Nujijla de He Nọ Hẹn Ale Wá

Osẹ atọ̀n jẹnukọnna plidopọ agbegbe agun dopodopo tọn, wẹnlatọ lẹ na tindo mahẹ to nujijla de mẹ whladopo dogọ, nado basi oylọna jlodotọ he tin to aigba-denamẹ yetọn ji lẹ wá plidopọ lọ. Mí tindo whẹwhinwhẹ́n dagbe nado nọ tindo mahẹ to nujijla whemẹwhemẹ tọn ehe mẹ. To paa mẹ, hodidọ sinai do Biblu ji lẹ, lehe azọ́nwatẹn lẹ nọ yin tito-basina bosọ nọ yin nukunpedego gbọn mẹdezejotọ lẹ dali do gọna walọ dagbe po pọninọ he mí nọ dohia po nọ whàn mẹhe kẹalọyi oylọ-basinamẹwe lọ bo wá plidopọ agbegbe tọn lọ ji lẹ taun. (Ps. 110:3; 133:1; Isa. 65:13, 14) Ṣigba, be nujijla mítọn nọ hẹn ale wá, titengbe to lẹdo he mẹ jlodotọ lẹ dona zingbejizọnlin gaa whẹpo do wá plidopọ lọ te lẹ mẹ ya?

To plidopọ agbegbe 2011 tọn godo, wekantẹn alahọ tọn de mọ wekanhlanmẹ de yí sọn nawe he mọ oylọ-basinamẹwe de to ohọ̀n etọn ji de dè. E tindo aṣa lọ nado nọ họnbẹ eyin Kunnudetọ lẹ húhúhọ̀n na ẹn. E wlan dọmọ: “N’tindo owhé whanpẹnọ de podọ asu dagbe de, bo nọ lẹndọ n’ko tindo nulẹpo he na zọ́n bọ n’na do dó ayajẹ. Amọ́, e blawu dọ n’ma tindo ayajẹ lọ podọ gbẹzan ṣie ma tindo zẹẹmẹ nujọnu tọn depope. Enẹwutu, n’basi dide nado zingbejizọnlin na kilomẹtlu 320 nado yì dotoaina tito-to-whinnu Sibigbe tọn.” E duvivi plidopọ lọ tọn sọmọ bọ e tẹkan hlan asu etọn nado dọna ẹn dọ emi jlo na nọ jẹ wunkẹngbe nado sọgan duvivi tito-to-whinnu Sẹgbe tọn ga. E yidogọ dọmọ: “N’dotoaina hodidọ lọ lẹpo, n’dọhodopọ hẹ Kunnudetọ Jehovah tọn susu, podọ n’basi dide dọ plidopọ ehe ma na yin godo tọn he n’na wá.” To whenue e lẹkọyi whégbè godo, e jẹ nuplọn ji podọ to osun ẹnẹ godo, e lẹzun wẹnlatọ he ma yí baptẹm. “Homẹ ṣie hùn taun dọ n’mọ oylọ-basinamẹwe enẹ to ohọ̀n ṣie ji, na todin gbẹzan ṣie tindo zẹẹmẹ nujọnu tọn!”

Todido tin dọ delẹ to mẹhe mọ oylọ-basinamẹwe de yí lẹ mẹ na wá plidopọ lọ. Enẹwutu, yí zohunhun do tindo mahẹ to nujijla titengbe ehe mẹ. To whenue a ja plidopọ lọ, hẹn oylọ-basinamẹwe he pò na we lẹ wá, bo yí yé zan nado basi oylọna mẹhe tin to lẹdo plidopọ lọ tọn mẹ lẹ.

[Yẹdide to weda 5]

Nawẹ Mí Na Ze Oylọ-Basinamẹwe lọ Donukọnnamẹ Gbọn?

Nado sọgan má oylọ-basinamẹwe lọ lẹ gbọn aigba-denamẹ mítọn pete ji, mí dona nọ glido. Mí sọgan dọ nude taidi: “Mì fọ́n dagbe ya? Mí to oylọ-basinamẹwe ehe má lẹdo aihọn pé. Mìtọn die. Mì na mọ nudọnamẹ gigọ́ lẹ to e ji.” Dọho po zohunhun po. To whenue mí to mahẹ tindo to nujijla lọ mẹ to sẹfifo lẹ, mí sọ dona ze linlinnamẹwe lẹ donukọnnamẹ sọgbe hẹ ninọmẹ lẹ.