Natani—Yiavùnlọna Sinsẹ̀n-Bibasi Wiwe-Ṣeke
E ma nọ bọawu nado dohia mẹhe tin to otẹn aṣẹpipa tọn mẹ dọ nuhe e wà ma sọgbe podọ e dona basi diọdo. Be hiẹ na yí adọgbigbo do dọ nugbo na omẹ mọnkọtọn eyin a yọnẹn dọ e ko hù dawe de nado sọgan ṣinyọnnudo nuṣiwa etọn ya?
Ahọlu Davidi Islaeli hohowhenu tọn deayọ hẹ Bati-ṣeba bọ e mọhò. Nado whlá ylando yetọn, Davidi hù asu Bati-ṣeba tọn bosọ plan Bati-ṣeba taidi asi. Na osun susu lẹ, Davidi to gbẹzan awe zan, podọ matin ayihaawe, e gbẹ́ to azọngban ahọlu tọn etọn hẹndi. Ṣigba, Jehovah ma yí nukunpẹvi do pọ́n ylando ahọlu lọ tọn lẹ gba. E do yẹwhegán etọn Natani hlan nado yì dọhona Davidi.
Azọ́ndenamẹ sinsinyẹn de wẹ ehe yin. Ze dewe do otẹn Natani tọn mẹ. Matin ayihaawe, nugbonọ-yinyin na Jehovah po nujinọtedo etọn lẹ go titẹdo po whàn Natani nado flin Davidi ylando etọn lẹ. Nawẹ yẹwhegán lọ sọgan wà ehe bo gọalọna Ahọlu Davidi nado yọnẹn dọ ewọ tindo nuhudo lẹnvọjọ tọn gbọn?
E PLỌNMẸ PO ZINZIN PO
Jaale, hia 2 Samuẹli 12:1-25. Mí ni dọ dọ hiẹ wẹ to otẹn Natani tọn mẹ bo to nujijọ ehe dọna Davidi dọmọ: “Omẹ awe de ko tin to tòdaho dopo mẹ; ode adọkunnọ, awetọ wamọnọ. Omẹ adọkunnọ lọ sọ tindo lẹngbọpa susu po oyìnpá lẹ po: ṣigba omẹ wamọnọ lọ ma tindo nude, adavo lẹngbọvu asi pẹvi dopo, he ewọ họ̀ bo to yìnyìn: e sọ whẹ́n dopọ po e po, podọ hẹ ovi etọn lẹ, nùdo etọn lọsu mẹ wẹ e nọ dù sọn, bo nọ nù sọn kọfo etọn lọsu mẹ, bo nọ mlọn akọ́n etọn mẹ, bosọ tin hlan ẹn di viyọnnu de. Gbejizọnlinnọ de sọ wá omẹ adọkunnọ lọ dè, ewọ sọ wàgoe nado desọn lẹngbọpa etọn titi mẹ podọ sọn oyìnpá etọn titi mẹ, nado wleyẹyina omẹ gbejizọnlinnọ he yè hẹn wá e dè, ṣigba yí lẹngbọvu omẹ wamọnọ lọ tọn, bo sọ̀ ẹ na omẹ he wá e de lọ.”—2 Sam. 12:1-4.
Na lẹngbọhọtọ de wẹ Davidi lọsu yin dai wutu, e mọdọ whẹho lọ na ko yì domọ nugbo. Zẹẹmẹ-basitọ de dọmọ: “Vlavo, Natani ko nọ saba yì e dè nado dọho do ota mẹhe jiya mawadodo tọn bo ma sọgan mọ whẹdida yí to aliho depope mẹ lẹ tọn mẹ, podọ Davidi lẹndọ whẹho mọnkọtọn de wẹ e hẹnwa todin.” Eyin whẹho lọ tlẹ yinmọ, e biọ nugbonọ-yinyin na Jiwheyẹwhe po adọgbigbo po to Natani si nado dọhona ahọlu lọ dile e wà do. Whẹho he ji Natani dọhodo lọ doadi na Davidi sọmọ bọ e dọmọ: “Le [Jehovah] to ogbẹ̀, omẹ he wà ehe tin jẹ nado kú.” Enẹgodo, Natani dọ wẹndomẹ sinsinyẹn lọ na ẹn dọmọ: “Hiẹ wẹ dawe lọ.”—2 Sam. 12:5-7.
Lẹnnupọndo nuhewutu Natani do ze whẹho lọ donukọnna ẹn to aliho enẹ mẹ ji. E ma nọ bọawuna mẹhe gblehomẹ do mẹdevo go de nado lẹnnupọndo ninọmẹ ede tọn ji ganji. Mímẹpo wẹ nọ dín whẹjijọ eyin yè kanhose mí gando nuṣiwa mítọn lẹ go. Ṣigba apajlẹ he Natani yizan whàn Davidi nado gblewhẹdo nuṣiwa etọn titi lẹ to mayọnẹn mẹ. Ahọlu lọ mọ hezeheze dọ nuyiwa he go Natani dọho gando lọ ylan taun. To whenue Davidi lọsu ko gblewhẹdo nuyiwa lọ godo wẹ Natani dohia dọ ahọlu lọ go wẹ apajlẹ lọ gando. Todin, Davidi sọgan mọ obá he mẹ ylando etọn sinyẹn jẹ. Ehe gọalọna ẹn nado tindo ninọmẹ ahun mẹ tọn he sọgbe nado kẹalọyi wọhẹ. E yigbe dọ na nugbo tọn, emi ko “vlẹ” Jehovah gbọn nuyiwa emitọn hẹ Bati-ṣeba dali, podọ e kẹalọyi wọhẹ he ewọ jẹna lọ.—2 Sam. 12:9-14; Ps. 51, nukinkan aga tọn.
Etẹwẹ mí sọgan plọn sọn ehe mẹ? Yanwle Biblu plọnmẹtọ de tọn wẹ nado gọalọna todoaitọ etọn nado lẹnnupọn bo wá tadona he sọgbe lọ kọ̀n. Na Natani na sisi Davidi wutu, e yí zinzin do dọhona ẹn. Natani yọnẹn dọ Davidi yiwanna dodowiwa po whẹdida dodo po. Enẹwutu, yẹwhegán lọ yí apajlẹ he na yinuwado mẹhe tindo jẹhẹnu enẹlẹ ji zan. Mílọsu sọgan gọalọna ahunjijlọnọ lẹ nado mọnukunnujẹ pọndohlan Jehovah tọn mẹ. Gbọnna? Mí na wà ehe eyin mí nọ gọalọna yé nado yí nugopipe yetọn nado yọ́n nuhe sọgbe zan bo wàmọ to aliho de mẹ bọ yé ma na lẹndọ mí to dodonọ jla kavi dọ mí tindo jlọjẹ nado dọ nuhe yé dona wà na yé. Biblu wẹ nọ gọalọna mí nado yọ́n nuhe sọgbe po nuhe ma sọgbe po, e ma yin linlẹn mítọn titi gba.
Na taun tọn, nugbonọ-yinyin na Jiwheyẹwhe wẹ hẹn Natani penugo nado gblewhẹdo ahọlu huhlọnnọ lọ. (2 Sam. 12:1) Mọdopolọ, nugbonọ-yinyin na hẹn mí tindo adọgbigbo nado yiavùnlọna nujinọtedo dodo tọn Jehovah tọn lẹ.
E ZE SINSẸ̀N-BIBASI WIWE-ṢEKE DAGA
E taidi dọ họntọn vivẹ́ wẹ Davidi po Natani po yin, na Davidi do yinkọ lọ Natani na dopo to visunnu etọn lẹ mẹ. (1 Otan. 3:1, 5) Whla tintan he yinkọ Natani tọn sọawuhia to kandai Biblu tọn mẹ, ewọ tin topọ hẹ Davidi. Yé omẹ awe lẹpo wẹ yiwanna Jehovah. E họnwun dọ ahọlu lọ nọ deji do pọndohlan Natani tọn go, na e dọ ojlo etọn nado gbá tẹmpli de na Jehovah na yẹwhegán lọ to ojlẹ de mẹ wayi. Davidi dọmọ: “Pọ́n dinvie, yẹn tin to ohọ̀ kedali tọn de mẹ, ṣigba aki Jiwheyẹwhe tọn tin to avọ̀họ̀ lẹ homẹ. Natani sọ dọhlan ahọlu dọ, Yì, wà nuhe tin to ayiha towe mẹ lẹpo; na OKLUNỌ tin to dè we.”—2 Sam. 7:2, 3.
Taidi sinsẹ̀n-basitọ nugbonọ Jehovah tọn, Natani yí zohunhun do nọgodona tito he Davidi to bibasi nado gbá nọtẹn sinsẹ̀n-bibasi wiwe-ṣeke tọn tintan to aigba ji. Ṣigba, to nujijọ enẹ mẹ, e họnwun dọ Natani dọ linlẹn etọn lẹ, e ma yin Jehovah tọn lẹ gba. To ozán he bọdego mẹ, Jiwheyẹwhe dọna yẹwhegán lọ nado yì dowẹn devo ahọlu lọ dọ: Davidi ma na gbá tẹmpli Jehovah tọn. Dopo to ovi Davidi tọn lẹ mẹ wẹ na wàmọ. Humọ, Natani dohia dọ Jiwheyẹwhe to alẹnu de basi hẹ Davidi todin bọ ofìn etọn na “lodo kakadoi.”—2 Sam. 7:4-16.
Pọndohlan Natani tọn gando tẹmpli lọ gbigbá go ma sọgbe hẹ ojlo Jiwheyẹwhe tọn. Ṣigba kakati nado hlunnudọ, yẹwhegán whiwhẹnọ ehe kẹalọyi lẹndai Jehovah tọn bo kọngbedopọ hẹ ẹ. Apajlẹ dagbe nankọ die nado hodo eyin Jiwheyẹwhe jla pọndohlan mítọn do gando nude go! Natani ma hẹn nukundagbe Jiwheyẹwhe tọn bu, na e gbẹ́ yin yiyizan to nukọn mẹ taidi yẹwhegán de. Na nugbo tọn, e taidi dọ Jehovah gbọdo Natani po Gadi numọtọ lọ po nado deanana Davidi na ewọ nido wleawuna hànsinọ 4 000 he na wà sinsẹ̀nzọn to tẹmpli mẹ lẹ.—1 Otan. 23:1-5; 2 Otan. 29:25.
E YIAVÙNLỌNA AHỌLU HE NA DUGÁN
Natani yọnẹn dọ Sọlomọni wẹ na jẹ otẹn Davidi he ko poyọnho lọ tọn mẹ taidi ahọlu. Enẹwutu, Natani yinuwa to niyaniya mẹ dile Adonija tẹnpọn nado hò ofìn lọ yí to whenue Davidi ko poyọnho. Natani sọ do zinzin po nugbonọ-yinyin po hia whladopo dogọ. Tintan whẹ́, e na tuli Bati-ṣeba nado yì flinnu Davidi gando opagbe etọn dọ ovi yetọn Sọlomọni wẹ na duahọlu go. Enẹgodo, Natani lọsu yì ahọlu dè nado kanse eyin Davidi wẹ de Adonija nado jẹ otẹn etọn mẹ. Na ahọlu yọnhonọ lọ mọ lehe ninọmẹ lọ sinyẹn do wutu, e degbena Natani po devizọnwatọ nugbonọ devo lẹ po nado yiamisisadode Sọlomọni bo lá ẹ di ahọlu. Tito Adonija tọn nado lẹzun ahọlu yin hinhẹngble.—1 Ahọ. 1:5-53.
WHENUHO-KANTỌ WHIWHẸNỌ DE
Mẹsusu wẹ kọngbedopọ dọ Natani po Gadi po wẹ kàn 1 Samuẹli weta 25 jẹ 31 po 2 Samuẹli po. E yin didọ gando kandai gbọdo he yin kinkan do owe enẹlẹ mẹ go dọmọ: “Dinvie owalọ Davidi ahọlu tọn lẹ tintan po godo tọn po, doayi e go, yè wlan yé to otàn Samuẹli numọtọ lọ tọn mẹ, podọ to otàn Natani yẹwhegán lọ tọn mẹ, podọ to otàn Gadi numọtọ lọ tọn mẹ.” (1 Otan. 29:29) Biblu sọ dọ dọ Natani wlanwe gando “owalọ Sọlomọni tọn lẹ” go. (2 Otan. 9:29) Ehe dohia dọ Natani na ko zindonukọn nado to sinsẹ̀n to họ̀nmẹ etlẹ yin to okú Davidi tọn godo.
Suhugan nuhe mí yọnẹn gando Natani go lẹ tọn sọgan ko yin kinkan gbọn yẹwhegán lọ lọsu dali. Etomọṣo, mí sọgan plọn nususu gando ewọ go sọn nuhe e ma wlan lẹ mẹ. E họnwun dọ whenuho-kantọ whiwhẹnọ de wẹ Natani yin. Ewọ ma tindo ojlo zogbe na yindidi. Wezẹhomẹ Biblu tọn de dọ dọ ewọ yin nùdego to Biblu mẹ, ṣigba nudepope ma yin didọ gando bẹjẹeji gbẹzan etọn tọn po whẹndo etọn po go. Mí ma yọ́n nudepope gando gbẹzan Natani tọn go.
NUGBONỌ-YINYIN NA JEHOVAH WHÀN ẸN
Onú vude he mí hia gando Natani go to Owe-wiwe lẹ mẹ dohia hezeheze dọ whiwhẹnọ de wẹ e yin bo nọgodona tito Jiwheyẹwhe tọn lẹ po zohunhun po. Jehovah Jiwheyẹwhe ze azọngban pinpẹn lẹ do alọmẹ na ẹn. Lẹnnupọndo jẹhẹnu Natani tọn lẹ ji taidi nugbonọ-yinyin na Jiwheyẹwhe po pinpẹn-nutọn-yinyọnẹn na nubiọtomẹsi Jiwheyẹwhe tọn lẹ po bosọ dovivẹnu vẹkuvẹku nado nọ do jẹhẹnu mọnkọtọn lẹ hia.
Vlavo hiẹ ma na yin yiylọ nado wọhẹ ahọlu he deayọ lẹ kavi hẹn tito he mẹde basi nado lẹzun ahọlu gble. Ṣigba, po alọgọ Jiwheyẹwhe tọn po, hiẹ sọgan yin nugbonọ na Jiwheyẹwhe podọ a sọgan yiavùnlọna nujinọtedo dodo tọn etọn lẹ. Hiẹ sọ sọgan yin adọgbotọ, ṣogan bo nọ plọnmẹ nugbo lọ po zinzin po bosọ nọ ze sinsẹ̀n-bibasi wiwe-ṣeke daga.
[Yẹdide to weda 25]
Dile Natani to avùnlọyina ahọlu he na dugán, e dọhona Bati-ṣeba po zinzin po