Linlinnamẹwe Mítọn lẹ Nọ Yin Awuwlena Nado Dọ̀n Mẹsusu
1. Nawẹ pipli afanumẹ nugbonọ podọ nuyọnẹntọ lọ tọn nọ hodọ apajlẹ apọsteli Paulu tọn gbọn?
1 Kẹdẹdile apọsteli Paulu nọ diọ aliho he mẹ e nọ ze wẹndagbe lọ donukọnnamẹ te nado sọgan duale “gbẹtọ wunmẹ lẹpo” tọn do, pipli afanumẹ nugbonọ podọ nuyọnẹntọ lọ tọn nọ yí linlinnamẹwe mítọn lẹ zan nado hẹn wẹndagbe lọ jẹ mẹhe tindo aṣa po nuyise voovo lẹ po dè. (1 Kọl. 9:22, 23) Nado sọgan yí Atọ̀họ̀-Nuhihọ́ lọ Tọn po Réveillez-vous! po zan ganji, mí dona nọ hẹn mẹhe linlinnamẹwe ehelẹ yin awuwlena lẹ do ayiha mẹ.
2. Mẹnu lẹ wutu wẹ Réveillez-vous! nọ yin awuwlena?
2 Réveillez-vous!: Linlinnamẹwe ehe nọ yin awuwlena na gbẹtọ he taidi mẹhe apọsteli Paulu dọyẹwheho na lẹ to whenue e to hodọna “omẹ Atẹni tọn lẹ.” (Owalọ 17:22) Omẹ enẹlẹ ma yin Klistiani, podọ yé ma tindo nukunnumọjẹnumẹ sọmọ gando Owe-wiwe lẹ go. Mọdopolọ, mẹhe Réveillez-vous! nọ yin awuwlena lẹ ma tindo oyọnẹn Biblu tọn sọmọ kavi ma tlẹ tindo depope. Yé sọgan nọma yọ́n nudepope gando nuplọnmẹ Klistiani tọn lẹ go, podọ yé sọgan ko jẹflumẹ gando sinsẹ̀n go, kavi yé sọgan nọma yọnẹn dọ Biblu yọ́n-na-yizan. Yanwle tintan Réveillez-vous! tọn wẹ nado hẹn mẹhe nọ hia ẹ lẹ kudeji dọ Jiwheyẹwhe nugbo de tin. Lẹndai linlinnamẹwe ehe tọn sọ wẹ nado hẹn wehiatọ lọ nado wleawuna yise to Biblu mẹ bo gọalọna ẹn nado yọnẹn dọ Kunnudetọ Jehovah tọn lẹ gbọnvo na sinsẹ̀n devo lẹ.
3. Mẹnu lẹ wẹ zinjẹgbonu Atọ̀họ̀-Nuhihọ́ lọ Tọn dopodopo nọ yin awuwlena?
3 Atọ̀họ̀-Nuhihọ́ lọ Tọn: Zinjẹgbonu gbonutọ lẹ tọn linlinnamẹwe ehe tọn nọ yin awuwlena na mẹhe tindo sisi jẹ obá de mẹ na Jiwheyẹwhe po Owe-wiwe po lẹ. Yé tindo oyọnẹn Biblu tọn vude, ṣigba yé ma mọnukunnujẹ nuplọnmẹ etọn lẹ mẹ ganji. Yé taidi gbẹtọgun he Paulu dlẹnalọdo taidi mẹhe “dibusi Jiwheyẹwhe” lẹ. (Owalọ 13:14-16) Zinjẹgbonu oplọn tọn Atọ̀họ̀-Nuhihọ́ lọ Tọn nọ yin awuwlena titengbe na Kunnudetọ Jehovah tọn lẹ. Paulu deji dọ mẹhe nọ hia wekanhlanmẹ etọn lẹ tindo oyọnẹn he pegan gando Owe-wiwe lẹ go. (1 Kọl. 1:1, 2) Mọdopolọ, hosọ he tin to zinjẹgbonu oplọn tọn mẹ lẹ nọ yin kinkan na mẹhe nọ yì opli mítọn lẹ bo jẹakọ hẹ hogbe po nuplọnmẹ Kunnudetọ lẹ tọn po.
4. Naegbọn mí dona nọ jẹakọ hẹ linlinnamẹwe he mí nọ yizan to kunnudegbe lẹ dopodopo?
4 Dile etlẹ yindọ linlinnamẹwe awe wẹ mí nọ ze donukọnnamẹ, dopo ji wẹ mí nọ saba dọhodo to nuzedonukọnnamẹ mítọn whenu. Enẹwutu, yí i do basi yanwle towe nado nọ jẹakọ hẹ zinjẹgbonu dopodopo. Ehe na zọ́n bọ hiẹ na penugo nado ze linlinnamẹwe he na dọ̀n ayidonugo mẹhe a dukosọ hẹ lẹ tọn donukọnna yé.