Be Hiẹ Ko Wleawufo Na Azán Jehovah Tọn Ya?
“Azán daho OKLUNỌ tọn tin sẹpọ, e tin sẹpọ bosọ to unklẹn susu.”—ZẸFANIA 1:14.
1-3. (a) Etẹwẹ Biblu dọ gando azán Jehovah tọn go? (b) ‘Azán Jehovah tọn’ tẹwẹ mí to nukundo?
AZÁN daho Jehovah tọn ma yin ojlẹ ganhiho 24 tọn gba. Ojlẹ gaa de wẹ e yin, whenue whẹdida Jiwheyẹwhe tọn na yin hinhẹnṣẹ do mẹylankan lẹ ji. Mẹylankan lẹ tindo whẹwhinwhẹ́n nado dibu na azán zinvlu, homẹgble, homẹfiọ zozo, tukla po vọjẹ po tọn enẹ. (Isaia 13:9; Amọsi 5:18-20; Zẹfania 1:15) Dọdai Joẹli tọn dọmọ: “Haa na azán lọ! Na azán OKLUNỌ tọn lọ tin to alọji, podọ azán lọ e na wá di viva sọn Ganhunupotọ lọ dè.” (Joẹli 1:15) Ṣigba to azán daho enẹ gbè, Jiwheyẹwhe na whlẹn mẹhe yin “tenọglinọ to ayiha mẹ lẹ.”—Psalm 7:10.
2 Hogbe lọ lẹ ‘azán Jehovah tọn’ nọ yin yiyizan na whẹdida he Jiwheyẹwhe hẹnṣẹ to ojlẹ voovo lẹ mẹ. Di dohia, ‘azán Jehovah tọn’ de wá tòmẹnu Jelusalẹm tọn lẹ ji gbọn Babilọninu lẹ dali to 607 J.W.M. (Zẹfania 1:4-7) Whẹdida Jiwheyẹwhe tọn mọnkọtọn de sọ yin hinhẹnṣẹ to 70 W.M. whenuena Jiwheyẹwhe yí Lomunu lẹ zan nado hẹn whẹdida etọn ṣẹ do akọta Ju he gbẹ́ Ovi etọn dai ji. (Daniẹli 9:24-27; Johanu 19:15) Biblu sọ dọ dọdai ‘azán Jehovah tọn’ de whenuena e na ‘hoavùn hẹ akọta lẹpo.’ (Zekalia 14:1-3) To gbọdo glọ, apọsteli Paulu blá azán enẹ dopọ hẹ tintin tofi Klisti tọn he bẹjẹeji to whenuena Jesu yin zizedo gánzinpo ji taidi Ahọlu to olọn mẹ to 1914. (2 Tẹsalonikanu lẹ 2:1, 2) Na kunnudenu lẹpo dohia hezeheze dọ azán Jehovah tọn ko sẹpọ wutu, wefọ owhe 2007 tọn na Kunnudetọ Jehovah tọn lẹ wá do ganmẹ taun. Hosọ lọ wẹ: ‘Azán daho Jehovah tọn ko sẹpọ,’ he yin zize sinai do Zẹfania 1:14 ji.
3 Na azán daho Jiwheyẹwhe tọn ko sẹpọ wutu, ojlẹ lọ die nado wleawudaina azán lọ. Nawẹ hiẹ sọgan wà enẹ gbọn? Vọjlado devo tẹlẹ wẹ hiẹ dona basi nado wleawudaina azán Jehovah tọn?
Wleawudai
4. Whlepọn sinsinyẹn tẹwẹ Jesu wleawudaina?
4 Jesu Klisti dọna devi etọn lẹ to whenuena e to dọdai dọ gando vivọnu titonu onú lẹ tọn go dọmọ: “Mì . . . wleawudai.” (Matiu 24:44) To whenuena Jesu dọ ohó enẹ, ewọ lọsu ko tin to awuwle mẹ nado jugbọn whlepọn sinsinyẹn de mẹ—yèdọ okú etọn taidi avọ́sinsan ofligọ tọn de. (Matiu 20:28) Etẹwẹ mí sọgan plọn sọn aliho he mẹ Jesu wleawudai te mẹ?
5, 6. (a) Nawẹ owanyi he mí tindo na Jiwheyẹwhe po gbẹtọ lẹ po nọ gọalọna mí nado wleawudaina azán Jehovah tọn gbọn? (b) Apajlẹ nankọ wẹ Jesu zedai gando owanyi didohia kọmẹnu go?
5 Jesu yiwanna Jehovah po nujinọtedo dodo tọn Etọn lẹ po sisosiso. Heblu lẹ 1:9 dọ gando Jesu go dọmọ: “Hiẹ yiwanna dodo bo gbẹwanna ylando; enẹwutu Jiwheyẹwhe, yèdọ Jiwheyẹwhe towe, ko yí amì homẹhun tọn sá na we hú ogbẹ́ towe lẹ tọn.” Na Jesu yiwanna Otọ́ olọnmẹ tọn etọn wutu, e hẹn tenọgligo hlan ẹn. Mọdopolọ, eyin mílọsu yiwanna Jiwheyẹwhe bo nọ nọgbẹ̀ sọgbe hẹ nubiọtomẹsi etọn lẹ, e na whla mí. (Psalm 31:23) Owanyi po tonusise mọnkọtọn po na gọalọna mí nado wleawudaina azán daho Jehovah tọn.
6 Owanyi he Jesu tindo na gbẹtọ lẹ wẹ yin adà tangan gbẹtọ-yinyin etọn tọn. Na nugbo tọn, “e wàlẹblanuna yé, na yè hẹn agbọ́pé yé, bosọ hẹn apọṣi yé di lẹngbọ he ma tindo lẹngbọhọtọ de.” (Matiu 9:36) Enẹwutu, Jesu dọyẹwheho wẹndagbe Ahọluduta lọ tọn na gbẹtọ lẹ, kẹdẹdile owanyi nọ whàn mí nado lá owẹ̀n Ahọluduta lọ tọn na kọmẹnu mítọn lẹ do. Owanyi he mí tindo na Jiwheyẹwhe po kọmẹnu mítọn lẹ po nọ dozolanmẹna mí taidi Klistiani lizọnyizọnwatọ lẹ bo nọ gbọnmọ dali gọalọna mí nado wleawudaina azán daho Jehovah tọn.—Matiu 22:37-39.
7. Naegbọn mí sọgan tindo ayajẹ dile mí to tenọpọn azán Jehovah tọn?
7 Homẹ nọ hùn Jesu nado wà ojlo Jehovah tọn. (Psalm 40:8) Eyin mí tindo gbigbọ dopolọ, mí na nọ mọ ayajẹ to sinsẹ̀nzọn wiwe bibasi hlan Jiwheyẹwhe mẹ. Taidi Jesu, mí na nọ nanumẹ matin ṣejannabi podọ ehe na hẹn dona kavi ayajẹ nujọnu tọn wá na mí. (Owalọ lẹ 20:35) Mọwẹ, “ayajẹ OKLUNỌ tọn wẹ huhlọn” mítọn. Ayajẹ mọnkọtọn na gọalọna mí nado wleawudai ganji na azán daho Jiwheyẹwhe tọn.—Nẹhemia 8:10.
8. Naegbọn mí dona dọnsẹpọ Jehovah pẹkipẹki to odẹ̀ mẹ?
8 Dẹ̀hiho vẹkuvẹku hlan Jiwheyẹwhe gọalọna Jesu nado wleawudaina whlepọn yise tọn lẹ. Odẹ̀ hò wẹ e te to whenuena Johanu baptizi i. Jesu hodẹ̀ na ozán dopo blebu whẹpo do de apọsteli etọn lẹ. (Luku 6:12-16) Podọ Biblu-hiatọ tẹwẹ ma nọ yin nuyiwadeji gbọn odẹ̀ ahundopo tọn he Jesu hò to ozán he e yizan gbọngodo to aigba ji dali? (Malku 14:32-42; Johanu 17:1-26) Be hiẹ nọ hodẹ̀ gbọzangbọzan dile Jesu wà do ya? Nọ dọnsẹpọ Jehovah gbọzangbọzan, nọ yiagbọji do hodẹ̀, nọ dín anademẹ gbigbọ wiwe tọn bosọ nọ yawu kẹalọyi anademẹ enẹ to whenuena e lẹzun nuhe họnwun. Dandannu wẹ e yin nado tindo haṣinṣan pẹkipẹki hẹ Otọ́ olọnmẹ tọn mítọn to ojlẹ awusinyẹn tọn ehe mẹ whenuena azán daho Jiwheyẹwhe tọn ko to unklẹn. Enẹwutu, wà nuhe go a pé lẹpo nado dọnsẹpọ Jehovah pẹkipẹki to odẹ̀ mẹ hugan gbede pọ́n.—Jakobu 4:8.
9. Naegbọn oyín Jehovah tọn kinklandowiwe dona nọ duahunmẹna mí?
9 Ojlo sinsinyẹn Jesu tọn dọ oyín wiwe Jehovah tọn ni yin kinklandowiwe sọ gọalọna ẹn nado wleawudaina whlepọn he e pehẹ lẹ. Na nugbo tọn, e plọn hodotọ etọn lẹ dọ odẹ̀ yetọn hlan Jiwheyẹwhe dona bẹ obiọ lọ hẹn dọmọ: ‘Na oyín towe ni yin kinklandowiwe.’ (Matiu 6:9) Eyin mí jlo nugbonugbo dọ oyín Jehovah tọn ni yin kinklandowiwe, mí na dovivẹnu ma nado wà nudepope he na kọ̀n masin do e go. Taidi kọdetọn de, mí na wleawudai ganji na azán daho Jehovah tọn.
Be Hiẹ Dona Basi Vọjlado Delẹ Ya?
10. Naegbọn e do yin nuhe sọgbe nado gbeje gbẹzan mítọn pọ́n?
10 Eyin azán Jehovah tọn na wá to osọ, be hiẹ na ko wleawufo nugbonugbo ya? Dopodopo mítọn dona gbeje gbẹzan ede tọn pọ́n nado mọ eyin nuyiwa kavi walọyizan etọn delẹ dona yin vivọjlado. Na gbẹzan mítọn dinwhenu tọn whègli bo masọ tindo jide wutu, dopodopo mítọn dona gbọṣi nukle to gbigbọ-liho to whepoponu. (Yẹwhehodọtọ 9:11, 12; Jakobu 4:13-15) Enẹwutu mì gbọ mí ni gbadopọnna delẹ to nuhe sọgan biọ vọjlado to gbẹzan mítọn mẹ lẹ mẹ.
11. Yanwle tẹwẹ a zedai na Biblu hihia?
11 Onú titengbe dopo wẹ ayinamẹ ‘afanumẹ nugbonọ lọ’ tọn nado nọ hia Biblu egbesọegbesọ. (Matiu 24:45) Hiẹ sọgan yí ì do basi yanwle towe nado nọ hia Owe-wiwe sọn Gẹnẹsisi yì Osọhia whladopo to owhe mẹ bo nọ lẹnayihamẹpọn do e ji. Gbọn nudi weta ẹnẹ hihia to gbèdopo dali, hiẹ na penugo nado hia weta Biblu tọn 1 189 lẹ to owhe dopo gblamẹ. Ahọlu Islaeli tọn dopodopo dona hia Osẹ́n Jehovah tọn “to azán ogbẹ̀ etọn tọn lẹpo mẹ.” E họnwun dọ Jọṣua wà onú mọnkọtọn de. (Deutelonomi 17:14-20; Jọṣua 1:7, 8) Lehe e yin nujọnu do sọ dọ mẹho agun tọn lẹ ni nọ hia Ohó Jiwheyẹwhe tọn egbesọegbesọ, na ehe nọ gọalọna yé nado ze “oplọn he pé” donukọnnamẹ!—Titu 2:1.
12. Nugbo lọ dọ azán Jehovah tọn ko sẹpọ dona whàn we nado wà etẹ?
12 Nugbo lọ dọ azán Jehovah tọn ko sẹpọ dona whàn we nado nọ yì opli Klistiani tọn lẹ to gbesisọ mẹ bo nọ tindo mahẹ gigọ́ to yé mẹ dile e sọgan yọnbasi do. (Heblu lẹ 10:24, 25) Mọwiwà na gọalọna we nado hẹn nugopipe towe pọnte dogọ taidi lilatọ Ahọluduta tọn he nọ tẹnpọn nado dín mẹhe tindo ahunjijlọ he jẹna ogbẹ̀ madopodo lẹ bo gọalọna yé. (Owalọ lẹ 13:48) Vlavo hiẹ sọgan tindo mahẹ to nuwiwa agun lọ tọn devo lẹ mẹ po zohunhun po, taidi alọgigọna mẹhomẹ lẹ po tulinina jọja lẹ po. Pekọ nankọtọn die vivẹnudido ehelẹ nọ hẹnwa!
Haṣinṣan Towe hẹ Mẹdevo Lẹ
13. Kanbiọ tẹlẹ wẹ mí sọgan kanse mídelẹ gando gbẹtọ-yinyin yọyọ lọ zize dogo go?
13 To whenuena e yindọ azán Jehovah tọn ko sẹpọ, be hiẹ dona dovivẹnu vẹkuvẹku nado “ze gbẹtọ yọyọ lọ dogo, mẹhe yè dá to dodo mẹ di apajlẹ Jiwheyẹwhe tọn, podọ to jijọ wiwe nugbo tọn mẹ” ya? (Efesunu lẹ 4:20-24) Dile hiẹ to awuwlena jẹhẹnu jijọ-di-Jiwheyẹwhe tọn lẹ, mẹdevo lẹ na doayi e go dọ hiẹ to ‘zọnlinzin gbọn gbigbọ Jiwheyẹwhe tọn dali’ bo to sinsẹ́n etọn dohia. (Galatianu lẹ 5:16, 22-25) Be a sọgan dlẹnalọdo nuyiwa tangan delẹ he dohia dọ hiẹ po whẹndo towe po ko ze gbẹtọ-yinyin yọyọ lọ dogo ya? (Kọlọsinu lẹ 3:9, 10) Di dohia, be a yin yinyọnẹn taidi mẹhe nọ do homẹdagbe hia yisenọ hatọ lẹ po mẹdevo lẹ po ya? (Galatianu lẹ 6:10) Biblu pinplọn to gbesisọ mẹ na gọalọna we nado tindo jẹhẹnu jijọ-di-Jiwheyẹwhe tọn lẹ he na hẹn we penugo nado wleawudaina azán Jehovah tọn.
14. Naegbọn mẹde dona nọ biọ gbigbọ wiwe to odẹ̀ mẹ dile e to vivẹnudo nado wleawuna mawazẹjlẹgo?
14 Etẹwẹ hiẹ sọgan wà eyin a nọ yawu gblehomẹ bo mọdọ emi dona yí mawazẹjlẹgo zan dogọ? Jẹhẹnu enẹ yin apadewhe sinsẹ́n he gbigbọ wiwe Jiwheyẹwhe tọn sọgan gọalọna we nado tindo tọn. Enẹwutu, nọ biọ gbigbọ wiwe to odẹ̀ mẹ to kọndopọ mẹ hẹ ohó Jesu tọn dọmọ: ‘Mì nọ biọ, yè nasọ yí na mì; mì nọ dín, mì nasọ mọ; mì nọ húhúhọ̀n, yè nasọ hùn dai hlan mì. Eyin mìwlẹ he yin mẹylankan yọ́n le yè nọ na nunina dagbe hlan ovi mìtọn lẹ do, nẹmunẹmu wẹ Otọ́ mìtọn olọn tọn na na gbigbọ wiwe hlan yé he biọ to e dè lẹ!’—Luku 11:9-13.
15. Etẹwẹ hiẹ dona wà eyin gbemanọpọ tin to hiẹ po yisenọ hatọ de po ṣẹnṣẹn?
15 Mí ni dọ dọ gbemanọpọ tin to hiẹ po yisenọ hatọ de po ṣẹnṣẹn. Eyin mọ wẹ, dovivẹnu lẹpo nado jla ninọmẹ lọ do bo gbọnmọ dali basi hihọ́na jijọho po pọninọ po to agun lọ mẹ. (Psalm 133:1-3) Hodo ayinamẹ Jesu tọn he tin to Matiu 5:23, 24 kavi Matiu 18:15-17 mẹ. Eyin hiẹ ko to dotẹnmẹ na owhè nado yìhọ do homẹgble towe ji, yawu yinuwa nado didẹ whẹho lọ. To paa mẹ, nuhe e nọ biọ lẹpo ma hugan ojlo lọ nado jonamẹ. Paulu wlan dọmọ: “Mì nọ wadagbe hlan mìnọzo, mì do homẹmimiọn [kavi awuvẹmẹ sisosiso], mì nọ jo ylando mìnọzo tọn, yèdọ dile Jiwheyẹwhe to Klisti mẹ ko jona mì do.”—Efesunu lẹ 4:25, 26, 32.
16. Aliho tẹlẹ mẹ wẹ awuvẹmẹ dona yin didohia to alọwle mẹ te?
16 Kanṣiṣa alọwle tọn nọ biọ dọ alọwlemẹ lẹ ni do awuvẹmẹ sisosiso hia podọ, to whedelẹnu yé ni jona yedelẹ. Eyin e biọ dọ hiẹ ni do owanyi po awuvẹmẹ po hia alọwlemẹ towe dogọ, dovivẹnu nado jẹ yanwle ehe kọ̀n po alọgọ Jiwheyẹwhe tọn po gọna Ohó etọn. Be nude tin he hiẹ dona wà nado yinuwa sọgbe hẹ nuhe 1 Kọlintinu lẹ 7:1-5 dọ nado sọgan hẹn haṣinṣan lọ pọnte dogọ bo yin nugbonọ na awetọ towe ya? Na jide tọn, adà gbẹzan tọn ehe nọ biọ dọ asu kavi asi ni do ‘awuvẹmẹ sisosiso’ hia.
17. Afọdide tẹlẹ wẹ dona yin zize eyin mẹde ko waylando sinsinyẹn?
17 Etẹwẹ eyin hiẹ ko waylando sinsinyẹn to aliho delẹ mẹ? Ze afọdide dagbe lẹ nado jla ninọmẹ lọ do dile e sọgan yawu yọnbasi do. Wà nuhe go a pé lẹpo nado dín alọgọ mẹho Klistiani tọn lẹ tọn. Odẹ̀ po ayinamẹ yetọn po na gọalọna we nado gọ̀ jẹgangan to gbigbọ-liho. (Jakobu 5:13-16) Hodẹ̀ hlan Jehovah bo do gbigbọ lẹnvọjọ tọn hia. Awugbopo nado wàmọ na hẹn we tindo numọtolanmẹ whẹhuhu tọn po ayihadawhẹnamẹnu he hoapa po. Davidi tindo numimọ mọnkọtọn, ṣigba lehe e yin homẹmiọnnamẹnu nado mọ kọgbọ he nọ wá sọn gbeyiyi na ylando mẹtọn na Jehovah mẹ do sọ! Davidi wlan dọmọ: “Donanọ wẹ ewọ tasinyẹn mẹhetọn yin jijona, ylando mẹhetọn yin nuṣinyọndo. Donanọ wẹ dawe lọ mẹhe OKLUNỌ ma hia ylanwiwa dokọna; ayiha mẹhetọn mẹ oklọ depope ma te.” (Psalm 32:1-5) Jehovah nọ jona mẹhe waylando ṣigba he lẹnvọjọ sọn ahun mẹ wá lẹ.—Psalm 103:8-14; Howhinwhẹn lẹ 28:13.
Nọla Na Aihọn
18. Nukun tẹwẹ hiẹ dona yí do pọ́n aihọn lọ?
18 Matin ayihaawe, hiẹ to nukọnpọnhlan aihọn yọyọ jiawu he Otọ́ olọnmẹ tọn mítọn dopagbe etọn na mí. To whelọnu lo, nukun tẹwẹ hiẹ nọ yí do pọ́n ogbẹ́ gbẹtọvi mawadodo he jẹla sọn Jiwheyẹwhe dè tọn? Satani, ‘ahọvi aihọn lọ tọn,’ ma tindo huhlọn do Jesu Klisti ji. (Johanu 12:31; 14:30) Na jide tọn, hiẹ ma na jlo dọ Lẹgba po aihọn etọn po ni tindo huhlọn do jiwe, enẹwutu setonuna ohó apọsteli Johanu tọn dọmọ: “Mì yiwanna aihọn blo, kavi nuhe tin to aihọn mẹ.” Nuyọnẹnnu wẹ enẹ yin na “aihọn [lọ] to jujujei po wantuntun etọn po: ṣigba ewọ he to ojlo Jiwheyẹwhe tọn wà wẹ na nọte kakadoi.”—1 Johanu 2:15-17.
19. Yanwle nankọ lẹ wẹ jọja Klistiani lẹ yin tulina nado doafọna?
19 Be hiẹ to alọgọna ovi towe lẹ nado ‘whla yede madodiho sọn aihọn dè’ ya? (Jakobu 1:27) Satani na jlo nado wle ovi towe lẹ kẹdẹdile mẹde nọ domlẹn wle whèvi do. Ogbẹ́ voovo lẹ po titobasinanu devo lẹ po nọ yin awuwlena nado dọ̀n jọja lẹ biọ aihọn Satani tọn mẹ. Ṣigba devizọnwatọ Jehovah tọn lẹ ko yin apadewhe titobasinanu dopo akàn he na lùn aihọn ylankan ehe tọ́n tọn. Enẹwutu jọja Klistiani lẹ dona yin tulina nado “nọ to susudeji to azọ́n Oklunọ tọn mẹ.” (1 Kọlintinu lẹ 15:58) Mẹjitọ budisi Jiwheyẹwhe tọ́ lẹ dona gọalọna ovi yetọn lẹ nado doafọna yanwle he na hẹn ayajẹ wá po dehe na hẹn gbẹzan he nọ gbògbéna Jiwheyẹwhe po wá lẹ, ehe na gọalọna yé nado wleawudaina azán Jehovah tọn.
Pọnnu Zẹ̀ Azán Daho Jehovah Tọn Go
20. Naegbọn mí dona ze todido mítọn do ogbẹ̀ madopodo ji?
20 Hiẹ na penugo nado nọtepọn azán Jehovah tọn po awuvivo po eyin a ze todido towe do ogbẹ̀ madopodo ji. (Juda 20, 21) Hiẹ to nukundo ogbẹ̀ mavọmavọ to Paladisi mẹ, enẹwutu hiẹ tindo todido nado duvivi huhlọn jọja whenu tọn bo tindo whenu kakadoi nado doafọna yanwle mẹjlọdote tọn lẹ bosọ plọn nususu dogọ gando Jehovah go. Na nugbo tọn, hiẹ sọgan to nuplọn gando Jiwheyẹwhe go kakadoi na nuhe gbẹtọvi lẹ yọnẹn todin gando “aliho etọn lẹ” go ma sọtẹ́n wutu. (Job 26:14) Nukundido jiawu nankọ die!
21, 22. Nudọnamẹ tẹwẹ hiẹ po mẹhe fọnsọnku lẹ po sọgan má hẹ mìdelẹ?
21 To Paladisi mẹ, mẹhe yin finfọnsọnku lẹ na penugo nado na nudọnamẹ delẹ mí gando ojlẹ he wayi lẹ go. Mí na mọ Enọku podọ e na basi zẹẹmẹ lehe e yí adọgbigbo do lá owẹ̀n Jehovah tọn na mẹylankan lẹ do tọn. (Juda 14, 15) Na jide tọn, Noa na dọ nuhe azọ́n aki gbigbá tọn bẹhẹn na mí. Ablaham po Sala po na penugo nado dọ numọtolanmẹ he yé tindo to whenuena yé jo gbẹzan awuvivo Uli tọn do bo wá yì nọ̀ gòhọ lẹ mẹ. Yí nukun homẹ tọn do pọ́n Ẹsteli dile e to zẹẹmẹ gigọ́ basi do lehe e yiavunlọna omẹ etọn lẹ do ji bo gbà sébibla Hamani tọn sọta yé. (Ẹsteli 7:1-6) Hiẹ na sè lehe Jona to zẹẹmẹ basi do azán atọ̀n he e yizan to ohò whèvi daho de tọn mẹ do ji kavi numọtolanmẹ he Johanu Baptizitọ lọ tindo to whenuena e baptizi Jesu. (Luku 3:21, 22; 7:28) Ojlofọndotenamẹnu nankọ lẹ die nado sè!
22 To Gandudu Owhe Fọtọ́n Klisti tọn glọ, hiẹ na tindo dotẹnmẹ hundote lọ nado gọalọna mẹhe fọnsọnku lẹ nado tindo “oyọnẹn Jiwheyẹwhe tọn.” (Howhinwhẹn lẹ 2:1-6) Homẹhunnu nankọtọn die nado mọdọ gbẹtọ lẹ to oyọnẹn Jehovah Jiwheyẹwhe tọn plọn bosọ to nuyiwadeji to egbehe! Ṣigba lẹnnupọndo ayajẹ he a na tindo to whenẹnu ji whenuena Jehovah na dona vivẹnudido towe nado plọn mẹhe nọgbẹ̀ to ojlẹ susu die wayi lẹ bọ yé sọ kẹalọyi nuplọnmẹ lọ po ahun pinpẹn-nutọn-yinyọnẹn tọn de po!
23. Etẹwẹ mí dona magbe nado wà?
23 Na mí yin mapenọ wutu, ale he mí to vivi etọn dù todin taidi omẹ Jehovah tọn lẹ zẹ̀ nuhe mí sọgan yí sọha na go. (Psalm 40:5) Mí dopẹ́ taun na awuwledainanu gbigbọmẹ tọn Jiwheyẹwhe tọn lẹ. (Isaia 48:17, 18) Mahopọnna ninọmẹ mítọn lẹ, mì gbọ mí ni yí ahun lẹpo do nọ basi sinsẹ̀n wiwe hlan Jehovah dile mí to nukundo azán daho etọn.
Nawẹ Hiẹ Na Na Gblọndo Gbọn?
• Etẹwẹ ‘azán Jehovah tọn’ yin?
• Nawẹ hiẹ sọgan wleawudaina azán Jehovah tọn gbọn?
• Na azán daho Jiwheyẹwhe tọn ko sẹpọ wutu, vọjlado tẹlẹ wẹ e sọgan biọ dọ mí ni basi?
• Etẹwẹ hiẹ to nukọnpọnhlan to whenuena azán Jehovah tọn na ko juwayi?
[Yẹdide to weda 12]
Jesu wleawudaina whlepọn lẹ
[Yẹdide to weda 15]
Lẹblanulọkẹyi nankọ die e na yin nado gọalọna mẹhe fọnsọnku lẹ nado tindo oyọnẹn Jehovah tọn!