Awufiẹsa Daho He Nọ Nọ̀ Aimẹ Dẹn

TO AGỌE, dodinnanutọ de jlo na yọ́n lehe ojlẹ he to jujuyi nọ yinuwado numọtolanmẹ mẹhe to awubla na mẹyiwanna yetọn he yé hẹnbu to okú mẹ lẹ tọn ji do. E do kanbiọ lẹ hlan mẹjitọ susu he ovi yetọn ko kú to owhe delẹ die wayi. E ma yin mẹjitọ lọ lẹpo wẹ na gblọndo gba. Owhe atọ́n to whenue otọ́ de he nọ yin Vladimir ko hẹn visunnu etọn bu to okú mẹ godo, e basi zẹẹmẹ dọ e gbẹsọ vẹawuna emi nado dọho gando visunnu emitọn go.a

Susu mẹjitọ he to aluẹmẹ lẹ tọn wẹ nọ saba tindo numọtolanmẹ awubla dẹn-to-aimẹ tọn mọnkọtọn. To owhe ao die wayi, visunnu owhe 18 mẹvi William tọn kútọ. William wlan dọmọ: “Awufiẹsa okú enẹ tọn gbẹsọ tin to ji e, podọ dile yẹn na to ogbẹ̀ dẹnsọ e na gbẹ́ to nuyiwa do ji e.” Owhe atọ́n to visunnu etọn hinhẹnbu to azọ̀n madonukun de mẹ godo, Lucy wlan dọmọ: “To azán tintan nujijọ lọ tọn lẹ gblamẹ, n’nọ to linlẹn gbọzangbọzan dọ ‘E ma sọgan yin nugbo.’ E taidi dọ odlọ ylankan de kú wẹ n’te nkọ bo na wá yín fọ́n to madẹnmẹ. To ojlẹ kleun de godo, n’wá mọ dọ nugbo wẹ; e masọ lẹkọja whégbè ba. E ko yì owhe atọ́n todin he visunnu ṣie kú, ṣigba to whedelẹnu n’gbẹ́ nọ vi i eyin n’tin yẹn ṣokẹdẹ.”

Naegbọn numọtolanmẹ awufiẹsa daho he nọ nọ̀ aimẹ dẹn tọn enẹ nọ dotukla mẹjitọ he to aluẹmẹ lẹ taidi Vladimir, William, po Lucy po nkọ sọmọ? Mì gbọ mí ni gbadopọnna whẹwhinwhẹ́n delẹ.

Naegbọn Awubla lọ Nọ Sù Sọmọ?

Eyin viyẹyẹ de yin jiji to whẹndo de mẹ, mẹjitọ lẹ nọ tindo numọtolanmẹ he nkọtọn ma nọ yin mimọ to haṣinṣan gbẹtọvi tọn devo depope mẹ. Ayajẹ po pekọ daho po wẹ e nọ yin na yé nado hẹn viyẹyẹ yetọn do akọ̀n, bo to pinpọn ẹn dile e to amlọndọ kavi to nukiko yẹsẹ etọn pọ́n. Mẹjitọ owanyinọ lẹ nọ wlebòna ovi yetọn lẹ. Yé nọ plọn yé nado tindo jijọ dagbe po sisi po. (1 Tẹsalonikanu lẹ 2:7, 11) Dile ovi lẹ to whinwhẹ́n bo to nuyiwa sọgbe hẹ vivẹnudido ehelẹ, mẹjitọ lẹ nọ doawagun bo nọ jẹ todido susu tindo ji to yé mẹ.

Mẹjitọ mẹtọnhopọntọ lẹ nọ wazọ́n sinsinyẹn nado penukundo ovi yetọn lẹ go. Yé sọgan nọ sẹ̀ akuẹ kavi nutindo agbasa tọn delẹ do whẹwhẹ nado sọgan penugo bo gọalọna ovi yetọn lẹ nado bẹ whẹndo yetọn titi jẹeji to nukọn mẹ. (2 Kọlintinu lẹ 12:14) Numọtolanmẹ, whenu, vivẹnudido po akuẹ susu he yé nọ yizan ehelẹ po hẹn mí wá tadona lọ kọ̀n dọ mẹjitọ lẹ nọ pọ́n ovi yetọn lẹ go whẹ́n nado nọgbẹ̀, e ma yin nado kú gba. To whenuena ovi de kú, azọ́n he to yinyin wiwà nado pọ́n e go whẹ́n lọ nọ gbọṣi agbòte, podọ todido mẹjitọ lẹ tọn nọ busẹ. Owanyi zogbe he mẹjitọ lẹ nọ túntún jẹgbonu do ovi yetọn lẹ ji nọ yin alọhẹndotena gbọn aliglọnnamẹnu sinsinyẹn okú tọn dali. Otẹn he mẹ visunnu kavi viyọnnu yetọn tin te to ahun yetọn mẹ dai nọ jẹvọ́. Mẹjitọ lẹ nọ tindo numọtolanmẹ sisosiso awubla tọn he ma nọ yawu yì.

Biblu zinnudeji dọ mẹjitọ he to aluẹmẹ lẹ nọ mọ awufiẹsa sinsinyẹn na ojlẹ dindẹn. To zẹẹmẹ bibasi do nuhe jọ to whenuena tọgbo Jakobu sè dọ visunnu etọn Josẹfu ko yin hùhù ji, Biblu dọmọ: “Jakobu sọ hẹn avọ̀ etọn tlẹ́n, bo yí odẹ́vọ̀ do adà etọn go, bo blawu na visunnu etọn azán susu. Visunnu etọn lẹpo po viyọnnu etọn lẹpo po sọ fọ́n nado miọnhomẹna ẹn; ṣigba e gbẹ́ nado yin mẹmiọnhomẹna; e dọmọ, Na awubla mẹ wẹ yẹn na zọ̀n yì yọdò mẹ yì visunnu ṣie dè.” To owhe susu godo, Jakobu gbẹ́ pò to awubla na visunnu etọn he e lẹndọ e ko kú. (Gẹnẹsisi 37:34, 35; 42:36-38) Apajlẹ Biblu tọn devo wẹ nawe nugbonọ lọ Naomi he hẹn visunnu etọn awe lẹ bu to okú mẹ. Ehe hẹn ẹn blawu sọmọ bọ e jlo na diọ yinkọ etọn Naomi he zẹẹmẹdo “Homẹvivi Ṣie” zun Mala he zẹẹmẹdo “Vivẹ́.”—Luti 1:3-5, 20, 21.

Ṣigba, e ma yin awubla he mẹjitọ lẹ nọ tindo numimọ etọn kẹdẹ go wẹ Biblu donù gba. E sọ do lehe Jehovah nọ na huhlọn mẹhe to awubla lẹ do hia ga. To hosọ he bọdego mẹ, mí na gbadopọnna delẹ to aliho he mẹ Jiwheyẹwhe nọ miọnhomẹna mẹhe to aluẹmẹ lẹ te.

[Nudọnamẹ Odò Tọn]