya, kavi lala? Etẹwẹ yin kọdetọn nugbomadọ tọn lẹ?

Nugbajẹmẹji He Nugbomadọ Nọ Hẹnwa

Lẹnnupọndo nugbajẹmẹji he nugbomadọ sọgan hẹnwa ji. Lalodido nọ hẹn jimadedomẹgo biọ alọwlemẹ lẹ ṣẹnṣẹn podọ to hagbẹ whẹndo tọn lẹ ṣẹnṣẹn. Mẹnudidọ he ma tindo dodonu sọgan hẹn yinkọ dagbe mẹde tọn gble. Mẹhodu azọ́nwatọ lẹ tọn nọ hẹn akuẹzinzan azọ́nwhé lẹ tọn jideji podọ ehe nọ dekọtọn do ahivivẹ onú lẹ tọn mẹ. Lalodido gando takuẹ go nọ zọ́n bọ gandudu lẹ ma nọ mọ akuẹ he yé tindo nuhudo etọn nado wà tòzọ́n lẹ. Dodinnanutọ lẹ nọ hẹn agbasazọ́n dagbedagbe yetọn lẹ bu na hopàdọ yetọn lẹ wutu podọ ehe nọ kọ̀n masin do oyín dagbe pipli nukundeji lẹ tọn go. Tito oklọ adọkunnọ lilẹzun to zánto dopo mẹ tọn lẹ nọ hò akuẹ yetọn lẹpo yí sọn ajọwatọ he ma bikan ganji lẹ si, kavi tlẹ sọ nọ hẹnnugble humọ. Abajọ Biblu do dọna mí dọ delẹ to nuhe yin osùnú na Jehovah Jiwheyẹwhe lẹ mẹ wẹ “odẹ́ lalo tọn” po “kunnudetọ lalo tọn he to ohó lalo dọ” po!—Howhinwhẹn lẹ 6:16-19.

Lalo he gbayipe sọgan hẹn nugbajẹmẹji wá na mẹdopodopo kavi na gbẹtọvi lẹpo to pọmẹ. Diblayin mẹlẹpo wẹ na kẹalọyi nugbo enẹ. To whelọnu lo, naegbọn gbẹtọ lẹ nọ desọn ojlo mẹ bo nọ dọ nuhe ma yin nugbo? Podọ be nugbomadọ lẹpo wẹ yin lalo ya? Mí na gbadopọnna gblọndo kanbiọ ehelẹ po devo lẹ po tọn to hosọ he bọdego mẹ.

[Yẹdide to weda 3]

Lalodido nọ hẹn jimadedomẹgo biọ alọwlemẹ lẹ ṣẹnṣẹn