Kunnudide Tòhomẹ-Liho Ji Tọn
1. Etẹwẹ yin dopo to aliho he mẹ mí sọgan hodo apajlẹ Jesu tọn te lẹ mẹ?
1 To lizọnyizọn aigba ji tọn Jesu tọn whenu, e ma whleawu nado dọhona mẹhe e dukosọ hẹ to aliho ji po nọtẹn gbangba tọn devo lẹ po. (Luku 9:57-61; Joh. 4:7) E jlo dọ gbẹtọ susu lẹ ni sè dogbọn owẹ̀n titengbe etọn dali. To egbehe, kunnudide tòhomẹ-liho ji tọn yin aliho dagbe de nado gọalọna gbẹtọ lẹ na yé nido tindo nuyọnẹn Jiwheyẹwhe tọn. (Howh. 1:20) Mí na tindo kọdetọn dagbe dogọ eyin mí nọ ze afọdide tintan nado dọnsẹpọ gbẹtọ lẹ bosọ nọ yí wuntuntun zan.
2. Nawẹ mí sọgan ze afọdide tintan nado nọ dọnsẹpọ gbẹtọ lẹ to kunnudide tòhomẹ-liho ji tọn mẹ gbọn?
2 Nọ Ze Afọdide Tintan: To paa mẹ, e nọ yọ́n hugan nado dọnsẹpọ gbẹtọ lẹ kakati nado nọte kavi sinai do fidopo na yé nido sẹpọ mí whẹpo mí nado dọhona yé. Nọ konu yẹsẹ do mẹhe a dukosọ hẹ lẹ bo nọ dọnsẹpọ yé to aliho họntọnjihẹmẹ tọn de mẹ. Eyin wẹnlatọ susu wẹ to kunnude, e na yọ́n hugan nado dọnsẹpọ gbẹtọ lẹ do voovo. Humọ, hiẹ dona dovivẹnu nado doafọna jlodotọ lẹ. Eyin e yọnbasi to hodọdopọ lọ godo, yí zinzin do kàn lehe mì sọgan vọ́ mìde mọ do sè mẹlọ. Wẹnlatọ delẹ nọ dekunnu to tòhomẹ-liho dopolọ ji whẹwhẹ, ehe nọ hùn dotẹnmẹ dotena yé nado dọho hẹ omẹ dopolọ lẹ pludopludo bo fọ́n ojlo yetọn dote.
3. Nawẹ mí sọgan yí wuntuntun zan to kunnudide tòhomẹ-liho ji tọn mẹ gbọn?
3 Nọ Yí Wuntuntun Zan: Nọ yí zinzin zan nado yọ́n fie a na nọ nọte do to alihogbó ji po mẹhe a na dọnsẹpọ lẹ po. E ma yin dandan nado nọ dekunnuna mẹhe juwajei lẹpo. Nọ doayinugo. Di apajlẹ, eyin mẹlọ to whlẹndo ji, e na yọ́n hugan nado jo e do. Eyin a to kunnude to nusatẹn de nukọn, nọ yí zinzin zan ma nado hẹn homẹgble nusàtọ lọ. E nọ saba yọ́n hugan nado dekunnuna mẹhe tọ́n sọn nusatẹn jei de hugan nado dekunnuna mẹhe ṣẹṣẹ jlo na biọ nusatẹn lọ. Nọ dọnsẹpọ gbẹtọ lẹ to aliho de mẹ ma nado hẹn yé jọsi. Humọ, nọ yí wuntuntun zan to whenue a to owe lẹ zedonukọnnamẹ. Eyin mẹlọ ma tindo ojlo sọmọ, a sọgan ze alọnuwe pẹvi de donukọnna ẹn kakati nido yin linlinnamẹwe lẹ.
4. Naegbọn kunnudide tòhomẹ-liho ji tọn nọ hẹn ayajẹ po kọdetọn dagbe po wá?
4 Kunnudide tòhomẹ-liho ji tọn nọ hùn dotẹnmẹ dotena mí nado vúnvún okún nugbo lọ tọn susu lẹ to ojlẹ kleun de mẹ. (Yẹwh. 11:6) E yọnbasi dọ mẹhe mí ma tlẹ nọ penugo nado mọ to whégbè to lizọnyizọn whédegbè jẹ whédegbè tọn mítọn mẹ lẹ wẹ mí na nọ dukosọ hẹ. Naegbọn mí ma na basi tito nado nọ tindo mahẹ to kunnudide tòhomẹ-liho ji tọn mẹ, yèdọ adà sinsẹ̀nzọn lọ tọn de he nọ hẹn ayajẹ po kọdetọn dagbe po wá?