Be Hiẹ Flin Ya?

Be a duvivi zinjẹgbonu Atọ̀họ̀-Nuhihọ́ lọ Tọn agọe tọn lẹ hihia tọn ya? Pọ́n eyin a sọgan na gblọndo na kanbiọ he bọdego helẹ:

Linlẹn tẹ mẹ wẹ Sọlomọni sọgan yin apajlẹ avase tọn de na mí te?

Jiwheyẹwhe dona Ahọlu Sọlomọni bosọ yí i zan. Ṣigba to gandudu etọn whenu, Sọlomọni wá jẹ kọgbẹ́ ayinamẹ Jiwheyẹwhe tọn lẹ go ji. E wlealọ hẹ viyọnnu Falo tọn he yin kosi de, bẹ asi susu pli, bosọ dike yọnnu kosi lẹ ni dọ̀n ẹn vudevude biọ sinsẹ̀n-bibasi lalo mẹ. Mí dona họ́ míde ma nado jẹ awuwlena aṣa kavi ayilinlẹn he ma sọgbe lẹ ji vudevude. (Deut. 7:1-4; 17:17; 1 Ahọ. 11:4-8)—15/12, weda 10-12.

Etẹwẹ dohia dọ sọn owhe kanweko tintan wá ojlẹ mítọn mẹ, Klistiani yiamisisadode nujọnu tọn delẹ tin to aigba ji to ojlẹ lẹpo mẹ?

To apajlẹ Jesu tọn he gando “likun” po “ogbé ylankan lẹ” po go mẹ, “okún dagbe lọ” nọtena “ovi ahọluduta lọ tọn lẹ.” (Mat. 13:24-30, 38) Ogbé ylankan lọ lẹ na whẹ́n dopọ hẹ likun lọ lẹ kakajẹ jibẹwawhé whenu. Enẹwutu, dile etlẹ yindọ mí ma sọgan dọ mẹhe pipli likun lọ tọn bẹhẹn lẹ po nujikudo po, mí yọnẹn dọ delẹ to Klistiani yiamisisadode lẹ mẹ dona tin kakajẹ ojlẹ mítọn mẹ.—15/1, weda 7.

Nawẹ mí sọgan duto gbigbọ nuvẹun tọn ji gbọn?

Afọdide he sọgan gọalọna mí delẹ die: Vivẹnudido nado wleawuna owanyi po owanyi mẹmẹsunnu tọn po, gbẹdido hẹ omẹ Jiwheyẹwhe tọn lẹ, ojlo tintindo nado nọ wà dagbe podọ nado nọ “jaya hẹ mẹhe to ayajẹ lẹ.” (Lom. 12:15)—15/2, weda 16-17.

To whenue mí jlo na na ayinamẹ mẹde, nunọwhinnusẹ́n tẹlẹ wẹ mí dona hẹn do ayiha mẹ?

Mọnukunnujẹ ninọmẹ lọ mẹ ganji. Nọ yì agbọ́ji. Nọ whiwhẹ dewe bo nọ yí Biblu zan. Eyin e yọnbasi, nọ yí owe sinai do Biblu ji lẹ zan. Ma nọ basi nudide na mẹdevo lẹ blo.—15/3, weda 7-9.

Etẹ dọ wẹ Jesu te to whenue e na tuli hosetọ etọn lẹ nado basi kilomẹtlu awe? (Mat. 5:41)

To ojlẹ lọ mẹ, Lomunu he paṣẹ do Islaeli ji lẹ nọ yí huhlọn do hẹn gbẹtọ lẹ nado wazọ́n na yé. Enẹwutu, to whenue Jesu na tuli hosetọ etọn lẹ nado basi kilomẹtlu awe, nuhe dọ e te wẹ yindọ yé ma dona yí homẹgble do wà azọ́n he mẹhe tin to otẹn aṣẹpipa tọn mẹ lẹ gbọn jlọjẹ dali biọ to yé si lẹ.—1/4, weda 9.