Be Hiẹ Sọgan Nọ Dekunnu to Whèjai lẹ Ya?
1. Sọgbe hẹ owe de, whetẹnu wẹ apọsteli Paulu nọ dọyẹwheho sọn whédegbè jẹ whédegbè?
1 Sọgbe hẹ owe lọ Daily Life in Bible Times, apọsteli Paulu nọ saba tindo mahẹ to lizọnyizọn whédegbè jẹ whédegbè tọn mẹ “bẹsọn ogàn 4 mẹ whèjai kakajẹ zánmẹ.” Mí ma yọnẹn eyin ojlẹ enẹ kẹdẹ mẹ wẹ Paulu nọ dekunnu te gba, ṣigba nuhe mí yọnẹn wẹ yindọ Paulu tindo ojlo nado “wà onú lẹpo na wẹndagbe lọ tọn wutu.” (1 Kọl. 9:19-23) Ehe sọgan ko biọ dọ ewọ ni vọ́ tito etọn lẹ jlado nado nọ wazọ́n sọn whédegbè jẹ whédegbè to whenue e sọgan mọ mẹsusu nado dọho hẹ.
2. Naegbọn whèjai lẹ do yin ojlẹ dagbe de nado tindo mahẹ to lizọnyizọn lọ mẹ?
2 To fisusu, wẹnlatọ lẹ nọ saba wazọ́n sọn whédegbè jẹ whédegbè to afọnnu lẹ to osẹ gblamẹ. Ṣigba, be ojlẹ enẹ wẹ gbẹ́ yọ́n hugan nado mọ gbẹtọ lẹ to whégbè to lẹdo towe mẹ ya? Gbehosọnalitọ de dọ gando aigba-denamẹ etọn go dọmọ: “Gbẹtọ lẹ ma nọ saba tin to whégbè to afọnnu lẹ. Whèjai wẹ suhugan yetọn nọ tin to whégbè.” Kunnudide whèjai tọn sọgan hùn dotẹnmẹ dagbe dote na mí nado mọ gbẹtọ lẹ, titengbe sunnu lẹ, bo dekunnuna yé. Whétọ lẹ nọ saba voawu to whèjai lẹ bo nọ tindo ojlo nado dọho hẹ mí. Eyin e yọnbasi, mẹho agun tọn lẹ sọgan basi tito na opli sinsẹ̀nzọn kunnudegbe tọn do whèjai lẹ.
3. Nawẹ mí sọgan do wuntuntun hia to whenue mí to mahẹ tindo to kunnudide whèjai tọn mẹ gbọn?
3 Nọ Yí Wuntuntun Zan: Nujọnu wẹ e yin nado nọ yí wuntuntun zan to whenue hiẹ to mahẹ tindo to kunnudide whèjai tọn mẹ. Di apajlẹ, eyin hiẹ yì whétọ de dè to whenue alọnu etọn ján, e na yọ́n hugan nado dọna ẹn dọ emi na wá to whedevonu. Eyin ozán ko kú, nọte to fie whétọ lọ sọgan mọ we te, bo yawu dọ mẹhe a yin po lẹndai he wutu a basi dlapọn na ẹn po. Nuyọnẹnnu wẹ e sọ yin dọ omẹ awe-awe ni wazọ́n dopọ kavi dọ omẹ awe ni wazọ́n dopọ bọ mẹhe pò lẹ ma na dẹn do yé, podọ nado nọ wazọ́n to tòhomẹ-liho he ji miyọ́n lẹtliki tọn họ́n ganji te lẹ, fie mẹdevo lẹ sọgan mọ mì te. Ma basi dlapọn to whenue gbẹtọ lẹ to awuwle nado yì mlọnai blo, na ehe sọgan dotukla yé. (2 Kọl. 6:3) Eyin lẹdo de nọ tindo owù to zánmẹ, nọ dọyẹwheho to finẹ to whèjai lẹ kẹdẹ.—Howh. 22:3.
4. Ale tẹlẹ wẹ mí nọ mọyi to whenue mí tindo mahẹ to kunnudide whèjai tọn mẹ?
4 Ale He Mí Nọ Mọyi Lẹ: Lizọnyizọn lọ nọ yin ayajẹnu hugan eyin mí mọ gbẹtọ lẹ bo dekunnuna yé. Podọ lehe mí penugo nado dekunnu sọ, mọ wẹ dotẹnmẹ susu nọ hundote na mí nado gọalọna mẹdevo lẹ na yé nido “yin whinwhlẹngán bo wá oyọnẹn he pegan nugbo tọn kọ̀n” do niyẹn. (1 Tim. 2:3, 4) Be hiẹ sọgan vọ́ tito towe lẹ jlado nado nọ dekunnu to whèjai lẹ ya?