Gblọndo He Sọgbe lẹ Dindin
Nawẹ n’sọgan hẹn agbasalilo dagbe go gbọn?
Etẹwẹ n’sọgan wà na whẹndo ṣie nido tindo ayajẹ dogọ?
Nawẹ n’sọgan wagbọn nado hẹn agbasazọ́n ṣie go?
BE HIẸ ko kàn depope to kanbiọ enẹlẹ mẹ sè pọ́n ya? Be a mọ gblọndo yọn-na-yizan he wazọ́n ganji lẹ ya? To whemẹwhemẹ, owe voovo diblayi 2 000 wẹ nọ yin zinzinjẹgbonu nado na ayinamẹ do whẹho ehelẹ po titengbe devo lẹ po ji. To Grande-Bretagne kẹdẹ, gbẹtọ lẹ nọ yí akuẹ he yiaga sọ livres sterling livi 80 (nudi 78 700 000 000 F CFA) zan to whemẹwhemẹ nado họ̀ owe he nọ na ayinamẹ do lehe mí sọgan pehẹ nuhahun gbẹ̀mẹ tọn lẹ do ji. To États-Unis, owe ayinamẹ tọn lẹ nọ hẹn akuẹ diblayi dọla Amelika tọn livi 600 (nudi 314 860 000 000 F CFA) wá to whemẹwhemẹ. E họnwun dọ, e ma yin hiẹ kẹdẹ wẹ to ayinamẹ dagbe lẹ dín to gbẹzan egbesọegbesọ tọn towe mẹ gba.
Gando ayinamẹ he nọ yin mimọ to owe susugege ehelẹ mẹ go, wekantọ de dọmọ: “Owe yọyọ susu ma nọ wà nudevo hugan nado vọ́ nuhe ko yin kinkàn dai lẹ dọ poun.” Na nugbo tọn, susu ayinamẹ he tin to owe ehelẹ mẹ tọn nọ vọ́ nùzindo nuyọnẹn he ko yin kinkàndai to dopo to owe he ko dohó hugan to aihọn mẹ lẹ ji. Owe ehe wẹ yin mimá gbayipe hugan lẹdo aihọn pé. Apadewhe kavi blebu etọn ko yin lilẹdo nudi ogbè 2 400 lẹ mẹ. To bladopọ mẹ, hugan vọkan liva 4,6 owe enẹ tọn ko yin zinzinjẹgbonu lẹdo aihọn pé. E ma yin owe devo de hugan Biblu.
Biblu dọ tlọlọ dọmọ: “Owe-wiwe lẹpo gbingbọ́n sọn Jiwheyẹwhe mẹ yin alenọ ga na mẹpinplọn, na wọhẹmẹ, na anademẹ, na nuplọnmẹ he tin to dodo mẹ.” (2 Timoti 3:16) Nugbo wẹ dọ, Biblu ma yin kinkàn taidi owe ayinamẹ tọn de gba. Lẹndai etọn tintan wẹ nado de ojlo Jiwheyẹwhe tọn hia gbẹtọvi lẹ. Etomọṣo, Biblu tindo nususu nado dọ gando lehe mí sọgan duto nuhahun he mímẹpo nọ pehẹ lẹ ji do go, podọ e dopagbe dọ mẹhe nọ hodo anademẹ etọn lẹ na plọn nado nọ mọaleyi sọn e mẹ. (Isaia 48:17, 18) Eyin mẹde yí ayinamẹ yọn-na-yizan etọn lẹ do yizan mẹ, e nọ tindo kọdetọn dagbe to whepoponu mahopọnna akọ̀ po aṣa he mẹ e wá sọn po kavi obá he mẹ e sewé jẹ. Naegbọn hiẹ ma na gbadopọnna hosọ he bọdego bo dindona na dewe vlavo eyin nuhe Biblu dọ gando whẹho delẹ taidi agbasalilo, whẹndo po agbasazọ́n po go yọn-na-yizan?