Be Hiẹ Nọ Yí Wepa Godo Tọn Zan Ya?

To whenuena gbẹtọ lẹ yí linlinnamẹwe de, yé nọ saba pọ́n wepa tintan lọ ji enẹgodo nọ yawu lilẹ́ ẹ nado yìnnukunpọn nuhe wepa godo tọn bẹhẹn. Wepa godo tọn Atọ̀họ̀-Nuhihọ́ lọ Tọn gbonutọ lẹ tọn nọ bẹ kanbiọ po ayinamẹ ojlofọndotenamẹ tọn susu po hẹn, gọna weda he ji nudọnamẹ lọ lẹ sọgan yin mimọ te.

Mí sọgan yí adà ehe zan nado mọ ayinamẹ dagbe he mí na yí do fọ́n kanbiọ homẹbibiọ tọn dote lẹ. Eyin mí nọ wazọ́n to aigba-denamẹ de ji whẹwhẹ, mí sọgan nọ diọ nuzedonukọnnamẹ mítọn gbọn kanbiọ voovo lẹ yiyizan to osun lọ blebu mẹ dali. Eyin alọnu whétọ de tọn ján, nuzedonukọnnamẹ mítọn sọgan nọ glido gbọn dopo to kanbiọ he tin to wepa godo tọn ji lẹ didohia ẹ dali bo dọ dọ, “Eyin a jlo na yọ́n gblọndo lọ, n’sọgan jo linlinnamẹwe ehelẹ do na we bọ mí na wá dọhodo yé ji yinukọn dogọ to whenue a vò.” Wẹnlatọ delẹ sọgan jlo nado bẹ hodọdopọ jẹeji gbọn wepa godo tọn lọ didohia whétọ de dali bo biọ to e si nado de kanbiọ he e yiwanna de. Enẹgodo yé sọgan do fie gblọndo lọ tin te hia whétọ lọ bo hia wefọ he yé ko wleawuna jẹnukọn de na ẹn. Vlavo hiẹ sọgan lẹnnupọndo aliho devo he mẹ a sọgan yí wepa godo tọn Atọ̀họ̀-Nuhihọ́ lọ Tọn zan te nado fọnjlodotena gbẹtọ lẹ ji.