Hẹn Nugbonọ-Yinyin Go po Ahun Dopo Po
“Yẹn na nọ zinzọnlin to nugbo towe mẹ; hẹn ayiha ṣie do dopo nado nọ dibusi oyín towe.”—PS. 86:11.
1, 2. (a) Sọgbe hẹ Psalm 86:2, 11, etẹwẹ na gọalọna mí nado hẹn nugbonọ-yinyin mítọn na Jehovah go to whlepọn kavi mẹtẹnpọn lẹ nukọn? (b) Whetẹnu wẹ mí dona wleawuna nugbonọ-yinyin ahundopo tọn?
NAEGBỌN Klistiani delẹ he ko hẹn nugbonọ-yinyin yetọn go na owhe susu mahopọnna gànpamẹninọ kavi homẹkẹn nọ wá jai jẹ omọ̀ ojlo agbasanu lẹ bibẹpli tọn mẹ? Gblọndo lọ sinai do ahun yẹhiadonu tọn mítọn ji—yèdọ nuhe mí yin to homẹ dọ́n. Psalm 86tọ do kanṣiṣa hia to nugbonọ-yinyin po ayiha kavi ahun dopo tintindo po ṣẹnṣẹn, ẹnẹ wẹ ahun he ma má. Psalm-kàntọ Davidi hodẹ̀ dọmọ: “Whlá ayiha ṣie: na [nugbonọ, NW ] wẹ yẹn: hiẹ Jiwheyẹwhe ṣie E, whlẹn devi towe he dotudo gowe.” E sọ yidogọ dọmọ: “OKLUNỌ E, plọn ali towe mi; yẹn na nọ zinzọnlin to nugbo towe mẹ; hẹn ayiha ṣie do dopo nado nọ dibusi oyín towe.”—Ps. 86:2, 11.
2 Eyin mí ma dejido Jehovah go po ahun mítọn lẹpo po, e bọawu dọ ahunmẹdunamẹnu po haṣinṣan devo lẹ po ni de nugbonọ-yinyin mítọn na Jiwheyẹwhe nugbo lọ pò. Ojlo ṣejannabi tọn lẹ taidi bọmbu flinflin he yin whiwhla do okọ́glọ to ali he ji mí to zọnlinzin gbọn. Eyin mí tlẹ ko hẹn nugbonọ-yinyin mítọn na Jehovah go to ninọmẹ whlepọn tọn lẹ glọ, mí gbẹ́ sọgan jẹ omọ̀ Satani tọn lẹ mẹ. Lehe e yin nujọnu dọ mí ni wleawuna nugbonọ-yinyin ahundopo tọn na Jehovah todin, whẹpo whlepọn kavi mẹtẹnpọn lẹ nido wá do sọ! “Hú whiwhla lẹpo, yí otù [kavi ahun] towe whlá,” wẹ Biblu dọ. (Howh. 4:23) Gando ehe go, mí sọgan plọn onú titengbe delẹ sọn numimọ yẹwhegán de tọn mẹ he Jehovah dohlan Ahọlu Jeloboami Islaeli tọn dè sọn Juda.
“Yẹn Nasọ Na Ale de We”
3. Nawẹ Jeloboami yinuwa hlan owẹ̀n whẹdida tọn he yẹwhegán Jiwheyẹwhe tọn do e gbọn?
3 Yí nukun homẹ tọn do pọ́n nujijọ lọ. Omẹ Jiwheyẹwhe tọn lọ ṣẹṣẹ do owẹ̀n sinsinyẹn de Ahọlu Jeloboami, mẹhe ko ze sinsẹ̀n-bibasi oyìnvu tọn dai to ahọluduta whẹndo ao agewaji Islaeli tọn mẹ. Nukun ahọlu lọ tọn bia to apà mẹ. E degbena omẹ etọn lẹ nado wle mẹhe wá do owẹ̀n lọ. Ṣigba Jehovah ma jo devizọnwatọ etọn do. To afọdopolọji, alọ he ahọlu lọ dlẹn jẹgbonu po adi po hú to azọ́njiawu-liho, bọ agbà he nọ yin yiyizan na sinsẹ̀n-bibasi lalo lọ zẹ̀ do voovo. Jeloboami gọ̀ biọ ede mẹ tlolo. E vẹ̀ omẹ Jiwheyẹwhe tọn lọ dọmọ: “Biọ dinvie nukundagbe OKLUNỌ Jiwheyẹwhe towe tọn bo hodẹ̀ na mi, na yè nido vọ́ alọ ṣie gọjona mi.” Yẹwhegán lọ hodẹ̀ bọ alọ ahọlu lọ tọn gọ̀ jẹgangan.—1 Ahọ. 13:1-6.
4. (a) Naegbọn nuzedonukọnnamẹ ahọlu lọ tọn do ze nugbonọ-yinyin yẹwhegán lọ tọn do whlepọn mẹ? (b) Gblọndo tẹwẹ yẹwhegán lọ na?
4 Enẹgodo, Jeloboami dọna omẹ Jiwheyẹwhe nugbo lọ tọn dọmọ: “Wá whégbè po yẹn po, bo na gbọjẹ dewe, yẹn nasọ na ale de we.” (1 Ahọ. 13:7) Etẹwẹ yẹwhegán lọ na wà todin? Be e na kẹalọyi nuzedonukọnnamẹ ahọlu lọ tọn to owẹ̀n whẹgbledomẹ tọn de dido e godo wẹ ya? (Ps. 119:113) Kavi be e na gbẹ́ oylọ ahọlu lọ tọn dile etlẹ taidi dọ nuyiwa ahọlu lọ tọn lẹ dohia dọ nuhe e wà lọ vẹna ẹn ya? Matin ayihaawe, Jeloboami tindo nugopipe lọ nado na nunina akuẹgegenu tọn susu họntọn etọn lẹ. Eyin yẹwhegán Jiwheyẹwhe tọn lọ ko tindo ojlo na agbasanu lẹ to ahun etọn mẹ wẹ, nuzedonukọnnamẹ lọ sọgan ko ze e do whlepọn daho de mẹ. Ṣigba, Jehovah ko degbena yẹwhegán lọ dọmọ: “Hiẹ ma na dù akla de, kavi nùsin, kavi gọ̀ gbọn aliho he hiẹ gbọn wá gba.” Enẹwutu, yẹwhegán lọ dọ madoadúdẹji dọmọ: “Eyin hiẹ na na odaa owhé towe tọn mi, yẹn ma to na yì whégbè po hiẹ po gba, mọ yẹn ma to na dù akla kavi nùsin to ofi he gba.” Yẹwhegán lọ sọ gbọn aliho devo yì sọn Bẹtẹli. (1 Ahọ. 13:8-10) Etẹwẹ nudide yẹwhegán lọ tọn plọn mí gando nugbonọ-yinyin ahundopo tọn go?—Lom. 15:4.
‘Nọ Tindo Pekọ’
5. Nawẹ ojlo agbasanu lẹ tọn gando nugbonọ-yinyin go gbọn?
5 Ojlo agbasanu lẹ tọn sọgan nọma taidi nuhe gando nugbonọ-yinyin go, ṣigba e gandego. Be mí dejido opagbe Jehovah tọn nado wleawuna nuhe mí tindo nuhudo etọn nugbonugbo lẹ go ya? (Mat. 6:33; Heb. 13:5) Kakati nado to kanván to aliho egblemaku tọn mẹ nado sọgan tindo onú “dagbe” gbẹ̀mẹ tọn he zẹ̀ nugopipe mítọn go to alọnu din delẹ, be mí sọgan wọnji yé go ya? (Hia Filippinu lẹ 4:11-13.) Be mí nọ yin whiwhlepọn nado gbẹkọ lẹblanulọkẹyi yẹwhehọluduta tọn delẹ go nado sọgan tindo nuhe mí to jijlo to alọnu din lẹ wẹ ya? Be sinsẹ̀nzọnwiwa na Jehovah po nugbonọ-yinyin po wẹ tin to otẹn tintan mẹ to gbẹzan mítọn mẹ ya? Vlavo mí yí ahun lẹpo do to sinsẹ̀nzọnwa na Jiwheyẹwhe kavi lala, enẹ ji wẹ gblọndo mítọn lẹ na sinai do. Apọsteli Paulu wlan dọmọ: “Jijọ-di-Jiwheyẹwhe po pekọ po ale daho wẹ. Na míwlẹ ma hẹn nude wá biọ aihọn mẹ, mọ míwlẹ masọ sọgan hẹn nude tọ́n jẹgbonu yì. Eyin mí tindo núdùdù po avọ̀ po, enẹ ni pekọna mí.”—1 Tim. 6:6-8.
6. “Ale” tẹlẹ wẹ sọgan yin zizedonukọnna mí, podọ etẹwẹ na gọalọna mí nado yọnẹn eyin mí na kẹalọyi yé?
6 Di apajlẹ, azọ́nmẹyimẹdotọ mítọn sọgan ze dotẹnmẹ nukọnyiyi tọn de donukọnna mí po akuẹ susu dogọ po gọna ale devo lẹ. Kavi mí sọgan mọdọ ninọmẹ mítọn na pọnte to akuẹzinzan-liho eyin mí sẹtẹn yì otò devo mẹ kavi awà devo ji nado dín azọ́n. To tintan whenu, dotẹnmẹ hundote mọnkọtọn lẹ sọgan taidi dona de sọn Jehovah dè. Ṣigba, be e ma jẹ dọ mí ni lẹnnupọndo mẹwhinwhàn mítọn lẹ ji whẹpo do basi nudide depope ya? Onú tintan he dona duahunmẹna mí wẹ yindọ, “Nawẹ nudide ṣie na yinuwado haṣinṣan ṣie hẹ Jehovah ji gbọn?”
7. Naegbọn e do yin nujọnu nado de ojlo agbasanu lẹ bibẹpli tọn sẹ̀ sọn ahun mítọn mẹ mlẹnmlẹn?
7 Aihọn Satani tọn fọ́n bo to ojlo agbasanu lẹ tọn zedaga mapote. (Hia 1 Johanu 2:15, 16.) Yanwle Lẹgba tọn wẹ nado hẹn ahun mítọn flu. Enẹwutu, mí dona tin to aṣeji nado nọ doayi ojlo agbasanu lẹ bibẹpli tọn go to ahun mítọn mẹ bo de e sẹ̀ mlẹnmlẹn. (Osọhia 3:15-17) E ma vẹawuna Jesu nado gbẹ́ ahọluduta aihọn ehe tọn lẹpo he Satani zedonukọnna ẹn dai. (Mat. 4:8-10) E na avase dọmọ: “Mì họ́ mìde, bosọ payi do nukunkẹn: to gege gbẹtọ tọn de mẹ ma wẹ ogbẹ̀ etọn nọte te sọn nuhe ewọ tindo lẹ mẹ gba.” (Luku 12:15) Nugbonọ-yinyin na gọalọna mí nado ganjẹ Jehovah go kakati ni yin mídetiti.
Yẹwhegán Mẹho de ‘Dolalo Na Ẹn’
8. Nawẹ nugbonọ-yinyin yẹwhegán Jiwheyẹwhe tọn lọ tọn yin whiwhlepọn gbọn?
8 Nulẹ na ko yì ganji na yẹwhegán Jiwheyẹwhe tọn lọ eyin e ko zindonukọn to gbejizọnlin etọn mẹ yì whé wẹ. Ṣigba e ma dẹn bọ e sọ pehẹ whlepọn devo. Biblu dọ dọ, “Yẹwhegán mẹho de nọ nọ̀ Bẹtẹli mẹ; dopo sọn visunnu etọn lẹ mẹ wá” bo dọ nuhe ko jọ to azán enẹ gbè lẹpo na ẹn. Tlolo he dawe yọnhonọ lọ sè nuhe jọ lọ, e biọ to ovi etọn lẹ si nado wleawuna kẹtẹkẹtẹ de na ẹn na e nido sọgan yawu yì plá yẹwhegán Jiwheyẹwhe tọn lọ. To ojlẹ vude godo, e mọ yẹwhegán lọ to gbigbọjẹ to atin daho de sá bọ e dọna ẹn dọmọ: “Wá whégbè po yẹn po, bo dù akla.” Whenuena omẹ Jiwheyẹwhe nugbo lọ tọn gbẹ́ oylọ enẹ, dawe yọnhonọ lọ gblọn dọmọ: “Yẹn ga yẹwhegán de yẹn yin dile hiẹ yin; angẹli de wẹ sọ dọho hlan mi gbọn ohó OKLUNỌ tọn dali, dọmọ, Hẹn ẹn gọ̀ po hiẹ po biọ owhé towe gbè, na e nido dù akla bosọ nùsin.” Ṣigba Owe-wiwe dọ dọ: “Lalodo e te hlan ẹn.”—1 Ahọ. 13:11-18.
9. Etẹwẹ Owe-wiwe dọ gando mẹklọtọ lẹ go, podọ mẹnu lẹ wẹ yé nọ gbleawuna?
9 Mahopọnna mẹwhinwhàn depope he yẹwhegán mẹho lọ sọgan ko tindo, e dolalo. Vlavo dawe yọnhonọ lọ sọgan ko yin yẹwhegán nugbonọ Jehovah tọn de to ojlẹ de mẹ wayi. Ṣigba todin, e yinuwa to aliho mẹkiklọ tọn mẹ. Owe-wiwe gblewhẹdo nuyiwa mọnkọtọn sinsinyẹn. (Hia Howhinwhẹn lẹ 6:16, 17.) Gbọnvona dọ mẹklọtọ lẹ nọ gbleawuna yedelẹ to gbigbọ-liho, yé sọ nọ gbleawuna mẹdevo lẹ.
“Ewọ Gọyìgodo” Hodo Dawe Yọnhonọ Lọ
10. Nawẹ yẹwhegán Jiwheyẹwhe tọn lọ yinuwa hlan oylọ dawe yọnhonọ lọ tọn gbọn, podọ etẹwẹ yin kọdetọn lọ?
10 Yẹwhegán he wá sọn Juda lọ dona ko penugo nado yọnẹn dọ kiklọ ẹ wẹ yẹwhegán mẹho lọ te. E dona ko kanse ede dọ, ‘Naegbọn Jehovah na do angẹli de hlan mẹdevo nado hẹn anademẹ devo lẹ wá na mi?’ Yẹwhegán lọ sọgan ko biọ to Jehovah si nado deanana ẹn, ṣigba Owe-wiwe ma dohia dọ e wàmọ gba. Kakatimọ, “ewọ gọyìgodo po [yẹwhegán mẹho lọ] po, bo dù akla to owhé etọn gbè, bosọ nùsin.” Ehe ma hẹn homẹhun Jehovah. Whenuena yẹwhegán he yin kiklọ lọ wá lẹkọ jei Juda to godo mẹ, kinnikinni de pé e bo hù i. Lehe azọ́ndenamẹ yẹwhegán tọn etọn wá vivọnu to aliho he blawu de mẹ do sọ!—1 Ahọ. 13:19-25.a
11. Apajlẹ dagbe tẹwẹ Ahija zedai?
11 To alọ devo mẹ, yẹwhegán Ahija he yin didohlan nado de Jeloboami taidi ahọlu, hẹn nugbonọ-yinyin etọn go kaka biọ yọnhowhe mẹ. Whenuena Ahija ko poyọnho bo masọ to numọ ba, Jeloboami do asi etọn hlan Ahija nado yọnẹn eyin visunnu yetọn he to azọ̀njẹ na jẹgangan. Po adọgbigbo po, Ahija dọ dọdai dọ visunnu Jeloboami tọn na kú. (1 Ahọ. 14:1-18) Dopo to dona he Ahija mọyi lẹ mẹ wẹ yindọ delẹ to nuhe e kàn lẹ mẹ wá sọawuhia to Ohó gbọdo Jiwheyẹwhe tọn mẹ. Gbọnna? Kandai etọn lẹ wá yin yiyizan gbọn Ẹzla yẹwhenọ lọ dali taidi asisa nudọnamẹ tọn.—2 Otan. 9:29.
12-14. (a) Etẹwẹ mí sọgan plọn sọn nuhe jọ do yẹwhegán pẹvi lọ go mẹ? (b) Na apajlẹ de he dohia dọ nujọnu wẹ e yin nado nọ yí sọwhiwhe do lẹnnupọndo ayinamẹ Biblu tọn he mẹho lẹ na lẹ ji to odẹ̀ mẹ?
12 Biblu ma dọ nuhewutu yẹwhegán pẹvi lọ ma kàn anademẹ biọ Jehovah whẹpo do lẹkọ hodo dawe yọnhonọ lọ bo dù bosọ nù gba. Be e sọgan yindọ nuhe e to jijlo nado sè wẹ dawe yọnhonọ lọ dọna ẹn ya? Etẹwẹ mí sọgan plọn sọn ehe mẹ? Mí dona kudeji mlẹnmlẹn dọ nubiọtomẹsi Jehovah tọn lẹ sọgbe. Podọ mí dona magbe nado jẹ yé kọ̀n, mahopọnna nudepope he sọgan jọ.
13 Eyin mẹdelẹ wá biọ ayinamẹ, nuhe yé to jijlo na sè wẹ yé nọ sè. Di apajlẹ, agbasazọ́n de sọgan yin zizedonukọnna wẹnlatọ de, ehe na hò whenu he e jẹ dọ e ni yizan hẹ whẹndo etọn podọ to nuwiwa yẹwhehọluduta tọn lẹ mẹ yí sọn e si. E sọgan biọ ayinamẹ to mẹho de si. Whẹpo mẹho lọ nado jẹ ayinamẹ na ẹn ji, e sọgan dọna ẹn dọ emi ma tin to otẹn dagbe mẹ nado dọ lehe e na penukundo whẹndo etọn go do na ẹn gba. Enẹgodo, mẹho lọ sọgan lẹnnupọndo owù he alọkikẹyi agbasazọ́n enẹ sọgan hẹnwa to gbigbọ-liho lẹ ji hẹ mẹmẹsunnu lọ. Be ohó he mẹho lọ dọ whẹpo do jẹ ayinamẹ na ji lọ kẹdẹ wẹ mẹmẹsunnu lọ na flin ya, kavi e na lẹnnupọndo nuhe bọdego lẹ ji ganji? Matin ayihaawe, mẹmẹsunnu lọ dona magbe nuhe na wà dagbe na ẹn hugan to gbigbọ-liho tọn.
14 Sọ lẹnnupọndo ninọmẹ devo ji. Mẹmẹyọnnu de sọgan kanse mẹho agun tọn de eyin ewọ dona klan sọn asu mayisenọ etọn dè. Matin ayihaawe, mẹho lọ na basi zẹẹmẹ na ẹn dọ nudide etọn wẹ nado klan kavi lala. Enẹgodo, e sọgan gbadopọnna ayinamẹ he Biblu na do whẹho ehe ji lẹ hẹ ẹ. (1 Kọl. 7:10-16) Be mẹmẹyọnnu lọ na na ayidonugo sọwhiwhe tọn nuhe mẹho lọ dọ ya? Kavi be e ko magbe to ayiha etọn mẹ nado jo asu etọn do wẹ ya? Nuyọnẹnnu wẹ e na yin dọ e ni lẹnnupọndo ayinamẹ Biblu tọn lẹ ji to odẹ̀ mẹ whẹpo do basi nudide.
Yin Jlẹkajinọ
15. Etẹwẹ mí plọn sọn nuṣiwa yẹwhegán Jiwheyẹwhe tọn lọ tọn mẹ?
15 Onú devo tẹwẹ mí sọgan sọ plọn sọn nuṣiwa yẹwhegán he wá sọn Juda lọ tọn mẹ? Howhinwhẹn lẹ 3:5 dọmọ: “Yí ayiha towe do dotudo OKLUNỌ go; a dẹ́ hlan dewe tọn dali blo.” Kakati nado ganjẹ Jehovah go dile e ko nọ wà do dai, yẹwhegán he wá sọn Juda lọ dejido nuyọnẹn etọn titi go to nujijọ ehe mẹ. E hẹn ogbẹ̀ etọn po oyín dagbe he e tindo hẹ Jiwheyẹwhe po bu na nuṣiwa ehe wutu. Lehe numimọ etọn hẹn ẹn họnwun gblegede dọ nujọnu wẹ e yin nado nọ yí jlẹkajininọ po nugbonọ-yinyin po do wà sinsẹ̀nzọn na Jehovah do sọ!
16, 17. Etẹwẹ na gọalọna mí nado gbọṣi nugbonọ-yinyin mẹ na Jehovah?
16 Ayilinlẹn ṣejannabi ahun mítọn tọn nọ saba hẹn mí buali. “Ayiha yin oklenọ hugan onú lẹpo, podọ e sọ yin awutunọ tupinpẹnnọ.” (Jẹl. 17:9) Eyin mí na gbọṣi nugbonọ-yinyin mẹ na Jehovah, mí dona to vivẹnudo zọnmii nado klọ́n gbẹtọ-yinyin hoho lọ sẹ̀ gọna ayilinlẹn sakla po jidedo mẹdetiti go tọn etọn po. Podọ mí dona ze gbẹtọ-yinyin yọyọ lọ dogo, “mẹhe yè dá to dodo mẹ di apajlẹ Jiwheyẹwhe tọn, podọ to jijọ wiwe nugbo tọn” kavi nugbonọ-yinyin mẹ.—Hia Efesunu lẹ 4:22-24.
17 “Nuyọnẹn tin to whiwhẹnọ dè,” wẹ Howhinwhẹn lẹ 11:2 dọ. Eyin mí ganjẹ Jehovah go po whiwhẹ kavi jlẹkajininọ po, enẹ na gọalọna mí nado dapana nuṣiwa sinsinyẹn lẹ. Di apajlẹ, eyin mí gbọjọ, mí sọgan nọ wá tadona agọ̀ kọ̀n po awubibọ po. (Howh. 24:10) Adà sinsẹ̀nzọn wiwe lọ tọn delẹ sọgan nọ do apọ̀ na mí bọ mí na jẹ mimọ ji dọ nuhe mí ko wà to owhe lẹ gblamẹ lọsu masọ whè, bo na lẹndọ vlavo ojlẹ lọ die nado jotẹnna mẹdevo lẹ. Kavi mí sọgan jlo nado zan nuhe mẹsusu nọ pọnhlan taidi gbẹzan he voawu. Ṣigba eyin mí nọ “sinyẹnlin” bo “nọ to susudeji to azọ́n Oklunọ tọn mẹ whepoponu,” enẹ na whlá ahun mítọn.—Luku 13:24; 1 Kọl. 15:58.
18. Etẹwẹ mí sọgan wà eyin mí ma yọ́n nudide he mí na basi?
18 To whedelẹnu, e sọgan biọ dọ mí ni basi nudide he vẹawu lẹ, bọ mí ma na yọ́n nuhe e jẹ dọ mí ni wà taun. Be mí na de nado didẹ whẹho lọ na míde wẹ ya? Nuyọnẹnnu wẹ e na yin nado nọ biọ alọgọ Jehovah tọn to whedepopenu he mí mọ míde to ninọmẹ mọnkọtọn mẹ. Jakobu 1:5 dọmọ: “Eyin mẹde ma tindo nuyọnẹn to mì mẹ, ni kanbiọ to Jiwheyẹwhe dè, mẹhe nọ namẹ susugege.” Otọ́ mítọn olọn mẹ tọn na na mí gbigbọ wiwe he mí tindo nuhudo etọn na mí nido sọgan basi nudide dagbe lẹ.—Hia Luku 11:9, 13.
Magbe Nado Hẹn Nugbonọ-Yinyin Towe Go
19, 20. Etẹwẹ mí dona magbe nado wà?
19 To whenue Sọlọmọni zẹ̀ali sọn sinsẹ̀n-bibasi nugbo mẹ, ojlẹ hunyanhunyan tọn he bọdego lẹ ze nugbonọ-yinyin devizọnwatọ Jiwheyẹwhe tọn lẹ tọn do whlepọn sinsinyẹn mẹ. Nugbo wẹ dọ mẹsusu jogbe to aliho de kavi devo mẹ. Etomọṣo, mẹdelẹ hẹn nugbonọ-yinyin yetọn na Jehovah go.
20 Egbesọegbesọ wẹ mí nọ pannukọn nudide he nọ whle nugbonọ-yinyin mítọn pọ́n lẹ. Mílọsu sọgan dohia dọ mí yin nugbonọ. Mì gbọ mí ni hẹn nugbonọ-yinyin mítọn na Jehovah go dile mí to sinsẹ̀n ẹn po ahun dopo po, bo deji mlẹnmlẹn dọ ewọ na zindonukọn nado nọ dona nugbonọ etọn lẹ.—2 Sam. 22:26, NW.
[Nudọnamẹ odò tọn]
a Biblu ma dọna mí eyin Jehovah hẹn okú wá yẹwhegán yọnhonọ lọ ji kavi lala.
Nawẹ Hiẹ Na Na Gblọndo Gbọn?
• Naegbọn mí dona dovivẹnu nado de ojlo agbasanu lẹ bibẹpli tọn sẹ̀ sọn ahun mítọn mẹ mlẹnmlẹn?
• Etẹwẹ na gọalọna mí nado hẹn nugbonọ-yinyin mítọn na Jehovah go?
• Nawẹ jlẹkajininọ sọgan gọalọna mí nado gbọṣi nugbonọ-yinyin mẹ na Jiwheyẹwhe gbọn?
[Yẹdide to weda 9]
Be e nọ vẹawuna we nado duto mẹtẹnpọn lẹ ji wẹ ya?
[Yẹdide to weda 10]
Be hiẹ na lẹnnupọndo ayinamẹ Biblu tọn lẹ ji to odẹ̀ mẹ ya?