Jọja lẹ Emi, Mì Flin Mẹdatọ Daho Mìtọn Todin
“Flin Mẹdatọ towe to azán ovu whenu towe tọn.”—YẸWH. 12:1.
1. Nawẹ Jehovah do jidide etọn hia to jọja he to sinsẹ̀n ẹn lẹ mẹ gbọn?
JEHOVAH nọ pọ́n jọja Klistiani lẹ hlan taidi nuhọakuẹ podọ taidi ahún fifá. Na nugbo tọn, e dọ dọdai dọ to azán “huhlọn” Ovi etọn tọn gbè, dẹpẹ lẹ po awhli lẹ po na yin “ojlonọ” kavi ze yede jo sọn ojlo mẹ wá to sinsẹ̀nzọn Klisti tọn mẹ. (Ps. 110:3) Dọdai enẹ dona mọ hẹndi to ojlẹ he mẹ gbẹtọ lẹ ma na tindo ojlo to Jiwheyẹwhe mẹ, bo na yin tolivẹtọ, ṣejannabinọ, bosọ yiwanna akuẹ. Etomọṣo, Jehovah yọnẹn dọ jọja he nọ sẹ̀n ẹn lẹ na gbọnvo. Jidide nankọ die ewọ tindo to mì mẹmẹsunnu po mẹmẹyọnnu jọja lẹ po mẹ!
2. Etẹwẹ e zẹẹmẹdo nado flin Jehovah?
2 Yí nukun homẹ tọn do pọ́n ayajẹ he Jiwheyẹwhe dona nọ tindo eyin e mọ bọ jọja lẹ to finflin in taidi Mẹdatọ Daho yetọn. (Yẹwh. 12:1) E họnwun dọ, nado flin Jehovah bẹ nususu hẹn hugan nado nọ hẹn ẹn do ayiha mẹ poun. E zẹẹmẹdo nado yí nude wà—yèdọ nado nọ wà nuhe na hẹn homẹhun in, bo dike osẹ́n po nunọwhinnusẹ́n etọn lẹ po ni nọ deanana mí to gbẹzan egbesọegbesọ tọn mítọn mẹ. E sọ zẹẹmẹdo nado dejido Jehovah go, bo yọnẹn dọ dagbe hugan mítọn wẹ nọ duahunmẹna ẹn. (Ps. 37:3; Isa. 48:17, 18) Be numọtolanmẹ he hiẹ tindo gando Mẹdatọ Daho towe go niyẹn ya?
“Yí Ayiha Towe do Dotudo OKLUNỌ Go”
3, 4. Nawẹ Jesu do jidide hia to Jehovah mẹ gbọn, podọ naegbọn e do yin nujọnu nado dejido Jehovah go to egbehe?
3 Na nugbo tọn, mẹhe ze apajlẹ dagbe hugan dai na nuhe dù jidide do Jiwheyẹwhe go wẹ Jesu Klisti. E nọgbẹ̀ sọgbe hẹ hogbe Howhinwhẹn lẹ 3:5, 6 tọn lẹ dọmọ: “Yí ayiha towe do dotudo OKLUNỌ go; a dẹ́ hlan dewe tọn dali blo. Yọ́n ẹn to aliho towe lẹpo ji, ewọ nasọ jlọ omọ́ towe.” Ojlẹ vude to baptẹm Jesu tọn godo, Satani dọnsẹpọ ẹ bo tẹnpọn nado whlé e pọ́n na ewọ nido kẹalọyi huhlọn po gigo aihọn tọn po. (Luku 4:3-13) Jesu ma dike Satani klọ ẹ gba. E yọnẹn dọ “whiwhẹ . . . po osi OKLUNỌ tọn po” wẹ nọ hẹnmẹ tindo “adọkun, yẹyi, po ogbẹ̀” nujọnu tọn po.—Howh. 22:4.
4 Nukunkẹn po ṣejannabi po gbayipe to aihọn mẹ to egbehe. To ninọmẹ mọnkọtọn mẹ, nuyọnẹnnu wẹ e na yin nado hodo apajlẹ Jesu tọn. Sọ hẹn do ayiha mẹ dọ Satani na wà nuhe go e pé lẹpo nado doyẹklọ devizọnwatọ Jehovah tọn lẹ bo dọ̀n yé sọn aliho bibó he nọ planmẹ yì ogbẹ̀ mẹ lọ ji. Ojlo etọn wẹ yindọ mẹlẹpo ni gbọn ali gblagada he yì vasudo mẹ lọ ji. A dike e klọ we blo! Kakatimọ, magbe nado nọ flin Mẹdatọ Daho towe. Dejido ewọ go mlẹnmlẹn, bo hẹn “ogbẹ̀ nugbonugbo” he diun bo na wá to madẹnmẹ lọ go gligli.—1 Tim. 6:19.
Jọja lẹ Emi, Mì Yin Nuyọnẹntọ!
5. Numọtolanmẹ tẹwẹ hiẹ tindo gando sọgodo aihọn ehe tọn go?
5 Jọja he nọ flin Mẹdatọ Daho yetọn lẹ nọ yọnnuin zẹ̀ owhe yetọn go. (Hia Psalm 119:99, 100.) Na yé kẹalọyi pọndohlan Jiwheyẹwhe tọn wutu, yé yọ́n lehe sọgodo aihọn ehe tọn dózin sọ to gigọ́ mẹ. Etlẹ yin to owhe vude he mì ko nọgbẹ̀ na lẹ gblamẹ, matin ayihaawe mì jọja lẹ ko mọ lehe obu po magbọjẹ po to jijideji do. Eyin mì gbẹ́ pò to wehọmẹ yì, vlavo mì ko sè dogbọn hẹnflu lẹdo tọn, yozò sinsinyẹn, vasudo zungbo lẹ tọn, po nuhahun mọnkọtọn devo lẹ po dali. Ninọmẹ ehelẹ to ahunmẹduna gbẹtọ lẹ tlala, ṣigba Kunnudetọ Jehovah tọn lẹ kẹdẹ wẹ mọnukunnujẹemẹ to gigọ́ mẹ dọ ehelẹ yin apadewhe ohia he gando vivọnu aihọn Satani tọn go lọ tọn.—Osọhia 11:18.
6. Nawẹ jọja delẹ ko yin kiklọ gbọn?
6 E blawu dọ, delẹ to devizọnwatọ Jiwheyẹwhe tọn jọja lẹ mẹ ko hẹn aṣejininọ yetọn bu bo wọnji dọ ojlẹ gli de wẹ pò na aihọn ehe. (2 Pita 3:3, 4) Mẹdevo lẹ ko yin kiklọ biọ ylando sinsinyẹn mẹ gbọn gbẹdido ylankan po yẹdide fẹnnuwiwa tọn lẹ po dali. (Howh. 13:20) Lehe e na blawu do sọ nado hẹn nukundagbe Jiwheyẹwhe tọn bu todin he opodo lọ ko sẹpọ pete! Kakatimọ, plọnnu sọn nuhe jọ do Islaelivi lẹ go to 1473 J.W.M. mẹ, whenuena yé whèsla do Danfafa Moabi tọn lẹ ji to bẹbẹnu Aigba Pagbe tọn lọ tọn. Etẹwẹ jọ to finẹ?
Yé Jai to Whenuena Yé Ko Dibla Jẹ Yanwle lọ Kọ̀n
7, 8. (a) Ayiha gigẹdẹ tẹwẹ Satani yizan to Danfafa Moabi tọn lẹ ji? (b) Ayiha gigẹdẹ tẹwẹ Satani to yiyizan to egbehe?
7 To ojlẹ enẹ mẹ, e họnwun dọ Satani jlo na glọnalina Islaelivi lẹ nado mọ ogú he opagbe etọn yin dido na yé lọ yí. To whenuena Satani ko gboawupo to yẹwhegán Balaami yiyizan nado hodẹ̀do yé mẹ godo, e yí ayiha gigẹdẹ devo zan; e tẹnpọn nado hẹn yé wà nuhe na glọnalina yé nado mọ dona Jehovah tọn yí. Yọnnu whanpẹnọ yẹdoklọmẹtọ Moabi tọn lẹ yin yiyizan nado dọ̀n yé, podọ to ojlẹ ehe mẹ, Lẹgba tindo kọdetọn dagbe jẹ obá de mẹ. Islaelivi lẹ jẹ kọndopọ fẹnnuwiwa tọn lẹ tindo hẹ viyọnnu Moabi tọn lẹ ji bosọ litaina Baali-peọli! Dile etlẹ yindọ alọ yetọn ko dibla plá ogú họakuẹ yetọn, yèdọ Aigba Pagbe tọn lọ, nudi Islaelivi 24 000 hẹn ogbẹ̀ yetọn bu. Nugbajẹmẹji nankọ die!—Osọha 25:1-3, 9.
8 To egbehe, mí to sisẹpọ aigba pagbe tọn dagbe hugan de po awuyiya po—enẹ wẹ titonu yọyọ lọ. Taidi aṣa etọn, Satani sọ to fẹnnuwiwa zanhẹmẹ tọn yizan nado hẹn omẹ Jiwheyẹwhe tọn lẹ gblezọn. Nujinọtedo walọ dagbe tọn lẹ ko yìdo to aihọn ehe mẹ sọmọ bọ galilọ nọ yin pinpọnhlan taidi nuhe sọgbe podọ zanhẹmẹ to vijinu dopolọ lẹ ṣẹnṣẹn nọ yin pinpọnhlan taidi whẹho nudide mẹdetiti tọn de poun. Mẹmẹyọnnu de dọmọ: “Whégbè po Plitẹnhọ Ahọluduta tọn mẹ po kẹdẹ wẹ ovi ṣie lẹ nọ plọn te dọ zanhẹmẹ to vijinu dopolọ lẹ ṣẹnṣẹn po zanhẹmẹ to gbonu alọwle tọn po ylan to nukun Jiwheyẹwhe tọn mẹ.”
9. Etẹwẹ sọgan jọ to ‘owhe aflanmẹ tọn lẹ mẹ,’ podọ nawẹ jọja lẹ sọgan duto ehe ji gbọn?
9 Jọja he nọ flin Mẹdatọ Daho yetọn lẹ yọnẹn dọ kọndopọ zanhẹmẹ tọn yin nunina wiwe de he tindo kanṣiṣa hẹ ogbẹ̀ po vijiji po. Enẹwutu, yé yọnẹn dọ aliho he Jiwheyẹwhe zedai mẹ kẹdẹ wẹ gbẹtọvi dona nọ duvivi kọndopọ zanhẹmẹ tọn te—enẹ wẹ to tito alọwle tọn mẹ. (Heb. 13:4) Ṣigba, to ‘owhe aflanmẹ tọn lẹ mẹ’—yèdọ ojlẹ he mẹ ojlo zanhẹmẹ tọn nọ sinyẹn bo sọgan yinuwado nulẹnpọn mẹde tọn ji to aliho agọ̀ mẹ te—e sọgan vẹawu nado gbọṣi wiwe ji. (1 Kọl. 7:36) Etẹwẹ hiẹ sọgan wà eyin linlẹn ylankan lẹ wá ayiha towe mẹ? Hodẹ̀ vẹkuvẹku nado biọ alọgọ Jehovah tọn nado sọgan ze ayiha do nuhe sọgbe lẹ ji. Jehovah nọ dotoaina mẹhe yí ahundopo do lẹhlan ẹn lẹ to whepoponu. (Hia Luku 11:9-13.) Hodọdopọ mẹjlọdote tọn lẹ sọgan sọ gọalọ nado ze ayiha do nuhe sọgbe lẹ ji.
Nọ De Yanwle Towe lẹ po Nuyọnẹn Po!
10. Nulẹnpọn agọ̀ tẹwẹ mí jlo na dapana, podọ kanbiọ tẹlẹ wẹ mí sọgan kanse míde?
10 Dopo to whẹwhinwhẹ́n he wutu jọja aihọn tọn lẹ ma nọ dava yede bo nọ zan gbẹzan gbẹ̀fẹdudu tọn lẹ mẹ wẹ yindọ yé ma tindo anademẹ Jiwheyẹwhe tọn kavi todido dejidego de na sọgodo. Yé taidi Islaelivi azán Isaia gbè tọn he lẹkọ sọn Jiwheyẹwhe godo bo wá pò na “homẹhunhun po ayajijẹ po, . . . dùdù olàn tọn, po nùnù vẹnhàn tọn po” lẹ. (Isa. 22:13) Kakati gbẹzan omẹ mọnkọtọn lẹ tọn nido nọ jlo we, naegbọn hiẹ ma na lẹnnupọndo todido họakuẹ he Jehovah zedonukọnna nugbonọ etọn lẹ ji? Eyin devizọnwatọ Jiwheyẹwhe tọn jọja de wẹ hiẹ yin, be a nọ pọnnukọnhlan aihọn yọyọ lọ po jejejininọ po ya? Be hiẹ nọ wà nuhe go a pé lẹpo nado “nọgbẹ̀ to hùwhẹ mẹ, . . . bo to nukundo todido donanọ” he Jehovah zedonukọnna we lọ ya? (Titu 2:12, 13) Gblọndo towe na yinuwado yanwle po nuhe tin to otẹn tintan mẹ na we lẹ po ji.
11. Naegbọn jọja Klistiani he gbẹ́ pò to wehọmẹ yì lẹ dona nọ wazọ́n sinsinyẹn?
11 Aihọn nọ jlo dọ jọja lẹ ni zan huhlọn yetọn na yanwle agbasa tọn lẹ. Na nugbo tọn, mì mẹhe gbẹ́ pò to wehọmẹ yì lẹ dona wazọ́n sinsinyẹn nado mọ nuplọnmẹ dodonu tọn dagbe de yí. Mì dona flindọ, yanwle mìtọn ma yin nado mọ agbasazọ́n dagbe de poun gba, ṣigba nado sọ yọ́n-na-yizan to agun mìtọn mẹ bo yin lilatọ Ahọluduta lọ tọn kọdetọn dagbenọ lẹ. Nado jẹ yanwle enẹ kọ̀n, mì dona penugo nado nọ dọho to aliho he họnwun mẹ, bo nọ lẹnnupọn ganji, bosọ nọ wadẹẹdẹ do yihojlẹdohogo hẹ mẹdevo lẹ po sisi po. Humọ, jọja he nọ plọn Biblu bo nọ dovivẹnu nado yí nunọwhinnusẹ́n etọn do yizan mẹ to gbẹzan yetọn mẹ lẹ nọ mọ nuplọnmẹ dagbe hugan he tin-to-aimẹ yí bosọ nọ ze dodonu dagbe sọgodo mavọmavọ de tọn dai na yede.—Hia Psalm 1:1-3.a
12. Apajlẹ tẹwẹ whẹndo Klistiani tọn lẹ na wadagbe nado hodo?
12 To Islaeli, mẹjitọ lẹ ma nọ yí nukunpẹvi do pọ́n wepinplọn ovi yetọn lẹ gba. Diblayin adà gbẹzan tọn lẹpo go wẹ wepinplọn enẹ nọ gando, titengbe whẹho gbigbọmẹ tọn lẹ. (Deut. 6:6, 7) Enẹwutu, jọja Islaelivi he nọ dotoaina mẹjitọ yetọn po mẹhomẹ budisi Jiwheyẹwhe tọ́ devo lẹ po lẹ ma nọ mọ oyọnẹn kẹdẹ yí gba, ṣigba nuyọnẹn, zinzin, nukunnumọjẹnumẹ, po nugopipe nulẹnpọn tọn po ga—yèdọ nugopipe he ma gbayipe he nuplọnmẹ Jiwheyẹwhe tọn kẹdẹ wẹ nọ hẹnmẹ tindo lẹ. (Howh. 1:2-4; 2:1-5, 11-15) Whẹndo Klistiani tọn lẹ dona na ayidonugo dopolọ nupinplọn to egbehe.
Nọ Dotoaina Mẹhe Yiwanna We Lẹ
13. Ayinamẹ nankọ wẹ jọja delẹ nọ mọyi, podọ naegbọn yé dona tin to aṣeji?
13 Jọja lẹ nọ mọ ayinamẹ yí sọn omẹ voovo lẹ dè—gọna ayinamẹtọ wehọmẹ tọn lẹ, he ayinamẹ yetọn lẹ nọ saba sinai do onú aihọn tọn lẹ kẹdẹ ji. Jaale nọ gbeje ayinamẹ mọnkọtọn lẹ pọ́n to odẹ̀ mẹ po alọgọ Ohó Jiwheyẹwhe tọn po gọna núdùdù gbigbọmẹ tọn he pipli afanumẹ nugbonọ nuyọnẹntọ lọ tọn nọ wleawuna. Sọn Biblu pinplọn towe mẹ, hiẹ yọnẹn dọ jọja he ma tindo numimọ lẹ dín wẹ Satani te hugan. Di apajlẹ, to jipa Edẹni tọn mẹ, Evi he ma tindo numimọ dotoaina Satani, yèdọ jonọ de he ma tlẹ ko do owanyi hia ẹ pọ́n. Lehe kọdetọn lọ na ko gbọnvo do sọ eyin ewọ dotoaina Jehovah, mẹhe ko do owanyi hia ẹ to aliho susu mẹ!—Gẹn. 3:1-6.
14. Naegbọn mí dona nọ dotoaina Jehovah po mẹjitọ yisenọ mítọn lẹ po?
14 Mẹdatọ Daho towe yiwanna hiẹ lọsu ga, podọ e nọ wàmọ po mẹwhinwhàn dagbe hugan lẹ po. E jlo dọ hiẹ ni tindo ayajẹ kakadoi, e ma yin todin kẹdẹ gba! Enẹwutu, po homẹdagbe he taidi mẹjitọ mẹtọnhopọntọ de tọn po, e to didọna hiẹ po mẹhe to sinsẹ̀n ẹn lẹpo po dọmọ: “Ehe wẹ aliho, mì zinzọnlin to e mẹ.” (Isa. 30:21) Eyin hiẹ tindo mẹjitọ yisenọ he yiwanna Jehovah nugbonugbo lẹ, be dona devo sọ niyẹn. Nọ dotoaina ayinamẹ yetọn lẹ po sisi po to whenuena a to nudide basi gando yanwle po nuhe na nọ̀ otẹn tintan mẹ na we lẹ po go. (Howh. 1:8, 9) To popolẹpo mẹ, ojlo yetọn wẹ yindọ hiẹ ni mọ ogbẹ̀ yí, yèdọ nuhe họakuẹ tlala hugan adọkun kavi yindidi to aihọn ehe mẹ.—Mat. 16:26.
15, 16. (a) Jidide tẹwẹ mí sọgan tindo to Jehovah mẹ? (b) Onú titengbe tẹwẹ mí plọn sọn numimọ Baluki tọn mẹ?
15 Mẹhe nọ flin Mẹdatọ Daho yetọn lẹ nọ zan gbẹzan he bọawu, bo nọ deji dọ Jehovah ma na jo yé dai kavi gbẹ́ yé “gbede.” (Hia Heblu lẹ 13:5.) Na pọndohlan dagbe ehe gbọnvo na nulẹnpọn aihọn tọn wutu, mí dona tin to aṣeji ma nado dike gbigbọ aihọn tọn ni yinuwado mí ji. (Efe. 2:2) Gando ehe go, lẹnnupọndo apajlẹ Baluki, wekantọ Jẹlemia tọn ji, mẹhe nọgbẹ̀ to azán godo tọn Jelusalẹm tọn lẹ mẹ, yèdọ ojlẹ he gọ́ na awusinyẹn bo wá dekọtọn do vasudo tòdaho lọ tọn mẹ to 607 J.W.M.
16 E sọgan ko yindọ Baluki jlo na hẹn gbẹzan etọn pọnte to agbasa-liho. Jehovah doayi ehe go bo gbọn homẹdagbe dali na avase Baluki ma nado to “onú dahodaho lẹ” dín na ede. Baluki do ede hia nado yin whiwhẹnọ podọ nuyọnẹntọ, na e dotoaina Jehovah bo lùn vasudo Jelusalẹm tọn tọ́n. (Jẹl. 45:2-5) To alọ devo mẹ, mẹhe nọgbẹ̀ to ojlẹ Baluki tọn mẹ bo bẹ “onú dahodaho” susu pli to agbasa-liho, bosọ dovọ́na sinsẹ̀n-bibasi Jehovah tọn lẹ hẹn nulẹpo bu to ojlẹ vude godo to alọ Kaldeanu (kavi Babilọninu) lẹ tọn mẹ. Mẹsusu sọ hẹn ogbẹ̀ yetọn bu. (2 Otan. 36:15-18) Numimọ Baluki tọn gọalọna mí nado mọdọ haṣinṣan dagbe tintindo hẹ Jiwheyẹwhe yin nujọnu tlala hugan adọkun po yindidi po to aihọn ehe mẹ.
Nọ Hodo Apajlẹ Dagbe Hugan Lẹ
17. Naegbọn Jesu, Paulu po Timoti po do yin apajlẹ dagbe na devizọnwatọ Jehovah tọn lẹ to egbehe?
17 Ohó Jiwheyẹwhe tọn wleawuna apajlẹ dagbe susu nado sọgan gọalọna mí dile mí to zọnlinzin gbọn aliho ogbẹ̀ tọn lọ ji. Di dohia, Jesu wẹ tindo nunina hugan to gbẹtọvi he ko nọgbẹ̀ pọ́n lẹ mẹ, ṣogan e ze ayidonugo do nuhe na gọalọna gbẹtọ lẹ kakadoi ji—enẹ wẹ “yẹwheho ahọludu” tọn. (Luku 4:43) Nado sọgan na dagbe hugan etọn Jehovah, apọsteli Paulu jo agbasazọ́n he sọgan hẹn ẹn jẹ adọkun do bo yí whenu po huhlọn etọn po zan nado dọyẹwheho wẹndagbe lọ tọn. Timoti, he yin “ovi . . . nugbo to yise mẹ” hodo apajlẹ dagbe Paulu tọn. (1 Tim. 1:2) Be gbẹzan he Jesu, Paulu po Timoti po zan vẹna yé wẹ ya? Paali! Na nugbo tọn, Paulu dọ dọ yijlẹdo lẹblanulọkẹyi Jiwheyẹwhe sinsẹ̀n tọn go, ewọ pọ́n nuhe aihọn zedonukọnna ẹn lẹ hlan taidi “omí.”—Flp. 3:8-11.
18. Diọdo titengbe tẹlẹ wẹ mẹmẹsunnu jọja de basi, podọ etẹwutu nudide etọn ma vẹna ẹn?
18 To egbehe, jọja Klistiani susu wẹ to apajlẹ Jesu, Paulu po Timoti po tọn hodo. Di apajlẹ, mẹmẹsunnu jọja de he tindo agbasazọ́n he pekuẹ ganji de to ojlẹ de mẹ wayi wlan dọmọ: “Na n’nọ hodo nunọwhinnusẹ́n Biblu tọn lẹ wutu, e ma dẹn bọ n’mọ dotẹnmẹ hundote nukọnyiyi tọn susu. Mahopọnna akuẹ susu he n’nọ mọyi, n’mọdọ wezundo wẹ n’te to jẹhọn godo. To whenuena n’dọnsẹpọ ogán azọ́nwhé lọ tọn lẹ bo dọ ojlo ṣie nado doafọna lizọnyizọn whenu-gigọ́ tọn na yé, yé yawu ze akuẹ susu dogọ donukọnna mi, po linlẹn lọ po dọ n’na gbọ bo ṣiai. Ṣigba, n’ko magbe. Nuhewutu n’jo agbasazọ́n he nọ hẹn akuẹ susu wá de do nado doafọna sinsẹ̀nzọn whenu-gigọ́ tọn vẹawuna mẹsusu nado mọnukunnujẹemẹ. Nuhe whàn mi lọ wẹ yindọ n’jlo na nọgbẹ̀ nugbonugbo sọgbe hẹ klandowiwe ṣie na Jiwheyẹwhe. Na gbẹzan ṣie sinai do gbigbọnu lẹ ji todin wutu, n’tindo ayajẹ po pekọ po jẹ obá de mẹ, ehe akuẹ kavi yindidi depope ma sọgan na mi.”
19. Nudide nuyọnẹn tọn tẹwẹ jọja lẹ yin tulina nado basi?
19 Lẹdo aihọn pé, jọja fọtọ́n susu wẹ ko basi nudide nuyọnẹn tọn mọnkọtọn lẹ. Enẹwutu, jọja lẹ emi, whenuena mì to nulẹnpọndo sọgodo mìtọn ji, mì nọ hẹn azán Jehovah tọn do ayiha mẹ gligli. (2 Pita 3:11, 12) Mì dike onú mẹhe to aihọn ehe yizan to gigọ́ mẹ lẹ tọn jlo mì blo. Kakatimọ, mì nọ dotoaina mẹhe yiwanna mì nugbonugbo lẹ. Onú dagbe hugan he mì sọgan wadotana wẹ nado bẹ “adọkunnu pli . . . to olọn mẹ” podọ enẹ kẹdẹ wẹ na hẹn ale mavọmavọ lẹ wá na mì. (Mat. 6:19, 20; hia 1 Johanu 2:15-17.) Mọwẹ, mì flin Mẹdatọ Daho mìtọn. Eyin mì wàmọ, Jehovah na dona mì.
[Nudọnamẹ odò tọn]
a Gando wepinplọn dahodaho po agbasazọ́n po go, pọ́n Atọ̀họ̀-Nuhihọ́ Lọ Tọn 1er octobre 2005, weda 26-31.
Be Hiẹ Flin Ya?
• Nawẹ mí nọ do jidide hia to Jiwheyẹwhe mẹ gbọn?
• Nupinplọn tẹwẹ yọ́n hugan?
• Etẹlẹ wẹ mí sọgan plọn sọn apajlẹ Baluki tọn mẹ?
• Mẹnu lẹ wẹ mí dona nọ pọnhlan taidi apajlẹ dagbe, podọ etẹwutu?
[Yẹdide to weda 13]
Jehovah nọ wleawuna nupinplọn dagbe hugan lọ
[Yẹdide to weda 15]
Baluki dotoaina Jehovah bo lùn vasudo Jelusalẹm tọn tọ́n. Etẹwẹ hiẹ sọgan plọn sọn apajlẹ ehe mẹ?