Nuhewutu Whẹho Edẹni Tọn Do Gando Gowe

WEYỌNẸNTỌ delẹ dọ dọ adà Biblu tọn he pò lẹ ma nọgodona kandai he gando Edẹni go lọ, podọ ehe yin dopo to linlẹn agọjẹdonu tọn he paṣamẹ hugan lẹ mẹ. Di apajlẹ, Mẹplọntọ Paul Morris he nọ basi dodinnanu do sinsẹ̀n ji wlan dọmọ: “Adà Biblu tọn he bọdego lẹ masọ wá dọ nudepope gando otàn Edẹni mẹ tọn go tlọlọ ba.” Linlẹn etọn sọgan ko sọgbe to nukun mẹsusu devo he ylọ yede dọ “weyọnẹntọ lẹ” tọn mẹ, ṣigba e gbọnvo pete na nuhe kunnudenu lẹ dohia.

Na nugbo tọn, Biblu donù jipa Edẹni tọn, Adam, Evi po odàn lọ po go to fisusu devo lẹ.a Ṣigba, nuṣiwa weyọnẹntọ vude ehelẹ tọn ma tlẹ yin nude yijlẹdo nuṣiwa daho hugan de he mẹ mẹsusu devo lẹ jai jẹ go. Omẹ ehelẹ wẹ sinsẹ̀ngán po homọdọdo Biblu go tọ́ lẹ po he jẹagọdo kandai Jenẹsisi tọn lẹ bo gbọnmọ dali gbẹ́ Biblu blebu dai. Naegbọn mí do dọ mọ?

Nujọnu taun wẹ e yin dọ yè ni mọnukunnujẹ nujijọ he wá aimẹ to Edẹni mẹ lẹ mẹ nado sọgan mọnukunnujẹ adà Biblu tọn he pò lẹ mẹ. Di apajlẹ, Ohó Jiwheyẹwhe tọn yin awuwlena nado gọalọna mí nado nọ mọ gblọndo na kanbiọ titengbe he siso taun he gbẹtọvi lẹ nọ kanse lẹ. Whlasusu wẹ gblọndo he Biblu na lẹ nọ dlẹnalọdo nujijọ he wá aimẹ to jipa Edẹni tọn mẹ lẹ. Mì gbọ mí ni gbadopọnna apajlẹ delẹ.

● Naegbọn mí nọ poyọnho bo nọ kú? Ojlo Jehovah tọn wẹ yindọ Adam po Evi po ni nọgbẹ̀ kakadoi eyin yé zindonukọn nado to taliaina ẹn. Eyin yé ṣiatẹ kẹdẹ janwẹ yé na kú. To azán he gbè yé ṣiatẹ te wẹ yé jẹ kúkú ji. (Jenẹsisi 2:16, 17; 3:19) Yé masọ yin mẹpipe lẹ ba, podọ ogú he kúnkan yetọn lẹ sọgan dù sọn yé dè ma hugan ylando po mape po. Enẹwutu, Biblu basi zẹẹmẹ dọmọ: “Ylando gbọn mẹdopo gblamẹ biọ aihọn mẹ podọ okú gbọn ylando gblamẹ wá, gbọnmọ dali okú dlẹnkan jẹ mẹlẹpo dè, na yemẹpo wẹ ko waylando wutu.”—Lomunu lẹ 5:12.

● Naegbọn Jiwheyẹwhe dike bọ ylanwiwa tin? To jipa Edẹni tọn mẹ, Satani ylọ Jiwheyẹwhe dọ lalonọ de he nọ tẹ̀ nuhe yin dagbe lẹ nudida etọn lẹ. (Jenẹsisi 3:3-5) Gbọnmọ dali, e fọ́n ayihaawe dote gando jlọjẹ Jehovah tọn nado dugán po aliho he mẹ Ewọ nọ wàmọ te po go. Adam po Evi po basi dide nado hodo Satani; enẹwutu taidi ewọ, yelọsu gbẹ́ nupojipetọ-yinyin Jehovah tọn dai, bo gbọnmọ dali kẹalọyi dọ gbẹtọvi sọgan basi nudide na ede gando nuhe yin dagbe po nuhe yin oylan po go. Na Jehovah nọ dawhẹ dodo bosọ tindo nuyọnẹn to aliho pipé mẹ wutu, e yọnẹn dọ aliho dopo gee wẹ tin nado didẹ avùnnukundiọsọmẹ ehe dile e jẹ do—enẹ wẹ nado dike whenu ni juwayi, bosọ na dotẹnmẹ gbẹtọvi lẹ nado dugán do yede ji kẹdẹdile yé jlo do. Taidi kọdetọn de, ylanwiwa wá gbayipe, titengbe na Satani zindonukọn nado to nuyiwa do aihọn lọ ji wutu, bọ gbọnmọ dali, vudevude, nugbo tangan ehe wá họnwun dọ: Gbẹtọ ma do nugopipe nado deanana ede matin alọgọ Jiwheyẹwhe tọn.—Jelemia 10:23.

● Etẹwẹ yin lẹndai Jiwheyẹwhe tọn na aigba? Jehovah wleawuna jipa Edẹni tọn bọ e yọnwhanpẹ, na mọ wẹ e jlo dọ aigba lọ blebu ni wá nọ. E deazọ́nna Adam po Evi po dọ yé ni ji ovi lẹ nado hẹn aigba lọ gọ́ bosọ “dugán do e ji,” bọ gbọnmọ dali aigba lọ pete na yọ́npọ́n bosọ gọ́ na jijọho kẹdẹdile e te do to Edẹni. (Jenẹsisi 1:28) Enẹwutu, lẹndai Jiwheyẹwhe tọn na aigba wẹ yindọ ni lẹzun paladisi de, fie whẹndo gbẹtọvi pipé tọn he bẹ kúnkan Adam po Evi po tọn lẹ hẹn na nọ to pọninọ mẹ. Suhugan adà Biblu tọn lẹ tọn wẹ dọhodo aliho he mẹ Jiwheyẹwhe na hẹn lẹndai dowhenu tọn etọn enẹ di te ji.

● Naegbọn Jesu Klisti do wá aigba ji? Atẹṣiṣi he fọ́n to jipa Edẹni tọn mẹ lọ zọ́n bọ kú-whẹ̀ yin didá na Adam po Evi po, gọna kúnkan yetọn lẹpo, ṣigba Jiwheyẹwhe gbọn owanyi dali hùnali todido tọn na yé. E do Visunnu etọn hlan aigba ji nado wleawu nude tọn, ehe Biblu ylọdọ ofligọ. (Matiu 20:28) Etẹwẹ enẹ zẹẹmẹdo? To linlẹn de mẹ, Jesu wẹ “Adam godo tọn” lọ; na e penugo bo wà nuhe Adam uwọ gboawupo nado wà. Jesu hẹn ogbẹ̀ gbẹtọvi pipé tọn etọn go gbọn tonusisena Jehovah dali. Enẹgodo, e desọn ojlo mẹ bo ze ogbẹ̀ ede tọn jo taidi avọ́sinsan kavi ofligọ de, ehe gblamẹ gbẹtọvi nugbonọ lẹpo sọgan mọ jona ylando yetọn lẹ tọn yí te bosọ penugo to nukọn mẹ nado wá mọ ogbẹ̀ he nkọ Adam po Evi po duvivi etọn to Edẹni mẹ jẹnukọnna ylando yetọn. (1 Kọlintinu lẹ 15:22, 45; Johanu 3:16) Gbọnmọ dali, Jesu hẹn gbẹtọvi lẹ kudeji dọ lẹndai Jehovah tọn nado diọ aigba zun paladisi Edẹni mẹ tọn nkọ de ma na gblá pọ́n.b

Lẹndai Jiwheyẹwhe tọn ma yin nùmẹ yozò de poun, kavi nuyise sinsẹ̀n tọn he ma do dodonu de gba. E na mọ hẹndi dandan. Kẹdẹdile jipa Edẹni tọn ko yin nọtẹn nujọnu tọn de to aigba ji pọ́n, bọ kanlin po gbẹtọ lẹ po ko nọ e ji pọ́n do, mọ wẹ opagbe Jiwheyẹwhe tọn gando sọgodo go yin nujọnu tọn, bo na mọ hẹndi nugbonugbo to madẹnmẹ do niyẹn. Be a na duvivi sọgodo mọnkọ de tọn nugbonugbo ya? Mẹde ma gán na gblọndo kanbiọ enẹ tọn do otẹn towe mẹ. Amọ́, Jiwheyẹwhe jlo dọ gbẹtọvi susu dile e yọnbasi do ni duvivi sọgodo enẹ tọn, etlẹ yin mẹhe gbẹzan yetọn masọ do lẹndai de ba lẹ.—1 Timoti 2:3, 4.

To whenue Jesu to kudonu, e dọhona dawe de he yọnẹn dọ ogbẹ̀ emitọn masọ do lẹndai de ba. Sẹ́nhẹngbatọ de wẹ dawe lọ; e sọ họnwun na ẹn dọ okú wẹ emi jẹna. Ṣigba, e dọhona Jesu nado mọ homẹmimiọn po todido po yí. Nawẹ Jesu yinuwa hẹ ẹ gbọn? E gblọnna ẹn dọmọ: “Hiẹ na tin hẹ mi to Paladisi mẹ.” (Luku 23:43) Eyin Jesu tindo ojlo nado gọ̀ dawe he yin sẹ́nhẹngbatọ dai enẹ mọ—whenue dawe ehe na yin finfọnsọnku bọ dotẹnmẹ na hundote na ẹn nado nọgbẹ̀ kakadoi to paladisi Edẹni tọn nkọ de mẹ—be a ma lẹndọ nudopolọ wẹ e to jijlo na hiẹ lọsu ya? Ayihaawe ma tin dọ mọ wẹ! Podọ ojlo Otọ́ etọn tọn niyẹn ga! Eyin a jlo na yí nukun towe lẹ do mọ sọgodo enẹ nugbo, wà nuhe go a pé lẹpo nado plọnnu gando Jiwheyewhe he do jipa Edẹni tọn ai lọ go.

[Nudọnamẹ odò tọn]

[Apotin/​Yẹdide]

DỌDAI DE HE BLÁ OWẸ̀N BIBLU TỌN BLEBU DOPỌ

“Yẹn nasọ yí okẹ̀n do hiẹ po yọnnu lọ po ṣẹnsẹn podọ do kúnkan towe po kúnkan etọn po ṣẹnṣẹn. Ewọ na só ota towe podọ hiẹ na hẹ̀nadu afọgbẹn etọn.”—Jenẹsisi 3:15.

Ehe wẹ yin dọdai tintan to Biblu mẹ, he yin didọ gbọn Jiwheyẹwhe dali to Edẹni mẹ. Mẹnu wẹ omẹ ẹnẹ he go e gando lẹ nọtena: yọnnu lọ, kúnkan etọn, odàn lọ, podọ kúnkan etọn? Nawẹ “okẹ̀n” he dọdai etọn yin didọ lọ wá aimẹ gbọn?

ODÀN LỌ

Satani Lẹgba.—Osọhia 12:9.

YỌNNU LỌ

Titobasinanu olọn mẹ tọn Jehovah tọn he bẹ nudida gbigbọnọ lẹ hẹn. (Galatianu lẹ 4:26, 27) Isaia dọ dọdai gando “yọnnu” lọ go dọ e na ji akọta gbigbọmẹ tọn de to sọgodo.—Isaia 54:1; 66:8.

KÚNKAN ODÀN LỌ TỌN

Mẹhe basi dide nado nọ wà ojlo Satani tọn lẹ.—Johanu 8:44.

KÚNKAN YỌNNU LỌ TỌN

Omẹ tintan he e bẹhẹn wẹ Jesu Klisti, he wá sọn adà olọn mẹ tọn titobasinanu Jehovah tọn mẹ. “Kúnkan” ehe sọ bẹ mẹmẹsunnu Klisti tọn lẹ hẹn, he na dugán hẹ ẹ to olọn mẹ. Pipli Klistiani yiamisisadode enẹlẹ tọn wleawuna akọta gbigbọmẹ tọn de, yèdọ “Islaeli Jiwheyẹwhe tọn.”—Galatianu lẹ 3:16, 29; 6:16; Jenẹsisi 22:18.

AFỌGBẸN HE YÈ HẸ̀NADU LỌ

Awufiẹsa sinsinyẹn he Mẹsia lọ jiya etọn wẹ, amọ́ ehe ma hẹn awugble tẹgbẹ tọn wá gba. Satani tẹnpọn bọ Jesu yin hùhù to aigba ji. Podọ Jesu wá yin finfọnsọnku.

OTA HE YIN SISÓ LỌ

Awugble sinsinyẹn de he hẹn okú wá na Satani. Jesu na và Satani sudo mlẹnmlẹn. Etlẹ yin jẹnukọnna enẹ, Jesu na vọ́ nuylankan he Satani hẹnwa bẹsọn Edẹni mẹ lẹ jlado.—1 Johanu 3:8; Osọhia 20:10.

Nado mọ bladopọ owẹ̀n tangan he Biblu bẹhẹn tọn de, pọ́n alọnuwe lọ La Bible: Quel est son message? (Biblu—Owẹ̀n Tẹwẹ E Bẹhẹn?) he Kunnudetọ Jehovah tọn lẹ zinjẹgbonu.

[Yẹdide]

Adam po Evi po waylando bosọ jiya kọdetọn vẹadi he enẹ hẹnwa lẹ tọn