Basi Dide Nado Sẹ̀n Jehovah to Jọja Whenu
“Nọte to nuhe hiẹ plọn lẹ mẹ, ehe hiẹ ko yí nukun towe hùn do e go hezeheze [kavi yin linlẹndiọna nado yise].”—2 TIM. 3:14.
1. Nukun tẹwẹ Jehovah nọ yí do pọ́n sinsẹ̀nzọn jọja Kunnudetọ etọn lẹ tọn?
SINSẸ̀NZỌN wiwe jọja lẹ tọn yin nujọnu to nukun Jehovah tọn mẹ sọmọ bọ e gbọdo psalm-kàntọ de nado dọ dọdai gando yé go. “Gbẹtọ towe lẹ na yin ojlonọ to azán huhlọn towe tọn gbè,” wẹ psalm-kàntọ lọ jihàn dọ. “To whanpẹ walọ wiwe tọn mẹ, sọn adọ̀ afọnnu fuu tọn mẹ; hiẹ tindo ahún ovu whenu towe tọn.” (Ps. 110:3) Mọwẹ, Jehovah nọ yí nukun nujọnu tọn do pọ́n jọja he jlo nado sẹ̀n ẹn lẹ.
2. Nuyiwadomẹji tẹwẹ jọja lẹ nọ pehẹ to aihọn mẹ to egbehe gando sọgodo yetọn go?
2 Mì jọja he tin to agun Klistiani tọn mẹ lẹ emi, be mì ko klan mìde do wiwe na Jehovah ya? E sọgan vẹawuna jọja susu nado basi nudide nado sẹ̀n Jiwheyẹwhe nugbo lọ. Azọ́ngán lẹ, mẹplọntọ lẹ, podọ to whedelẹnu hagbẹ whẹndo tọn po họntọn lẹ lọsu po nọ na tuli jọja lẹ nado doafọna yanwle agbasa tọn lẹ. Eyin jọja lẹ to afọdona yanwle gbigbọmẹ tọn lẹ, gbẹtọ lẹ nọ saba ṣàn yé kò. Ṣigba nugbo lọ wẹ yindọ, aliho gbẹninọ tọn dagbe hugan he hiẹ sọgan doafọna wẹ nado sẹ̀n Jiwheyẹwhe nugbo lọ. (Ps. 27:4) Enẹwutu, lẹnnupọndo kanbiọ atọ̀n ehelẹ ji: Naegbọn hiẹ dona sẹ̀n Jiwheyẹwhe? Nawẹ hiẹ sọgan tindo kọdetọn dagbe to klandowiwe towe hlan Jiwheyẹwhe mẹ gbọn mahopọnna nuhe mẹdevo lẹ sọgan dọ kavi wà? Dotẹnmẹ sinsẹ̀nzọn wiwe tọn dagbe tẹlẹ wẹ sọgan hundote na we?
Sinsẹ̀nzọn Jehovah Tọn —Nuhe Mí Dona Wà
3. Nawẹ nudida Jehovah tọn lẹ dona yinuwado mí ji gbọn?
3 Naegbọn hiẹ dona sẹ̀n Jiwheyẹwhe nugbo ogbẹ̀nọ lọ? Osọhia 4:11 na whẹwhinwhẹ́n tangan lọ dọmọ: “[Jehovah] mítọn podọ Jiwheyẹwhe mítọn, hiẹ wẹ jẹ nado yí gigo, yẹyi, po huhlọn po: na hiẹ wẹ dá onú popo, podọ to ojlo towe mẹ wẹ yé do tin, bọ yè sọ do dá yé.” (Osọhia 4:11) Jehovah wẹ Didatọ onú popo tọn. Pọ́n lehe aigba yọnwhanpẹ sọ! Atin, vounvoun, kanlin, ohù, osó po tọ̀sisa osó mẹ tọn lẹ po—nudida Jehovah tọn wẹ ehe lẹpo. “Aigba gọ́ na nutindo [Jiwheyẹwhe tọn lẹ],” wẹ Psalm 104:24 dọ. Lehe mí dopẹ́ do sọ dọ Jehovah gbọn owanyi dali na mí agbasa po ayiha de po he nọ hẹn mí penugo nado duvivi aigba po onú dagbe he tin to e ji lẹ po tọn! Be pinpẹn-nutọn-yinyọnẹn na nudida jiawu etọn lẹ ma dona whàn mí nado sẹ̀n ẹn ya?
4, 5. Nuyiwa Jehovah tọn tẹlẹ wẹ dọ̀n Jọṣua sẹpọ Ẹ?
4 Whẹwhinwhẹ́n devo he wutu mí dona sẹ̀n Jehovah sọawuhia to nuhe nukọntọ Islaeli tọn Jọṣua dọ lẹ mẹ. Sẹpọ vivọnu gbẹzan etọn tọn, Jọṣua dọna omẹ Jiwheyẹwhe tọn lẹ dọmọ: “Mìwlẹ sọ yọnẹn to ayiha mìtọn lẹpo mẹ podọ to gbigbọ mìtọn lẹpo mẹ, dọ onú dopo ma gbòpò sọn onú dagbe he OKLUNỌ Jiwheyẹwhe mìtọn dọ gbọn mì dali lẹ de mẹ; popolẹpo wẹ ṣẹ hlan mì.” Naegbọn Jọṣua sọgan dọ mọ?—Jọṣ. 23:14.
5 To whenuena Jọṣua pò to ovu to Egipti, e dona ko sè dogbọn opagbe Jehovah tọn dali nado na Islaelivi lẹ aigba yetọn titi. (Gẹn. 12:7; 50:24, 25; Eks. 3:8) Enẹgodo, Jọṣua mọ bọ Jehovah jẹ dọdai enẹ hẹndi ji to whenuena e hẹn Azọ̀nylankan Ao lẹ wá Egipti ji bo hẹn Falo tasinyẹntọ lọ gánnugánnu nado jo ovi Islaeli tọn lẹ do. Jọṣua tin to mẹhe gbọn Ohù Vẹẹ mẹ luntọ́n lẹ mẹ podọ to enẹgodo, e mọ whenue ohù enẹ ṣinyọ́n Falo po awhànpa etọn po ji. To gbejizọnlin gaa he yé zìn gbọn “zungbo kiklo podọ he dobu” Sinai tọn mẹ, Jọṣua mọ lehe Jehovah wleawuna nuhe Islaelivi lẹ tindo nuhudo etọn lẹpo do. Dopo tata to yé mẹ ma kú na nugbla kavi huvẹ wutu gba. (Deut. 8:3-5, 14-16; Jọṣ. 24:5-7) To whenuena ojlẹ sọ na Islaelivi lẹ nado gbawhàn akọta huhlọnnọ Kenani tọn lẹ tọn bo yí Aigba Pagbe tọn lọ, Jọṣua mọ lehe Jiwheyẹwhe he ewọ po Islaelivi he pò lẹ po to sinsẹ̀n nọgodona yé to azọ́n ehe mẹ do.—Jọṣ. 10:14, 42.
6. Etẹwẹ na gọalọna we nado wleawuna ojlo lọ nado sẹ̀n Jiwheyẹwhe?
6 Jọṣua yọnẹn dọ Jehovah ko hẹn opagbe Etọn lẹ di. Enẹwutu, Jọṣua dọmọ: “Na yẹn tọn po owhé ṣie po, míwlẹ na OKLUNỌ lọ sẹ̀n.” (Jọṣ. 24:15) Hiẹ lo? Eyin hiẹ lẹnnupọndo opagbe he Jiwheyẹwhe nugbo lọ ko hẹndi po dehe e na gbẹ́ wá hẹndi lẹ po ji, be e nọ hẹn we tindo ojlo nado sẹ̀n ẹn dile Jọṣua wà do ya?
7. Naegbọn baptẹm osin tọn do yin afọdide titengbe de?
7 Eyin hiẹ nọ lẹnnupọndo azọ́n nudida Jehovah tọn po opagbe jiawu etọn he sọgan yin jidedego mlẹnmlẹn lẹ po ji, e ma yindọ e na whàn we nado klan dewe do wiwe na Jehovah kẹdẹ wẹ gba, ṣigba nado basi yẹhiadonu klandowiwe enẹ tọn gbọn baptẹm osin tọn dali ga. Afọdide titengbe de wẹ baptẹm yin, he mẹdepope he jlo na sẹ̀n Jiwheyẹwhe dona ze. Apajlẹnọ mítọn Jesu hẹn ehe họnwun. Ojlẹ vude whẹpo e do bẹ azọ́n etọn jẹeji taidi Mẹssia lọ, e yì Johanu Baptizitọ dè nado yí baptẹm. Naegbọn Jesu do ze afọdide enẹ? E dọ to godo mẹ domọ: “Yẹn jẹte sọn olọn, e ma yin nado wà ojlo ṣie lọsu gba, adavo ojlo ewọ he do mi hlan tọn.” (Joh. 6:38) Jesu yí baptẹm nado dohia dọ e ko ze ede jo nado wà ojlo Otọ́ etọn tọn.—Mat. 3:13-17.
8. Naegbọn Timoti basi dide nado sẹ̀n Jiwheyẹwhe, podọ etẹwẹ e sọgan biọ dọ hiẹ ni wà?
8 Sọ lẹnnupọndo apajlẹ Timoti tọn ji, yèdọ jọja Klistiani de he Jehovah wá ze azọngban po lẹblanulọkẹyi susu po do alọmẹ na to godo mẹ. Naegbọn Timoti basi dide nado sẹ̀n Jiwheyẹwhe nugbo lọ? Biblu dọna mí dọ ‘e plọn onú delẹ bo yin linlẹndiọna nado yise.’ (2 Tim. 3:14) Eyin hiẹ ko plọn Ohó Jiwheyẹwhe tọn bo ko yin linlẹndiọna nado yise dọ nuplọnmẹ etọn lẹ yin nugbo, be ninọmẹ towe jlo na taidi Timoti tọn. Todin, hiẹ dona basi nudide. Naegbọn hiẹ ma na dọhona mẹjitọ towe lẹ gando nuhe a jlo na wà go? To pọmẹ hẹ mẹho agun tọn lẹ, yé sọgan gọalọna we nado mọnukunnujẹ nubiọtomẹsi Owe-wiwe tọn lẹ mẹ na baptẹm.—Hia Owalọ lẹ 8:12.
9. Nuyiwadomẹji tẹwẹ nudide towe nado yí baptẹm sọgan tindo do mẹdevo lẹ ji?
9 Eyin hiẹ yí baptẹm, bẹjẹeji dagbe de wẹ e na yin to Jiwheyẹwhe nugbo lọ sinsẹ̀n mẹ. Gbọn afọdide ehe zize dali, hiẹ na bẹ alèwezun gaa de jẹeji he na dekọtọn do ogbẹ̀ madopodo mẹ na we bo nasọ hẹn we tindo ayajẹ he nọ wá sọn ojlo Jiwheyẹwhe tọn wiwà mẹ todin. (Heb. 12:2, 3) Hiẹ nasọ hẹn ayajẹ wá na hagbẹ whẹndo towe tọn he ko to alèwezun lọ họ̀n lẹ gọna họntọn towe he tin to agun Klistiani tọn mẹ lẹ. Hú popolẹpo, hiẹ na hẹn ayiha Jehovah tọn jaya. (Hia Howhinwhẹn lẹ 23:15.) Nugbo wẹ dọ, mẹdevo lẹ sọgan nọma mọnukunnujẹ nuhewutu hiẹ de nado sẹ̀n Jehovah mẹ, podọ yé sọgan fọ́n ayihaawe dote gando nudide towe go. Yé tlẹ sọgan diọnukunsọ we. Ṣigba hiẹ sọgan duto avùnnukundiọsọmẹnu ehelẹ ji.
Whenuena Mẹdevo lẹ Fọ́n Kanbiọ Dote Kavi Diọnukunsọ We
10, 11. (a) Kanbiọ tẹlẹ wẹ gbẹtọ lẹ sọgan kanse we gando nudide towe nado sẹ̀n Jiwheyẹwhe go? (b) Etẹwẹ a sọgan plọn sọn aliho he mẹ Jesu na gblọndo na kanbiọ he gando sinsẹ̀n-bibasi nugbo go lẹ te mẹ?
10 Nudide towe nado sẹ̀n Jehovah sọgan paṣa wehọmẹvigbẹ́, kọmẹnu, po hẹnnumẹ towe lẹ po. Yé sọgan kàn nuhewutu hiẹ do basi nudide ehe sè we bo fọ́n kanbiọ dote gando nuyise towe go. Eyin enẹ jọ janwẹ, nawẹ hiẹ na na gblọndo gbọn? Na nugbo tọn, hiẹ dona lẹnnupọndo pọndohlan po numọtolanmẹ towe lẹ po ji nado sọgan penugo bo basi zẹẹmẹ nuhe whàn we nado basi nudide towe lẹ tọn. Podọ nado na gblọndo na kanbiọ he gando nuyise towe go lẹ, apajlẹ dagbe tẹwẹ hiẹ sọ sọgan hodo hugan Jesu tọn?
11 To whenuena sinsẹ̀ngán Ju lẹ kanhose Jesu gando fọnsọnku go, e dọ̀n linlẹn yetọn wá wefọ he yé ma na ayidonugo de ji. (Eks. 3:6; Mat. 22:23, 31-33) Whenuena wekantọ de kàn gbedide he klohugan sè e, Jesu yihodọ sọn wefọ Biblu tọn he dọhodo whẹho enẹ ji lẹ mẹ. Dawe lọ dọnudo Jesu na gblọndo lọ. (Lev. 19:18; Deut. 6:5; Malku 12:28-34) Na aliho he mẹ Jesu nọ yí Owe-wiwe zan bosọ nọ dọho te wutu, “kinklan fọ́n to agundaho lọ ṣẹnṣẹn,” bọ nukundiọsọmẹtọ etọn lẹ ma sọgan gbleawuna ẹn. (Joh. 7:32-46) Eyin hiẹ to gblọndo kanbiọ lẹ tọn na gando nuyise towe go, nọ yí Biblu zan bo nọ dọho to “walọmimiọn po osi po mẹ.” (1 Pita 3:15) Eyin hiẹ ma yọ́n gblọndo kanbiọ de tọn, yigbe dọ a ma yọnẹn bo biọ nado yì basi dodinnanu. To enẹgodo, dindona kanbiọ lọ gbọn Index des publications Watch Tower kavi Watchtower Library to CD-ROM ji yiyizan dali eyin yé tin-to-aimẹ to ogbè he a sè de mẹ. Po awuwiwle dagbe de po, hiẹ na “yọ́n le [a] na nọ gblọnhona gbẹtọ lẹ dopodopo do.”—Kọl. 4:6.
12. Naegbọn hiẹ ma dona dike homẹkẹn ni hẹn we gbọjọ?
12 Hiẹ sọgan pehẹ nususu hugan kanbiọ he gando teninọ po nuyise towe lẹ po go. To popolẹpo mẹ, kẹntọ Jiwheyẹwhe tọn Satani Lẹgba wẹ to anadena aihọn. (Hia 1 Johanu 5:19.) E ma na sọgbe hẹ lẹnpọn dagbe nado donukun pipà kavi alọkẹyi mẹlẹpo tọn, podọ e yọnbasi dọ a na pehẹ nukundiọsọmẹ. Mẹdelẹ sọgan ‘dọho oylan tọn do gowe,’ bo zindonukọn to mọwiwà mẹ. (1 Pita 4:4) Ṣigba flindọ e ma yin hiẹ kẹdẹ wẹ tindo numimọ ehe gba. Jesu Klisti lọsu jiya homẹkẹn tọn. Nudopolọ wẹ gando apọsteli Pita go. E wlan dọmọ: “Mẹyiwanna emi, mì lẹn di nudabla de blo gbọn whlepọn miyọnawu he ja mì whlepọn gbé, kẹdẹdi onú dabla de wẹ jọ hlan mì dè: ṣigba mì ni jaya, sọle mì yin mahẹtọ to yajiji Klisti tọn mẹ do.”—1 Pita 4:12, 13.
13. Naegbọn Klistiani lẹ sọgan jaya to whenuena yé yin homẹkẹndo?
13 Akọndidona homẹkẹn kavi nukundiọsọmẹ na Klistiani yinyin wutu yin whẹwhinwhẹ́n de nado jaya. Etẹwutu? Na eyin aihọn kẹalọyi we, enẹ na dohia dọ a to gbẹnọ sọgbe hẹ nujinọtedo Satani tọn lẹ—kakati nido yin Jiwheyẹwhe tọn lẹ. Jesu na avase dọmọ: “Dindọn hlan mì, whenuena omẹ pó to onú mìtọn dagbe dọ! Na mọkẹdẹ wẹ otọ́ yetọn lẹ wà hlan yẹwhegán lalonọ lẹ.” (Luku 6:26) Homẹkẹn nọ dohia dọ homẹ Satani po aihọn etọn po tọn ma hùn do gowe na hiẹ to Jehovah sẹ̀n wutu. (Hia Matiu 5:11, 12.) Podọ eyin “yè to [mí] vlẹ na oyín Klisti tọn wutu,” ayajẹnu de wẹ e yin.—1 Pita 4:14.
14. Dagbe tẹlẹ mẹ wẹ e sọgan dekọtọn do eyin mẹde hẹn nugbonọ-yinyin etọn na Jehovah go mahopọnna homẹkẹn?
14 Eyin hiẹ hẹn nugbonọ-yinyin towe na Jehovah go mahopọnna homẹkẹn, e whè gbau kọdetọn dagbe ẹnẹ wẹ e na hẹnwa. E na yin kunnudenu dagbe de gando Jiwheyẹwhe po Ovi etọn po go. Akọndonanu po nugbonọ-yinyin towe po na na tuli mẹmẹsunnu po mẹmẹyọnnu towe lẹ po. Ayidonugotọ delẹ he ma yọ́n Jehovah sọgan yin whinwhàn nado dín in mọ. (Hia Filippinu lẹ 1:12-14.) Podọ dile hiẹ mọ lehe Jehovah nọ namẹ huhlọn nado doakọnna whlepọn lẹ do, owanyi towe na ẹn na siso dogo.
“Ohọ̀n Daho” de Hùndonuvo Na We
15. “Ohọ̀n daho” tẹwẹ hùndonuvo na apọsteli Paulu?
15 Apọsteli Paulu wlan gando lizọnyizọn etọn to Efesu go dọmọ: ‘Yè hùn ohọ̀n daho he nọ planmẹ jẹ nuwiwa kọ̀n de hlan mi.’ (1 Kọl. 16:8, 9) Ohọ̀n enẹ plan ẹn jẹ nuwiwa susu dogọ kọ̀n to azọ́n wẹndagbe lilá po mẹhẹnzun devi po tọn mẹ to tòdaho enẹ mẹ. Nado gbọn ohọ̀n enẹ nù, Paulu gọalọna mẹsusu nado plọnnu dogbọn Jehovah dali bo sẹ̀n Ẹn.
16. Nawẹ pipotọ mẹyiamisisadode lẹ tọn gbọn “ohọ̀n he yè hùn dai” de nù to 1919 gbọn?
16 To 1919, Jesu Klisti he yin gigopana lọ ze “ohọ̀n he yè hùn dai” de do pipotọ mẹyiamisisadode lẹ tọn nukọn. (Osọhia 3:8) Yé gbọn ohọ̀n enẹ nù bo jẹ yẹwheho wẹndagbe lọ tọn dọ ji bosọ to nugbo Biblu tọn lẹ plọnmẹ po zohunhun po hugan gbede pọ́n. Etẹwẹ yin kọdetọn lizọnyizọn yetọn tọn? Wẹndagbe lọ ko jẹ opodo aigba tọn todin, podọ nudi gbẹtọ livi ṣinawe wẹ ko tindo todido lọ nado mọ ogbẹ̀ madopodo yí to aihọn yọyọ Jiwheyẹwhe tọn mẹ.
17. Nawẹ hiẹ sọgan gbọn ‘ohọ̀n daho he nọ planmẹ jẹ nuwiwa kọ̀n de’ nù gbọn?
17 ‘Ohọ̀n daho he nọ planmẹ jẹ nuwiwa kọ̀n de’ gbẹ́ pò to hùnhùn na devizọnwatọ Jehovah tọn lẹpo. Mẹhe to ohọ̀n ehe nù gbọn lẹ nọ mọ ayajẹ po pekọ po dile yé to mahẹ susu tindo to wẹndagbe lọ lilá mẹ. Mì jọja devizọnwatọ Jehovah tọn lẹ emi, be mì nọ yí nukun nujọnu tọn do pọ́n lẹblanulọkẹyi mayọnjlẹ he mì tindo nado gọalọna mẹdevo lẹ na yé nido “yí wẹndagbe sè” ya? (Malku 1:14, 15) Be mì ko lẹnnupọndo sinsẹ̀nzọn gbehosọnalitọ whepoponu tọn kavi alọgọtọ tọn ji ya? Dotẹnmẹ devo he sọ sọgan hundote na susu to mì mẹ wẹ Plitẹnhọ Ahọluduta tọn gbigbá, sinsẹ̀nzọn Bẹtẹli tọn, azọ́ndenamẹ mẹdehlan tọn po sinsẹ̀nzọn gbehosọnalitọ titengbe tọn po. To whenuena e yindọ opodo aihọn ylankan Satani tọn to sisẹpọ po awuyiya po, egbesọegbesọ wẹ e nọ lẹzun onú niyaniya tọn dogọ nado tindo mahẹ to wunmẹ sinsẹ̀nzọn Ahọluduta lọ tọn ehelẹ mẹ. Be hiẹ na gbọn “ohọ̀n daho” lọ nù whẹpo whenu nido fẹ́ ya?
“Dọ́ Ẹ Pọ́n, Bosọ Mọdọ Yinyọ́n Wẹ OKLUNỌ”
18, 19. (a) Etẹwẹ hẹn Davidi tindo ojlo vẹkuvẹku nado sẹ̀n Jehovah? (b) Etẹwẹ dohia dọ e ma vẹna Davidi pọ́n gbede dọ e sẹ̀n Jehovah?
18 To gbọdo glọ, psalm-kàntọ Davidi basi oylọna gbẹtọ lẹ nado “dọ́ . . . pọ́n, bosọ mọdọ yinyọ́n wẹ OKLUNỌ.” (Ps. 34:8) Whenuena Davidi gbẹ́ pò to jọja taidi lẹngbọhọtọ de, Jehovah whlẹn ẹn sọn alọ gbekanlin ylankan lẹ tọn mẹ. Jiwheyẹwhe nọgodona ẹn to avùnhiho etọn sọta Goliati mẹ bosọ whlẹn ẹn sọn nugbajẹmẹji susu devo lẹ mẹ. (1 Sam. 17:32-51; Ps. 18, nukinkan aga tọn) Na dagbewanyi susu Jiwheyẹwhe tọn wutu, Davidi yin whinwhàn nado wlan dọmọ: “OKLUNỌ E Jiwheyẹwhe ṣie, susu wẹ azọ́njiawu he hiẹ ko wà, po linlẹn towe po hlan míwlẹ dali: yè ma sọgan hia yé hlan we kannukannu gba.”—Ps. 40:5.
19 Davidi wá yiwanna Jehovah taun bo jlo na yí ahun po ayiha etọn lẹpo po do pà Ẹ. (Hia Psalm 40:8-10.) Dile owhe lẹ to yìyì, e ma vẹna Davidi pọ́n gbede dọ e yí gbẹzan etọn do sẹ̀n Jiwheyẹwhe nugbo lọ. Gbẹninọ to mẹdezejo na Jiwheyẹwhe mẹ wẹ yin nuhọakuẹ hugan etọn—yèdọ asisa ayajẹ tọn he ma pé awe de. To yọnhowhe etọn mẹ, Davidi dọmọ: “Hiẹ wẹ todido ṣie, [Jehovah] Jiwheyẹwhe E; hiẹ wẹ tudonu ṣie sọn ovu ṣie wá. Dinvie ga whenuena yẹn zun yọnhonọ bosọ wúwhà, Jiwheyẹwhe E, a gbẹ́ mi blo.” (Ps. 71:5, 18) Jidide Davidi tọn do Jehovah go po haṣinṣan he e tindo hẹ Ẹ po wá lodo dogọ, mahopọnna dọ agbasa etọn ko yigodo.
20. Naegbọn Jiwheyẹwhe sinsẹ̀n do yin aliho gbẹninọ tọn dagbe hugan lọ?
20 Gbẹzan Jọṣua, Davidi po Timoti po tọn yidogọna kunnudenu lọ dọ Jehovah sinsẹ̀n wẹ aliho gbẹninọ tọn dagbe hugan lọ. Ale ojlẹ gli tọn he afọdidona agbasazọ́n de to aihọn ehe mẹ nọ hẹnwa lẹ ma tlẹ sọtẹ́n yijlẹdo ale dẹn-to-aimẹ he hiẹ na mọyi lẹ go, eyin a ‘yí ayiha po alindọn towe lẹpo po do sẹ̀n Jehovah.’ (Jọṣ. 22:5) Eyin hiẹ ma ko klan dewe do wiwe na Jehovah to odẹ̀ mẹ, kanse dewe dọ, ‘Etẹwẹ to aliglọnna mi nado lẹzun dopo to Kunnudetọ Jehovah tọn lẹ mẹ?’ Eyin sinsẹ̀n-basitọ Jehovah tọn he ko yí baptẹm de wẹ hiẹ yin, be hiẹ na jlo nado hẹn ayajẹ towe sudeji to gbẹ̀mẹ ya? Eyin mọ wẹ, hẹn lizọnyizọn towe gblodeji bo to nukọnyi zọnmii to gbigbọ-liho. Hosọ he bọdego na do aliho he mẹ hiẹ sọgan yinukọn to gbigbọ-liho te gbọn apajlẹ apọsteli Paulu tọn hihodo dali hia we.
Nawẹ Hiẹ Na Na Gblọndo Gbọn?
• Na whẹwhinwhẹ́n awe he wutu mí dona sẹ̀n Jiwheyẹwhe.
• Etẹwẹ gọalọna Timoti nado basi dide nado sẹ̀n Jiwheyẹwhe?
• Naegbọn hiẹ dona hẹn tenọgligo to homẹkẹn glọ?
• Dotẹnmẹ sinsẹ̀nzọn tọn tẹlẹ wẹ sọgan hundote na we?
[Yẹdide to weda 18]
Jehovah sinsẹ̀n wẹ aliho gbẹninọ tọn dagbe hugan lọ
[Yẹdide to weda 19]
Be hiẹ sọgan na gblọndo kanbiọ he gando nuyise towe go lẹ tọn ya?